Навоий ва Учқудуқ ўртасида янги шаҳарлараро поезд қатнови йўлга қўйилди

Жорий йилнинг 5 сентябридан бошлаб «Навоий–Учқудуқ–Навоий» йўналишида янги шаҳарлараро поезд қатнови йўлга қўйилди. Бу ҳақда «Ўзтемирйўловчи» АЖ матбуот хизмати хабар берди.

Поездлар ҳар душанба ва жума кунлари қуйидаги жадвал асосида ҳаракат қилади:

№6462 «Навоий–Учқудуқ»: Навоийдан 05:38да йўлга чиқиб, Учқудуқга 09:02да етади.

№6464 «Навоий–Учқудуқ»: Навоийдан 09:04да йўлга чиқиб, Учқудуқга 11:55да етади.

№6461 «Учқудуқ–Навоий»: Учқудуқдан 18:52да йўлга чиқиб, Навоийга 22:18да етади.

№6463 «Учқудуқ–Навоий»: Учқудуқдан 15:59да йўлга чиқиб, Навоийга 18:50да етади.

Янги қатнов йўловчилар учун қулайлик яратади ва икки шаҳар орасидаги транспорт алоқасини янада осонлаштиради.

Telegram I Facebook I YouTube I Instagram

Навоийлик мактаб битирувчилари ўқишга кириш бўйича рекорд натижа қайд этди

Ўқишга кириш кўрсаткичи бўйича энг юқори натижани қайд этган вилоятлар эълон қилинди. Бу рўйхатда 1-ўринни доимгидек Навоий вилояти эгаллаб турибди.

Ушбу натижага таълим муассасалари сифатини ошириш, педагогларнинг малакалилиги ва ўқув жараёнида замонавий методлардан самарали фойдаланиш сабаб бўлган.

Шунингдек, вилоятда талабаларни ҳар томонлама қўллаб-қувватлаш ва тайёрлов марказлари фаолияти ҳам ўқишга кириш кўрсаткичларини яхшилашда муҳим аҳамият касб этган.

Telegram I Facebook I YouTube I Instagram

Ўзбекистонда дам олиш кунлари ҳаво +37 даражагача иссиқ бўлади

Ўзгидромет хабар беришича, шанба ва якшанба кунлари Ўзбекистон ҳудудида асосан кам булутли ва иссиқ об-ҳаво сақланиб туради. Кундузи ҳаво ҳарорати +30...+35 даражага кўтарилади, айрим жойларда эса +37 даражагача исситиш эҳтимоли бор. Кечаси ва эрталаб ҳарорат +17...+22 даража атрофида бўлади.

Шу йилнинг 5-6 сентябр кунлари республикада айрим ҳудудларда шамол 13-18 м/с гача кучайиши ва чанг-тўзонлар кузатилиши мумкин.

Тошкентда ҳаво кам булутли бўлади, шамол шарқдан 3-6 м/с тезликда эсади ва 5 сентябрда айрим жойларда 8-10 м/с гача кучайиши мумкин. Ҳарорат 5 сентябрда +35...+37 даража, 6-7 сентябрда +33...+35 даража, кечалари +18...+20 даража бўлиши кутилмоқда.

Telegram I Facebook I YouTube I Instagram

2025 йилда абитуриентларнинг 41,29% ўтиш баллини тўплай олмади

Ҳуқуқшунос Хушнудбек Худойбердиевнинг маълум қилишича, 2025 йилда 614 768 нафар абитуриент тестга кирди, бу ўтган йилга нисбатан 122 мингга кам.

Абитуриентларнинг 253 844 нафари, яъни 41,29 фоизи, минимал ўтиш балли — 56,7 баллни ҳам тўплай олмади. Максимал баллнинг 30 фоизини ҳам ола олмаганлар ҳам шу қаторида. 56,7 баллдан юқори тўплаганлар сони эса 360 924 нафарни, яъни 58,71 фоизни ташкил қилди.

Бу кўрсаткич ўтган йилга нисбатан 6 фоизга яхшиланган. 2024 йилда ўтмай қолган абитуриентлар улуши 46,9 фоизни ташкил қилган эди.

Энг ёмон натижа Андижон вилоятида қайд этилди (56,7 баллдан паст улуши 47,6%), нисбатан яхши натижа Тошкент шаҳри ва Бухоро вилоятида қайд қилинди (31,4%). Жорий йилда барча ҳудудларда 50 фоиздан кўпроқ абитуриент 56,7 баллдан паст тўплаган ҳодисалар сони камайган.

Telegram I Facebook I YouTube I Instagram

Тошкентда ичимлик суви таъминоти режали ўчирилади

Куз-қиш мавсумига тайёргарлик доирасида йирик сув узатиш тармоқларида режали профилактика ва таъмирлаш ишлари олиб борилиши муносабати билан, 8 сентябрдан 10 октябрга қадар ичимлик суви босими пасайиши ва вақтинча узилиши мумкин.

👉 Батафсил рўйхат

Telegram I Facebook I YouTube I Instagram

Ўзбекистон болалар хавфсизлиги йўлида глобал ташаббусга қўшилди

Ўзбекистон болаларга нисбатан зўравонликка барҳам беришга қаратилган халқаро ташаббус — глобал альянсга қўшилган 46-давлат сифатида эътироф этилди. Бу ҳақда UNICEFнинг Ўзбекистондаги ваколатхонаси маълум қилди.

Айтилишича, мамлакатнинг альянсга қўшилиши болалар ҳуқуқларини ҳимоя қилиш соҳасида амалга оширилаётган ислоҳотлар билан узвий боғлиқ. Жорий йил май ойида қабул қилинган “Болаларни зўравонликнинг барча шаклларидан ҳимоя қилиш тўғрисида”ги қонун ҳамда ҳозирда ишлаб чиқилаётган соҳаларлараро стратегия ва ҳаракатлар режаси бунинг ёрқин намунасидир.

"Бу болаларни ҳимоя қилиш йўлидаги муҳим қадамдир. Ўзбекистонда қабул қилинган қонун ва амалга оширилаётган ислоҳотлар ҳар бир бола учун хавфсиз муҳит яратишга хизмат қилади. Биз ҳукумат билан ҳамкорликда уйда, мактабда ва жамиятда болаларнинг соғлом ва хавфсиз улғайиши учун қўллаб-қувватловчи муҳитни таъминлаш йўлида ҳаракат қилишдан фахрланамиз",

дейилади UNICEF хабарида.

Шу тариқа, Ўзбекистон глобал майдонда болалар ҳуқуқлари ва хавфсизлигини таъминлаш бўйича ўз мажбуриятларини янада мустаҳкамлади.

Telegram I Facebook I YouTube I Instagram

Чет элда содир этилган жиноят учун Ўзбекистонда жавобгарликка тортиладими?

Ўзбекистон фуқаролари хорижда жиноят содир этган тақдирда, уларга нисбатан мамлакатимиз қонунчилиги ҳам қўлланилиши мумкин. Жиноят кодексининг 11-моддасига кўра, қилмишнинг бир қисми ёки оқибати Ўзбекистон ҳудудида юз берса, шунингдек, Ўзбекистон байроғи остидаги самолёт ёки кемада содир этилса, у Ўзбекистон ҳудудида содир этилган деб топилади.

12-моддага асосан, агар фуқаро ёки Ўзбекистонда доимий яшовчи шахс чет элда жиноят қилиб, ўша давлат суди томонидан жазоланмаган бўлса, Ўзбекистон қонунчилиги бўйича жавобгарликка тортилиши мумкин. Бироқ, уларни бошқа давлатга топширишга йўл қўйилмайди, фақат халқаро шартномаларда бошқача ҳол назарда тутилган бўлмаса.

Шу тариқа, фуқаро чет элда жиноят қилиб жазодан қутулса, Ўзбекистонда унга нисбатан жиноий жавобгарлик белгиланиши мумкин.

Telegram I Facebook I YouTube I Instagram

Олий суд раисига биринчи ўринбосар сайланди

Ўзбекистон Республикаси Президентининг тақдимномаси ва Олий Мажлис Сенатининг тегишли қарорига асосан Усманов Алишер Атаханович беш йил муддатга Олий суд раисининг биринчи ўринбосари - судлов ҳайъати раиси лавозимига сайланди.

Шунингдек, Икрам Муслимов Ўзбекистон Республикаси Олий суди раисининг ўринбосари – судлов ҳайъати раиси лавозимидан, Нодира Хакимова Ўзбекистон Республикаси Олий судининг судьяси лавозимидан озод этилди.

Telegram I Facebook I YouTube I Instagram

Ўзбекистон терма жамоаси Уругвайга қарши ўртоқлик ўйини ўтказади

Ўзбекистон миллий терма жамоаси Жаҳон чемпионатига тайёргарлик жараёнида навбатдаги ўртоқлик учрашувини ўтказиши белгиланди.

Ўзбекистон футбол ассоциацияси хабарига кўра, жамоа 13 октябр куни Малайзия пойтахти Куала-Лумпурда Жаҳон чемпионатларида доимий қатнашиб келаётган Уругвай терма жамоасига қарши майдонга тушади.

Охирги йилларда миллий жамоа кучли рақиблар билан ўйин ўтказиш орқали тажриба тўплаш ва асосий таркибни шакллантиришни мақсад қилиб келмоқда. Уругвайга қарши баҳс ҳам шу режанинг бир бўлагидир.

Эслатиб ўтамиз, бу икки жамоа аввал икки марта ўзаро тўқнашган:

2018 йилда Монтовидеода ўтган беллашувда мезбонлар 3:0 ҳисобида ғалаба қозонган, Ўзбекистонни эса вақтинчалик бош мураббий Тимур Кападзе бошқарган эди.

2019 йилда Хитойда «China Cup» турнирида ҳам уругвайликлар 3:0 ҳисобида устун келган.

Келгуси баҳс миллий жамоа учун жаҳон даражасидаги рақибга қарши ўз имкониятларини синовдан ўтказиш ва тажриба орттириш имкониятини бериши кутилмоқда.

Шунингдек, португалиялик мураббий Паулу Бенту жамоа 2026 йилги Жаҳон чемпионатига йўлланма олганига қарамай, терма жамоани бошқаришдан воз кечгани ҳақида аввал хабар қилинган эди.

Telegram I Facebook I YouTube I Instagram

ХДП фракцияси Бухородаги ҳалокатли ҳодисани парламент муҳокамасига олиб чиқмоқчи

Бухорода беш ишчининг қурилиш пайтида ҳалок бўлиши Халқ демократик партияси фракцияси эътиборини тортди. Фракция вакиллари бу ҳолатни фақат маҳаллий воқеа эмас, балки бутун тизимдаги муаммоларнинг ифодаси сифатида баҳоламоқда

Депутатлар таъкидлашича, мамлакатда норасмий ишлаётган фуқаролар сони кўп, улар ҳуқуқий ҳимоядан маҳрум ва меҳнат муҳофазаси кўп ҳолларда фақат қоғозда қолмоқда. Масъул вазирликнинг назорати ва масъулияти етарли эмаслиги қайд этилди.

Ҳодиса қурбонларининг оиласи билан боғлиқ саволлар ҳам очиқча турибди: ишчи меҳнати расмийлаштирилганми, яқинларига ёрдам ва компенсация бериладими?

ХДП фикрича, нафақат қурилиш, балки бошқа соҳаларда ҳам ишчиларни норасмий меҳнатга мажбур қилаётган ҳолатларга барҳам бериш зарур. Шу боис партия масалани парламент муҳокамасига олиб чиқиш ниятида.

Telegram I Facebook I YouTube I Instagram

Сергелида кўп қаватли уйнинг таянч конструкцияларини бузган мулкдорларга жарима қўлланди

Қурилиш ва уй-жой коммунал хўжалиги соҳасида назорат қилиш инспекцияси томонидан ўтказилган рейд давомида Тошкент шаҳри Сергели тумани Жунариқ маҳалласидан қонунбузарлик ҳолатлари аниқланди.

Бир ҳолатда уй мулкдори ертўла қисмини ўзбошимчалик билан ковлаб, асосий таянч деворни бузиб эшик очгани маълум бўлди. Яна бир ҳолатда эса хонадон эгаси биринчи қават плиталари ва бетон конструкцияларини бузиб, ертўлага йўл очгани қайд этилди.

Ҳуқуқбузарликлар бўйича икки мулкдорга Маъмурий жавобгарлик тўғрисидаги кодекснинг 159-моддаси асосида БҲМнинг 50 баробари миқдорида жарима қўлланди. Шунингдек, ҳолатни асл ҳолатига келтириш учун 7 кунлик кўрсатма берилиб, унинг ижроси назоратга олинди.

Telegram I Facebook I YouTube I Instagram

Давлат ОТМ талабаларига ижара тўловининг бир қисми қоплаб берилади

Қонунчиликка мувофиқ, ётоқхона билан қамраб олинмаган ва ўзига ёки ота-онаси (қонуний вакиллари)га тегишли бўлмаган уйда ижара ҳуқуқи асосида яшайдиган давлат олий таълим муассасалари талабаларига ойлик ижара тўловининг бир қисми қоплаб берилади.

Тўлов миқдори қуйидагича белгиланган:

🔷Тошкент шаҳрида — БҲМнинг бир баравари (412 минг сўм);

🔷бошқа ҳудудларда — БҲМнинг ярим баравари (206 минг сўм).

Бир турар жойда икки ва ундан ортиқ талаба яшаган тақдирда, уларнинг барчаси ижара шартномасида қайд этилган бўлиши шарт.

Ариза бериш учун талабалар белгиланган шаклда анкета-аризани икки нусхада тўлдириб, ижара шартномаси нусхаси билан факультетнинг ёшлар билан ишлаш бўйича декан ўринбосари ёки ОТМнинг талабаларни турар жой билан таъминлаш ишларини мувофиқлаштирувчи бўлимига топшириши лозим.

Telegram I Facebook I YouTube I Instagram

Россияда ишламайдиган мигрант оилалари учун пулли яшаш тартиби таклиф этилди

Россияда ишламайдиган мигрант оилалари учун пулли яшаш тартибини жорий этиш таклиф қилинди. Мазкур таклифни “Янги одамлар” фракцияси депутатлари ИИВ раҳбари Владимир Колоколцевга йўллаган.

Таклифга кўра, тўлов миқдори ва тартиби ИИВ ҳамда манфаатдор идоралар томонидан белгиланади. Депутатлар фикрича, ишламайдиган мигрант оилалари Россия иқтисодиётига молиявий ҳисса қўшмаяпти ва уларнинг харажатлари давлат бюджети ҳисобидан қопланмоқда.

Янги тартиб бюджетга қўшимча тушум киритиш, мигрантларни расмий ишлаш ва таълим олишга рағбатлантиришни кўзлайди.

Telegram I Facebook I YouTube I Instagram

Қувасойда мажбурий меҳнат иддаоси

Таҳририятимизга келиб тушган мурожаатга кўра, Фарғона вилояти Қувасой шаҳар ободонлаштириш бошқармасида ишлайдиган айрим ходимлар — Д. ва А. исмли шахслар ишчиларни мажбурий меҳнатга жалб этиб келаётгани айтилмоқда.

Мурожаатда улар ўз хизмат ваколатидан фойдаланиб, манфаатлар тўқнашувига йўл қўйгани, сўнгги 8 ой ичида кўплаб ишчиларни асоссиз равишда ишдан бўшатиб, ўрнига ўз яқинларини жойлаштириш ҳолатлари кузатилгани маълум қилинган. Шунингдек, айрим ишчиларнинг эса ҳужжатсиз бўшатилаётгани ва уларнинг ойлигини ўзлаштиргани каби ҳолатлар ҳам мурожаатчилар томонидан айтилмоқда.

Ушбу воқеа 31 август куни содир бўлгани таъкидланмоқда.

Effect.uz масъуллардан мазкур мурожаат юзасидан расмий изоҳ кутиб қолади.

Telegram I Facebook I YouTube I Instagram

Мирзиёев ва Трамп телефон орқали стратегик ҳамкорлик масалаларини муҳокама қилди

Президент Шавкат Мирзиёев Америка Қўшма Штатлари Президенти Дональд Трамп билан телефон орқали мулоқот қилди. Суҳбатда Ўзбекистон – АҚШ стратегик шериклик муносабатларини мустаҳкамлаш ва ўзаро манфаатли ҳамкорликни кенгайтиришнинг амалий йўналишлари кўриб чиқилди.

АҚШ президенти Янги Ўзбекистонда сўнгги йилларда амалга оширилаётган иқтисодиётни модернизация қилиш ва аҳоли фаровонлигини оширишга қаратилган ислоҳотларни юқори баҳолади. Президент Мирзиёев эса Дональд Трампни АҚШ маъмурияти олиб бораётган ички ва ташқи сиёсатдаги ютуқлари билан табриклади ҳамда мамлакатнинг глобал хавфсизликка қўшаётган ҳиссасини алоҳида қайд этди.

Суҳбат чоғида халқаро ва минтақавий масалалар, жумладан, “C5+1” ҳамкорлик формати доирасидаги муносабатларни чуқурлаштириш юзасидан ҳам фикр алмашилди.

Президент Мирзиёев суҳбат якунида Дональд Трампни ўзи учун қулай вақтда Ўзбекистонга расмий ташриф билан келишига таклиф этди.

Telegram I Facebook I YouTube I Instagram

Фарғона, Тошкент ва Сурхондарёда коррупцияга оид жиноятлар фош этилди

Давлат хавфсизлик хизмати, прокуратура ва ички ишлар органлари ҳамкорлигида ўтказилган тезкор тадбирларда бир нечта коррупцион ҳолатлар аниқланди.

Фарғона вилояти Фурқат туманида “Ёшлар кичик саноат зонаси”даги ер майдонини ноқонуний сотишга уриниш билан боғлиқ ҳолатда масъул мутахассис ва МЧЖ раҳбари 15 минг АҚШ доллари олган вақтда ашёвий далиллар билан ушланди. Уларга нисбатан Жиноят кодексининг тегишли моддалари бўйича иш қўзғатилди.

Тошкент вилоятида эса Қурилиш ва уй-жой коммунал хўжалиги бош бошқармаси юристконсульти маъмурий ишни ижобий ҳал қилиш эвазига 15 минг АҚШ доллари олган пайтда қўлга олинди. Унга нисбатан қамоқ эҳтиёт чораси қўлланди.

Сурхондарё вилояти Шўрчи туманида солиқ инспектори маҳаллий тадбиркордан қарздорликни ёпиб бериш баҳонасида 8 млн сўм талаб қилган. Унинг шериги пулни олган вақтда, инспектор эса маблағнинг бир қисмини учинчи шахс орқали қабул қилганида ушланди.

Барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram

Сенатда бош прокурор ҳисоботи муҳокама қилинди

Олий Мажлис Сенатининг ўнинчи ялпи мажлисида бош прокурорнинг 2024 йилдаги фаолияти ҳақида ҳисоботи тингланди.

Ҳисоботда аҳолини ижтимоий муҳофаза қилиш, бандлик ва камбағалликни қисқартиришга эътибор қаратилгани айтилди. 489 нафар фуқарога 3,8 млрд сўм кечиктирилган иш ҳақи ундириб берилди, 11,2 млрд сўмлик талон-торож ҳолатлари аниқланди.

Иқтисодий соҳада қонунийликни мустаҳкамлаш, инвестиция дастурларини таъминлаш, энергия ресурслари талон-торожини олдини олиш ва яширин иқтисодиётга қарши чоралар кўрилди. 29,5 мингдан ортиқ тадбиркор ва хорижий инвесторнинг ҳуқуқлари ҳимоя қилинди.

Шу билан бирга, соғлиқни сақлаш, репродуктив саломатлик ва юқумли касалликларга қарши назорат ишлари самарасиз экани, айрим ҳудудларда оналар ўлими кўпайгани қайд этилди. Жиноятчилик бўйича 67 мингдан зиёд ҳолат қайд этилган бўлиб, уларнинг 62 фоизини олдини олиш мумкин эди.

Сенаторлар қатор йўналишларда назоратни кучайтириш зарурлигини таъкидлаб, тегишли тавсиялар бердилар. Мажлис якунида Сенат қарори қабул қилинди.

Telegram I Facebook I YouTube I Instagram

Рақобат қўмитаси VFS Global’дан давлат тилига риоя этишни талаб қилди

Рақобат қўмитаси VFS Global виза марказига “Давлат тили ҳақида”ги қонун талабларига риоя қилиш ва 10 кун ичида расмий жавоб беришни сўради. Истеъмолчиларга давлат тилида тўлиқ ва тушунарли ахборот тақдим этилиши зарурлиги таъкидланди.

Қўмитага фуқаролардан виза марказлари ва консалтинг фирмаларда давлат тили қўлланмаётгани ҳақида кўплаб мурожаатлар келиб тушмоқда. Хусусан, Қашқадарё вилоятидан бир фуқаро VFS Global ваколатхонасида овозли меню, операторлар ва ҳужжатлар фақат рус ва инглиз тилларида бўлаётганидан норозилигини билдирди.

Қўмита бу ҳолатга асосан компаниядан тегишли чоралар кўриш ва жавоб тақдим этишни талаб қилди. Ўзбекистонда ўзбек тили давлат тили бўлиб, унинг қўлланиши “Давлат тили ҳақида”ги қонун ва бошқа қонун ҳужжатлари билан қатъий тартибга солинган.

Қўмита ахборотида қайд этилишича, мазкур ҳолат назоратга олинган ва истеъмолчиларга давлат тилида тўлиқ ва тушунарли ахборот тақдим этилишини таъминлаш чоралари кўрилмоқда.

Telegram I Facebook I YouTube I Instagram