Бугун, 2 сентябрь (сешанба) куни:

— барча учун иш куни;

— мактабларда барча синф ўқувчилари учун дарс бошланади.

Эртага, 3 сентябрь (чоршанба) куни қуйидагиларга ўқиш бошланади:

— 1-курсга кирган бакалавр ҳамда магистратура талабалари учун;

— академик лицейларнинг барча босқич ўқувчилари учун;

— техникум ва касбий таълим ташкилотлари ўқувчилари учун.

8 сентябрь (душанба) куни бакалавр ҳамда магистратуранинг юқори босқич талабалари учун дарслар бошланади.

Telegram I Facebook I YouTube I Instagram

Ташаббусли бюджет жараёнларида халқ вакиллари ва сайловчилар ўртасида ҳамкорлик кучайтирилади

“Ташаббусли бюджет жараёнларини такомиллаштириш доирасида халқ вакиллари ва сайловчилар ўртасида ҳамкорликни кучайтириш чора-тадбирлари тўғрисида”ги Президент қарори (ПҚ–264-сон, 29.08.2025 й.) қабул қилинди.

🔰 Қарорга кўра, Қонунчилик палатасида ташаббусли бюджет жараёнларини мувофиқлаштириш, лойиҳаларнинг амалга оширилиши устидан парламент назоратини олиб бориш учун 11 нафар депутатдан иборат парламент комиссияси ташкил этилади.

✅ 2026 йил 1 январдан депутатлар ҳар йили ташаббусли бюджет жараёнларида тегишли сайлов округларида ғолиб бўлмаган лойиҳалар орасидан аҳолининг кундалик ҳаёти ва ҳудудни ривожлантиришга таъсир қиладиган 2 та лойиҳани (ҳар мавсумда 1 тадан) “Очиқ бюджет” ахборот порталида танлайди.

💰 Мазкур танлов лойиҳани республика бюджетидан молиялаштириш учун асос ҳисобланади.

💸 Шунингдек, мазкур жараёнларда ғолиб бўлмаган лойиҳаларни молиялаштириш учун ҳар бир депутатга 1 йилда 2 мавсумга БҲМнинг 8 минг баравари миқдорида маблағ ҳар йилги республика бюджетида назарда тутилади.

🔗 2026 йил 1 февралдан ташаббусли бюджет жараёнларида ижтимоий аҳамиятга эга лойиҳаларни аҳоли ва давлат ўртасида шериклик асосида молиялаштириш амалиёти жорий этилади.

📚 Ташаббускор аҳоли томонидан лойиҳалар қийматининг 50 фоизи ихтиёрий равишда молиялаштирилганда лойиҳалар ғолиб деб топилади ва қолган 50 фоизи республика бюджетидан молиялаштирилади.

Telegram I Facebook I YouTube I Instagram

Судларда қонун адолат устунми ёки манфаатлар?

Ўзбекистонда суд қарорлари қонунга асосланиши шарт. Аммо амалда бу қоида доим ҳам ишламаётгани жамоатчилик орасида жиддий саволларни келтириб чиқармоқда. Ўзбекистон инсон ҳуқуқлари ЭЗГУЛИК жамияти Марказий бошқармаси аъзоси Тошкент вилояти бўлми раиси Зариф Мирзаҳмедовга кўра бир хил жиноят учун турлича жазо тайинланиши, айрим ҳукмларнинг ҳуқуқий жиҳатдан изоҳлаб бўлмаслиги суд жараёнларига шахсий манфаатлар аралашиши ва коррупция омиллари ҳали ҳам мавжудлигини кўрсатмоқда.

📌 Ҳаётдан мисоллар:

— Андижон: икки шахсни шафқатсиз калтаклаган айбланувчиларга суд атиги 3 йил уй қамоғи тайинланган. Бу ҳукм одамни калтаклаш билан уйда тинч телевизор кўришни деярли тенг кўйган ҳолат сифатида баҳоланмоқда.

— Наманган: инсон ҳаётини сақлаб қолиш учун ҳаракат қилган 70 ва 66 ёшли шифокорлар асоссиз равишда айбдор қилиниб, 3 йил қамоқ жазосига ҳукм қилинди. “Қутқарсанг қамоққа тушасан, урсанг уйга кетасан” деган парадокс юзага келди.

— Самарқанд: дастлаб 10 йил қамоқ жазосига ҳукм қилинган айбланувчи кейинчалик шартли равишда озод этилди. Жамоатчилик учун қаттиқ ҳукм, айбланувчи учун эса енгил финал.

— Сурхондарё: ўз фарзандини сотишга уриниб, ушланган аёл 3 йилга қамалди. Натижада, 6 бола ва ногирон эр қаровсиз қолди.

— Янгийўл: саратондан яқинда турмуш ўртоғи вафот этган, икки бола тарбиясида қолган эркак уй қамоғига чиқиши мумкин эди, аммо суд унга қамоқ жазоси тайинлади. Бу инсонпарварлик тамойилларига зид ҳолат сифатида баҳоланмоқда.

— Қашқадарё: сохта жабрланувчилар иштирокидаги ишлар ҳамон адолатсиз қарорларга сабаб бўлмоқда.

⚡️ Адолат учун зарур шартлар:

1. Судьялар мустақил бўлиши ва қарорларига фақат қонун асос бўлиши шарт.

2. Ҳар бир ҳукм жамоатчиликка тушунарли ва ишонарли бўлиши лозим.

3. Суд тизимида жавобгарлик ва назорат кучайтирилиши зарур.

4. Жамиятнинг қонунга ишончи тикланмаса, адолат ҳақиқий маънода қарор топмайди.

Шунинг учун Олий суд ва Судьялар олий кенгаши судьялар мустақиллигини таъминлаб, ҳар бир ҳукмнинг адолатли ва қонуний чиқарилишини кафолатлаши шарт. Фақат шундагина адолат жамиятда ҳақиқатан яшайди.

Telegram I Facebook I YouTube I Instagram

2 сентябрдан Пискент автополигонида автомобилларни синовдан ўтказиш амалиёти тўхтайди

Ўзбекистон Техникавий жиҳатдан тартибга солиш агентлиги маълумотига кўра, истеъмолчиларнинг манфаатларини ҳимоя қилиш ва сифати кафолатланмаган автомобилларни мамлакатга киритиш ҳамда жамоат йўлларида фожиали ҳодисаларнинг олдини олиш мақсадида, 2024 йилнинг 1 ноябридан Пискент синов мажмуасида транспорт воситалари Вазирлар Маҳкамаси тасдиқлаган техник регламентга мувофиқ синовдан ўтказилган эди.

Таҳлил натижалари шуни кўрсатдики, мамлакатга техник регламентга мувофиқ тасдиқланмаган енгил автомобиллар импорт қилинган ва уларнинг синовлари бирма-бир ўтказилишга мажбур бўлган.

2024 йилга қадар фақат 3 та дилерлик маркази фаолият кўрсатган бўлиб, улар 15 та автомобил модели учун турини тасдиқлаш ҳужжатларини олган эди. Ҳозир эса, 21 та хорижий компаниянинг расмий дилерлари ўз фаолиятини бошлаган ва 100 дан ортиқ автомобиль турлари учун тасдиқлаш ҳужжатлари расмийлаштирилган.

Бу эса истеъмолчиларга сифатли ва хавфсиз, кафолатланган автомобилларни расмий дилерлар орқали харид қилиш имкониятини яратди.

Шу боис, республикамизда расмий дилерлар ва сервис марказлари сони кескин ошгани ҳамда истеъмолчиларнинг расмий дилерлар билан ишлаш амалиёти жорий этилганлигини ҳисобга олган ҳолда, 2025 йил 2 сентябрдан Пискент автополигонида автомобилларни синовдан ўтказиш амалиёти тўхтатилади.

Маълумот учун: импорт қилинаётган автомобилларнинг сифати ва хавфсизлиги доимий назорат қилинади, талабларга номувофиқликлар аниқланса ва истеъмолчилардан шикоятлар келиб тушса, тегишли чоралар кўрилиши таъминланади.

Истеъмолчиларга автомобилни харид қилишда расмий дилерлар орқали амалга ошириш тавсия этилади.

Telegram I Facebook I YouTube I Instagram

Шавкат Мирзиёев мактаб ўқувчилари ва устозларни янги ўқув йили билан табриклади

Ўзбекистон Республикаси президенти Шавкат Мирзиёев мактаб ўқувчилари, устоз ва ота-оналарни янги ўқув йили билан қутлаб, қуйидагиларни изҳор қилди:

"Қадрли фарзандларим!
Ҳурматли устоз ва мураббийлар!
Муҳтарам ота-оналар!

Аввало, сиз, азизларни юртимиздаги 10 мингдан зиёд мактабларда Ўзбекистон мустақиллигининг 34 йиллик байрамига уйғун ҳолда ўтаётган Билимлар куни билан чин қалбимдан самимий муборакбод этаман.

Ушбу шукуҳли айёмда “Биринчи қўнғироқ”лар жаранги остида илк бор мактаб остонасига қадам қўяётган 720 мингдан ортиқ ўғил-қизларимиз ва набираларимизни, уларнинг ота-оналарини алоҳида қутлаб, ўзимнинг энг эзгу тилакларимни изҳор этишдан ғоят мамнунман.

Ҳеч шубҳасиз, кейинги йилларда бутун юртимиз каби мактабларимиз қиёфаси ҳам тубдан ўзгариб, улар том маънода Янги Ўзбекистон тимсолига айланиб бораётгани барчамизни чексиз қувонтиради. Чунки мактаб қанчалик обод ва чароғон бўлса, жамият ҳаёти шунчалик фаровон, мазмунли ва маърифатли бўлади.

Шу маънода, мамлакатимизда таълим-тарбия жараёнлари тобора такомиллашиб бораётгани, ҳар йили кўплаб янги ўқув масканлари барпо этилаётгани, уларнинг моддий-техник базаси мустаҳкамланиб, мактаб иши умумхалқ ҳаракатига айлангани – кейинги даврда эришган энг катта ютуқларимиздан бири, десак, айни ҳақиқатни айтган бўламиз.

Чиндан ҳам, кўзлари илмга ҳавас ва ҳаяжон билан чақнаб турган сиздек азму шижоатли ёшларимизга юксалиш ва камолот, бахт ва саодат эшикларини очиб берадиган муқаддас даргоҳ – мактабларимиз равнақида биз халқимиз, миллатимизнинг ёруғ келажагини кўрамиз. Бугунги кунда ўз олдимизга қўяётган катта-катта мақсадларга эришишнинг асосий омили, бош калитини, аввало, таълимда, мактабларимизда, деб биламиз.

Сўнгги йилларда ўқувчи ёшларимиз ҳурматли устоз ва мураббийлари билан биргаликда ана шундай юксак эътиборни чуқур ҳис этиб, ўқишда, ижодда, спортда, жамоат ишларида муҳим ғалабаларни қўлга киритаётгани бизга албатта қўшимча куч-ғайрат, илҳом ва ишонч бағишлайди.

Кўплаб мактаб битирувчилари мамлакатимиздаги нуфузли олий ўқув юртлари билан бирга хориждаги етакчи университетларга юқори балл билан ўқишга кираётгани, ҳаётда ўз муносиб ўрнини топиб, Янги Ўзбекистон тараққиётига улкан ҳисса қўшаётгани ҳаётимизда мактабнинг, устоз-мураббийларнинг аҳамияти янада ортиб бораётганини кўрсатади.

Ишончим комил, сиз, азизлар ана шундай эзгу анъаналарни муносиб давом эттирасиз ва юксак босқичга кўтарасиз.

Ҳеч қачон унутманг, мактаб – бу мўъжиза, китоб, устозлар ўтадиган ҳар бир дарс – беқиёс хазинадир.

Олдингизга аниқ мақсад қўйиб, бор куч-ғайратингиз, билим ва қобилиятингиз билан ҳаракат қилсангиз, кўзлаган марраларга албатта етасиз.

Бу йўлда сизларга сиҳат-саломатлик, ютуқ ва зафарлар тилайман.

Янги ўқув йили барчангизга муборак бўлсин!"

Шавкат Мирзиёев, Ўзбекистон Республикаси президенти

Telegram I Facebook I YouTube I Instagram

Тошкентда 15-, 28- ва 61-сонли автобус йўналишларига ўзгартиришлар киритилди

2025 йил 1 сентябрдан Тошкент шаҳрида қуйидаги автобус йўналишларида ҳаракат тартиби ўзгартирилди:

15-йўналиш – Қўйлиқ 1-мавзесидан Дўстлик метроси томон ҳаракатланишда, энди Қўйлиқ кўприк ости йўлидан кўприк йўлига қўшимча йўл бўлаги орқали (Водий автотураргоҳига бормай) ҳаракат қилади.

28-йўналиш – Тиббиёт академиясидан Янгиобод мавзеси томон ҳаракатланишда, йўналиш Шоҳимардон, Оҳангарон йўли, Шоҳсанам ва Катта Янгиобод кўчалари орқали ўтказилади. Шунингдек, Катта Янгиобод кўчасида йўналиш бир томонлама ҳаракат қилади.

61-йўналиш – Энди йўналиш икки томонлама Ижзат кўчаси орқали ҳаракат қилади ва Бешариқ, Авиасозлар ва Ҳосият кўчаларига кирмайди.

Шу билан, Тошкент шаҳрида автобус йўналишлари йўловчилар учун қулайлаштирилди ва шаҳар транспорт тизимида тартиб янада такомиллаштирилди.

Telegram I Facebook I YouTube I Instagram

Наманган шаҳар ҳокими қамоққа олинди

Наманган ва Тошкент вилоятида коррупция билан боғлиқ ҳолатлар бўйича жиноят ишлари қўзғатилди.

1️⃣ Наманган шаҳрида Давлат хавфсизлик хизмати ходимлари тезкор тадбир ўтказди. Унга кўра, шаҳар ҳокими ва пойабзал ишлаб чиқарувчи МЧЖ раҳбари фуқародан шаҳар ҳудудидаги 35 сотих ерда кўп қаватли уй қуриш ҳуқуқини бериш ва молиялаштириш эвазига 60 минг АҚШ доллари талаб қилган.

🚨 Тадбирда МЧЖ раҳбари пулни олган вақтида ушланди. Кейин шаҳар ҳокими унинг ишончли одами орқали 60 минг АҚШ долларини олган вақтида ҳам қўлга олинди.

⚖️ Ҳозирда Наманган шаҳар ҳокими депутатлик дахлсизлик ҳуқуқидан маҳрум қилиниб, Жиноят кодексининг 210-моддаси 3-қисми “а” банди билан унга ва девонхона мудирига, 168-модда 4-қисми “а” банди ва 28, 211-модда 3-қисми “а” банди билан МЧЖ раҳбарига нисбатан жиноят иши қўзғатилди.

👮 Шаҳар ҳокимига нисбатан “қамоқ” эҳтиёт чораси қўлланди. Тергов давом этмоқда.

2️⃣ Зангиота туманида (Тошкент вилояти) қишлоқ хўжалиги бўлими бош мутахассиси маҳаллий фуқарога тегишли уй ёнидаги давлат захирасидаги 8 сотих ерни тадбиркорлик фаолияти учун расмийлаштириш эвазига 40 минг АҚШ доллари талаб қилган.

💰 20 минг АҚШ доллари олган вақтида Давлат хавфсизлик хизмати ва Иқтисодий жиноятларга қарши курашиш департаменти ходимлари уни ушлади.

⚖️ Ҳозирда бош мутахассисга нисбатан Жиноят кодексининг 168-модда 4-қисми “а” банди ва 28,211-модда 3-қисми “а” банди билан жиноят иши қўзғатилди ва “қамоқ” эҳтиёт чораси қўлланди. Тергов ҳаракатлари олиб борилмоқда.

Ўзбекистон ва Хитой сунъий интеллект маркази ташкил этишни муҳокама қилди

2 сентябрь куни Пекин шаҳрида Президент Шавкат Мирзиёев ва Хитой Халқ Республикаси Раиси Си Цзиньпин иштирокида расмий музокаралар бўлиб ўтди. Учрашувда икки давлат ўртасидаги ҳар томонлама стратегик шерикликни мустаҳкамлаш ва амалий ҳамкорликни кенгайтириш масалалари кўриб чиқилди.

Музокараларда инновация йўналишида муҳим қадам сифатида Ўзбекистон – Хитой сунъий интеллектни ривожлантириш марказини ташкил этиш таклифи илгари сурилди. Шунингдек, “Хитой – Қирғизистон – Ўзбекистон” стратегик темир йўлини барпо этиш ишлари амалий босқичга ўтгани қайд этилди.

Илм-фан, тиббиёт, таълим ва туризм соҳаларида ҳамкорликни кенгайтириш зарурлиги алоҳида таъкидланди. Ўзбекистонда Шимоли-ғарбий қишлоқ ва ўрмон университети филиали ҳамда Халқаро математика маркази фаолият бошлади. Шу билан бирга, Сиань нефть университети филиали очиш бўйича битим имзоланди, Пекин технология институти филиалини йўлга қўйиш режалаштирилган.

Жорий йилда мамлакатимизда иккинчи Таълим форуми ўтказилиши белгиланган. Хитой тилини ўрганиш имкониятларини кенгайтириш, квоталар сонини ошириш ва Конфуций институтлари фаолиятини ривожлантириш масалалари қўллаб-қувватланди. Шунингдек, турли соҳалар учун мутахассислар тайёрлайдиган “Лу Бань устахоналари”ни ташкил этиш кўзда тутилган.

Туризм йўналишида авиақатновлар сони кўпайтирилаётгани ва визасиз тартиб жорий этилгани қайд этилди. Шу кунларда Хитой Миллий музейида Ўзбекистон ҳам иштирок этаётган йирик кўргазма ўтмоқда. 2027 йилда Шанхай ва Пекинда санъат кўргазмалари ўтказилиши режалаштирилган.

Учрашув доирасида икки мамлакат маданият марказларини очиш бўйича тарихий битим қабул қилиниши кутилмоқда. Шунингдек, БМТ, ШҲТ ва “Марказий Осиё – Хитой” формати каби халқаро тузилмалар доирасидаги ҳамкорликни кучайтириш муҳимлиги таъкидланди.

Музокаралар якунида Президент Мирзиёев Хитой раҳбарини Ўзбекистонга ташриф буюришга таклиф этди. Учрашув самимий ва дўстона руҳда ўтди.

Telegram I Facebook I YouTube I Instagram

ОАВ учун контент марказига янги раҳбар ва ўринбосарлар тайинланди

Президент Администрацияси қарорига мувофиқ, Қобулжон Холиқович Аҳмедов Оммавий ахборот воситалари учун контент тайёрлаш маркази директори этиб тасдиқланди.

Марказ раҳбарияти таркиби қуйидагича шакллантирилди:

Ҳусан Салихов – директорнинг ўринбосари лавозимига тайинланди. У илгари Президент Матбуот хизмати Медиа марказига раҳбарлик қилган ҳамда режиссёр сифатида фаолият юритган.

Жаҳонгир Абдураҳмонов – директор ўринбосари сифатида иш бошлади. У бундан олдин Президент Матбуот хизматида бош консультант сифатида ишлаган, шунингдек, “UZREPORT”да шеф-муҳаррир лавозимини ҳам эгаллаган.

Telegram I Facebook I YouTube I Instagram