Қирғизистондан олиб келинган катта миқдордаги “Регапен” дорилари билан боғлиқ икки ҳолат фош этилди

Наманган ва Фарғона вилоятларида кучли таъсир қилувчи дори воситалари ноқонуний айланмасига чек қўйилди.

🔹 Наманганда 1985 йилда туғилган шахс қирғизистонлик таниши билан келишиб, 16 755 дона “Регапен” дори воситасини олиб келган. Ушбу воситаларни олиб кетаётган куръер тезкор тадбир вақтида ушланган ва буюртмачи ҳам қўлга олинган.

🔹 Фарғонада эса 1980 йилда туғилган шахснинг автомашинасида 11 200 дона “Регапен” топилди. Терговда ушбу дорилар ҳам Қирғизистондан айланма йўллар орқали киритилгани аниқланди.

Ҳар икки ҳолат бўйича Жиноят кодексининг тегишли моддалари асосида жиноят иши қўзғатилди ва айбланувчилар қамоққа олинди.

Telegram I Facebook I YouTube I Instagram

Мирзиёев октябрда Брюсселда ЕИ билан битим имзолашда иштирок этади

Европа кенгаши президенти Антониу Кошта Ўзбекистон Президенти Шавкат Мирзиёевни Мустақиллик байрами билан табриклаб, Брюсселда бўлиб ўтадиган учрашув ҳақида маълум қилди.

“Сиз билан 2025 йил 24 октябрь куни Брюсселда бўлиб ўтадиган учрашувни интиқлик билан кутаман, у ерда Европа Иттифоқи ва Ўзбекистон ўртасида Кенгайтирилган шериклик ва ҳамкорлик тўғрисидаги битимнинг имзоланиши муносабати билан фикр алмашишни давом эттириш имконига эга бўламиз”,

– деди Кошта.

У, шунингдек, ЕИ ва Ўзбекистон ўртасидаги дўстона муносабатларни алоҳида эътироф этаркан, жорий йил апрелида Самарқандда ўтган “Европа Иттифоқи – Марказий Осиё” биринчи саммитини ҳам ёдга олди.

Telegram I Facebook I YouTube I Instagram

“Табиат уйғунлиги ҳимоячиси” танлови ғолибларининг фарзандлари учун контракт тўлови давлат томонидан қопланади

Санитар тозалаш ва ободонлаштириш соҳасида камида 10 йил меҳнат қилган ходимлар орасида “Табиат уйғунлиги ҳимоячиси” танлови ўтказилади.

Унга кўра, ғолиб бўлган ходимларнинг давлат олий таълим муассасаларига ўқишга кирган фарзандлари ёки набираларининг контракт тўлови давлат ҳисобидан қоплаб берилади.

Танлов 2025 йил 1 сентябрдан старт олади ва ғолиблар 8 декабрь куни эълон қилинади.

Аризалар 30 сентябр, соат 17:00га қадар info@sanitation.uz электрон манзили ёки ҳудудий бошқармалар орқали қабул қилинади.

Telegram I Facebook I YouTube I Instagram

Нотариал хизматларда онлайн ва “face-id” тизими жорий этилади

Президент Шавкат Мирзиёев адлия тизимида давлат хизматларини ривожлантириш ва рақамлаштириш масалалари билан танишди. Ҳозирда нотариуслар 80 дан ортиқ хизмат турларини тақдим этаётган бўлса-да, онлайн хизматлар улуши фақат 11 фоизни ташкил қилади.

Давлат раҳбари рақамлаштириш орқали фуқаролар учун қулайликлар яратиш муҳимлигини таъкидлаб, 2025-2027 йилларда босқичма-босқич 20 та нотариал ҳаракатни онлайн тартибда расмийлаштириш режалаштирилганини маълум қилди.

Шунингдек, нотариал хизматларда шахсни тасдиқловчи ҳужжатнинг асли талаб қилинмайди ва уни “face-id” орқали аниқлаш тартиби жорий этилади.

Telegram I Facebook I YouTube I Instagram

Японияда бир ўқувчи учун бутун бошли электропоезд, Ўзбекистонда эса мактабга бормасликка мажбур болалар...

Японияда мактабдан юзлаб километр узоқликдаги ягона мактаб ўқувчиси учун бутун электропоезд қатнагани ҳақида эшитганмисиз? Биргина ўқувчи учун «электричка» 9–12 йил давомида 100 км қўшимча йўл босган.

Ўзбекистонда эса таълим ва ўқувчиларга муносабатни Самарқанд вилоятидаги ҳолат мисолида кўришимиз мумкин, автобус шофёри ўқувчилардан бориш ва қайтиш учун алоҳида тўлов талаб қилгани сабабли болалар мактабга бормай, уйга қайтишга мажбур бўлган. Бу ҳолат мамлакатда таълимга ва инсон қадрига етарли эътибор қаратилмаётганини кўрсатади.

Telegram I Facebook I YouTube I Instagram

Самарқанд вилояти Пахтачи туманидаги ҳолат бўйича муносабат билдирилган

Самарқанд вилояти ҳокимлиги юқоридаги вазият юзасидан муносабат билдириб, автобус хусусий тадбиркорга тегишли эканлиги ва ҳайдовчи лавозимидан бўшатилганини маълум қилган.

Шу куннинг иккинчи ярмида ўқувчилар учун текин автобус қатнови йўлга қўйилган, аммо бу транспорт кимнинг ҳисобидан ташкил этилгани очиқланмаган.

Давлатнинг айби учун хусусий корхона автобуси ҳайдовчисининг ишдан бўшатилгани эса яна бир қатор саволларни туғдиради...

Telegram I Facebook I YouTube I Instagram

Пойтахт ва вилоятларда пора таклиф қилган шахсларнинг ноқонуний ҳаракатларига чек қўйилди

Ички ишлар вазирлиги ва ҳудудий бўлинмалари томонидан Тошкент шаҳри, Фарғона ва Сурхондарё вилоятларида ходимларга пора таклиф қилган шахсларнинг ноқонуний ҳаракатларига барҳам берилди.

🔹 Тошкентда ЙПХ гуруҳ командирига 500 АҚШ долларини пора сифатида таклиф қилган «Onix» ҳайдовчиси қўлга олинди.

🔹 Фарғона вилоятининг Қува ва Боғдод туманларида профилактика инспекторига 1000, ЙПХ инспекторига 800 АҚШ долларини таклиф қилган шахслар ушланган.

🔹 Сурхондарёда маст ҳолда руль бошқарувига кирган фуқарога маъмурий чора қўлланиб, у ЙПХ инспекторига 3 млн сўмни пора сифатида бераётган вақтда қўлга олинди.

Telegram I Facebook I YouTube I Instagram

Қайси соҳаларда коррупция хавфи юқори экани маълум қилинди

Мамлакатда боғча, мактаб, соғлиқни сақлаш, банк ва бандлик тизими ходимлари орасида коррупцион жиноятлар содир этиш ҳолатлари юқори экани маълум қилинди. Бу ҳақда 5 сентябрь куни бўлиб ўтган Сенат мажлисида ахборот берилди.

Антикоррупция агентлиги 2024 йилда республика судлари кўриб чиққан ишлар таҳлилини тақдим этди. Таҳлилга кўра, Андижон, Тошкент, Наманган ва Сирдарё вилоятларида коррупция оқибатида давлат манфаатига энг катта зарар етказилган. Шу билан бирга, Андижон, Наманган, Тошкент, Қашқадарё ва Самарқандда коррупцияга оид жиноятлар сони ортиб борган.

Ўтган йили Адлия вазирлиги томонидан кўрилган 2 мингдан ортиқ норматив-ҳуқуқий ҳужжат лойиҳаларидан 222 тасида (11%) 337 та коррупциявий омил аниқланган. Энг кўп коррупциявий хавф эса Иқтисодиёт ва молия, Экология, Қишлоқ хўжалиги ҳамда Олий таълим вазирликлари ҳужжатларида кўзга ташланган.

Сенат хабарларига кўра, коррупцияга қарши экспертиза олинмаган лойиҳаларнинг кўпчилиги Инвестициялар, саноат ва савдо (олтита), Энергетика, Қишлоқ хўжалиги ва Ташқи ишлар (бештадан) вазирликларига тўғри келади.

Шунингдек, судланган шахслар асосан боғча, мактаб, соғлиқни сақлаш, банк ва бандлик тизими ходимларидан иборат бўлган.

Telegram I Facebook I YouTube I Instagram

❗️«900 минга яқин иш ўрни ҳисоботга қўшиб ёзилган, 160 минг фуқарога ўтказилмаган скрининг ҳисоботга киритилган» — Ниғматилла Йўлдошев

Бош прокурор Ниғматилла Йўлдошевнинг маълум қилишича, 2024 йилда аслида яратилмаган 900 минга яқин иш ўрни ҳисоботларда кўрсатилган.

Давлат ҳисоботларида бу каби сохта маълумотлар ичида 12 млрд сўмлик иш ҳақи талон-торож қилингани ҳам аниқланган.

Бош прокурор Ниғматилла Йўлдошев таъкидлашича, 2024 йилда қандли диабет ва саратонни аниқлаш бўйича скрининг текширувлари ўтказилмаган 160 минг фуқаро ҳисоботларга қўшиб ёзилган.

Унинг сўзларига кўра, кўрилган чоралар натижасида 13 минг 600 фуқаро скринингдан ўтказилиб, 936 беморда касаллик аниқланган ва улarga ногиронлик белгилаган.

Ҳолатлар юзасидан тегишли қонуний чоралар кўрилгани маълум қилинди.

Telegram I Facebook I YouTube I Instagram

❗️Талабалари энг кўп жиноят қилаётган университетлар номи айтилди

Олий Мажлис Сенатида маълум қилинганидек, талабалар томонидан содир этилаётган жиноятларнинг катта қисми қуйидаги олий таълим муассасаларига тўғри келмоқда:
➖ Тошкент давлат транспорт университети;
➖ Ўзбекистон миллий университети;
➖ Тошкент давлат техника университети;
➖ Тошкент ахборот технологиялари университети;
➖ Тошкент давлат иқтисодиёт университети.

Telegram I Facebook I YouTube I Instagram

Алкоголизмни даволовчи янги дори воситаси патентланди

Адлия вазирлиги маълумотига кўра, “Сурункали алкоголизмни даволовчи восита” IAP 8081-сонли давлат рўйхатидан ўтказилди ва ҳуқуқий муҳофазага олинди.

Янги препарат тиббиёт соҳасида, айниқса, фармакология ва наркология йўналишида, алкоголизмни даволашда қўлланилиши мумкин.

Ихтиро I ва II босқичдаги алкоголизмни даволаш ҳамда касалликнинг қайта такрорланишини олдини олишга қаратилган.

“Ихтирони давлат рўйхатидан ўтказиш ва патент олиш унинг ривожланиши ҳамда ҳуқуқий муҳофазаси учун муҳим қадамдир”, — дейилади вазирлик ахборотида.

Telegram I Facebook I YouTube I Instagram

Ўзбекистонда шахсий исм ёки рақамдан иборат давлат рақамини расмийлаштириш мумкин бўлади

Вазирлар Маҳкамаси қарорига кўра, 2026 йил 1 январдан бошлаб «Узавтомотобелги» давлат унитар корхонасига транспорт воситалари учун «ноёб» давлат рақами белгиларини бериш ваколати берилди.

Бу рақамлар олтитагача ҳарф ва ёки рақамлардан ташкил топиши мумкин бўлиб, улар фақат очиқ ким ошди электрон савдолари орқали тақдим этилади.

Шу билан бирга, «ноёб» рақамлар амалдаги рақамлар билан такрорланмаслиги, қонунчилик ва ахлоқий нормаларга зид маъно касб этмаслиги шарт қилиб белгиланган.

Telegram I Facebook I YouTube I Instagram

Қишлоқ хўжалигида ҚҚСни ҳисоблашнинг соддалаштирилган тартиби жорий этилади

“Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида”ги президент фармони (ПФ–153-сон, 04.09.2025 й.) қабул қилинди.

2026–2027 йилларда қишлоқ хўжалиги соҳасида расмий товар айланмасини камида 3 баравар ошириш Фармонни қабул қилишдан кўзланган асосий мақсад этиб белгиланди.

Фармонга кўра, 2026 йил 1 январдан:

🔹 қишлоқ хўжалиги товар ишлаб чиқарувчилари томонидан етиштирилган қишлоқ хўжалиги маҳсулотлари реализацияси учун ҚҚСнинг “ноль” ставкаси жорий қилинади;

🔹 қишлоқ хўжалиги товар ишлаб чиқарувчиларига ҚҚС суммаси ўрнини қоплаш (қайтариш) 3 кунда автоматлаштирилган тарзда амалга оширилади.

Бундан ташқари, 2026 йил 1 январдан ишлаб чиқилган товарларни айнан 1 та етказиб бериш занжири бўйича ҚҚС суммасини ҳисобга олишда электрон ҳисобварақ-фактураларни хавф даражасига қараб реал вақт режимида автоматлаштирилган тарзда таҳлил қилиш тизими жорий қилинади.

Бунда юқори хавф даражасига эга электрон ҳисобварақ-фактураларнинг улуши ҳисобот даврида расмийлаштирилган жами электрон ҳисобварақ-фактуралар сонининг 10 фоизидан ошмаслиги назарда тутилди.

Telegram I Facebook I YouTube I Instagram

Янги уй харидидан олдин QR-код орқали маълумотни текшириш мумкин

Янги қурилаётган кўп қаватли уй харид қилишдан аввал фуқароларни қонунийлик ва ишончлилик масалалари қизиқтиради. Энди бу саволларга “Шаффоф қурилиш” миллий ахборот тизими орқали жавоб топиш мумкин.

Объект ҳудудига ёпиштирилган QR-кодни сканер қилиш орқали харидорлар уй ҳақидаги муҳим маълумотларни кўриши мумкин. Жумладан, объект номи, буюртмачи, лойиҳачи, қурувчи ва унинг рейтинги, фойдаланишга топширилиш санаси, шаҳарсозлик ҳужжатлари ҳамда бошқа маълумотлар очиқ тарзда тақдим этилади.

Бу хизмат уй харидорлари учун шаффофлик ва ишончни таъминлашга қаратилган.

Telegram I Facebook I YouTube I Instagram

Соғлиқни сақлаш вазирлигида янги тайинловлар амалга оширилди

🔹Аброржон Алижанов Соғлиқни сақлаш вазирлигининг Тиббий ёрдамни ташкил этиш департаменти бошлиғи этиб тайинланди.

🔹Умиджан Эралиев Соғлиқни сақлаш вазирлигининг Оналик ва болаликни муҳофаза қилиш бошқармаси бошлиғи лавозимига тайинланди.

🔹Даврон Султанов Соғлиқни сақлаш вазирлигининг Назорат инспекцияси бўлими бошлиғи лавозимига тайинланди.

Telegram I Facebook I YouTube I Instagram

Давлат хизматлари янада соддалаштирилади

Президент Шавкат Мирзиёев раҳбарлигида ўтказилган йиғилишда аҳолига давлат хизматларини кўпайтириш ва улардан фойдаланишни енгиллаштириш масалалари муҳокама қилинди.

Яқин уч йилда давлат хизматлари сони 900 тага етказилиши режалаштирилган. Ҳар йили камида 80 та хизмат “3 қадам” тамойили асосида соддалаштирилади. Шу билан бирга, аҳоли кўп жойлашган ҳудудлар ва олис маҳаллаларда 1 100 та интерактив киоск ўрнатилади.

Фуқаролардан талаб этиладиган 30 турдаги ҳужжат бекор қилинади. Масалан, никоҳланувчи шахсларнинг тиббий кўрик натижалари ёки ҳарбий хизматга мажбур шахсларнинг турар жойи ўзгариши ҳақидаги маълумотлар эндиликда ахборот тизимлари орқали автоматик тарзда олинади.

Яъни, келгусида аҳоли давлат хизматларидан тез, қулай ва ортиқча ҳужжатсиз фойдаланиш имкониятига эга бўлади.

Telegram I Facebook I YouTube I Instagram

Конимех бозорида нарх-наво ва тадбиркорлар муаммолари ўрганилди

Навоий вилояти Конимех тумани ҳокими Руслан Рўзиев ҳамда департаментнинг Конимех тумани бўлими бошлиғи Руфат Баҳронов туман марказидаги бозорда нарх-наволар ҳолати, тадбиркорларнинг муаммо ва таклифларини ўрганди.

Бозорда нархларни барқарорлаштириш, аҳолига сифатли маҳсулот етказиб бериш, рақамлаштириш жараёнларини жадаллаштириш ҳамда коррупцияга қарши курашиш бўйича амалга оширилаётган ишлар билан танишилиб, мутасаддиларга тегишли топшириқ ва кўрсатмалар берилди.

Telegram I Facebook I YouTube I Instagram

Автомототранспортлар учун давлат рақами бериш тартиби соддалаштирилади

“Автомототранспорт воситалари учун рўйхатдан ўтказиш давлат рақами белгиларини бериш тартибини соддалаштириш чора-тадбирлари тўғрисида”ги Ҳукумат қарори (562-сон, 04.09.2025 й.) қабул қилинди.

Қарорга кўра, 2026 йил 1 январдан қуйидагилар бекор қилинади:

🔸 автотранспортлар учун рўйхатдан ўтказиш давлат рақами белгиларини оширилган тўлов ставкалари бўйича беришда “Ўзбекистон республика товар-хомашё биржаси” АЖ ахборот тизимида аукцион ўтказиш тартиби;

🔸 автотранспортлар учун харидоргир ҳарф ва рақамлар комбинациясига эга бўлган давлат рақами белгиларини оширилган тўлов ставкалари бўйича бериш тартиби.

2026 йил 1 январдан автомототранспортлар учун исталган ҳарф ва рақамлар комбинациясига эга бўлган давлат рақами белгилари ягона оширилган тўлов эвазига шахсларнинг электрон мурожаатига асосан берилади.

Шахслар ягона очиқ маълумотлар базасида бўш турган исталган ҳарф ва рақамлар комбинациясига эга бўлган давлат рақами белгиларини қуйидаги тизимлар орқали танлаб олади:

🔹 рўйхатдан ўтказиш бўлинмаларида жойлашган инфокиосклар;

🔹 Йўл ҳаракати хавфсизлиги хизматининг (ЙҲХХ) мобил иловаси;

🔹 ЙҲХХнинг расмий веб-сайти;

🔹 ЯИДХП (my.gov.uz).

Шунингдек, 2026 йил 1 январдан ягона очиқ маълумотлар базасида ҳудудларнинг код рақами доирасида барча тоифадаги давлат рақами белгилари (олдин берилган ёки фойдаланишда бўлганлардан ташқари) жойлаштирилади.

Telegram I Facebook I YouTube I Instagram

Ўзбекистон Афғонистонга 300 тонна инсонпарварлик ёрдами юборди

Президент Шавкат Мирзиёевнинг топшириғига асосан, кучли зилзиладан жабрланган Афғонистон аҳолиси учун навбатдаги инсонпарварлик ёрдами йўлланди. Бу ҳақда Сурхондарё вилояти ҳокимлиги маълум қилди.

Ёрдам сифатида озиқ-овқат маҳсулотлари, дори-дармон ва тиббий анжомлардан иборат қарийб 300 тонна юк Ўзбекистон халқи номидан Балх вилоятига етказилди.

Ҳайратон шаҳридаги «Астрас» компанияси майдонида ёрдамни топшириш маросими ўтказилди. Унда Ўзбекистон президентининг Афғонистон бўйича махсус вакили Исматилла Эргашев, Сурхондарё вилояти ҳокими Улуғбек Қосимов, Балх вилояти губернаторининг ўринбосари Нурулҳоди Абуидрис ҳамда икки мамлакат расмийлари иштирок этди.

Юк таркибидан ун, гуруч, шакар, тушёнка, макарон ва қандолат маҳсулотлари, ёғ, тайёр таомлар, қизил ловия ва мош, қадоқланган ичимлик суви, 5 мингта ёпинғич ҳамда 10 тоннадан зиёд дори воситалари ва тиббий жиҳозлар ўрин олган.

Маълумот учун, 1 сентябрга ўтар кечаси Афғонистон шарқида содир бўлган кучли зилзила 800 нафардан ортиқ инсоннинг ҳалок бўлишига сабаб бўлган. Қутқарув ишлари давомида қурбонлар сони 3 мингга яқинлашгани аниқланди.

Telegram I Facebook I YouTube I Instagram

Ухламай машина ҳайдаганлар ва қоидабузар мансабдорларга катта жарима қўлланади

Ўзбекистон Сенати йўловчи ва юк ташиш хавфсизлигини таъминлашга қаратилган янги қонунни маъқуллади.

Ҳужжатга кўра, халқаро ва шаҳарлараро йўналишларда ҳайдовчилар меҳнат ва дам олиш тартибини бузган тақдирда, уларга базавий ҳисоблаш миқдорининг 7 баравари (ҳозирда 2 млн 884 минг сўм) миқдорида жарима солинади. Бу талаб ухламасдан руилга ўтирган ҳайдовчиларга ҳам тааллуқли.

Шунингдек, темирйўл ва метрополитенда ҳаракат хавфсизлиги қоидаларини бузганлик, йўловчи ва юк ташиш тартибини таъминламаганлик учун ҳам маъмурий жавобгарлик кучайтирилди. Эндиликда мансабдор шахсларга базавий ҳисоблаш миқдорининг 10 баравари (4 млн 120 минг сўм) миқдорида жарима белгиланди.

Статистик маълумотларга кўра, 2024 йилда мамлакат бўйлаб автомобил транспорти орқали 8 миллиарддан зиёд йўловчи ташилган. Шу даврда темирйўл орқали 102,7 млн тонна юк ва 10 млн йўловчи, метрополитенда эса 270 млн йўловчи хизматлардан фойдаланган.

Бироқ транспорт соҳасида жиддий қонунбузарликлар кузатилмоқда. Масалан, 2024 йилда темирйўл ва метро тизимида хавфсизлик талаблари бузилиши билан боғлиқ 130 та ҳолат қайд этилди, натижада қарийб 4 млрд сўм зарар келтирилди. Шунингдек, автомобил йўлларидаги темирйўл кесишмаларида 38 та йўл-транспорт ҳодисаси содир бўлиб, 11 киши ҳалок бўлди.

Сенаторлар томонидан маъқулланган мазкур қонун ташиш жараёнларининг хавфсизлиги, сифатлилиги ва барқарорлигини таъминлашга қаратилган.

Telegram I Facebook I YouTube I Instagram

FIFA президенти Жанни Инфантино юртимизга ташриф буюради

Бу ҳақда Ўзбекистон футбол ассоциацияси ахборот хизмати хабар берди.

Ташриф доирасида у Ўзбекистонда футболни янада ривожлантиришга оид лойиҳаларни муҳокама қилади, Миллий футбол маркази билан танишади ҳамда “CAFA Nations Cup 2025” мусобақасининг финал учрашувини стадиондан томоша қилади.

Telegram I Facebook I YouTube I Instagram