Жаҳонда матбуот эркинлиги кўрсаткичлари пасаймоқда

Бу йилги Жаҳон Матбуот эркинлиги индексида журналистлар ва оммавий ахборот воситаларининг молиявий ҳолати эркинлигига таҳдид солувчи асосий омиллардан бири сифатида кўрсатилди. Индексда таъкидланишича, бугунги ахборот воситалари таҳририят мустақиллигини сақлаб қолиш ва иқтисодий омон қолиш ўртасидаги танлов остида кун кечирмоқда.

Индекснинг молиявий кўрсаткичи бир йил ичида икки баллдан ортиқ пасайгани, шунингдек, хавфсизлик, ижтимоий, сиёсий ва ҳуқуқий ҳолатни ўлчовчи бошқа кичик индекслар ҳам 2024 йилдан бери маълум даражада ёмонлашгани сабаб, 2025 йилда умумий индекс илк бор "мураккаб" ҳолатга тушиб қолди.

"Матбуот молиявий мустақилликсиз эркин бўлиши мумкин эмас. Оммавий ахборот воситалари молиявий жиҳатдан қийин аҳволда бўлса, улар аудиторияни жалб қилиш пойгасига тортилади", дейди Чегара билмас мухбирлар таҳририят директори Анна Боканде. Ҳисоботга киритилган 180 мамлакатдан 160 тасида ОАВ молиявий барқарорликка "қийинчилик билан" ёки "умуман" эриша олмаганини маълум қилган. Барча мамлакатларнинг учдан бирида муҳим ахборот агентликлари ёпилгани қайд этилган, яъни бу ҳолат ҳам ривожланаётган, ҳам ривожланган мамлакатларда кузатилган.

Журналистлар учун хавфсизлик, ижтимоий ва ҳуқуқий муҳитнинг ўртача жаҳон кўрсаткичлари 58–67 балл оралиғида бўлиб, бу "мураккаб эмас" дея баҳоланади (55 баллдан паст кўрсаткич вазиятнинг мураккаблигини англатади). Шу билан бирга, оммавий ахборот воситаларининг сиёсий муҳити ўтган йилдан бери "мураккаб" деб баҳоланмоқда, иқтисодий ҳолат эса ундан ҳам аввал шундай ҳолга тушган. Аммо 2025 йилда у янада ёмонлашиб, рекорд даражада — 44.1 баллгача пасайди.

Telegram I Facebook I YouTube I Instagram

Яккасарой ҳокими ва BEUN компанияси Қурбон ҳайит байрамида эҳтиёжманд оилалар аҳволидан хабар олди

BEUN – Dermatological Cosmetics компанияси томонидан Муборак Қурбон ҳайити байрамида Яккасарой тумани ҳокими Нилуфар Аллаберганова билан биргаликда саховат тадбирларини ўтказди. Эҳтиёжманд оилалар молиявий тарафдан қўллаб-қувватланди.

«Ҳар бир ғамхўрлик ишораси, ҳар бир самимий дуо бизга асосий нарсани эслатди – жамиятнинг кучи бирликда, ишонч эса эзгуликда. Ҳар бир хонадон меҳр-шафқатга, кўнгиллар нур ва муҳаббатга тўла бўлсин. Байрам муборак азиз дўстлар!», дейилади компания табригида.

Telegram I Facebook I YouTube I Instagram

Яшил ҳудудлар ҳолати ўрганилди

2025 йил 5 июнь куни Навоий шаҳар ҳокими Дилмурод Эргашев раҳбарлигида шаҳар ҳокими ўринбосари Азимжон Ёрқулов, маҳалла ва БСК раҳбарлари, шунингдек, мутасадди ташкилотлар иштирокида “Янгиҳаёт” ва “Меъмор” маҳаллаларида амалга оширилаётган ободонлаштириш, кўкаламзорлаштириш ҳамда қурилиш-таъмирлаш ишлари ҳолати ўрганилди.

Жойига чиқилган ҳолда ўрганиш жараёнида кўплаб камчилик ва муаммолар аниқланди. Хусусан, маҳалладаги манзарали дарахтларга парвариш ва шакл бериш ишлари етарли даражада олиб борилмаётгани, айрим дарахтлар суғорилмаётгани сабабли қуриб бораётгани қайд этилди.

Шунингдек, яшил майдонлар ўрнида турли инфратузилма объектлари (автотураргоҳ, дўкон ва бошқалар) барпо этилгани, суғориш тизимининг ишламаётгани ҳамда қурилиш ва таъмирлаш ишлари режасиз ва паст сифатда олиб борилаётгани маълум бўлди.

Ўрганиш давомида шаҳар ҳокими томонидан қатор саволлар кўтарилди:
“Ким бунга рухсат берган? Қандай ҳужжат асосида? Бу ишлар учун ким жавобгар?” деган сўзлар билан масъуллардан аниқлик талаб қилинди.

Аниқланган камчиликлар юзасидан тегишли ташкилотлар раҳбарларига аниқ ва муддатли топшириқлар берилди. Жумладан:

дарахтларни мунтазам суғориш, уларни кесиш эмас, асраш ва парвариш қилишни таъминлаш;

яшил ҳудудларни ноқонуний ўзлаштириш ҳолатларига нисбатан ҳуқуқий чоралар кўриш;

барча қурилиш ишларини аниқ режа, белгиланган стандарт ва жамоатчилик назорати асосида амалга ошириш лозимлиги таъкидланди.

Шаҳар ҳокимлиги томонидан Навоий шаҳрини замонавий, қулай ва экологик тоза масканга айлантириш борасида тизимли ва манзилли ишлар давом эттирилади. Шу муносабат билан аҳолининг фаол иштироки ва жамоавий масъулияти ҳам муҳим аҳамият касб этади.

Telegram I Facebook I YouTube I Instagram

“Қамчиқ” довонида содир бўлган ҳолат бартараф этилди – Фавқулодда вазиятлар вазирлиги

Бугун, 7 июн куни соат 17:04 да “Қамчиқ” довони ҳудудидан ўтувчи А-373 “Тошкент-Ўш” автомобиль йўлининг 137,7 километрида “Водий-Тошкент” йўналишида кучли ёмғир ёғиши оқибатида тоғ ёнбағридан маълум миқдорда сел, тошқин сувлари автомобиль йўлига оқиб тушганлиги бўйича навбатчилик қисмига хабар тушган.

Воқеа жойига “Қамчиқ” махсус қидирув ёнғин-қутқарув бошқармасининг қутқарувчилари ва бошқа ҳамкор ташкилотлар етиб борган. Тирбандликларни олдини олиш мақсадида Тошкент-Водий-Тошкент йўналишида автомобиллар вақтинчалик йўлнинг бир тасмаси орқали ҳаракат қилган.

Айни пайтда "Қамчиқ" довонида содир бўлган ҳолат тўлиқ бартараф этилган. Автомобилларнинг икки томонлама ҳаракати давом эттирилмоқда.

Telegram I Facebook I YouTube I Instagram

Бухорода катта тантана ва байрам, бизнинг паловимизни бутун дунё тан олган – Ботир Зарипов

Бухоро вилоят ҳокими Ботир Зарипов «Ипак ва зираворлар» халқаро фестивали доирасида ўтказилаётган палов сайлида иштирок этиб, ташриф буюрганларни самимий қутлади.

Telegram I Facebook I YouTube I Instagram

Панжара ортидаги чақалоқ ва она…

Инсон ҳуқуқлари фаоли Абдураҳмон Ташанов Фарғонадаги суд залидаги панжара ортида қўлида гўдак билан тасвирланган видеолавҳани бўлишиб, шундай фикр билдирди.

Қонун олдида таслим бўлайлик! Сиз тасвирда кўраётган жараённи улашишга иккиландим. Бобом: "Ялқовдан анқов ёмон" дерди. Ҳақиқатан анқовнинг, фаҳмсизнинг касофати кўпчиликка уради: катта эҳтимол билан болани панжара ортига киритишга "раҳмдил" конвой ходимлари рухсат беришган.

Видео бугун Фарғона судларидан биридан олинди. Аёлнинг нима билан айбланаётгани, унинг кейинги тақдири унчалик муҳиммас, бу кунда бўладиган ҳодиса. Аммо панжара ортида чақалоқ нима қиляпти?

Қарашлари юксак, ўзини ҳурмат қиладиган онгли жамият бу ҳолга бефарқ бўлмайди. Қонуннинг бузилгани бир тараф, масаланинг жамият ахлоқий жиҳатларига тааллуқли қисми, менимча, жуда-жуда муҳимдир.

Болалар Омбудсмани бу ҳолни изоҳлаши, мурғак гўдакнинг панжара ортига ўтказилганини кескин қоралаши керак. Ҳеч бир восита бу тасвирдаги дилхираликни оқламайди.

Telegram I Facebook I YouTube I Instagram

Метронинг айрим қисми вақтинча ёпилди, ўрнига бепул автобус қатнайди

2025 йил 8 июндан Тошкент метрополитенининг ер усти ҳалқа йўналишидаги "Қурувчилар" ва "Қипчоқ" бекатлари оралиғида поездлар ҳаракати профилактика ишлари туфайли вақтинча тўхтатилди. Бу ҳақда “Тошшаҳартрансхизмат” АЖ ахборот хизмати хабар берди.

Йўловчилар учун қулайлик яратиш мақсадида ушбу оралиқда 1М рақамли автобус қатнови ташкил этилди. Автобуслар ҳар куни соат 5:00 дан 23:00 гача ишлаб, йўловчиларни бепул ташийди.

Автобусларга чиқиш ва тушиш фақат метро станциялари ҳудудида амалга оширилади. Поезд ҳаракати қачон тикланиши ҳозирча номаълум.

Telegram I Facebook I YouTube I Instagram

Эҳтиёжманд оилаларга газ ва электр учун компенсация — аризалар қабул қилиш бошланди

2025 йил 1 майдан бошлаб эҳтиёжманд оилаларга газ ва электр энергияси учун йил давомида компенсация тўлаб берилади. Энди тўловлар фақат қишда эмас, ҳар ойда амалга оширилади.

Ариза топшириш 1 июндан бошланди.

➖ Компенсация ижтимоий ҳимоя ва Камбағаллик реестридаги оилалар (ойлик даромад ҳар бир аъзога 669 минг сўмдан кам бўлса);
➖ Реестрда бўлмаган, лекин мол-мулки кам ва ойлик даромади ҳар бир аъзога 1 млн сўмдан кам бўлган оилаларга берилади.

Telegram I Facebook I YouTube I Instagram

Словакия бош вазири расмий ташриф билан Ўзбекистонда бўлади

Ўзбекистон Республикаси президенти Шавкат Мирзиёев таклифига биноан Словакия Республикаси бош вазири Роберт Фицо 8-10 июнь кунлари расмий ташриф билан мамлакатимизда бўлади.

Ташриф дастурига мувофиқ, Тошкент шаҳрида олий даражадаги музокаралар бўлиб ўтади, Ўзбекистон-Словакия кўп қиррали ҳамкорлигини янада ривожлантириш масалалари муҳокама қилинади.

Устувор йўналишлар - савдо, инвестиция ва инновациялар, қишлоқ хўжалиги, саноат, энергетика, туризм соҳаларида шерикликни кенгайтиришга алоҳида эътибор қаратилади. Ташкиллаштирилган меҳнат миграцияси, маданий-гуманитар ва таълим соҳаларидаги ҳамкорлик масалалари кўриб чиқилади. Халқаро аҳамиятга молик масалалар, жумладан, кўп томонлама майдонларда ўзаро қўллаб-қувватлаш юзасидан фикр алмашилади.

Етакчиларнинг учрашуви якунида Ўзбекистон билан Словакия ўртасидаги ўзаро манфаатли ҳамкорликни ривожлантиришга қаратилган ҳужжатлар имзоланиши кўзда тутилган.

Ташриф доирасида Словакия Бош вазири Роберт Фицо IV Тошкент халқаро инвестиция форумида ҳам иштирок этади.

Telegram I Facebook I YouTube I Instagram

Навоийда маиший чиқинди йиғиш тарифлари оширилди

2025 йил 5 июндан бошлаб Навоий вилоятида маиший чиқиндиларни йиғиш ва ташиш хизматлари учун тўлов миқдори оширилди. Бу ҳақда халқ депутатлари вилоят кенгашининг қарорида баён этилган.

Қарорга мувофиқ, Навоий шаҳри ва Кармана туманида аҳоли учун чиқинди хизматлари нархи ҚҚСни ҳисобга олган ҳолда белгиланди. Жумладан:

Навоий шаҳрида ҳар бир фуқаро учун ойлик тўлов — 5800 сўм;

Кармана шаҳрида — 4950 сўмни ташкил этади.

Юридик шахслар учун эса икки ҳудудда ҳам тариф — 80 080 сўм этиб белгиланди (ҚҚС билан).

Telegram I Facebook I YouTube I Instagram

Панжара ортидаги чақалоқ: Она фарзандини васийлик ва ҳомийлик ташкилотига топширишни ҳоҳламаган

Аввалроқ Инсон ҳуқуқлари фаоли Абдураҳмон Ташанов Фарғонадаги суд залидаги панжара ортида қўлида гўдак билан тасвирланган видеолавҳани эълон қилган эди. Фарғона вилояти судлари ҳолат бўйича муносабат билдирди.

👉 https://effect.uz/6443

Telegram I Facebook I YouTube I Instagram

Москвада мигрантларга қарши катта рейд тадбирлари ўтказилмоқда

Москва шаҳрида яна кенг кўламли рейдлар бошланди. Россия полицияси томонидан ўтказилаётган бу текширувларда, ҳужжатларида камчилик бўлган меҳнат муҳожирлари оммавий равишда ушланмоқда.

Рейд вақтида ҳуқуқ-тартибот органлари ходимлари баъзи ҳолатларда зўравонлик ҳам қўлламоқда — тепкилаш, ҳақорат қилиш, ерга ётқизиб олиб кетиш ҳолатлари кузатилмоқда.

Ушланганлар орасида ўзбекистонликлар, қирғизлар, тожиклар ва қозоқлар ҳам бор.

Telegram I Facebook I YouTube I Instagram

Ўзбекистонда украиналик болалар учун дам олиш ва реабилитация дастури бошланди

Қурбон ҳайити арафасида Ўзбекистон ҳукумати кўмагида украиналик болалар Тошкентга етиб келди. Бу ҳақда Украина элчихонаси хабар берди.

Хабарга кўра, болалар Украинадаги жанговар ҳаракатлардан жабр кўрган Харьков, Херсон, Николаев, Запорожье, Суми, Хмельницкий, Львов ва Киев каби шаҳарлардан ташриф буюришган. Улар учун 12 кунлик дам олиш ва психологик тикланиш дастури режалаштирилган.

Ушбу ташаббус Украина элчихонасининг мурожаати асосида Ўзбекистон ҳукумати таклифи ва тўлиқ кўмаги билан амалга оширилмоқда. Ташкилотчиларнинг мақсади — болаларнинг руҳий мувозанатини тиклаш, уларни ҳар куниги ҳаво ҳужумлари ва ракета зарбаларидан чалғитиш орқали тинч дам олиш имконини яратиш.

Болалар ва уларнинг ҳамроҳлари Тошкент халқаро аэропортида тантанали тарзда кутиб олиниб, кейин Тян-Шан тоғлари етаксида жойлашган гўзал водийдаги оромгоҳга йўл олишди. Оромгоҳда илиқ ва самимий кутиб олиш маросими уюштирилди.

Ташриф дастури кенг қамровли бўлиб, унда Ўзбекистоннинг тегишли вазирлик ва идоралари фаол иштирок этмоқда. Ҳар куни болалар учун “Миллий қадриятлар куни”, “Спорт ва соғломлик куни” каби мавзули тадбирлар, ижодий танловлар ва экскурсиялар ташкил этилади.

Эслатиб ўтамиз, 2023 йилда ҳам Ўзбекистонга 45 нафар бола ва 5 нафар ҳамроҳ ташриф буюрган бўлиб, улар 12 кун давомида “Анор” тоғ оромгоҳида психологик тикланиш дастурида иштирок этган эди.

Telegram I Facebook I YouTube I Instagram

Колумбияда президентликка номзодга суиқасд: Мигель Урибе оғир аҳволда шифохонага ётқизилди

Колумбияда сайловолди митинги чоғида президентликка номзод Мигель Урибега суиқасд уюштирилди. Номаълум шахслар томонидан унга икки маротаба ўқ узилгани хабар қилинмоқда.

Ҳодиса митинг давомида кенг жамоатчилик иштирокида содир бўлди. Урибе бош қисмидан оғир жароҳат олиб, дарҳол шифокорлар назоратига олинди. Ҳозирда у шифохонада оғир, лекин барқарор аҳволда экани айтилмоқда.

Маълумотларга кўра, воқеа сайловларга оз вақт қолган бир пайтда содир бўлиши мамлакатда сиёсий вазият таранглашганини кўрсатмоқда. Ҳукумат ҳодисани қаттиқ қоралаб, суиқасдчиларни топиш ва жавобгарликка тортиш бўйича суриштирув бошланганини маълум қилди.

Мигель Урибе сўнгги пайтларда ўзининг ислоҳотчи дастури, коррупцияга қарши кураш ва хавфсизликни таъминлаш бўйича баёнотлари билан танилган эди. Унга қилинган ҳужум сиёсий мақсадларни кўзлаб уюштирилган бўлиши мумкинлиги ҳақида тахминлар билдирилмоқда.

Ҳозирча ҳужумчининг шахси ва унга тегишли маълумотлар расман ошкор қилинмаган. Тергов ишлари давом этмоқда.

Telegram I Facebook I YouTube I Instagram

Болгария президенти Румен Радев Ўзбекистонга расмий ташриф билан келади

Давлатимиз раҳбари таклифига биноан, Болгария Республикаси президенти Румен Радев 2025 йил 9–11 июнь кунлари Ўзбекистонга расмий ташриф амалга оширади.

Ушбу ташриф икки давлат ўртасидаги дўстона муносабатларни янада мустаҳкамлаш, ўзаро манфаатли ҳамкорликни кенгайтиришда муҳим қадам бўлиши кутилмоқда. Ташриф доирасида олий даражадаги музокаралар ўтказилиши, сиёсий, савдо-иқтисодий, маданий-гуманитар соҳалардаги ҳамкорликнинг долзарб масалалари муҳокама қилиниши режалаштирилган.

Шунингдек, икки мамлакат ўртасида ҳамкорликнинг янги йўналишларини белгилаб олиш, қатор муҳим икки томонлама ҳужжатларни имзолаш ҳам кўзда тутилган. Ташриф давомида президент Румен Радевнинг Ўзбекистон расмий доиралари ва бизнес ҳамжамияти вакиллари билан учрашувлари ҳам режалаштирилмоқда.

Ташриф икки давлат муносабатларини янги босқичга кўтаришга хизмат қилиши, стратегик шерикликни чуқурлаштиришга туртки бериши кутилмоқда.

Аввалроқ, Ўзбекистон Республикаси президенти Шавкат Мирзиёев таклифига биноан Словакия Республикаси бош вазири Роберт Фицо 8-10 июнь кунлари расмий ташриф билан мамлакатимизда бўлиши ҳақида хабар берилганди.

Telegram I Facebook I YouTube I Instagram

Тошкентда мотоцикл ва скутер тўқнашуви икки киши ҳаётига зомин бўлди

Тошкент шаҳри Сергели туманида мототранспорт воситалари иштирокида содир бўлган йўл-транспорт ҳодисаси икки ҳайдовчининг ҳалок бўлишига олиб келди. Бу ҳақда ИИББ Йўл ҳаракати хавфсизлиги бош бошқармаси хабар берди.

8 июнь куни соат 02:00 атрофида Файзли Тошкент кўчасида 26 ёшли Ш.Х. бошқарувидаги QJ Motors мотоцикли ва 25 ёшли М.З. бошқарувидаги Drongo скутери тўқнашиб кетган.

Тўқнашув натижасида ҳар икки ҳайдовчи оғир тан жароҳатлари сабаб ҳалок бўлган.

Ҳодиса юзасидан Жиноят кодексининг 266-моддаси 3-қисми бўйича жиноят иши қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram