EIO (ဆက်သွယ်ရေးနှင့်သတင်းပြန်ကြားရေး)

◾️ NUG ကို မကျေနပ်လို့ တော်လှန်ရေး ရပ်ကြမလား

စပိန်ပြည်တွင်းစစ် (1936-1939) တုန်းက ဖက်ဆစ် အာဏာရှင် ဖရန်စစ္စကို ဖရန်ကို ကို ဖြုတ်ချဖို့အတွက် စပိန်ပြည်သူတွေ၊ ဒီမိုကရေစီ လိုလားသူတွေ၊ လက်ဝဲဝါဒီတွေ ပေါင်းပြီး ရီပတ်ဘလီကန် (Republican) တပ်ပေါင်းစုကြီး ဖွဲ့ခဲ့ကြပါတယ်။ တော်လှန်ရေးလုပ်နေရင်းနဲ့ ရီပတ်ဘလီကန် အစိုးရတွင်းမှာ ခြစားမှုတွေ၊ နိုင်ငံရေး အယူအဆ ကွဲလွဲမှုတွေ၊ တာဝန်ခံမှု ကင်းမဲ့တာတွေ ဖြစ်လာပါတယ်။

အဲဒီအခါမှာ ပြည်သူတွေနဲ့ တော်လှန်ရေး အင်အားစုတချို့ဟာ အစိုးရကို စိတ်နာပြီး ပူးပေါင်း ဆောင်ရွက်မှု ရပ်တန့်တာ၊ အချင်းချင်း ပြန်တိုက်ခိုက်တာတွေ လုပ်လာကြပါတယ်။ အချင်းချင်း မကျေနပ်လို့ တော်လှန်ရေးကို ကျောခိုင်း လိုက်တဲ့အတွက် ရှေ့တန်းက ရဲဘော်တွေ လက်နက်နဲ့ ရိက္ခာ ပြတ်လပ်သွားပါတယ်။ နောက်ဆုံးမှာ အာဏာရှင် ဖရန်ကို အနိုင်ရသွားပြီး စပိန်နိုင်ငံကြီးဟာ နောက်ထပ် ၃၆ နှစ်တိုင်တိုင် (၁၉၇၅ ခုနှစ် ဖရန်ကို သေဆုံးသည်အထိ) ဖက်ဆစ် အာဏာရှင် လက်အောက်ကို ပြန်လည် ကျရောက်သွားခဲ့ရပါတယ်။

စိတ်ပျက်အားငယ်မှုနဲ့ ဒေါသထွက်မှုတွေ ရှိပေမယ့် ခံစားချက်ရှေ့တန်းတင်ပြီး တော်လှန်ရေးကို ကျောခိုင်းရင် မိမိတို့ ဖြုတ်ချချင်နေတဲ့ အာဏာရှင်စနစ်ကို သက်ဆိုးရှည်စေဖို့ ကိုယ်တိုင် ကူညီလိုက်သလို ဖြစ်သွားစေတယ် ဆိုတာ ဒီဟာက သမိုင်း ဥပမာ တစ်ခုပါ။ တော်လှန်ရေးဆိုတာ ဘုံရန်သူ (စစ်အာဏာရှင်စနစ်) ကို ဖယ်ရှားပြီး ဖက်ဒရယ်ဒီမိုကရေစီ ပန်းတိုင်ကို သွားနေတဲ့ ခရီးစဉ် ဖြစ်ပါတယ်။ NUG အစိုးရဆိုတာ အဲဒီခရီးကို ပို့ဆောင်ပေးနေတဲ့ ကားနဲ့ ကားသမား သာ ဖြစ်ပါတယ်။

ကားသမားက လမ်းမှားမောင်းနေတယ်၊ ဒါမှမဟုတ် ကားပေါ်မှာ ပြဿနာရှိတယ်ဆိုရင် ကားသမားကို သတိပေးရမယ်၊ လိုအပ်ရင် ကားသမား အသစ်ပြောင်းဖို့ ကြိုးစားရပါမယ်။ ကိုယ်တိုင်လည်း ဝင်မောင်းဖို့ အခြေအနေ ဖြစ်လာရင် ဝင်မောင်းသင့် မောင်းရပါမယ်။ ဒါပေမဲ့ ကားသမားကို စိတ်ဆိုးပြီး တောကြီးမျက်မည်းထဲမှာ ကားပေါ်ကနေ ဆင်းချသွားတာမျိုးဟာ ပန်းတိုင်ကို မရောက်တော့ဘဲ ကိုယ်တိုင် ဒုက္ခရောက်မယ့် လုပ်ရပ်ဖြစ်ပါတယ်။

တော်လှန်ရေးကာလ ကြာလာတာနဲ့အမျှ ပြည်သူတွေဟာ စီးပွားရေး၊ လူမှုရေး၊ စိတ်ပိုင်းဆိုင်ရာ ပင်ပန်းနွမ်းနယ်မှုတွေကို ခံစားရလေ့ရှိပါတယ်။ ဒီလိုအချိန်မှာ အချင်းချင်းက အမှားတစ်ခုခု လုပ်လိုက်တဲ့အခါ အဲဒီအမှားကို အကြောင်းပြချက် တစ်ခုအနေနဲ့ သုံးပြီး ငါတော့ နားပြီ ဆိုပြီး ထွက်သွားဖို့ ဝန်မလေး တတ်ကြတော့ပါဘူး။ ဒါဟာ လူ့သဘာဝဖြစ်ပေမယ့်၊ တော်လှန်ရေး သဘောတရားအရတော့ စစ်အာဏာရှင်တွေ အလိုချင်ဆုံး အခြေအနေပဲ ဖြစ်ပါတယ်။

လက်ရှိ မြန်မာ့နွေဦးတော်လှန်ရေးဟာ ကမ္ဘာမှာ ရှားရှားပါးပါး ပြည်သူက ရာနှုန်းပြည့် ထောက်ပံ့ထားရတဲ့ တော်လှန်ရေး ဖြစ်ပါတယ်။ စစ်ကောင်စီဘက်မှာ နိုင်ငံတော် ဘဏ္ဍာငွေ၊ အခွန်ငွေ၊ သယံဇာတ၊ ဗဟိုဘဏ်၊ လေကြောင်းရန်၊ အတင်းအကျပ် စစ်မှုထမ်းဥပဒေက ရတဲ့ လူအင်အားတွေ ရှိနေပါတယ်။ တော်လှန်ရေးတပ်ဖွဲ့တွေဘက်မှာ ပြည်သူလူထုရဲ့ ထောက်ပို့ငွေ၊ စိတ်ဓာတ်ခွန်အား နဲ့ ယုံကြည်မှုသာ ရှိပါတယ်။

ပြည်သူတွေက တော်လှန်ရေးကို ကျောခိုင်းလိုက်ရင် ကိုယ့်ဘက်က တော်လှန်ရေးသမားတွေရဲ့ အသက်ရှူပေါက်ကို ကိုယ်တိုင် ပိတ်ပင်လိုက်တာနဲ့ တူညီပါတယ်။ စစ်ကောင်စီရဲ့ အဓိက ဗျူဟာက ပြည်သူတွေ မျှော်လင့်ချက်မဲ့ပြီး အချင်းချင်း ကွဲကွာသွားစေဖို့ ဖြစ်ပါတယ်။ NUG ကို စိတ်ပျက်လို့ တော်လှန်ရေးကို စွန့်ခွါမယ်ဆိုရင် အာဏာရှင်တွေ နှစ်ပေါင်းများစွာ အသုံးပြုခဲ့တဲ့ သွေးခွဲအုပ်ချုပ်ခြင်း (Divide and Rule) သြဇာခံအဖြစ် သက်ဆင်းသွားခြင်းပဲ ဖြစ်ပါတယ်။

တော်လှန်ရေးကို ကျောခိုင်းတာဟာ NUG ကို သပိတ်မှောက်ရာ မရောက်ဘဲ တောထဲမှာ အသက်ပေးတိုက်နေတဲ့ လူငယ်တွေကို သေတွင်းထဲ တွန်းပို့လိုက်တာ ဖြစ်သလို၊ နောက်လာမယ့် မျိုးဆက်သစ်တွေကိုပါ စစ်ဖိနပ်အောက်မှာ ဆက်လက် နေထိုင်ဖို့ ကိုယ်တိုင် ရွေးချယ်လိုက် သလိုပါပဲ။ အစိုးရတစ်ရပ် (သို့မဟုတ်) အဖွဲ့အစည်းတစ်ခုကို ပြုပြင်ပြောင်းလဲဖို့ ကြိုးစားရတာဟာ ခက်ခဲပါတယ်။ ဒါပေမဲ့ တော်လှန်ရေးကြီး ကျရှုံးသွားရင် ခံစားရမယ့် ဆင်းရဲဒုက္ခက အဆပေါင်းများစွာ ပိုမို ကြီးမားပါလိမ့်မယ်။

ဒါကြောင့် NUG အပေါ် မကျေနပ်မှုကို တခြားနည်းလမ်းတွေနဲ့ ပြသဖို့သာ တိုက်တွန်းပါတယ်။ တရားမျှတမှုနဲ့ ပွင့်လင်းမြင်သာမှုကို တောင်းဆိုတာဟာ မဖြစ်မနေ လုပ်ရမယ့် အလုပ်ပါ။ ဒါပေမဲ့ ဒီကိစ္စကို အကြောင်းပြုပြီး ရှေ့တန်းက ရဲဘော်တွေကို ကျောခိုင်းလိုက်တာ၊ တော်လှန်ရေးကို ရပ်တန့်ပစ်ဖို့ စဉ်းစားတာတွေဟာ ကြွက်မနိုင်လို့ ကျီမီးနဲ့ရှို့ သလို အပျက်ဘက် ရောက်ဖို့သာ ဖြစ်သွားနိုင်ပါတယ် ဆိုတာလေး လက်တို့ချင်ပါတယ်။

📝မူရင်းရေးသားသူကို #Credit ပေးပါတယ်။

#Admin Team
#Eagle Information Operator
#EIO (ဆက်သွယ်ရေးနှင့်သတင်းပြန်ကြားရေး)

🙏2👍1

199 views14:48