Алиментчи отадан 150 минг доллар ундирилди

Бюронинг Учтепа туман бўлими иш юритувига ФИБ Учтепа туманлараро судининг 2018 йил 17 май ҳамда 2022 йил 20 апрелдаги суд буйруқларига асосан қарздор Б.Т.дан ундирувчи Б.Г. фойдасига уч нафар фарзанди вояга етгунига қадар ҳар ойда иш ҳақи ва даромадларининг 1/3 қисми миқдорида алимент ундириш тўғрисидаги ижро ҳужжати келиб тушган.

Шу асосда ижро иши қўзғатилиб, тегишли ҳаракатлар амалга оширилган. Жараёнда қарздор ота ўз фарзандлари таъминоти учун алиментни олдиндан ҳисоблаб беришни сўраб мурожаат қилган.

Ўзбекистон Республикаси Оила кодексининг 145-моддаси ҳамда Вазирлар Маҳкамасининг 2018 йил 6 октябрдаги 808-сон қарори асосида МИБ электрон дастури орқали ҳисоб-китоб қилинганда, алимент миқдори 2025 йил 1 июлдан 2040 йил 2 февралга қадар жами 1 млрд 847 млн 413 минг сўмни ташкил этган.

Олиб борилган ижро ҳаракатлари давомида, жорий йил 29 август куни қарздор ота томонидан ундирувчи фойдасига 150 000 АҚШ доллари миқдорида алимент тўлаб берилди. Шундан сўнг мазкур ижро иши амалда тамомланди.

Telegram I Facebook I YouTube I Instagram

Қишлоқ хўжалиги вазирлиги: "пахта терими нархлари ҳақидаги миш-мишлар асоссиз"

Қишлоқ хўжалиги вазирлиги ижтимоий тармоқларда тарқалган «пахта терими учун 1 кг – 1 800 сўм» деган хабар ҳақиқатга тўғри келмаслигини маълум қилди.

Расмий ахборотга кўра, 2025 йилги мавсумда пахта терими учун қуйидаги ҳисоб-китоблар белгиланган:

машина ёрдамида йиғилган пахта – 1 кг учун 1 373 сўм;

қўлда йиғилган пахта – 1 кг учун 2 000 сўм (тавсия этилган нарх).

Шунингдек, фермерлар ва кластерлар теримчилар билан келишиб, нархни мустақил белгилаш ҳуқуқига эга.

Бундан ташқари, пахта етиштириш харажатларини камайтириш мақсадида давлат бюджети ҳисобидан ҳар килограмм учун 1 000 сўм миқдорида субсидия ажратилиши белгиланган.

Вазирлик бу тартиб пахтачилик соҳасида барқарорликни таъминлаш, ишчи-меҳнаткашларни қўллаб-қувватлаш ва хўжаликлар манфаатини ҳимоя қилишга хизмат қилишини таъкидлади.

Мутасаддиларнинг сўзларига кўра, фақат расмий манбалар орқали берилган маълумотларга ишониш керак. Асоссиз хабарлар эса жамиятни чалғитиши ва қонунчиликка кўра жавобгарликка сабаб бўлиши мумкин.

Эслатиб ўтамиз, ўтган 2024 йил мавсумида қўлда терилган пахта учун 1 кг миқдорига 2 500 сўмдан ҳақ тўланган эди.

Telegram I Facebook I YouTube I Instagram

2026 йилдан “Очиқ бюджет” ғолиби бўлмаган лойиҳалар ҳам молиялаштирилади

Президент қарорига мувофиқ, 2026 йил 1 январдан бошлаб “Очиқ бюджет” танловида ғолиб чиқмаган лойиҳалар орасидан аҳоли турмушига ва ҳудудларни ривожлантиришга долзарб таъсир кўрсатадиган икки лойиҳа (ҳар мавсумда биттадан) депутатлар ташаббуси билан танлаб олинади ва республика бюджети ҳисобидан молиялаштирилади.

Шунингдек, 2026 йил 1 февралдан бошлаб аҳоли ташаббуси билан киритилган лойиҳаларнинг қиймати 50 фоизгача аҳоли ҳиссаси билан ихтиёрий равишда қопланса, қолган қисми давлат томонидан молиялаштирилади.

Яна бир муҳим ўзгариш – 2025 йил 1 сентябрдан бошлаб айрим ҳолларда ғолиб бўлган лойиҳалар навбатдаги икки мавсумда ҳам иштирок этиши мумкин. Хусусан:

маҳаллалари сони 15 тадан кам бўлган туман ва шаҳарлардаги барча маҳалла лойиҳалари;

аҳоли ва давлат шериклиги асосида амалга ошириладиган ташаббуслар.

2026 йил учун республика бюджетидан “Очиқ бюджет” дастурларига 1 триллион сўм ажратилиши белгиланган. Шундан 494 миллиард сўм депутатлар ташаббуси билан молиялаштириладиган лойиҳаларга, 506 миллиард сўм эса аҳоли билан ҳамкорликда амалга ошириладиган ташаббусларга йўналтирилади.

Telegram I Facebook I YouTube I Instagram

Олмалиқда қўриқлаш ходими ўзини отиб қўйди

Ички ишлар вазирлиги ҳузуридаги Қўриқлаш департаментининг Олмалиқда хизмат қилган 37 ёшли ходими ўз уйида табел қуроли билан жонига қасд қилди.

Фожиа 29 август куни эрталаб содир бўлган. Ходим навбатчиликдан кейин уйига йўл олган ва хизмат қуроли билан ўзини отган.

Расмий маълумотга кўра, қурол навбатдан сўнг батальонга топширилиши керак эди, аммо ходим бошқача йўл тутган.

Ҳозирда марҳумга нисбатан суд-медицинa экспертизаси тайинланган. Ҳодиса сабаблари ва бошқа тафсилотлар прокуратура органлари томонидан ўрганилмоқда.

Telegram I Facebook I YouTube I Instagram

🇺🇿 1 сентябр Ўзбекистоннинг мустақиллик куни муборак бўлсин!

Азиз юртдошлар!
Эркин ва озод Ватанимиз — Ўзбекистон Республикаси давлат мустақиллигининг 34 йиллиги билан барчангизни самимий табриклаймиз!

🌿 Мустақиллик — тинчлик, фаровонлик ва келажакка ишонч рамзи.

🤝 Бирдамликда янги марралар сари олға қадам қўяйлик!

Effect.uz таҳририяти сизларни ушбу қутлуғ сана билан табриклайди!

🎉 Байрам муборак, азиз юртдошлар!

Telegram I Facebook I YouTube I Instagram

Фарғонадаги бозорда нарх-навo ростдан арзонми?

Бир неча кун аввал Effect.uz мухбири Ҳамиджон Аҳмедов “Фарғона бозоридаги нархлар ҳақиқатан ҳам халқ учунми ёки... ” мавзусида оммабоп саволни кўтарган эди.

Саволнинг ечимини топиш мақсадида Фарғона шаҳар ҳокими Восилжон Назаров, шаҳар прокурори Шерзод Мавлонов ва Иқтисодий жиноятларга қарши курашиш департаменти ходимлари ҳамда Effect.uz журналистлари билан бозорга боришди.

Репортажда нархлар ва маҳсулот сифати текширилди.

Расмийларга кўра, маҳсулотлар нархи ҳам, сифати ҳам қониқарли.

Аммо савол очиқ қолмоқда: фуқаролар ҳам шундай фикрдами?

Видеолавҳани кўриш давомида аҳоли бозордаги нархлардан қанчалик миқдорда рози эканига гувоҳ бўласиз.

ТЎЛИҚ ВИДЕО

Telegram I Facebook I YouTube I Instagram

2025 йилги “Ташаббусли бюджет”нинг иккинчи мавсуми якунланди

Иқтисодиёт ва молия вазирлиги хабарига кўра, мамлакатимизда “Ташаббусли бюджет”нинг навбатдаги мавсуми бўйича овоз бериш жараёнлари ўз якунига етди.

Бу сафар юртимиз аҳолиси томонидан 11 миллиондан зиёд овоз берилди. Натижада 3,2 трлн сўм маблағ ҳисобидан амалга оширилиши белгиланган 2 332 та ташаббус ғолиб сифатида белгиланди.

Вазирлик маълумотида ғолиб деб топилган лойиҳалар рўйхати билан танишиш учун алоҳида имконият яратилгани ҳам қайд этилган.

Маълумки, шу йилнинг биринчи мавсумида ҳам 3,2 трлн сўм маблағ ажратилган бўлиб, ўшанда 2 369 та лойиҳа ғолиб чиққан эди.

Эслатиб ўтамиз, 2026 йилдан бошлаб “Ташаббусли бюджет” жараёнларига бир қатор ўзгаришлар киритилиши режалаштирилган.

Telegram I Facebook I YouTube I Instagram

⚡️Саида Мирзиёева юртдошларни Мустақиллик байрами билан табриклади

Саида Мирзиёева Ўзбекистон халқини давлат мустақиллигининг 34 йиллиги билан самимий табриклади.

У ўз табригида шундай деди:

“Ватанимиз бундан-да кучли, фаровон, толеи порлоқ бўлсин. Тинчликсевар давлатимизда доимо осойишталик ҳукм сурсин.
Барчамизга бахт ва омад ҳамроҳлик қилсин, энг эзгу орзу-умидларимиз ушалсин.

Эркимиз тантанаси абадий бўлсин!”

Telegram I Facebook I YouTube I Instagram

Мустақиллик байрами муносабати билан Тошкентда йўллар вақтинчалик ёпилади

Ички ишлар органлари маълумотига кўра, 1 сентябрь куни соат 17:00 дан 23:00 гача пойтахтнинг айрим кўчаларида автотранспорт ҳаракати чекланади.

Йўл ҳаракати қуйидаги участкаларда вақтинчалик тўхтатилади:

— Маҳтумқули–Оҳангарон шоҳ кўчасидан Янги Ўзбекистон – 4Р12 йўли чорраҳасигача;
— Чўлпон кўчасидан Янги Ўзбекистон – Миллий боғ чорраҳасигача;
— Янги Ўзбекистон – Темирчи кўчалари кесишмасигача бўлган қисмида.

Мазкур чекловлар давлат мустақиллигининг 34 йиллиги муносабати билан “Янги Ўзбекистон” боғида ўтказиладиган байрам тадбирлари муносабати билан жорий этилган.

Тошкент аҳолиси ва меҳмонларига ҳаракатланиш учун айланма йўллардан фойдаланиш тавсия қилинди.

Telegram I Facebook I YouTube I Instagram

ЙҲХХ аҳолини 2 сентябрда жамоат транспортидан фойдаланишга чақирди

Ички ишлар вазирлиги Йўл ҳаракати хавфсизлиги хизмати ота-оналар ва ҳайдовчиларга мурожаат қилиб, 2 сентябрь — янги ўқув йили бошланиши муносабати билан шахсий автомобил ўрнига жамоат транспортидан фойдаланишни тавсия этди.

Бу куни мактабларда биринчи қўнғироқ янграйди, шу боис эрталаб йўлларда катта тирбандликлар юзага келиш эҳтимоли юқори экани қайд этилди.

Telegram I Facebook I YouTube I Instagram

Мирзиёев: «Ҳамкорликни янги босқичга олиб чиқиш вақти келди»

Бугун Тяньцзинь шаҳрида бўлиб ўтган Шанхай ҳамкорлик ташкилотига аъзо давлатлар раҳбарлари кенгаши мажлисида Президент Шавкат Мирзиёев бир қатор стратегик ташаббусларни илгари сурди. Давлат раҳбари таъкидлаганидек, ШҲТнинг сиёсий пойдеворини мустаҳкамлаш, хавфсизлик соҳасида ишончни кучайтириш, шунингдек, иқтисодий ва гуманитар йўналишларда ҳамкорликни ривожлантириш долзарб аҳамият касб этмоқда.

Президент таклиф этган муҳим йўналишлар қуйидагилардан иборат:

ташкилот институционал салоҳиятини ошириш ва уни Глобал Жануб давлатлари ҳисобига кенгайтириш;

ядро хавфсизлиги декларациясини қабул қилиш, Ички ишлар вазирлари кенгашини тиклаш, 2030 йилгача гиёҳвандликка қарши дастур ишлаб чиқиш ва «ШҲТ–Афғонистон» мулоқот гуруҳини фаоллаштириш;

савдода енгиллаштирилган тартибларни жорий этиш, стратегик материаллар маркази, энергетика консорциуми ҳамда венчур компаниялар тармоғини тузиш, махсус электрон инвестиция порталини йўлга қўйиш;

«ШҲТ ягона транспорт макони»ни шакллантириш ва уни «Бир макон, бир йўл» ташаббуси билан уйғунлаштириш орқали йирик транзит йўлакларни ривожлантириш;

иқлим ўзгаришига мослашиш ва экология хавфларини башорат қилиш учун сунъий интеллект технологияларига асосланган минтақавий платформани ишга тушириш;

маданий-гуманитар йўналишда халқаро фестиваллар, «ШҲТ университети» онлайн кампуси, ёшлар учун танлов ва олимпиадалар, шунингдек, сайёҳлик ва тиббиёт туризми лойиҳаларини амалга ошириш.

Саммит якунлари орасида энг муҳим қарор сифатида Тошкент шаҳрида ШҲТга аъзо давлатларнинг хавфсизликка таҳдид ва хатарларга қарши курашиш бўйича Универсал марказини ташкил этиш белгиланди. Шунингдек, унинг таркибида Ахборот хавфсизлиги маркази ҳам фаолият юритади.

Президент Мирзиёев таъкидлаганидек:
«Хавфсизлик соҳасидаги ҳамкорликни янги босқичга олиб чиқиш вақти келди».