ኤፌሶን~፩

➥           "አንበሳ ሲያረጅ..."
◈◈◈◈◈ ◊ ◈◈◈◈◈ ◊ ◈◈◈◈◈
ያዕቆብ ልጆቹን በባረከ ጊዜ ለይሁዳ የሰጠው የበረከት ቃል፦ "ይሁዳ የአንበሳ ደቦል ነው ፤ ልጄ ሆይ፥ ከአደንህ ወጣህ ፤ እንደ አንበሳ አሸመቀ፥ እንደ ሴት አንበሳም አደባ ፤ ያስነሣውስ ዘንድ ማን ይችላል? " ዘፍጥ.49፥9 ብሎ ነበር።

በእርግጥም ይሁዳ በአምላኩ ክንድ ተደግፎ ፥ ኃያላኑን ነገሥታት፦ የአሞሬዎንን ንጉሥ ሶዎንን ፣ የባሳንን ንጉሥ ዐግን ድል የነሳ ፣ የፈርዖንም የጭካኔ በትር ያላጠፋው ፥ አንበሳ ነበር።

ዛሬ ግን የድምጹ ግርማ አራዊትን ሁሉ የሚያርድ፣ የሚያንቀጠቅጠው አንበሳ ፥ በአምላኩ በእግዚአብሔር ላይ አምጿልና ብርቱ ክንዱ ዝሎ ፥ ትላንት ከርኅቀት ሰምተው የተሸበሩለት አሕዛብ (ዕርያና የዝንብ መንጋ) ፥ መጫወቻ አድርገውታል።

በዝንብ ፊት ፥ የሚቀመጥ የክብር ዕቃ ሁሉ ፥ ክብር እንደማይኖረው የታመነ ነው። ዝንብ ልባም ሴት በአሰናዳችው ማዕድ ላይ ራሷን ስትሰይም ከብርና መወደድ አይሰማትም ፤ ሙያ የጎደላትም ብታሰናዳው አትጸየፈውም።

አንበሳው ይሁዳ ፥ በኃጢአት ብዛት ስለአረጀ ፥ የዝንብ መንጋ እንዲጫወትበት ፥ ለባቢሎን ተላልፎ ተሰጥቷል።

የይሁዳም ልጅ ዳዊት የመከራውን ጽናት እንዲህ በማለት ዘግቦታል ፥ "በባቢሎን ወንዞች አጠገብ በዚያ ተቀመጥን ፤
ጽዮንንም ባሰብናት ጊዜ አለቀስን።
በአኻያ ዛፎችዋ ላይ መሰንቆቻችንን ሰቀልን። የማረኩን በዚያ የዝማሬን ቃል ፈለጉብን ፥ የወሰዱንም፦ “የጽዮንን ዝማሬ ዘምሩልን፡” አሉን። የእግዚአብሔርን ዝማሬ በባዕድ ምድር እንዴት እንዘምራለን? ኢየሩሳሌም ሆይ፥ ብረሳሽ፥ ቀኜ ትርሳኝ። ባላስብሽ፥ ምላሴ በጕሮሮዬ ይጣበቅ ፤ ከደስታዬ ሁሉ በላይ ኢየሩሳሌምን ባልወድድ።" መዝ.137

▩ ለጠላቶቻችን ፥ ወዳጅ እንጂ ጠላት እንሁንባቸው የሚል ትምህርት የለንም።
ነገር ግን ፥ ጠላት ሕዝብና ታሪክን ሊያጠፋ፣ ከሆነም ሊማርክ እንጂ ሊባርክ እንደማይመጣ ከመገንዘብ መዘግየትም የቅድስና ፍሬ አይደለም።

በጠላት ፊት ያስቀመጥከው የክብርና የቅድስና ሀብት ሁሉ ፥ ለአንተ ክብርና ጌጥ አይሆንህም።

ዝንብ ክብርና ቅድስናን ፣ የጽዮንንም የዝማሬዋን መወደድ አትገነዘብምና ፥ እባክህ ! ክቡር ዕንቁህን በዕርያና ፣ በዝንብ መንጋ ፊት አትጣል ፤ አንተም ወደ ዝንቦች መንደር አትግባ ፣ ዝንቦችም እንዳይቀርቡህ ፥ የክብርህን አጥር በንጹሕ አምላክህ ትዕዛዝ አጽና።

አንበሳው ባያረጅ እጅግ የተሻለ ነበር። ዛሬ ግን ክንዱ ዝሏል ፣ ዝንቦችም በርትተውበታል። ኃይሉ ተለይቶታል ፤ የቀረችለት ሀብቱ ዕንባው ብቻ ናት። በዕንባው ጽናት ግን የአምላኩን ፊት ለማየት የበቃ ነው። አምላኩም ዕንባውን ያብስለታል ፤ ኃይሉንና የድምጹንም ግርማ ይመልስለታል።
በዚህም አንበሳው እንደቀድሞ ከእርጅናው ይታደሳል።

ከይሁዳ ነገድ የተወለደው ፥ የማያረጀው አንበሳ ፥ ክርስቶስ ኢየሱስ ፥ የጠላትን፣ ኃይል በመንፈስ እንረግጥ ዘንድ በምሕረቱ ያሰልጥነን።

         ▩        አሜን !      ▩

✍️              ቴዎሶፊ
📅     ሕዳር 18/2018 ዓ.ም

እስትንፋስ ያለው ሁሉ እግዚአብሔርን ያመስግን( መዝ 150 - 6 )

የኢ/ኦ/ተ/ቤ/ክ መዝሙሮችን ለማግኘት
ይሄን link በመንካት ይቀላቀሉን 👇👇👇

#ሼር @efeson_2
🙏🙏🙏🙏🙏

🕊ለወዳጅ ለዘመዶ ያካፍሉ🕊

❤1

170 viewsedited 08:19