Академик лицейларга кириш тест синовлари санаси ва вақти маълум бўлди

2025 йил 24 июль — тест синовлари республиканинг барча ҳудудларида, 25 июль — Тошкент шаҳрида махсус белгиланган ҳудудларда ўтказилади.

Тест синовлари икки сменада ўтказилади:
🔹 Биринчи смена — соат 09:00;
🔹 Иккинчи смена — соат 15:00.

Эслатма: Абитуриентлар тест синови ўтказиладиган ҳудудга камидан 1,5 соат олдин, шахсини тасдиқловчи ҳужжат ва рухсатнома билан келишлари талаб этилади.

Синов ўтказиладиган манзил рухсатномада кўрсатилган бўлади.

Telegram I Facebook I YouTube I Instagram

⚡️Бир қанча фуқароларнинг норозилигига сабабчи бўлган – Askiya City офиси мухрланди. Ўзида қўшимча калит мавжуд эмаслигини айтган компания вакили бир неча соатдан сўнг терговчининг мухрлаш қоғозини «йиртиб», офисни рухсатсиз очди

Аввалроқ, Askiya City'дан жабр чеккан фуқаролар ДХХга мурожаат йўллаши ортидан МЧЖ мансабдорларига нисбатан жиноят иши қўзғатилгани тўғрисида хабар берган эдик.

Ҳолат юзасидан, Яккасарой туман ИИО ФМБ ҳузуридаги тергов бўлими томонидан 23 апрель куни «Insoft Invest» МЧЖ мансабдор шахслари ва бошқаларга нисбатан жиноят кодексининг 168-моддаси 4-қисми (жуда кўп миқдорда фирибгарлик) «а» банди билан жиноят иши очилган.

Аниқланишича, «Insoft Invest» МЧЖ мансабдор шахслари томонидан харидорлар билан тузилган шартнома шартлари вақтида бажарилмаган. Шунга кўра, ишни олиб бораётган тергов гуруҳи ходими майор Турғунов томонидан 19 июль куни компаниянинг Яккасарой ҳудудидаги офиси мухрланган.

Терговчи мухрлаш жараёнида компания ходими Мўмин Бобожоновдан унда бошқа калит бор ёки йўқлигини сўраган. Бобожонов бунга жавобан «йўқ» дея жавоб берган, аммо унинг ўзи бироз вақт ўтиб, терговчининг ҳатти-ҳаракатлари нотўғри эканлигини айтиб, офисни ўзбошимчалик билан рухсатсиз очишга эришган. Ваҳоланки, мухрлангани тасвирланган оқ қоғозда «жиноят иши якунига қадар очилмасин», сўзлари ёзилган эди.

Effect.uz билан гаплашган манба, Askiya City қурилиш компанияси мансабдорлари «тепадаги танишлари» орқали, терговга аралашаётган бўлиши мумкинлигини қайд этди.

Шуни қайд этиш керакки, иш юзасидан жабрланувчи сифатида эътироф этилиб, фуқаровий даъвогар ҳисобида тергов органида аллақачон рўйхатдан ўтказилган.

Маълумот ўрнида, «Insoft Invest» МЧЖ директори ҳам таъсисчиси Азизбек Очилов бўлиб, 2017 йилда давлат рўйхатидан ўтказилган жамиятга бошқа шахсларнинг ҳам норасмий таъсири борлиги айтилади. Аммо уларнинг кимлиги ёки тергов ишига жалб қилингани ҳозирча номаълум. Ички ишлар вазирлигидан ҳолат бўйича расмий муносабат сўралади.

Telegram I Facebook I YouTube I Instagram

Ўзбекистонда 3500 нафар она фарзанди учун алимент тўламоқда

Ўзбекистонда фарзандини моддий қўллаб-қувватлаш мақсадида 3500 нафар онага нисбатан алимент ундирилиши бўйича ижро ҳужжатлари мавжуд. Бу ҳақда Мажбурий ижро бюроси матбуот котиби Фаррух Тошпўлатов маълум қилди.

Унинг таъкидлашича, 2018 йилда алимент ва моддий таъминот билан боғлиқ жами 240 мингта ижро ҳужжати мавжуд бўлган бўлса, 2025 йилда бу кўрсаткич 348 мингтага етган. Бу эса сўнгги етти йилда мазкур тоифадаги ишлар сони 45 фоизга кўпайганини англатади.

Айни пайтда МИБ органлари иш юритувида 348 мингдан зиёд алимент ва моддий таъминот бўйича ҳужжатлар мавжуд. Ҳар бир давлат ижрочиси ойига ўртача 147 та шундай иш билан шуғулланмоқда. Шулардан 3500 таси — она шахсига нисбатан алимент ундирувига тааллуқлидир.

Статистикага кўра, аёллар томонидан алимент тўлаш ҳолатлари бўйича энг юқори кўрсаткич Самарқанд вилоятига тўғри келади. Кейингги ўринларда эса Фарғона, Сурхондарё ва Андижон вилоятлари қайд этилган.

Telegram I Facebook I YouTube I Instagram

Судлар томонидан оқланганлар сони кескин қисқарди: 2025 йилнинг биринчи ярмида энг паст кўрсаткич қайд этилди

2025 йилнинг январь-июнь ойларида Ўзбекистонда судлар томонидан оқланган ва реабилитация қилинган шахслар сони 204 нафарни ташкил этди. Бу ўтган йилнинг шу даврига нисбатан 2,5 баробар кам кўрсаткич ҳисобланади — 2024 йилнинг биринчи ярмида 465 киши оқланган эди.

Сўнгги йиллар статистикасига қаралса, 2023 йилнинг илк ярмида 564 нафар, 2022 йилда эса 468 нафар шахс оқланган. Шу билан бирга, 2024 йил умумий ҳисобда 723 нафар оқланган шахс билан сўнгги етти йил ичидаги энг паст кўрсаткични қайд этди.

2025 йил бошидаги маълумотлар ушбу пасайиш тенденцияси давом этаётганини кўрсатмоқда.

2017 йилдан 2023 йилгача бўлган давр мобайнида Ўзбекистонда судлар томонидан жами 6 679 нафар фуқаро оқланган. Бу йиллар кесимида қуйидагича тақсимланган:

2017 йил — 263 киши

2018 йил — 867 киши

2019 йил — 859 киши

2020 йил — 781 киши

2021 йил — 932 киши

2022 йил — 1 010 киши

2023 йил — 1 244 киши.

Мазкур маълумотлар суд-ҳуқуқ тизимида оқлаш ҳолатлари йил сайин камайиб бораётганини кўрсатади. Бу ўзгаришлар қандай сабаблар билан боғлиқ экани юзасидан расмий изоҳ берилмаган.

Telegram I Facebook I YouTube I Instagram

2025 йилда хотин-қизлар учун 4 000 та грант ажратилади

Президент фармойишига асосан, Олий таълим, фан ва инновациялар вазирлиги 2025–2026 ўқув йили учун давлат грантлари тақсимоти бўйича бир қатор таклифларни Давлат комиссиясига тақдим этади.

Таклиф этилаётган йўналишлар қуйидагиларни ўз ичига олади:

🔹 Республикада фаолият юритаётган хорижий олий таълим муассасалари, уларнинг филиаллари ва нодавлат ОТМлар учун ажратилган 1 320 та давлат грантини тақсимлаш тартиби;
🔹 Хорижда истиқомат қилаётган ёш ватандошлар учун давлат олий таълим муассасаларида таълим олиш имконини яратиш мақсадида 30 та давлат грантини таълим йўналишлари бўйича тақсимлаш;
🔹 Хотин-қизларни қўллаб-қувватлаш мақсадида Оила ва хотин-қизлар қўмитаси билан ҳамкорликда ажратиладиган 4 000 та давлат грантини мақсадли ва адолатли тақсимлаш тартиби;
🔹 Давлат буюртмаси асосида талабаларни қабул қилиш истагида бўлган нодавлат ОТМлар рўйхатини шакллантириш;
🔹 2025–2026 ўқув йили учун таълим шакллари ва тиллари кесимида умумий қабул параметрлари бўйича ОТМлардан таклифларни қабул қилиш.

Ушбу ташаббус таълимда тенгликни таъминлаш, хотин-қизлар ва хориждаги ватандошлар учун янги имкониятлар яратишга хизмат қилади.

Telegram I Facebook I YouTube I Instagram

Хорижий тил ўқитувчиси жамиятнинг тенг ҳуқуқли аъзоси эмасми? Сертификат машмашасига қачон барҳам берилади?!

Ўзбекистонда чет тили ўқитувчилари учун В2 даражасидаги тил сертификатини мажбурий талаб этиш ҳақидаги қарор мамлакат бўйлаб кенг муҳокамаларга сабаб бўлмоқда. Ушбу талабни янги ўқув йилидан кучга киритилиши эълон қилингач, бир гуруҳ ўқитувчилар бош вазир, бош прокурор, Адлия вазири, Халқ таълими вазири ва Касаба уюшмалари федерацияси раҳбарларига мурожаат билан чиқди. Улар бу қарор ортида инсон қадри, меҳнат ҳуқуқлари ва таълим тизимининг барқарорлигига оид жиддий саволлар ётганини таъкидлашмоқда.

“4 йил ўқидик, бу ихтиёрий бўлиши керак, пул ишлаш манбайи эмас. Сертификат дипломдан устун бўлиши мумкинми?... Ва бу нега фақат чет тили ўқитувчиларида? Ҳозир ҳамма фанда даража сертификат имтиҳони бор, лекин уларда бу сертификат натижаси аҳамиятсиз. Усиз ҳам диплом билан бемалол ишлайверади. Чет тили ўқитувчилари эса бусиз ишлолмайди. Нега? Биз демократик жамиятнинг тенг ҳуқуқли фуқаросимасмизми?”

дейилади мурожаатда.

https://effect.uz/uz/6482

Telegram I Facebook I YouTube I Instagram

Ўзбекистонда 4 ва 5 қаватли уйларга лифт ўрнатиш режалаштирилмоқда

2025 йил 8 июль куни Ахборот ва оммавий коммуникациялар агентлигида бўлиб ўтган матбуот анжуманида Қурилиш ва уй-жой коммунал хўжалиги вазирлиги томонидан 4 ва 5 қаватли уйларга лифт ўрнатиш бўйича махсус дастур ишлаб чиқилаётгани маълум қилинди.

Вазирлик бўлим бошлиғи Азиз Халилов маълум қилишича, мамлакатда ҳозирда 14 637 та тўрт қаватли ва 7541 та беш қаватли турар жой биноси мавжуд. Шу муносабат билан халқаро тажриба ўрганилган.

«Мутахассисларимиз беш қаватли уйларга лифт ўрнатиш амалиётини хорижий мамлакатлар мисолида таҳлил қилдилар. Бу тажрибани мамлакатимизда жорий этиш юзасидан тегишли таклифлар ишлаб чиқилмоқда»,

— деди Халилов.

Қурилиш ва уй-жой коммунал хўжалиги вазири ўринбосари Озода Жўраева ҳам мазкур йўналишда иш олиб борилаётганини тасдиқлади. Унинг таъкидлашича, айниқса ногиронлиги бўлган фуқаролардан ушбу масалада кўплаб мурожаатлар келиб тушмоқда.

Дастур доирасида, авваламбор, амалдаги лифт тизимини янгилашга алоҳида эътибор қаратилмоқда. Халиловнинг сўзларига кўра, ҳукумат қарорига асосан мамлакат бўйлаб 5491 та кўп қаватли уйдаги 13 798 та лифт инвентаризация қилинди. Текширув натижасида 2001 та лифт фойдаланиш муддати тугагани боис алмаштирилиши, 382 та лифт таъмирталаб экани аниқланган.

«Лифт тизимини янгилаш ишлари учун маҳаллий бюджетлардан 854,6 миллиард сўм ажратилиши режалаштирилган»,

— дея маълум қилди Азиз Халилов.

Шундан сўнггина 4 ва 5 қаватли уйларга лифт ўрнатиш ишлари амалга оширилади. Бундай ташаббус халқаро амалиётда кенг тарқалган бўлиб, Австрия, Германия, Финляндия, Эстония каби мамлакатлар мисолида ҳам кузатиш мумкин.

Telegram I Facebook I YouTube I Instagram

Учтепада 64-автобус ёниб кетди

20 июл куни соат 12:44 да Тошкент шаҳар Учтепа тумани Бирлик мавзесида автобусда ёнғин содир бўлаётгани тўғрисида Тошкент шаҳар ФВБга хабар келиб тушган.

Ёнғин-қутқарув  экипажлари айтилган манзилга соат 12:50 да етиб бориб, ёнғин соат 12:53 да ўчирилди.

Айтилган манзилда 18-автосаройга қарашли 64-рақамли автобус ёниб зарарлангани аниқланди.

Ҳодиса оқибатида жабрланганлар йўқ.

Telegram I Facebook I YouTube I Instagram

Абдуқодир Ҳусанов – АПЛнинг энг тезкор футболчилари қаторида

Ўзбекистон миллий терма жамоаси аъзоси ва “Манчестер Сити” клуби ҳимоячиси Абдуқодир Ҳусанов 2024/25 йилги мавсумда Англия Премьер Лигасининг энг тезкор футболчилари рўйхатига кирди. Give Me Sport нашри эълон қилган маълумотларга кўра, Ҳусанов соатига 36,27 километр тезлик билан 8-ўринни эгаллаган. Бу кўрсаткич “Ноттингем Форест”га қарши 28-тур доирасидаги ўйинда қайд этилган.

Таъкидлаш жоизки, ўтган мавсумда АПЛдаги энг юқори тезликни “Тоттенҳэм” ҳимоячиси Микки ван де Вен қайд этган — 37,38 км/соат. Ундан сўнгги ўринларда “Ньюкасл”нинг швециялик янги аъзоси Энтони Эланга (36,65 км/соат) ва “Брентфорд” вингери Брайан Мбеумо (36,65 км/соат) жойлашган.

Англия Премьер Лигасининг энг тезкор 10 футболчиси (2024/25 мавсум):

1. Микки ван де Вен (“Тоттенҳэм”) — 37,38 км/соат

2. Энтони Эланга (“Ньюкасл” / “Ноттингем Форест”) — 36,65 км/соат

3. Брайан Мбеумо (“Брентфорд”) — 36,65 км/соат

4. Карлос Боржес (“Вулверхэмптон” / “Аякс”) — 36,58 км/соат

5. Янкуба Минте (“Брайтон”) — 36,40 км/соат

6. Уилсон Одобер (“Тоттенҳэм”) — 36,36 км/соат

7. Абдуқодир Ҳусанов (“Манчестер Сити”) — 36,27 км/соат

8. Эммануэл Агбаду (“Вулверхэмптон”) — 36,15 км/соат

9. Эрлинг Ҳоланд (“Манчестер Сити”) — 36,01 км/соат

10. Маркус Рэшфорд (“Манчестер Юнайтед”) — 35,35 км/соат

Маълумот учун, Абдуқодир Ҳусанов 2025 йил қишки трансфер ойнасида Франциянинг “Ланс” жамоасидан “Манчестер Сити” сафига қўшилган эди. У инглиз гранди сафида Премьер Лигада 6 та учрашувда майдонга тушган, шунингдек, Англия Кубоги (2 ўйин), Чемпионлар Лигаси ва Клублар ўртасидаги жаҳон чемпионатида ҳам бир марталик иштирок қайд этган.

Ҳозирда Ҳусановнинг “Манчестер Сити” билан тузган шартномаси 2029 йил ёзигача амал қилади. Transfermarkt портали маълумотларига кўра, футболчининг бозор қиймати 35 миллион еврога баҳоланган.

Telegram I Facebook I YouTube I Instagram

Академик лицейларга кириш тест синовлари ўтказилиш санаси ва вақти аниқ бўлди

Академик лицейларга кириш тест синовлари ўтказилиш санаси ва вақти аниқ бўлди. Бу ҳақида Таълим назорати Telegram-каналида маълум қилинди.

👉 https://effect.uz/6483

Telegram I Facebook I YouTube I Instagram

Тошкентда «Lacetti» ва «Tracker» тўқнашуви оқибатида бир нафар пиёда вафот этди

Мазкур ҳолат юзасидан Ички ишлар бош бошқармаси муносабат билдирди.

👉 https://effect.uz/6484

Telegram I Facebook I YouTube I Instagram

Юлдуз Усмонованинг қўшиғини куйлаган хонанда жаримага тортилди

Бу ҳақда Адлия вазирлиги хабар берди.

👉 https://effect.uz/6485

Telegram I Facebook I YouTube I Instagram

Солиқ қоидабузарликлари ҳақида хабар қилган фуқароларга 17,7 млрд сўм мукофот тўланди

Ўзбекистонда солиқ қонунчилигини бузган ҳолатлар ҳақида хабар берган фуқароларга 2025 йилнинг биринчи ярми давомида умумий ҳисобда 17,7 миллиард сўм мукофот пули тўлаб берилди. Бу ҳақда Давлат солиқ қўмитаси маълум қилди.

Маълумотларга кўра, жорий йилнинг январь-июнь ойларида “Солиқ ҳамкор” мобил иловаси орқали 54 401 та мурожаат қабул қилинган. Улардан:

49 015 таси — харид чеки бермаслик ҳолати,

1 898 таси — тўловни пластик карта орқали қабул қилмаслик,

126 таси — карта орқали тўловда нархни асоссиз равишда ошириш,

3 362 таси — бошқа турдаги қоидабузарликларга оид бўлган.

Тушган мурожаатларнинг 26 155 таси такрорий бўлгани ёки ҳозирда текширув жараёнида экани боис ҳали кўриб чиқилмаган. Аммо 21 702 та ҳолат бўйича сайёр солиқ текширувлари амалга оширилган ва уларнинг 99,1 фоизида қонунбузарликлар тасдиқланган.

Натижада, 24 762 та мурожаат асосида фуқароларга жами 17,7 миллиард сўм мукофот пули тўланди. Қонунчиликка кўра, аниқланган қоидабузарлик учун тўланган жарима суммасининг 20 фоизи хабар берган шахсга мукофот сифатида берилади.

Энг кўп мукофот Тошкент шаҳар фуқароларига тўланган — 4 млрд 279 млн 500 минг сўм, энг кам мукофот эса Жиззах вилояти фуқароларига — 512 млн сўм миқдорида.

Шунингдек, солиқдан ташқари соҳаларда ҳам фуқароларнинг ҳуқуқбузарликлар ҳақидаги фаоллиги қўллаб-қувватланади. Жумладан, сув, электр ва газдан ноқонуний фойдаланиш, ер участкаларини ўзбошимчалик билан эгаллаш ёки дарахтларни ноқонуний кесиш ҳолатлари ҳақида фото ва видео материаллар тақдим этган фуқароларга ҳам мукофот тўлаш амалиёти мавжуд.

Telegram I Facebook I YouTube I Instagram

Талабаларни ўқишга қабул қилиш “аввал тест, сўнг танлов” тамойилига мувофиқлаштирилади

Президент фармони билан президентнинг айрим ҳужжатларига ўзгартиришлар киритилди.

Фармон билан киритилган ўзгартиришларга кўра, Тошкент шаҳридаги Турин политехника университетида талабаларни Турин политехника университети (Италия Республикаси) ўқув режа ва дастурлари билан бир қаторда бошқа илғор хорижий олий таълим ташкилотларининг ҳам ўқув режа ва дастурлари асосида ўқитиш тизими жорий қилинади.

Шунингдек, олий таълим ташкилотларининг бакалавриат таълим йўналишларига ўқишга қабул қилиш жараёнлари “аввал тест, сўнг танлов” тамойилига мувофиқлаштирилади.

Telegram I Facebook I YouTube I Instagram

"Молиявий хизматлар рекламаcида аниқ ва тўлиқ маълумот бўлиши шарт" — Рақобат қўмитаси

Рақобат қўмитаси молиявий хизматларга оид рекламаларда истеъмолчилар ҳуқуқларини бузадиган ҳолатлар ҳануз кузатилаётганини маълум қилди.

Мониторинг натижасига кўра, айрим рекламаларда банк кредит ва омонатлари бўйича фоиз ставкалари, шартлар, қўшимча тўловлар каби муҳим маълумотлар умуман кўрсатилмаяпти ёки чалғитувчи тарзда берилмоқда.

“Реклама тўғрисида”ги қонунга кўра, бундай реклама:

аниқ ва тўлиқ бўлиши,

шартномаларнинг муҳим шартларини очиб бериши,

истеъмолчини чалғитмаслиги лозим.

Шунингдек, рекламада ўқиш қийин бўлган шрифтлар, яширин матнлар ёки бошқа ташкилотлар номи орқали чалғитишга йўл қўйилмаслиги шарт.

Рақобат қўмитаси истеъмолчиларни нотўғри ахборотдан ҳимоя қилиш мақсадида қонунбузарларга нисбатан молиявий санкциялар қўлланилиши мумкинлигини эслатади.

Telegram I Facebook I YouTube I Instagram