(فنون السلهمه)

صاحبي من دونك السرحان عاوي
في هواك القلب رغم البعد ساكر

لو تغيب اسنين في حبك رجاوي
والله انك حاضراً لا عاش ناكر

طاوياً قلبي على لاماك طاوي
اخفي الآهات عن حاقد وماكر

قلت لك ما انساك يا ذبح الهواوي
باللقا ًاللي بيننا كان انت فاكر

الغرام جنون والفرقى بلاوي
والمحبه باقيه والقلب ذاكر

ياعيون اللي على الهارب قصاوي
اشقراً بجبال فارس له مواكر

الخدود ورود والرمش امتساوي
في فنون السلهمه صفّة عساكر

قذلتك تشبه لهب نار الخلاوي
او شعاع الشمس حد الارض باكر

يا نفل روض الهوى يا عود جاوي
يا عسل سدر الجبل يا احلى السكاكر

خل في قلبك مروفه لا تراوي
اسقني كاس الوفا و اكون شاكر

عبدالله المفضلي

( فنون المجالس)

الله من راسٍ تـراقـص جـنـونـه
يـسري عليه الهم ويكدّر البال

احترت في هذا الزمن كيف لونه
غابت به رجالٍ وبـانـت بـه ازوال

اهل الجهل ثوب الخطأ يلبسونه
ثوب الجهاله يكسي الخبل تفصال

من يدهل المجلس ويجهل فنونه
اعمى بصيره جامعٍ طيش وهبال

ياليتهم لامن حكى يـمـنـعـونـه
قبل اللغم يضرب من الجال للجال

وابا النمايم ليتـهم يـطـردونـه
اللي يحـرضهم على خيبة الفال

كم واحدٍ شرب الندم في حفونه
اللي يصدّق زارع الشر وش قال

معقّد شوشهم ليت ما يسمعونه
ما يمدّ له في مجلس الطيب فنجال

الـعـقـل ماهو سلعةٍ يشـتـرونـه
لو ينشرى يدفع به الحال والمال

اللي عن البلشات تقفي ضـعـونـه
صاحي فكر يلبس من العقل سربال

الطيب رجمٍ مار الاهوال دونه
قالوه قبلي بالقصايد والامثال

النعم للـي لابـتـه يـمـدحـونـه
يجمع ولا يفرّق ويحري بالافعال

ماعاش من شاف الجفا في عيونه
لو عاش عمر شعيب في ضيم واذلال

شخصٍ يـورّيـك الجفـا والمـهـونـه
كان انت قمت تجامله ما انت رجّال

عبدالله المفضلي

(في الجو)

الطايره يوم استقرت ورى الغيم
تحت السما تطوي بقايا المسافه

جنحانها تعزف وتعطي ترانيم
صفق الهوا بجنوبها في صلافه

سكوت والركاب مثل المعازيم
قومً حشام وفي مكان الضيافه

لد. وخذا قلبي غزالٍ من الريم
الله حسيبه ما خذاه بلطافه

وانا من الدهشه كسرت المفاهيم
هذا الذي كنت استلذه و اخافه

الاوله نظره وهاذي مقاسيم
اسباب جرحاً بالضمير وحسافه

والثانيه نظره وبسمه وتكليم
ابدا لي الاعجاب حسب إعترافه

والمشكله لهبوطنا قرّب التيم
ماباقي الّا حومةً وإنعطافه

قلت ابا احاول وادري الوضع تحطيم
لكن من اشواقي وقفت بلقافه

اصيح للطيّار وانخاه من ضيم
ارجوك لا تهبط ولا به كلافه

خل المطار و خذ مع الجو تحويم
خذ لك على غرب الرياض إلتفافه

عبدالله المفضلي

( كف عفريت)

الليله الدنيا على كــف عـــفـريت
يرقص بها الشيطان والبال ضايق

مجنون واعطتني حشيشه وكبريت
مـتـكـدّرٍ والصبر ما به لـحـايـق

قاومت هجمات المشاكل وعانيت
كل الدروب اضحت صدوف وعوايق

من دلّة السمّ المعتّق تــقـهويــت
يا علقم ايامي شكى منك ذايق

للنــوم وطيوفه ركنت وتــمـنّيـت
الــعـيـن تبغى النوم والقلب فايق

من صاخب همومي نهضت و تعزويت
راسي لصعبات النواميس تايق

الـعـمـر كـلـه يا عذابي تماديت
ياللاسف عمر السعاده دقايق

حتى العسل في ذلّة النفس حلتيت
حرام ماهو للـمــطـالـيـق لايــق

عن واقعي عمد و قناعه تخلّيت
انكر ظروف الوقت لو هي حــقـايــق

ان زانت الدنيا فرحت وتهنيت
وان شانت الدنيا عساها الحرايق

عسى تفجّر بالبسيطه دناميت
مادام مالي في رضاها طرايق

على قبر حلمٍ لي العام صليت
صلاة مرتابٍ من الوقت مايق

شفت الحقيقه مار عنها تعاميت
ألبس قناع الكذب واقول رايق

بالارض في وهم السعاده تمشّيت
اشاهد الصحرا مـــروج وحدايق

شبّيت نار العزم عمد وتحديت
يسوقني لمصارع الكود سايق

ابعدت عن جرح الشعور وتنحّيت
اسراب غيضي بالتسامح عتايق

على ضفاف انهار الافكار مرّيت
ورداً تغطرف غي للعين شايق

والشاعر اللي قال فيما مضى بيت
صارت رجالاً مع رجالاً علايق

يا كثرهم يوم انتبهت وتحرّيت
كثر العلايق والتجارب وثايق

يالله يا علاّم ما اظهرت واخفيت
احظى بظلّك يوم عرض الخلايقً

عبدالله المفضلي

(كوكب عطارد)

ضج المكان وصوّتوا لي هذولاك
رديت بلساني وانا الفكر شارد

للقلب شف و نظرة العين لهناك
واشوف دون هناك صادر و وارد

يا راس هات من النداوي مزاياك
الـحـر الاشـقـر للجناحين فـارد

يقلع بي التفكير لحدود الافلاك
من كوكب الزهره لكوكب عطارد

تعدّت المعقول وحدود الادراك
قصه و راويها للاحداث سارد

درب الخطر بين الكواسر والاشواك
يمشيه من يدعيه للطيش مارد

يا بارد الـمـا بالاهانه بليّـاك
لفح الهجير بعزّة النفس بارد

ألجى لرب الكون و اقول رحماك
واعـوذ بـه والخيـر للـشـر طـارد

عبدالله المفضلي

(كيد الحريم)

هيه ياللي طعونك من زمانٍ قديم
ما تهيّا تطيب ولا نويت الوصال

احتفظ في غرامك واهتني به و اهيم
لو تقول العواذل صاب عقله هبال

اعتبرني غريبٍ في ضيافة كريم
والكريم اندفاعي ما حسب راس مال

واعتبرني ضحيّه من ضحايا الحريم
امهات المكايد بالدلع والدلال

كان ودك بذبحي خل قلبك رحيم
يحرم القتل لكن من يدينك حلال

يـقرب الشوق مني كل ليلٍ بـهـيـم
ودي بشوف وجهك مار مالي مجال

كل ما اذكرك زار القلب طيفك نديم
مايجيب العلوم ويبعث الانفعال

انت وحدك بقلبي وصف حبك عظيم
قـبـل عشرين عـام وثـابـتٍ لا يزال

كني اشوف زولك في خيالي مقيم
صورتك في عيوني يا بعيد المنال

صرت انا لك غريمٍ ما ضفر في غريم
ماحصل منك فال ولا تلاه العقال

انت بالزين مامثلك وشكلك عديم
ميزتك يا حبيبي فيك غي وجمال

نظرةٍ من عيونك ما تسلم سليم
ليتني ماعرفتك في قديم الليال

اول الحب نعمه مار يرجع جحيم
ماحسبت الـمـحـبـه قـاتـلـه للرجال

حال دونك سراب وحال دونك سديم
آه انا وا عذابي دونك الـبـعـد حال

كل ما مال ورد وكل ما بان غـيـم
لاح برق الغرام و ومحجر العين سال

مع شذا يا سمين الشوق هب النسيم
جاب طيفك قبالي و انت وينك ؟تعال

عبدالله المفضلي

( لعنة الحب)

هذي سوايا لعنة الحب فينا
وصل وهنا وافراح . واتراح وفراق

نكذب اذا قلنا خلاص انتهينا
ونصدق اذا قلنا الى الموت عشاق

بالله يالايام جودي علينا
تذكري قولة ولا قطع الارزاق

للوصل وسرور الحياة اتركينا
كوني سلام وثلج يانار الاشواق

ان صاح صياح الغرام لحدينا
جا له من الثاني رساله وميثاق

ياما على النجم الشمالي سرينا
بدروبنا خوف وعراقيل واعواق

وياما على رجف القلوب إلتقينا
في موعدٍ له هايم الروح ينساق

طعنا تصاريف الزمان وعصينا
وشفنا نجوم القايله والفضا ضاق

راحت سنين وتونا ما سلينا
مثل السكارى والمحبه بالاعماق

من منهل الحب الزلال ارتوينا
باجسادنا يجري للارواح ترياق

بعنا بسوق اهل الغرام وشرينا
والناس مختلفين بشفوف واذواق

نسقي ورود العاطفه في يدينا
واحلامنا رحبه كما رحب الافاق

لولا الامل يااهل الحسد ما بقينا
نشوف له في مقدم المزن براق

اشوف باقصى اليم ساحل ومينا
هو حلم والا علم يا شوف الاحداق

عبدالله المفضلي الشمري

(لقمة الحقران)

غلطةٍ ترضي نواياك ياللايم
اعتبرها غلطتي واتحمّلها

لابسً ثوب الردا طولك ملايم
والثعالب ما تخلّي دغايلها

طير فكري في عنان السما حايم
والهموم استوطنت راس عاقلها

ساعةً بأرض الخلا الخاليه هايم
ابرك الساعات للقلب واجملها

مبعداً عن مجلس المهزله شايم
شلّة الرديان ماني مجاملها

اتمضّى وانتظر حظي النايم
حيّةً رقطا على المتن شايلها

والله اني يوم قلت آهه من ضايم
النفوس عتاب الانذال يقتلها

البضاعه خاسره والردي سايم
يحسب انه مقدم الناس و أولها

الهبايب عاتيه والسما غايــم
والرجال امجادها في فعايلها

السيوف مجرّده والخطر قايم
والجنون مربّطه في معاقلها

من صحون اهل الردا يرجع الصايم
لقمة الحقران ما يشبع آكلها

الخلايق فانيه والله الدايم
والبشر من وحّد الواحد افضلها

عبدالله المفضلي

( ابو وجهين)

ما انا يابو وجهين مثلك بوجهين
مبداي واحد لو تزول الجبالي

اعطيك عن عز النفوس المضامين
مـواقـفٍ يرخص لها كـل غــالي

ما لي ومال مبرهجات الدواوين
اللي بها تشرا الذمم بالريالي

لاشفت كرهي في وجيه المعادين
ابـيـعـهـم بالرخص بيع الهزالي

اشوم عن مجلس ربيب الشياطين
وارتاح في دوّاٍ من الناس خالي

كان الجزاء مشروع والعين بالعين
من هانني هنته ولاني امبالي

واحرص على عرف الرجال الميامين
اهل النفوس الراقيه والمعالي

في زحمة الدنيا تضيع العناوين
مما يعاني ضاق صدر الشمالي

وللناس بالدنيا سلوم وقوانين
احدٍ مـقـامـه عز واحدٍ هيالي

واللي مهو مقبول بالسلم والدين
يركض به الخايب خبيث العمالي

ماعايشٍ مرتاح غير المجانين
ما ميّزوا ميل الزمن والعدالي

الوقت جاير والدهر له معاوين
ونصبر على الصعبات صبر الجمالي

احترت بين شيوخ كذب ومساكين
ناسً مرضها الفخفخه والتعالي

هبّيت يا مدحاً بليّا بـراهـيـن
المدح مدفوع الثمن للزوالي

مرشَد يقول الناس بالفعل دارين
افعل ويكفونك ثقات الرجالي

عبدالله المفضلي

(احجار العقيق)

يستثار الشعر والمارد يفيق
بوح روح وغيض في رحلة فكر

ابني الاهرام بأحجار العقيق
واختصر كل المعاجم في سطر

ان سبقني بالجنون ابن زريق
اختلفنا بالزمان وبالسفر

كان انا قلت آه من جرحاً عميق
اعذروني سلّم الله من عذر

و كان همي عبد؟ .قولو له عتيق
معتقه ما ابيه جيّاب السهر

حايراً مذهول في وادي سحيق
للسباع وللـكـواسر فـيـه اثـر

في مضارب غربتي ضاع الطريق
داهمه ريح البوارح واندثر

لا طريق ولا صديق ولا رفيق
ما سوى اعجاز النخل بأرضً قفر

من يقول الارض بأبنادم تضيق؟
لين صارت دار حبس ولا مفر

علقم الايام بأكواب الرحيق
يمنح الانسان تصميم وصبر

اكفخ الجنحان يالحر الطليق
الزمان دروس للناس و عبر

كل حرّاً ماعشق قمة طويق
والله انه خاب لو عاش الدهر

قال واحد كان لي مجداً عريق
قلت كان و كان ميّت في قبر

ياضعيف العزم والناصح شفيق
خل قلبك مثل جلمود الصخر

تخدع الابصار يالغصن الوريق
ما دريت انك ضريع بلا ثمر

كنت امارس حق قانون الرقيق
للهقاوي لين صارت في خطر

موتة الهقوه بصّده من صديق
طعنة الايام غدراً بالظهر

قلبي اللي حمّله ما لا يطيق
حظي العاثر غرابيل و كدر

ليه سلمى ما تنزّل للعشيق
لو تكون الروح لرضاها مهر

صابراً والجوف به جمر الحريق
جعل جمر الجوف يطفيه المطر

اتعلّق بالسبب مثل الغريـق
مؤمناً بالله واحــوال الــقــدر

عبدالله المفضلي

(اقواس الامل)

حاولت انام وطيّر النوم كابوس
واخذت لي مع صاخب الفكر مرواس

ياهاجسي غرّد ترا ما انت محبوس
حرّر خيالك ما على الفكر حرّاس

و ارسم مساراتك من القوس للقوس
وازرع ورودك بالامل بين الاقواس

طب القلوب اللي بها الهم محسوس
مشيً مع البيدا ليا هب نسناس

فجً خلا ماهو من الناس مأنوس
فيه السراب لصورة الارض عكّاس

يسوى من الدنيا عمارات وفلوس
واخير من شـوفة غثيثاً من الناس

قفر الاماني رد من دونه عسوس
لقى العطش واستصعب الامر عسّاس

كان اللبيب ملجلجاً تقل مضروس
كيف الهبيل اللي بالاوهام غطّاس

تاهت خطاوينا و هب الهوا كوس
وضاعت هقاوينا و ردت بالاتعاس

شفنا من الايام ميلات وعكوس
نصبر وننطح داعي الضيم بالبأس

نأخذ من اخبار البشر عبر ودروس
ونحرص على علماً لنا فيه نوماس

كلاً على ما كان بالنفس مغروس
وكلاً على ميراث والعرق دسّاس

بين النشامى بيرق اللاش منكوس
وبنكه من التقصير يعلن بالافلاس

الموت جوع بعز تحيا به نفوس
ولا شبعة الذلّان ببيوت الانجاس

لا للـنـفـاق ولا لتطمينة الـروس
موت الشجر واقف وهو شامخ الراس

عبدالله المفضلي

(الابتسامه)

لاتبتسم والقلب قبل ابتسامك
يرقص طرب ويغازلك وايتمنّاك

طيّرت في جو المحبه حمامك
حام ونزل سربه على السدر والراك

ركزت مابين المحاني حسامك
زدني طعون وضيم مادام يهناك

يرضي غرورك لحظة الضعف امامك
يحق لك . زينك ينسّي خطاياك

عينك خطيره يا مصوّب سهامك
من دم عرق القلب حنّيت يمناك

تمثيلك اني ما خذيت اهتمامك
يمشي على غيري وانا اعرف خفاياك

اقرا بنظراتك معاني كلامك
تظهر حروفه واضحه عن نواياك

هذا برستيجك وهذا نظامك
تقتل وتمشي في جنايز ضحاياك

خمر الهواوي تحت طرقة لثامك
سجّل حضوري حول روعة شفاياك

حاول تجمّل و اسقني من مدامك
عمر الهوى فرصه وانا ودي ارواك

من كثر حبي لك عشقت احترامك
وانت القمر فارق على كل الافلاك

شمعة جبينك .ضحكتك .وانسجامك
كنك تبشرني عسى اللاش يفداك

احتار واعجز كيف اوصّف قوامك
زملوق وسم ويسلب العقل فتّاك

كان انت سالي ما سطا بك هيامك
لومي عليك وياصلك وايتعدّاك

وان كان محسوبك غلاك ومرامك
أقبل هلابك وارخص العمر لرضاك

عبدالله المفضلي

(الاستبداد)

الليالي والظروف المستبده
في عذابي جا لها صوله وجوله

راعني شوف الفجوج المجرهدّه
السراب بقيضها حطّت نزوله

ميل وقت وهم قلب وطول مده
ليت سلطان العنا تقفي فلوله

ساعةً من يوم يسراً بعد شده
عادلت عمر الشقا عرضه وطوله

يا ردي العزم يا هاته و وده
الاماني وحدها جتك بسهوله

لا يغرّك بالبحر جزره و مده
ولا يغرك بالرخا مسرج خيوله

للشجاع بغيبة الاذهان رده
وللكريم بلقمة الجايع بطوله

وللدليله والمساري والاشده
نشوةً مع غازياً ينخى ذلوله

للسهر والليل مشتاقً يوده
عطّره بالهيل وارضى به ميوله

كان شفت دموع رجلاً فوق خده
المطر لو ما نزل ما احداً ينوله

كان طيبي بس عندك لا تعده
وكان مدحي قد سمعك لا تقوله

لو تهد جبال ،صبري ماتهده
الجلاده للرجل رمز الرجوله

والله اني لأوصل المجهود حده
لين غرقان الحسد يبدي ذهوله

عبدالله المفضلي