مساء الخير عليكم ❤️

مستعدين لرسايل دعاء السفر ولا ايه 🫣😂

ان شاء الله اول رسالة عن ما بعد التخرج الساعة ١٠ بليل

هحاول يبقي كل يوم او يوم و يوم بحيث اقولكم كل اللي عرفته حتي الان قبل بداية رمضان ان شاء الله 🫡

ماذا بعد التخرج؟!

دلوقتي في ٣ طرق اساسيين قدامنا
1️⃣ سفر و معادلات
2️⃣ شغل برايفت و شفتات
3️⃣ اتعلم في تخصص معين

هنتكلم النهارده عن اغلب اول طريق معانا ان شاء الله

              سفر و معادلات
هنا لازم تحدد طريقك عشان هيفرق معاك دول خليج ولا دول اوربية ولا أمريكا

هنا هتلاقي طريق محتاج انت تبدا من دلوقتي وانت في امتياز زي أمريكا و دول أوروبا

طريق هتبدا فيه من بعد الامتياز زي دول اسيوية مسلمة او الخليج عامة

لو دول اوربية او أميركا

الطريق ده عيبه انه مليان تغيرات بشكل سريع جدا جدا

1️⃣ أمريكا طبعا كلكم عارفين طريق USML و لو حد عاوز يعرف تفاصيل عنه
Part one
Part two

و بالنسبة لي اعتماد الجامعة عندنا المفرض فيه زيارة من الجودة قريب فيا مسهل يا رب

و طبعا لا ننسي ترامب و الحوارات اللي كل شوية بيطلع بيها يعني

--------
2️⃣ تاني طريق و هو بريطانيا
و ده عبارة عن كذا حاجة
1) PLAB
و ده بقي ملوش اي قيمة دلوقتي

2) MRCS
ده تبع الجراحة و سهلة نوعا ما و كويسة بس عشان تبقي أخصائي لازم سنتين خبره الاول في مصر عادي او بره

🚫 عشان تمتحن اول امتحان لازم يكون معاك شهادة التخرج يعني اخر امتياز

3) MRCP
دي زمالة الباطنة و تقيلة ك مذاكرة جدا و قوية جدا لما تخلصها هتبقي اخصائي علي طول

🚫 الامتحانات بعد التخرج برضه


4) other
و دي كذا زمالة لي تخصصات معينة بس المصادر و الكورسات فيها مش كتير اوي برضه

🚨🚨 خد بالك الطريق ده بقي شبه مقفول لسبب ان بريطانيا خلت الأولوية لتدريب أطباء لي اهل البلد و دول معينه تبعهم و باقي العالم مقاعد بنسبة ٣٪
فالطريق ده مبقاش سهل خالص زي زمان

                  --------
3️⃣ ألمانيا و ده طريق سالك نوعا ما حتي الان
العيب اساسي انك محتاج تتعلم ألماني كويس اوي و تحفظ مصطلحات طبية بالماني كمان فده محتاج مذاكرة اوي

وصلت لل المستوي المطلوب B2 ساعتها هتعمل حساب مغلق مش فاكر الرقم كام بس حوالي 11000 يورا و خد بالك هيفضلوا في الحساب و تقدر تسحب جزء معين كل شهر وانت هناك

و بتدا تشغل هناك و بعد فترة بتبدا تستعد عشان تمتحن المعادلة بتاعتهم و المعادلة هناك سهلة مش صعبة زي الطرق التانية بتعتمد علي OSCEاَ يعتبر

🚫 كان فيه فيديو كويس سمعته ليها لو لقيتهه هعدل الرسالة و هحطها

                  --------
4️⃣ في معادلة أستراليا الصراحة مدورتش فيها كتير

---------------------------
طبعا لو هتتجه لي اي طريق من دول يبقي لازم تحط حاجة مهمة قدامك انك هتبقي في مجتمع مختلف و حياة مختلفة و الدين مش هتلاقي اللي يشجعك اقلها اذاة الصلاة (ماعدا لو انت في مكان كله مسلمين يعني)

فلازم تدرس الخطوة دي كويس اوي عشان دينك اهم من اي حاجة

🚨 اسمع الفيديو ده حلو عن المشاكل اللي ممكن تقابلك في الجانب الديني

في طريق لي دول اسيوية مسلمة

طريق جميل و اشهر دولتين
ماليزيا و المالديف

هم شبه بعض هم كانوا قبل كده بيقبلوا ممارس عام عادي بس حاليا من اول اخصائي و ليها شبه معادلة شهادات علي ما اتذكر مش امتحانات يعني

فيهم مسلمين و مصرين كتير برضه

🚫 هنا اللغة الأساسية معاك انجليزي في الشغل و الرواتب بي الدولار الأمريكي

🔻 فطريق زي ده مش هتفكر فيه دلوقتي عشان تدوس فيه تبقي اخصائي و بعدها تشوف الوضع ساعتها عامل ازاي

طريق الخليج

هنتكلم فيه بكره ان شاء الله ❤️🫡

#ماذا_بعد_التخرج
#طرق_السفر_واحد

مين بقي خريج رسمي دلوقتي ❤️🥰

مبارك عليكم و ديما في خير و سعادة يا رب العالمين ❤️❤️

مساء الخير عليكم ❤️
معلش علي اليومين الفاصل دول بداية الترم الجديد والنتيجة فقولت نفصل يومين بقي 😂

نيجي لي تاني طريق سفر معانا

دول الخليج

هنا كل الدول شبه بعضها في التفاصيل
لازم قبل ما تقدم علي شغل في اي دولة فيهم يبقي معاك حاجتين

1️⃣ شهادة داتا فلو و ده مجرد ورق بتقدم عليه عشان تعادل الشهادة بيكون في رنج ١٠٠٠٠

2️⃣ تمتحن امتحان بروميترك و ده في رنج ١٥٠٠٠ و ده بيكون امتحان عبيط و بيتكرر و مطلوب تعدي ٦٠٪ و بيكون اختياراي ممكن تمتحن فيه مصر عادي (مش عارف لو انت أخصائي بتعوز الامتحان ده ولا لا)

طبعا كل دولة خليجية ليها داتا فلو خاصة بيها و امتحان خاص بيها

طب بنسافر امته بقي؟!
بلاش تسافر ممارس عام ابدا عشان
1️⃣ هيبقي مرتب اقل
2️⃣ مش هتلاقي حد يعلمك كويس
3️⃣ مش هتترقي وانت هناك بسنين الخبرة هتبقي عاوز تحضر حاجة عشان تترقي
4️⃣ نادر لما بيطلبوا دلوقتي ممارس عام
5️⃣ هتبقي عرضة اكتر للخطئ الطبي عشان انت لسه خبرتك قليلة و ده غرامة بمبالغ محترمة جدا

حوار الخطئ و كان بيتعمل بيه قضيه و تعويضات و كده بالاخص السعودية بس اخر فترة المفروض قل عشان الحكومة هتعمل قرار لو المريض ملوش حق هيدفع تعويض للدكتور 🫣😂

فالأفضل نسافر من اول ما نبقي اخصائي اول و هنا المرتب من اول ٩ او ١٠ الف ريال وانت طالع حسب كل تخصص بقي

طب ازاي تبقي اخصائي؟!
1️⃣ ماجستير عادي
'هتحتاج سنتين خبرة في مصر الاول عشان تبقي اخصائي لو ماجستير بس انت مساعد اخصائي'
2️⃣ زمالة مصرية
3️⃣ بورد عربي
و كلهم عبارة عن ٣ خطوات يعتبر
هكلمكم عن ال٣ طرق دول بعدين عشان يبقي تسلسل المعلومات صح بس دلوقتي

4️⃣ MRCS + سنتين خبره في مصر
5️⃣ MRCP بدون خبره

🚫 لو انت حابب السعودية يبقي زمالة مصرية احسن حاجة

🚫 لو انت حابب الإمارات يبقي البورد العربي احسن حاجة

🔻 طبعا اشهر فرص في الخليج هي السعودية و الإمارات عشان فرص اكتر و سكان اكتر عكس قطر و الكويت و البحرين

----------------------------
⚡️ نقطة مهمة ركز علي التخصصات اللي مناسبة لي كل دولة يعني مثلا
1️⃣ لو انت دكتور و عاوز نسا في السعودية مستحيلة دي ممكن تمشي في الإمارات
2️⃣ عاوز تسافر علي أخصائي علي طول يبقي متخدش تخصص تقيل زي
Both Neuro
Both CVS
دول اكتر ٤ تخصصات بيطلبوا فيها استشاري بس

⚡️طبعا عشان تعرف التخصصات اللي عليها طلب كتير هتدخل في الجروبات شغل في السعودية و إمارات و تتابع بقي

----------------------------
و الي لقاء بكره مع الشغل و الشفتات ❤️🫡

#ماذا_بعد_التخرج
#طرق_السفر_اتنين

مساء الخير عليكم ❤️
النهاردة هتكلم معاكم عن الشغل و البرايفت في فترة الامتياز

🚫 هنقسم الشغل الي ٣ انواع
1️⃣ Medical
2️⃣ Related medical
3️⃣ Not medical

Medical

و هنا انت بتتعلم حاجة من ٣ بشكل اساسي كويس اوي:
1️⃣ طوارئ
و ده عبارة عن استقبال و الطواريء و الحوادث و الخناقات و كل الهيصة دي فده اكتر حاجة فيهم فيها ضغط عليك

هنا انت محتاج مهارة ايد كويسة اوي في التخيط و CPR دول اكتر مهارت عاوزها يعتبر الباقي بقي مذاكرة و انك تعرف تتعامل مع الوضع اللي قدامك و ت vital المريض

🚫 تتعلمه من نزولك الطواريء فترة كويسة مش مستاهله كورس و ممكن مع النزول تقرا من doctor guide هيلم لك الدنيا سريعا مع قراءة زيادة من النت عشان تتمكن من الكلام كويس

2️⃣ حضان
و ده شغل اطفال و برضه فيه مهارة ايد برضه تركب tube و كام حاجة تانية بس الصعوبة هنا انه طفل premature برضه ساعات

هنا ميزته انك بتابع الطفل و الضغط هنا شبه هادي و لو الطفل حصله حاجة تتدخل غير كده بتابع كل شوية و تريح شوية

🚫 هنا اشهر مكان ليه حضان الشرعية او اي مكان بيعمل الكورس و خلاص و سعره بيكون في المعقول يعني قي الشريعة ب ٢٠٠٠ اظن

3️⃣ عناية
هنا ده اعلي واحد في الفلوس و برضه هنا ممكن تركب tube و كذا مهارة تانية
غير كده انت بتاع المريض و لو قدر الله الوضع ساء بتتدخل

🚫 اشهر كورس ليه مع د ابراهيم صبري و ده كورس تقيل جدا و اللي جربه شكر فيه و هتطلع متعلم كويس بس عيبه سعره غالي معدي ٤٠ او ٥٠ الف

----------------------------
🚨بس انت لو هتاخد الطريق ده عشان تحقق دخل ليك لازم تاخد بالك من كذا نقطة:
🚫 اول حاجة دور في الشغل ده حلال ولا حرام عشان لو دروبات (بمعني انك بتروح مكان حد) و ده ناس بتقول عليه حرام فانت دور بنفسك في النقطة مش هقدر اديك فيها رائ

🚫 عشان تنزل تبقي متعلم كويس اوي و الدكتور اللي كنت بتنزل معاه حسك تصد و تاخد راي تبدا شغل ولا تكمل تدريب اكتر شوية

🚫 تنزل في مكان كويس يعني انت متفق معاهم انك امتياز عشان لو حصل تفتيش متتضرش عشان طول ما انت امتياز مينفعش نشتغل عشان لو لقدر الله حصل تفتيش بتبقي مشكلة ليك
----------------------------

Related medical

1️⃣ تقف في صيدلية و ده هيفيدك انك تجمع معلومات كويسة عن الأدوية

2️⃣ Medical rep
وده انك بتسوق دواء او أجهزة طبية لدكترة و ده شغله و مرتباته حلو بس محتاج انك تعرف تكلم كويس و تقنع اللي قدامك

3️⃣ Call center medical
و ده بيكون اغلبه في المحافظات الكبيرة بتستقبل المكالمة و توجه المريض يحجز في انهي عيادة في المستشفى

Not medical

ده يعتمد علي خبراتك بقي

1️⃣ تنسيق و كتابة محتوي لحد ك freelancer

2️⃣ لو ليك في المونتاج او الدزاين بقي

#ماذا_بعد_التخرج
#طرق_الشغل_و_انت_امتياز

مساء الخير عليكم ❤️
دلوقتي الناس اللي البطاقة عندهم عاوزة تجدد الفترة الجاي او حتي خلصانه

يستنوا و ميجددوهاش امشوا بيها الفترة دي كده

لحد اول ما تستلموا الامتياز و بعدها باسبوع تروحوا تجددوا البطاقة و تتمضوا الاستمارة من شؤون الامتياز و مسؤول الامتياز
عشان يكون مكتوب فيها طبيب امتياز

عشان في تقديم التكليف لازم البطاقة يكون مكتوب فيها طبيب امتياز

---------------------------
جزء زيادة
لو. انت كنت مجدد البطاقة خلاص حلو استني دلوقتي متجددهاش غير قبل التكليف بشهر ولا حاجة هتقولي ليه؟

1️⃣ عشان لو حابب تغير محل الإقامة عشان تاخد التكليف في مكان مش في النطاق الجغارفي بتاعك
يعني مثلا احنا كفر الشيخ لينا محافظات معينة نقدم فيها مثلا واحد عاوز يروح القاهرة مثلا مش هينفع
فساعتها بتعوز تغير محل الإقامة الاول للقاهرة عشان تقدر تقدم تكليف في القاهرة

2️⃣ نفس فكرة محل الإقامة بس عشان تاخد مكان نائي
يعني مكان معين لو انت من كفر الشيخ فهو مش نائي
بس لو انت من القاهرة بقي نائي

3️⃣ دي للبنات لو هتكتب الكتاب قبل التكليف ده هيساعدك لو جالك مكان بعيد تقدمي تظلم و تروحي مكان قريب


---------------------------
طب انا هستني البطاقة و اجددها بعد استلام امتياز طب كده هعمل الفيزا ازاي؟!
بعد ما تستلم و تجدد البطاقة هتروح البريد و تعمل الفيزا اول مرتب بيتاخر كده كده و حتي لو نزل و انت مش عامل الفيزا بتروح تعمل فيزا و المرتب بينزلك عادي

كده كده الفلوس مربوطة بالرقم القومي فمتقلقش

يلا نمسك ٣ طريق معانا و هو التدريب

انت واحد مش حاطط في دماغك معادلات ولا حتي شغل برايفت و عاوز تدرب في التخصص اللي بتحبه

بتبدا تشوف التخصصات اللي انت مديها اولويه عندكم او حابب تشغل فيها

🚫 مثال انت حابب جراحة عامة يبقي تنزل كتير عمليات و خلي النواب يشوفك كتير و بعد كده هتبدا تحاول تعلم اكتر و اكتر و ممكن يعتمدوا عليك في حاجة في العملية كمان

بشكل عام الشغل الجراحي عاوز تدريب كويس اوي فكل ما تكون دايس فيه من بدري لما يجي وقت النايبة هتبقي واصل لي درجة كويسة


⚡️ لو ليك حد من قرايبك او حد تثق فيه انه يعلمك بضمير يبقي ده من التخصصات اللي تديها فرصة كويسة ان تدرب و تتخصص فيها حتي لو انت مش حابب التخصص ده خالص اديله فرصة تاني في التفكير

⚡️ طبعا انت قررت تنزل تدرب في تخصص حاول تشوف النايب الكويس و تدوس معاه اكتر عشان سعات ممكن تلاقي نواب مكبرين دماغهم
و ده هتحسه واحدة واحدة وانت في المستشفى

----------------------------
برضه لو انت محدد انك عاوز تكون دكتور جراحة مثلا مش معني ده انك تسيب باقي الطب كله، لازم يكون عندك معلومات في الباقي الحد الادني في تخصصات معينه زي النسا مثلا حد من العيلة حامل او لو انتي دكتورة وحامل او انت دكتور و مراتك حامل لازم تبقي عندك خلفية عن disease with pregnancy


🚫 اقروا البوست ده حلو عن التخصصات و ازاي تختار التخصص

----------------------------
اخر نصيحة بلاش تقارن طريقك او قرار انت اخدته بحد كل واحد ماشي في طريقه

يعني مثال انت مثلا هتلاقي ناس بتلقط كلمتين في الطواريء و تنزل تشغل انت شايف ده غلط خلاص ملكش دعوة بيه هو اختار الطريق فتقعدش تقول لنفسك اصل فلان سبقي او ده بدا شغل وانا لسه بدرب

امشي في طريقك و ركز فيه و متفضلش تبص علي غيرك بيعمل ايه

و طبعا طول ما انت في طريقك ادعي ربنا يلهمك الطريق المناسب لك و استشير حد تثق في كلامه يكون اكبر منك بحيث ممكن يكون شايف حاجة انت مش شايفها و عنده خبره عنك

#ماذا_بعد_التخرج
#طريق_التدريب

صباح الخير عليكم ❤️
ان شاء الله بليل رسالة عن الامتياز
فلو حد عاوز يسال علي حاجة يكتبها في الكومنتات و هوضحها في الرسالة بليل أن شاء الله

يلا بسم الله الرحمن الرحيم نشوف الامتياز ده عبارة عن ايه

حاجات هنعملها قبل الامتياز

🚫 ورقة اخلاء و دي عشان نخلصها هنلف علي ٤ او ٥ أماكن عشان نمضيها
1️⃣ التربية العسكرية للولاد فقط
تروح و يبقي معاك الورقة الصغيرة بتاع التربية العسكرية ممكن يقولك سبها يوم و تعالي خدها بكره
(مينفعش حد يروح يعمل ل اتنين كل واحد بنفسه)

2️⃣ ختم من المدنية الجامعية بتاع السكن دي كله هيختمه حتي لو عمرك ما اخدت سكن
احنا كانت المدنية الجامعة اللي عند عند الميكروباصات

3️⃣ ختم من راعية الطلبة في الأرضي

4️⃣ ختم من المكتبة

5️⃣ ختم من الشؤون

6️⃣ في الاخر ختم من وكيل الكلية بقي 😂

🚫 الجاي حاجات بسيطة بقي
1️⃣ 4 صور شخصية
2️⃣ اصل شهادة الميلاد حديثة
3️⃣ 2 صورة بطاقة
4️⃣ ٢ و٧ جند واحدة بتطلبها اولاين و هحط لها رسالة في الكومنتات (ولاد بس)
او لو ليك إعفاء او تأجيل مؤقت تروح نخلصه من منقطة التجنيد التابع ليها في الحالة دي لازم تكون البطاقة سارية وانت رايح

🚨 الكلام ده كله هيتقال بعدين من الكلية بس قولت اوضحه عشان لو حد عاوز يبدا في الورق او يبقي عارف مطلوب منه ايه الفترة الجاية
تقدروا تخلصوا كل حاجة دلوقتي ما عدا ورقة اخلاء

----------------------------
🚨 اخر حاجة لازم فيزا من البريد اي نوع بقي عشان المرتب 🥰
المرتب ٢٦٢٠ 🫣

- لو حد معاه فيزا قديم تنفع ولا لا بحاول اسال في النقطة دي لسه بس لو ينفع المهم تبقي صالحة لحد شهر ابريل ٢٠٢٨

- اول مرتب بيتاخر شوية ممكن شهرين يعني فلو انت البطاقة منتهيه استني لما تستلم امتياز و تجدد البطاقة و بعدها اعمل فيزا بريد بقي

نيجي للامتيار بقي

نيجي للجد اللي يهمنا بقي الأمتياز في اول سنة فيه ايه انا كاتب بالترتيب اللي بدانا بيه عادي يتغير عندكم
1️⃣ اطفال
2️⃣ جراحة عامة
3️⃣ نسا
4️⃣ باطنة عامة
كل حاجة ٣ شهور

النظام بشكل عام

- هيبقي في ليدر لكل جروب ده اللي بينظم الدنيا مع الدكتور المنسق من القسم
(اللي هيبقي ليدر يبعتلي اقوله يظبط الدنيا ازاي و تقسيمات الحضور عندنا)

- الليدر هيعرف الحضور ازاي و علي أساسه يبدا يقسم الحضور و عادي برضه نبدا مع بعض قبل ما تخلص التقسيمة النهائية للحضور

- الحضور نفسه بناخد امضي حضور من شؤون الامتياز في الدور السادس و مفيش امضي انصراف و محدش يسال فيه امضي انصراف ولا لا

- الامضي لحد ١٠ بالكتير اوي و في اول شهر بالكتير برضه هيبقي بالكارنيه

- الحضور رسمي ٣ ايام في الأسبوع و اليوم ١٢ ساعة بس الواقع
الحضور يومين في الأسبوع و بعد كده خليناها يوم في الأسبوع عشان الزحمة و external (دول امتياز من جامعات تانية معانا)

- طب الغياب بيبقي الدنيا جد اوي؟
الدنيا كويسة في الغياب مع الشؤون بعد ما يعدي اول شهر و طول ما انتم بتتعاملوا معاهم كويس و مش بتعملوا زحمة
(يعني رايحن تخدوا الغياب لقتوا زحمة شوية بشوية يدخلوا)

- طب رتم الحضور هيفضل هادي اه ان شاء الله الا اذا فتحوا طوارئ ممكن يزيد يوم في الأسبوع ولا حاجة

- الأقسام كويسة و مش بيخدوا غياب عندهم الا قسم الباطة العامة فيه غياب عندهم يعني لازم تفضل قاعد لحد الساعة ١ او ٢

- بيكون في تقيم كل شهر و ده بيبقي شفوي منظر بس حرفيا و الدكتور يمضي في الوك بوك و خلاص
لازم تحضر ٢ من ٣ الا الباطنة و اطفال لازم تحضر ٣

طب الإستفادة

🚫 في نواب كويسين وبيعملوا عادي و كل ما النايب يبقي شايفك اكتر معاه هيهتم وهو بيعلمك و العماليات برضه كويسة بي صعب تعمل حاجة طبعا بتشوف بس و تسال عادي و النواب متعاونين

🚫 مفيشق، درتي هنا الا حاجات بسيطة زي تودي المريض يعمل اشعة او تحليل او تاخد غياب لراوند 😂 و ده في قسم واحد برضه مش هقول المرة دي

طب ينفع احول امتياز بره

- ليك سنة لو هتحول جامعة
- او ٦ شهور لو هتحول تعليمي او عام

مش لازم تاخد الفترة علي بعضها ممكن عادي راوند هنا بعدها راوند بره وبعدها راوند هنا زي ما تحب

🚫 ده بيبقي ليه شوية ورق بتخلصه هنا و المكان اللي هتحول فيه و كمان في العاصمة الإدارية ده اللي عرفته في الموضوع ده

طب احول و اروح مكان حلو و تعليم حلو ولا افضل هنا

1️⃣ لو من كفر الشيخ نفسها هنا او مراكز كفر الشيخ
مش مستاهله تحول افضل هنا و خلاص الحضور قليل و الدينا ماشية بالحب عشان كده كتير اوي اكسترنال بيجوا هنا

🚫 هتقولي عاوز تعليم احسن واتدرب كويس
هقولك جميل ما تخليك هنا حضور كويس اوي و روح المكان اللي تحبه volunteer و اتعلم و انطلق علشان متبقاش مقيض نفسك بنظام معين عشان لو حصلك ظرق تكون عارف تسلك امورك بسهولة

2️⃣ لو انت من بعيد و عاوز جامعة قريبة منك يبقي انقل عندك التخصصات اللي حضورها هنا صعب بشكل اساسي زي
باطنة عامة
طواري في السنة التانية
----------------------------
دلوقتي في رحلة التعليم انت مش مجبر و لا هتلاقي حد يمشي وراك يعلمك، انت اللي بتسعي بنفسك عشان تتعلم و تطور من نفسك خطوة بخطوة

لو في سؤال ابعتوا في الكومنتات

مساء الخير عليكم ❤️
انا زودت شوية معلومات في الرسايل
1️⃣ في جزء البطاقة

2️⃣ في جزء ازاي تبقي أخصائي عدلت شوية معلومات هنا

كذا حد كان سال علي النقط دي
🚫 لو معاك فيزا بريد بالرقم القومي بتاعتك قديمة عادي المهم تكون صالحة لحد شهر ابريل ٢٠٢٨

🚫 لو هتحول الامتياز بره بينزلك المرتب عادي

🚫 لو انت ليك تاجيل من الجيش او اعفاء و مش هتقدر تعمله دلوقتي عادي اطلب ٧ و ٢و٣ جند و زي الفل

بسم الله الرحمن الرحيم ❤️

رسايل اللي نزلت حتي الان

1️⃣ طريق السفر
واحد +اتنين

2️⃣ الشغل البرايفت

3️⃣ التدريب

4️⃣ الامتياز و نظامة

🚫 البطاقة

معلش كنت فاكرهم بيتكلوا اعلي إفادة التراكمي هتبقي بعد ٣ او ٤ شهور


الافادة اللي بيتكلموا عليها لو حد عاوزها عشان يقدم علي شغل او كورس عامة و بيكون مكتوب فيها
إفادة الي مستشفى كذا او الي حضور كورس كذا

و ده اختياراي لو حد محتاجها يعملها
و لو مش عاوزها مش مهم دلوقتي اعلمها لما تعوزها بعدين بقي عادي

صباح الخير عليكم ❤️

زي ما اتكلمت معاكم في نصايح في رحلة الطب و لسه فيه تكملة بعد رمضان ان شاء الله

لازم اتكلم معاكم عن اهم حاجة و هي علاقتنا مع ربنا فبذكركم و بذكر نفسي

ديما لازم نسعي الي ربنا و نقرب و  هنلاقي ربنا بيكرمنا و بيفتح علينا

عن أنس بن مالك عن النبي ﷺ فيما يرويه عن ربه قال: «إذا تقرب العبد إلي شبرًا تقربت إليه ذراعًا، وإذا تقرب إلي ذراعًا تقربت منه باعًا، وإذا أتاني يمشي أتيته هرولة».

----------------------------
🚫 فديما شوف انت فين و بتعمل ايه و ركز علي ذنوبك واياك انك تقلل من ذنب و بالاخص ذنوب اللسان اللي بنقع فيها واحنا مش حاسسين زي كذبة او غيبة او نمية او شتيمة و الخ

قال تعالي: «مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ»

🚫 اهتم تحضر او تسمع دروس و تعرف اكتر عن الحلال و الحرام عشان فيما بعد هنبقي مسؤلين عن اسرة و اولاد وانت ساعتها القدوة فانت لو مش عاوز ولاد يكذبوا يبقي انت لازم تكون مش بتكدب و هكذا

هرشحلكم اسماء شيوخ كتير اولاين
1️⃣ د احمد العربي
2️⃣ م امجد سمير
3️⃣ الثلاثي في ايه المشكلة
4️⃣ م احمد عامر
5️⃣ م علاء حامد
6️⃣ فاهم برودكاست ده مستضيف شيوخ كتير في مواضيع مختلفة تحفة جدا
7️⃣ د احمد عبدالمنعم في تفسير القرآن
8️⃣ د حازم شومان

طبعا في كتير كمان كويسين جدا اولاين انت لما تبدا تسمع مع حد هتلاقي الاغلبية بيظهر قدامك ان شاء الله 

🚫 اقرا و اسمع قران كتير ثواب عظيم و راحة و هدوء و هيسهل عليك لما تقرأ او تحفظ كمان

🚫 الصحبة الصالحة مهمة جدا جدا عشان تعينوا بعض ولما تحس انك بتقع تلاقي اللي يساعدك

🚫 خلي التايم لاين عندك يبقي مفيد و تاخد منه ثواب انك تعمل فلو لي شيوخ و صفح بتنزل قران

ربنا يوفقنا جميعا لما يحب و يرضي ❤️❤️

كل عام وأنتم بخير وصحة وسلامة يارب العالمين ❤️❤️

رمضان فرصة جديدة للتوبة و العتق من النار فنسعي كأنها اخر فرصة لينا

ربنا يتقبل منا ومنكم صالح الأعمال ❤️❤️

مساء الخير عليكم اللي عندهم دور تاني و محتاجين اي مذكرات
يبعتوا علي البوت هنا و ربنا يعينكم و يقويكم

@Easymodule2_bot

انتم بتبدوا امتياز في شهر ٩ ان شاءالله

صباح الخير عليكم ❤️

ايه احسن ترتيب في الروتاشن نبدا بيه؟

كله زي بعضه مش هتفرق بس الفكرة كلها في حاجة واحدة ان الباطنة اللي بيرخموا علي الغياب بيكون غياب في شؤون امتياز و غياب مع النواب

فكله واحد يشوف الفترة اللي عنده فيها باطنة مظغوط في الوقت او مشغول ولا لا بس كده

يعني مثلا حد عنده باطنة ٦ و ٧ و ٨
و هو الوقت ده عنده ظروف و مش هيقدر يحضر بانتظام زي التقسيمة يبقي يحول لي جروب تاني احسن


اطفال و نسا و جراحة مفيش غياب مع النواب بيكون غايب في الشؤون بس

طب الحضور قد ايه

هيبان من كلام الأقسام بس المستشفي متستوعبش عدد كبير اصلا

يعني في اطفال بنكون ١٠ في العيادة بيقولوا نصكم يمشوا عشان الزحمة 😂

فالحضور يومين بالكتير يعني ان شاء الله

ده لو يومين يبقي العيادة في اليوم مثلا فيها حوالي ٢٥ واحد و ده صعب خالص

طبعا يا شباب كل group هيتقسم لي
Subgroups

يعني كل ١٠ او ١٥ واحد بيحضروا في وقت معين طول مدة ٣ شهور

مثبتين مثلا حد و اربع عندنا حضور طول ٣ شهور

بيبقي فيه برضه تحويلات لي subgroups بحيث الأصحاب يبقوا مع بعض عادي

ركزوا اهم حاجة ان كل واحد يحول لي الجروب اللي عاوزة دلوقتي اهم حاجة و سيبكم من تقسيمة subgroups هتتظبط بعدها ان شاء الله

----------------------------
فكرة subgroups لو انتم حضور يويمن في الأسبوع

الجروب في ٢٢٠ شخص

هنقسمة الي

ناس سبت و ثلاث
ناس حد و اربع
ناس اتنين و خميس

كل يومين فيه شبه ٧٥ واحد بيحضروا مع بعض

نرجع نقسم ٧٥ الي ٣ مجاميع صغيرة

لو حاجة زي الجراحة
العيادة فيهم ٢٥ بيحضروا مع بعض
العنبر فيهم ٢٥ بيحضروا مع بعض
العمليات فيهم ٢٥ بيحضروا مع بعض


🚨 طبعا كل ٢٥ واحد دول بيحضروا مع بعض طول مدة ٣ شهور مينفعش يروحوا مع جروب تاني او يوم تاني
الا لو لقي حد يبدل معاه لو في يوم عنده ظرف و لا حاجة

🚨طبعا بيكون فيه فرصة في الاول ان كل واحد يحول لي subgroup المناسب ليه عشان يبقي مع أصحابه


🚨طبعا انتم هتلفوا علي عيادة و عمليات و عنابر
مثلا السبت عيادة
الثلاث عمليات
السبت عنبر
الثلاث عيادة
وهكذا طول ٣ شهور


كده كده كل الكلام ده الليدر في كل جروب هيقولوه ليكم لسه بس خليكموا ماشين خطوة بخطوة دلوقتي

بكره ان شاء الله بداية استلام امتياز و علي مدار الاسبوع

بلاش تعملوا زحمة خليكم منظمين عشان يخدوا عنكم انطباع حلو و تعاملهم معاكم يبقي كويس و يمشوا معاكم الدنيا

شؤون امتياز متعاونين معانا جدا طول ما احنا مش بنقرفهم

🚫 خلوا معاكم قلم عشان لو بتكتبوا حاجة في الورق

🚫 في ورق الاستلام الاتينن اكتبوا رقم الكشف فوق

🚫 في ورقة استلام الخاص اوعي تنسي توقع قسم الأطفال مش هيرضي يمضي لو مش موقع

كده كده الحضور و الغياب من الأسبوع الجاي مش الاسبوع ده الا لو قسم الباطنة بس حب يبقي فيه حضور