2026 йил 4 ноябрь куни Масқат шаҳрида «Ўзбекистон — Ўмон: маданий алоқалар. Мовароуннаҳр — асрлар оша таралган ислом цивилизацияси зиёси» мавзусида халқаро симпозиум бўлиб ўтди. Ўзбекистон Республикаси Президенти Шавкат Мирзиёевнинг муаллифлик лойиҳаси бўлган Ўзбекистондаги Ислом цивилизацияси марказининг хорижий тақдимотлари доирасида ташкил этилган ушбу тадбир икки мамлакат ўртасидаги тарихий ва маънавий алоқаларни мустаҳкамлашда муҳим қадам бўлди.

Халқаро Кутубхоналар Ассоциациялари ва Муассасалари Федерацияси (IFLA) томонидан Жанубий Кореянинг Пусан шаҳрида ўтказилган Бутунжаҳон кутубхона ва ахборот конгрессида (WLIC 2026) 2026 йилги «Яшил кутубхона» мукофоти ғолиблари эълон қилинди. 27 мамлакатдан 62 та лойиҳа иштирок этган нуфузли танловнинг «Йирик кўламли лойиҳа» йўналишида Истанбулдаги тарихий Рами кутубхонаси тенгсиз деб топилди. ХIХ асрга оид ҳарбий казармаларни иқлим ўзгаришларига чидамли ва барча учун очиқ замонавий жамоат маконига айлантирган ушбу мажмуа тарихий мерос, экологик барқарорлик ва замонавий кутубхоначиликни ягона маконда мужассам этгани учун жаҳон миқёсида эътироф этилди.