بسم الله الرحمن الرحيم

هذه قناتي في التيليجرام
اتشرف بالجميع

( الابراج)

طار فكري بالسما وابعد الحومه
مع صقور الجو بالجو روّاجي

النفوس من العواكيس مكلومه
مار لا للبوح منعاً للاحراجي

صحصحٍ لأهل الولع تومي رجومه
يطفي الجوال من بعد الابراجي

ينتعش به قلب يشكي من همومه
مثل مسجونٍ مبشّر بالافراجي

الرجل يبعد مشاحيه بعزومه
مع هواء الغربي بالاقفار دواجي

يبتعد عن حاقدٍ تزعل علومه
نيته سودا وقلبه كـمـا الصاجي

من يبيع المسكنه بأول السومه
يستحق وسام الامجاد والتاجي

عبدالله المفضلي

(الجوهره)

نار الطموحات مس القلب صاليها
والنفس ألبّي طلبها يوم واعصاها

لي حاجةً يشغل الخفّاق طاريها
استوطنت في صميم الذات رجواها

الجوهره غاليه والناس تغليها
لكنّها كايده للي تمنٌاها

ادلجت هجن العزايم في حراويها
من كثر شوقي لها خفت اتعدّاها

اسعد بها حلم واملكها واخفّيها
واشقى بها علم واخشى الناس وارعاها

اشيلها هم و اخذ وجد واعطيها
واسري لها الليل واروى شوق واظماها

واكتب لها بيت شعراً هايماً فيها
واصبّها كيف عاشق واتقهواها

و ارسم جسور الامل بالفكر وابنيها
واغيّر الخارطه و اهد مبناها

وابيع غير الكرامه بيع واشريها
واعاند ظروف وقتي واتحداها

احلى القصايد على المقصود اغنيها
واحلى المشاوير ما وصّلني حماها

بانت نجوم السما لعيون ساريها
لولا ظلام الليالي ما نظرناها

ياحادي العيس لالا ما انت حاديها
قدّامك دروب ما تعرف خفاياها

ارجوك تعطي سهام القوس باريها
من كان له صنعةً لابد يهواها

ما همنّي ناس تسبقني بأمانيها
طلّابة الهون ما تغفر خطاياها

عبدالله المفضلي

( الشمال امطار)

الشمال امطار والاجواء جميله
التمشّي فيه وصٰفـه للتعـافـي

كل ماهب الهوا ينعش عليله
المزاج بنفحة الذعذاع صافي

بالشمال انا المـعـزب والدليلـه
والطيور وصحصح البرّان كافي

كيف ما يطرب ولا يشفي غليله
الغريب اللي له الصحرا منافي

ما تعدّل من عواج الوقت ميله
تنتهي سبع وتجي سبعٍ عجافي

صابرٍ صبر الجمل لازاد شيله
من ثقيل الشيل تلحاه الظلافي

نظرتي حول المراقيب الطويله
كل مقصد دونها ماهوب كافي

الردي واللي مـحـاريفه هزيله
لا نشدني قلت له مابي خلافي

كان عز النفس بالدنيا فضيله
ما ترجّينا العطا من كل هافي

الحياد وكل واحد في سبيله
ماحرصت اعرف خفا ماكان خافي

عبدالله المفضلي

(الصبر الجميل)

الحظ لا منّه تردّا وعاداك
يجيب لك في كل يوماً مطمّه

تنسى معاريفك وتذكر خطاياك
ولو تمدح الرجّال كنّك تذمّه

يدنيك من بعض الفوايد ويعصاك
ويعرّضك كل الامور المهمّه

ويتعب على درب المظامي مطاياك
ويبدا بمشوار العنا ما يتمّه

الصبر محمود العواقب لشرواك
ان كان راسك فيه مخًّ يضمّه

فرق البشر عن غيرهم عقل وادراك
ومن غيرهن رمّه تشابه لرمّه

حظّاً مهو عن عثرة الرجل ياقاك
ودك تحطه وسط بير وتدمّه

اكحل عيون عداك في فعل يمناك
وخل الردي لا يشغلك خابت امّه

يم الملامه لا تسرّح رعاياك
شف المديح و سق رعاياك يمّه

والمورد اللي وانت عطشان يجفاك
طرد السراب اخير من قرب جمّه

عبدالله المفضلي

(الصوره)

سويت فيني خطا يا مرسل الصوره
ذكرتني بالهوى و انا اولاً سالي

الحب انا قابلاً شرعه ودستوره
القلب للزين والمزيون ميّالي

قيس الملوّح بدا به وانتهى دوره
مجنون ليلى عطاني برجه العالي

الورده اللي بوبل الشوق ممطوره
مـنـي هـديـه لخلٍ وافيٍ غـالـي

اشري رضا صاحبي واداري شعوره
ارضي به القلب وازعل فيه عذّالي

يا ما دعانا الهوى مع كل غندوره
نشرب بكاس الغرام المر والحالي

الله من دمعةً بالعين محشوره
والله من نار ذكرى كدّرت بالي

اسرار راعي الهوى بالقلب مستوره
ماهي سواليف متجنّي ودجّالي

عبدالله المفضلي

( الضيوف)

البارحه سيّر علي موكب هموم
و قلطتهم مابين غيض وكلافه

مسيار عدوانٍ على شخص معدوم
مـا هـو هـلابه ضيف مابه مــرافـه

انا واياهم والفضا ليل ونـجـوم
وقهويتهم من دم جوفي ضيافه

مافيهم المجهول والكل معلوم
رفقة عمر لو كان ما به لطافـه

هذا معه شرهه وهذا معه لوم
وهذا يجيب علوم راعي لقافه

انكرت ضيم حضورهم وابعد الحوم
واقـول مـا تطري عليّ المـخـافـه

يوم انهم راحو وانا اوميت للنوم
كان السهر حاضر بعنف وصلافـه

مثلي مثل غيري لي اصحاب وخصوم
والـنـاس مـخـتـلفين رأي وثـقـافـه

ابيع قرب اللاش وارخص به السوم
مشرى رضا الخايب هوان وضعافه

انا بري بعيون الايام مـتهـوم
متهم بفعل الذنب قبل اقترافه

ونقع المطر بكفوف الانذال مسموم
طـلـبـه قاتـل والهوان ارتشافـه

انا مثل منهو بالاعدام محكوم
مع كل طلعة شمس يبدأ ارتجافه

شفت النخل بالارض لكن طلع دوم
والـدوم خداع النظر في مشـافـه

جيت المكان اللي بالاذهان مرسوم
واخـذت مـده نازلٍ في ضـفـافـه

وعنه ابتعدت بعزم واثنيه بعزوم
بعدٍ عن الهقوه وبعد المسافـه

عبدالله المفضلي

(الطايره)

يا شاغلاً بالي وانا منك مقهور
يا لعنبو حيّك عيونك ضياعي

تفرق على الزينات بالملح والنور
توصف و تعرف بالعيون الوساعي

انا صويب عيونك النجل مخطور
وزوّد عناي البعد والانقطاعي

انته وانا شخصين ساحر ومسحور
انقض سحر هاروت مافيه داعي

زعيم جيش القلب بحماك مأسور
عزيز قوماً ذل وانت الشجاعي

فيك ابتليت ودونك الدرب محذور
من دونك الايام تلوي ذراعي

محتار انا ما لي على الوصل مقدور
سيف الحيا دونك يرد اندفاعي

اغليك يا بدراً تلالا بديجور
اخذت من بدر الليال الشعاعي

سافرت من رفحا مكلّف ومأمور
اعلنت لك عند الفراق الوداعي

بالطايره قلبي بذكراك مجبور
يوم استدارت بالسما بأرتفاعي

لك إلتفت مما بقلبي من الجور
فوق السحاب العين يمّك تراعي

نظرت لك بأحساس واشواق وشعور
روحاً لها من نار حبك متاعي

وحسّيت بالحسره ولو صحت معذور
مادام شوفي لك مهو مستطاعي

كأس الهوى يا شاغل القلب مخشور
سكّر نبات و سم رقط الافاعي

عبدالله المفضلي

( العزايم)

اكبري يالعزايم واصغري يالظروف
و اركدي يالهبايب واثبتي يالجبال

كن ما اسمع كلام و كن ما اشوف شوف
ميّت احساس عامد واخفي الانفعال

بين راسٍ عنيد وبين قلبٍ عطوف
وبين حظٍ تعيس وبين ظرفٍ عضال

واقفٍ واتجاهل حر نار الوقوف
فوق جمر الحقيقه تحت ثلج الخيال

شاعراً عرقلنه جايرات الصدوف
الهموم الثقيله جاثمه لا تزال

ليلةً عاندتني بالصعوبه تطوف
كيف انا قلت ليله؟بالحقيقه ليال

ما تجود الليالي في منال الشفوف
الهقاوي تبخّر دون صعب المنال

درهمن الركايب داميات الخفوف
في مضارب (بني حاضر)وباكر تعال

شفت رف الحمام ويتبعنّه رفوف
للعشوش العتيقه معتريها الجفال

انظر الشمس تسطع ما غشاها كسوف!
دونها الغيم يسبح ويتبادر سؤال

هل بقي بالسحابه شربةً بالكفوف؟
وهل ميل الليالي يقبل الاعتدال؟

ماملكت الكنوز ولا تركت الحسوف
كل ما شفت بيدر دونه الحظ حال

استحي من ضيوفي لو همومي ضيوف
يقلط الهم وانحر في قدومه جمال

راحة القلب ساعه ماعلى النفس خوف
في كهوف المظامي زايلات الظلال

يقرب الضيم وانهض في يديني سيوف
وانتخي واتذكّر للمواقف رجال

ما كسبت العزايم من عزوم الضعوف
لا طموحي حرام ولا التهاون حلال

عبدالله المفضلي

(العيطموس)

يا سحابه ممطره عقب العجاج
يا خزامى الشوق يا شمس الشموس

اقبلي والقلب في حال ابتهاج
واطربيني يا بعد وجهٍ عبوس

تعرفيني بالهوى عالي مزاج
ما تشوق القلب غير العيطموس

تلبسين الحسن كله لبس تاج
تخلفين العقل بالطرف النعوس

عند غضات الغنادير احتجاج
طاحت اسهمهن بسهمك يالعروس

لون ورد ولون توت ولون عاج
اجتمع في روض مزهر وامحروس

اعطي المجروح من وصلك علاج
واكسري خوفه قبل كسر النفوس

للجواهر عند مغليها رواج
ما تقدّر من غلاها بالفلوس

الليالي بين ضيقٍ وانفراج
والهوى غلّاب والدنيا دروس

عبدالله المفضلي