Хитойлик компания очилганига уч ҳафта бўлмасдан икки олтин конига эга бўлди

26 август куни E-auksion электрон савдо майдонида Навоий вилоятида жойлашган “Ойдинбулоқ” участкасида геологик изланишлар ҳуқуқи бўйича аукцион ўтказилди. Лотнинг бошланғич нархи 4,12 млрд сўм этиб белгиланган бўлиб, савдо қарийб икки ярим соат давом этди. Якунда “Zhongcheng Mining” МЧЖ 13,1 млрд сўмлик таклиф билан ғолиб деб топилди.

“Ойдинбулоқ” майдони Нурота тумани, Дебаланд шаҳарчасидан 20,5 км узоқликда жойлашган. Ҳудуднинг умумий майдони 40 гектар бўлиб, ҳисоб-китобларга кўра, тахминан 1,3 тонна олтин ва 7,1 тонна кумуш захираси мавжуд.

Компания аслида бу биринчи муваффақияти эмас. 14 август куни, яъни рўйхатдан ўтганига бор-йўғи саккиз кун бўлган пайтдаёқ, “Zhongcheng Mining” Бухоро вилоятининг Ғиждувон туманидаги “Четтик” участкаси бўйича ҳам аукционда ғолиб чиққан эди. Бошланғич нархи 4,1 млрд сўм қилиб белгиланган лот 35,6 млрд сўмга сотилган — яъни нарх 8,6 баробарга ошган. Ушбу майдоннинг ҳудуди 1314 гектарни ташкил қилиб, унда 4,57 тонна олтин захираси бўлиши кутилмоқда.

“Zhongcheng Mining” МЧЖ 2025 йил 8 август куни 500 млн сўм устав фонди билан давлат рўйхатидан ўтган. Компаниянинг ягона таъсисчиси ва раҳбари Ши Чунхуан ҳисобланади. Шундай қилиб, очилганига уч ҳафта бўлмасдан мазкур корхона икки йирик олтин кони аукционларида ғолиб чиқишга муваффақ бўлди.

Telegram I Facebook I YouTube I Instagram

Ўзбекистонда хорижий юк машиналари учун тўловлар пасайтирилди

Эндиликда хорижий давлатларга тегишли оғир ва катта ҳажмли юк машиналарининг Ўзбекистон ҳудуди бўйлаб ҳаракатланиши учун ундириладиган тўловлар миқдори камайтирилди. Бу ҳақда Адлия вазирлигининг “Ҳуқуқий ахборот” канали маълум қилди.

Ҳукумат қарорига мувофиқ, транспорт воситасининг умумий ҳақиқий оғирлиги йўл қўйилган меъёрдан ошиб кетган ҳолларда тўлов қуйидаги тартибда ҳисобланади:

ортиқча вазн 5 тоннагача — 1 км учун БҲМнинг 0,08 %;

5–10 т — 0,12 %;

10–15 т — 0,24 %;

15–20 т — 0,42 %;

20–25 т — 0,63 %;

25–30 т — 0,97 %;

30–35 т — 1,39 %;

35–40 т — 1,94 %;

40–45 т — 2,66 %;

45–50 т — 3,59 %;

50 т ва ундан ортиқ — 4,22 %.

Шунингдек, оғир юкли ва йирик габаритли машиналарнинг ҳаракатланиши учун аризаларни кўриб чиқиш, йўналишни келишиш ва рухсатнома бериш хизматлари учун тўлов ҳам қайта белгиланди. Энди у “Лицензия” ахборот тизими орқали қуйидагича ҳисобланади:

100 км гача — БҲМнинг 54 % (ҳозирда 222 480 сўм);

ҳар бир кейинги км учун — БҲМнинг 0,24 % (ҳозирда 988 сўм 8 тийин).

Маълумот учун, аввалги тартибда ушбу тўловлар 100 км гача — 25 АҚШ доллари, ҳар бир кейинги км учун эса 0,11 доллар миқдорида белгиланган эди.

Telegram I Facebook I YouTube I Instagram

Ўзбекистон U20 қизлар гандбол жамоаси Осиё чемпионатидан чиқарилди

Тошкентда ўтаётган 20 ёшгача бўлган қизлар ўртасидаги Осиё чемпионати мезбонлар учун кутилмаган ҳолат билан якун топди.

Ўзбекистон U20 терма жамоаси яримфиналга чиқиш арафасида мусобақадан четлатилди. Натижада уларнинг гуруҳ босқичидаги барча кўрсаткичлари — 3 ғалаба ва 1 мағлубият — бекор қилинди. Бу билан жамоа нафақат яримфинал, балки Жаҳон чемпионатида иштирок этиш имконидан ҳам маҳрум бўлди.

Айрим манбаларга кўра, қарор миллий жамоа таркибидаги бир нечта ўйинчи ҳужжатларидаги ноаниқликлар билан боғлиқ.

Осиё гандбол федерацияси ҳозирча расмий изоҳ бермаган, якуний баёнот кейинроқ эълон қилиниши кутилмоқда.

Telegram I Facebook I YouTube I Instagram

Ўзбекистонда ҳуқуқбузарликларни кузатишда дронлардан фойдаланиш йўлга қўйилди

Ички ишлар вазирлиги тизимида ҳуқуқбузарликларни назорат қилиш мақсадида дронлардан фойдаланиш амалиёти бошланди. Дастлабки тажриба Бухоро вилоятида йўлга қўйилган. 2024 йилда давлат раҳбарининг ташрифи чоғида берилган топшириққа асосан, вилоят ҳокимлиги 150 та дрон харид қилган эди.

Ҳозирда 5 та вилоятдаги 84 та ҳуқуқ-тартибот муассасалари дронлар билан таъминланмоқда. Улар ИИВ томонидан сотиб олинган бўлиб, яқин вақтда яна қўшимча дронлар олиш масаласи кўриб чиқиляпти. Режага кўра, 2026 йил охирига қадар барча туман ва шаҳар бўлимлари учувчисиз учиш аппаратлари билан таъминланади. Бу ҳақда ИИВ ҳуқуқбузарликлар профилактикаси хизмати бошлиғи ўринбосари Раҳимжон Наимов маълум қилди.

Дронлар орқали ҳудуд тепадан назорат қилинади, ҳуқуқбузарлик аниқланган тақдирда ички ишлар ходимлари зарур чораларни кўради. Амалиёт ҳуқуқбузарликларни олдиндан аниқлаш ва уларнинг олдини олишда самарали бўлаётгани айтилмоқда.

Бироқ дронларни барча ходим бошқармайди — бу ҳуқуқ профилактика катта инспекторларига берилади. Улар махсус ўқув курсларидан ўтиб, сертификат олгандан сўнггина дрондан фойдаланиш ҳуқуқига эга бўлади. Ҳозиргача Бухоро ва Фарғона вилоятларидаги инспекторлар тайёрланиб, сертификатга эга бўлишди.

Раҳимжон Наимовга кўра бу жараён босқичма-босқич давом эттирилади.

Telegram I Facebook I YouTube I Instagram

Санкт-Петербург кўчаларида миллатга қараб ажратадиган кузатув тизими ишга туширилди

Санкт-Петербургда 2026–2028 йилларда шаҳар кўчаларига йўловчиларнинг ташқи қиёфаси орқали уларнинг этник келиб чиқишини аниқлай оладиган махсус видеокузатув тизими жорий этилиши режалаштирилган. Бу ҳақда Петербургский дневник хабар берди.

Ахборотлаштириш ва алоқа қўмитаси раиси ўринбосари маълум қилишича, тизим ирқий ва минтақавий гуруҳларни фарқлай олади. Бу орқали шаҳарнинг турли ҳудудларида муайян миллат вакилларининг тўпланиши кузатилиб, ҳуқуқни муҳофаза қилувчи органларга тегишли маълумот тақдим этилади.

Маълумотларга кўра, жами 50 минг камера этник белгиларни аниқлаш имкониятига эга бўлади. Бироқ улар аниқ миллатни белгилай олмайди, фақат Кавказ, Шарқий ва Марказий Осиё ҳудудлари вакиллари, шунингдек европаликлар ва осиёликларни умумий қиёфа асосида ажрата олади. Жиноятларнинг очилишига доир умумий статистика эса йил охирида тақдим этилиши айтилган.

Ушбу масала жамоатчиликда тортишувларга сабаб бўлмоқда. Яқинда ижтимоий тармоқларда бир йўловчининг ўзбек таксичига нисбатан “сенлар россияликларни қулисан” деган ҳақоратли гаплари кенг муҳокама қилинди. Шунга қарамай, Ўзбекистон Ташқи ишлар вазирлиги ҳолат юзасидан ҳали муносабат билдиргани йўқ.

Telegram I Facebook I YouTube I Instagram

Фуқаролар учун хорижда ишлашга йўналтирувчи мобил илова ишга туширилди

Фуқаролар энди махсус мобил илова орқали хорижда ишлаш истагини билдириши, касб ва чет тилларини ўрганиш учун мурожаат қилиши мумкин. Шунингдек, ушбу платформа орқали чет элга қонуний тартибда ишлаш учун кетиш бўйича ҳам ариза қолдириш имконияти яратилган.

Бундан ташқари, фойдаланувчилар маҳалла еттилигига ўзларининг бошқа турдаги мурожаатларини ҳам илова орқали юборишлари мумкин.

Батафсил видеода☝️☝️☝️

Telegram I Facebook I YouTube I Instagram

"Ўзбекистон фуқаролари дунёнинг исталган нуқтасида бўлишидан қатъий назар давлат ҳимоясида" – ТИВ

Бир муддат олдин ижтимоий тармоқларда бир йўловчининг ўзбек таксичига русчада “сенлар россияликларни қулисан” деб ҳақорат қилгани кенг муҳокамаларга сабаб бўлгани ва ҳолатга тегишли ташкилотлар ҳеч қандай изоҳ бермагани ҳақида хабар берилганди. Ташқи ишлар вазирлиги матбуот котиби ушбу ҳолатга муносабат билдирди.

Баёнотда таъкидланишича, Ўзбекистон Конституцияси, миллий қонунлар ва халқаро ҳуқуқ нормаларига кўра, фуқаролар дунёнинг исталган нуқтасида бўлишидан қатъий назар давлат ҳимоясида ҳисобланади.

Вазирлик фуқароларнинг хорижда ҳуқуқлари ёки қадр-қиммати бузилган ҳолатда, аввало қабул қилувчи давлатнинг ҳуқуқ-тартибот органларига мурожаат қилиш зарурлигини, шунингдек, Ўзбекистоннинг дипломатик ваколатхоналари ва консуллик муассасалари ҳам ҳуқуқий ва консуллик ёрдами кўрсатишга тайёр эканини билдирди.

Шу билан бирга, фуқароларни хорижда ҳимоя қилиш давлат сиёсатининг муҳим йўналиши экани ва бу масъулият давлатнинг ўз фуқаролари олдидаги мажбуриятлари асосида амалга оширилиши яна бир бор эслатиб ўтилди.

Фуқароларимизни хорижда ҳимоя қилиш давлат сиёсатининг муҳим йўналиши эканини ҳамда бу масъулият давлатнинг ўз фуқаролари олдидаги мажбуриятлари асосида амалга оширилишини яна бир бор эслатиб таъкидлаймиз,

дейилади расмий баёнотда.

Telegram I Facebook I YouTube I Instagram

⚡️Ўзбекистон президенти мустақиллик байрами арафасида 523 нафар маҳкумни афв этди

Ўзбекистон мустақиллигининг 34 йиллиги муносабати билан Президент Шавкат Мирзиёев жазони ўтаётган, қилмишидан чин кўнгилдан пушаймон бўлган ва тузалиш йўлига ўтган шахсларни афв этиш тўғрисидаги фармонни имзолади. Бу ҳақда Ўзбекистон 24 телеканали хабар берди.

Фармонга кўра, жами 523 нафар маҳкум афв этилди. Улардан 195 нафари жазодан тўлиқ озод қилинган бўлса, 147 нафари муддатидан аввал шартли равишда озод этилди. Шунингдек, 87 нафар маҳкумнинг жазоси енгилроқ турдаги жазо билан алмаштирилди, яна 94 нафарига нисбатан қамоқ муддати қисқартирилди.

Афв этилганлар орасида 45 нафар аёл, 60 ёшдан ошган 31 киши, 30 ёшгача бўлган 220 нафар шахс, жумладан бир вояга етмаган ҳам бор. Шунингдек, Тожикистондан 6, Серра-Леонедан 1 нафарни ўз ичига олган 8 нафар хорижлик ҳам қамраб олинган. Афв этилганлар орасида тақиқланган ташкилотлар фаолиятида иштирок этган 15 киши ҳам мавжуд.

Расмий маълумотда таъкидланишича, афв этиш акти содир этилган жиноят фактини бекор қилмайди, балки айбини англаб, қилмишидан пушаймон бўлган ва тузалиш истагини намоён этган шахслар учун янги имконият ҳисобланади.

Фармон ижроси доирасида прокуратура ва тегишли идоралар озод этилганларни яшаш жойига етказиш ишларини ташкил этмоқда. Шунингдек, хорижлик маҳкумлар белгиланган тартибда ўз юртларига депортация қилинади.

Telegram I Facebook I YouTube I Instagram

Ўзбекистоннинг доимий аҳолиси сони 38 миллиондан ошди

Миллий статистика қўмитаси маълумотларига кўра, Ўзбекистонда доимий аҳоли сони 28 август ҳолатига 38 миллионни ташкил этмоқда.

Шундан, эркаклар 19,1 млн нафарни, аёллар эса 18,8 млн нафарни ташкил қилмоқда.

Ўзбекистоннинг доимий аҳолиси сонида эркаклар сони аёлларга нисбатан 273 600 нафарга кўп.

Маълумот ўрнида, 2024 йилнинг 24 апрель куни мамлакатимиз доимий аҳолиси сони 37 миллионга етган эди.

Telegram I Facebook I YouTube I Instagram