မော်လိုက်မြို့ရှိ ပျူစောထီးရွာ အများအပြားကို တော်လှန်ရေးအဖွဲ့များ ဆက်တိုက်သိမ်းပိုက်၊ မြို့နှစ်မိုင်ပတ်လည်သာ စစ်တပ် အုပ်စိုးထားနိုင်

11 Sept 2025 By Garcia Ni / MPA

စစ်ကိုင်းတိုင်း၊ မော်လိုက်မြို့နယ်အတွင်းရှိ ပျူစောထီးကျေးရွာများကို တော်လှန်ရေးအဖွဲ့များက ဆက်တိုက်သိမ်းပိုက်နိုင်ပြီး တိုက်ပွဲဆက်လက်ပြင်းထန်နေကြောင်း ဒေသခံသတင်းရင်းမြစ်များထံမှ စုံစမ်းသိရှိရသည်။

မော်လိုက်မြို့နယ်အတွင်း ပြီးခဲ့သည် သြဂုတ်လကုန်ပိုင်းမှစ၍ တိုက်ပွဲများပြင်းထန်နေခြင်းဖြစ်ပြီး ချင်းတွင်းမြစ်အရှေ့ကမ်း စစ်ကောင်စီဂိတ်စခန်းများနှင့် မော်လိုက်မြို့အထက်ပိုင်းရှိ ပျူစောထီးကျေးရွာများကို တော်လှန်ရေးအဖွဲ့များက တောက်လျှောက်သိမ်းပိုက်နိုင်ခဲ့ခြင်းဖြစ်သည်။

" တိုက်နေတာတော့ကြာပြီ။ ပျူစောထီးရွာတွေကို တစ်ရွာပြီးတစ်ရွာတောက်လျှောက်သိမ်းနေတာဗျ။ တိုက်ပွဲလည်းဆက်ဖြစ်နေတာ။ စစ်ရေးသတင်းဆိုတော့ ဒီလောက်ပဲပြောလို့ရတယ်"ဟု မော်လိုက်မြို့နယ်အတွင်း တော်လှန်ရေးရဲဘော်တစ်ဦးက MPAကိုပြောသည်။

လက်ရှိတွင် ချင်းတွင်းမြစ်အရှေ့ဘက်ကမ်းမှ ပျူစောထီးကျေးရွာများ၊ စစ်ကောင်စီဂိတ်စခန်းများကို တော်လှန်ရေးတပ်ဖွဲ့များက အလုံးစုံသိမ်းပိုက်ထားနိုင်ပြီး ချင်းတွင်းမြစ်အနောက်ဘက်ကမ်းရှိ မော်လိုက်မြို့ နှစ်မိုင်ပတ်လည်ကိုသာ စစ်ကော်မရှင်က နယ်မြေစိုးမိုးထားနိုင်ကြောင်းသိရသည်။

" မြစ်အရှေ့ဘက်ကမ်းကတော့ PDFနယ်မြေဖြစ်သွားပြီ။ မြစ်အနောက်ဘက်ကမ်းကလည်း ကင်းတပ်၊ ရှားပင်၊ မော်လိုက်ကလေး သုံးရွာပဲကျန်တော့တယ်။ နားပင်၊ ကျောက်ပြင်ကုန်း၊ နောင်ပိန်းရွာတွေလည်း PDF တွေသိမ်းပြီးပြီ။ တော်တော်များခဲ့ပြီ၊ မော်လိုက်အနီးအနား တစ်မိုင်နှစ်မိုင်ပဲရှိတော့မှာပေါ့ အလွန်ဆုံး "ဟု စစ်ကော်မရှင်နှင့်နီးစပ်သည် မော်လိုက်မြို့ပေါ်ဒေသခံအမျိုးသားတစ်ဦးက MPAကို ပြောသည်။

တိုက်ပွဲအတွင်း စစ်ကော်မရှင်လက်အောက်ခံ ပျူစောထီးအများအပြားသေဆုံး၍ မော်လိုက်မြို့ပေါ်သို့ ဆုတ်ခွာထွက်ပြေးခဲ့ကြရပြီး ဒဏ်ရာရသူများလည်း အများအပြားရှိကြောင်း အထက်ပါသတင်းရင်းမြစ်က ဆက်လက်ပြောသည်။

" ဆေးရုံမှာဆိုလည်း ပြည့်လို့ပါ့။ လက်မှန်တဲ့သူနဲ့၊ ပေါင်မှန်တဲ့သူနဲ့ ဗိုက်မှန်တဲ့သူနဲ့ နည်းတာမဟုတ်ဘူး။ သေတဲ့သူလည်းသေပဲ"ဟု ၎င်းကဆိုသည်။

ထိုသို့ ပြင်းထန်နေသည့်တိုက်ပွဲအခြေအနေများကြောင့် မော်လိုက်မြို့ပေါ်ဒေသခံပြည်သူများအနေဖြင့် ကလေးမြို့နှင့် အခြားနယ်ဘက်ကျေးရွာများသို့ ထွက်ခွာရှောင်တိမ်းနေ​ကြသူများလည်း ရှိကြောင်းသိရသည်။

" ပိုက်ဆံရှိတဲ့လူ တော်တော်များများကတော့ ရှောင်ကြတယ်။ မလွယ်ဘူးလေ ရှောင်ဖို့ကလည်း။ ပိုက်ဆံအတော်ကုန်တာ။ ကျမတို့ကတော့မရှောင်ပါဘူး။ အခြေအနေကြည့်နေရတာပါ့။ အသံတခုခုကြားရင် အိမ်ထဲတံခါးပိတ်နေတော့တာ"ဟု အသက်သုံးဆယ်ဝန်းကျင် မော်လိုက်မြို့ဒေသခံအမျိုးသမီးတစ်ဦးက ပြောသည်။

လက်ရှိတွင် မော်လိုက်မြို့စစ်ကောင်စီတပ်များနှင့် ချင်းတွင်းမြစ်အရှေ့ခြမ်းနယ်မြေစိုးမိုးမှုရယူထားသည့် တော်လှန်ရေးတပ်များအကြား လက်နက်ကြီးအပြန်အလှန်ပစ်ခတ်မှုများ ရှိနေပြီး လက်နက်ကြီးကြောင့် မော်လိုက်မြို့ဒေသခံပြည်သူ ၅ဦးထက်မနည်း သေဆုံးခဲ့ရကြောင်း ဒေသခံများထံမှ စုံစမ်းသိရှိရသည်။


စာတည်း-ကိုဆန်း

အကြမ်းဖက်စစ်တပ်၏ ထိုးစစ်ကို ထိထိရောက်ရောက် ချေမှုန်းပစ်နိုင်ရေး နယ်မြေတချို့ကို စွန့်ကောင်းစွန့်ရလိမ့်မည်ဟု NUG ကာကွယ်ရေးဝန်ကြီး ပြောဆို

🟥စစ်တပ်၏ အတုအယောင် ရွေးကောက်ပွဲကို လုံး၀ လက်မခံဘဲ စစ်ရေး၊ နိုင်ငံရေး၊ လူထုနည်းဖြင့် ဆန့်ကျင်တိုက်ဖျက်မည်

ရန်ကုန်၊ စက်တင်ဘာ ၁၁

အကြမ်းဖက်စစ်တပ်၏ ထိုးစစ်ကို ထိထိရောက်ရောက် ချေမှုန်းပစ်နိုင်ရေး နယ်မြေတချို့ကို စွန့်ကောင်းစွန့်ရလိမ့်မည်ဟု အမျိုးသားညီညွတ်ရေးအစိုးရ- NUG ကာကွယ်ရေးဝန်ကြီးဦးရည်မွန်က ထုတ်ဖော်ပြောဆိုသည်။

NUG ၏ မီဒီယာဖြစ်သော PVTV နှင့် တွေ့ဆုံမေးမြန်းခန်းတွင် ကာကွယ်ရေးဝန်ကြီး ဦးရည်မွန်က အထက်ပါအတိုင်း ပြောဆိုခြင်းဖြစ်ပြီး စစ်ကောင်စီက အိမ်နီးချင်းအာဏာရှင်နိုင်ငံတချို့၏ ပြောင်ပြောင်တင်းတင်း ရပ်တည်ထောက်ခံမှု ရရှိလာသောအခါ စိတ်ဓာတ်စစ်ဆင်ရေးများဖြင့် ထိုးစစ်တချို့ကို အရဲကိုးလုပ်လာကြောင်း၊ ထို့ကြောင့် တော်လှန်ရေးအင်အားစုများအနေဖြင့် စစ်တပ်၏ ထိုးစစ်ကို ထိထိရောက်ရောက် ချေမှုန်းနိုင်ရေးအတွက် နယ်မြေတချို့ကို စွန့်ကောင်းစွန့်ရမည်ဖြစ်ကြောင်း ပြောဆိုသည်။

"အခုအချိန် အကြမ်းဖက်စစ်အုပ်စုကို ပိုပြီးတော့ အတင့်ရဲလာစေတဲ့ အဓိကအကြောင်းကတော့ အာဏာရှင် နိုင်ငံတချို့ပေါ့ဗျာ။ အဲဒီနိုင်ငံတွေရဲ့ ပြောင်ပြောင်တင်းတင်းရပ်တည်ထောက်ခံမှု ရလာတဲ့အချက်ကို အဲဒီအချက်ကိုပဲ အသုံးချ ဆိုက်ဝါးထည့်ရင်းနဲ့ ထိုးစစ်တချို့ အရဲကိုးလုပ်လာတဲ့သဘော ။ တော်လှန်ရေးအင်အားစုတွေအနေနဲ့ဆိုရင်တော့ ဒီအချိန်မှာနယ်မြေတချို့ စွန့်ကောင်းစွန့်ရမယ်။ ဒါပေမဲ့ စစ်မျက်နှာအတိုင်း ရန်သူ့ထိုးစစ်ကို ထိထိရောက်ရောက် ချေမှုန်းပစ်နိုင်ဖို့ပေါ့။ ဒါကို ကျွန်တော်တို့ ကြိုးစားနေတဲ့အချိန်ဖြစ်ပါတယ်။ လတ်တလော အရေးကြီးတဲ့ တော်လှန်ရေးအဖွဲ့အစည်းဖြစ်တဲ့ TNLA ဆိုရင် ဒါ နောင်ချိုကို လက်လွှတ်ခဲ့ရတယ်။ မန္တလေးဒေသ PDF တွေလည်း သပိတ်ကျင်းကို လက်လွှတ်ခဲ့ရတာ ရှိပါတယ်။ ဒါပေမဲ့ အခုချိန်က ဒါ ခံစစ်တွေတိုက်ဖို့ သင့်တော်တဲ့အချိန် မဟုတ်ဘူးဗျ။ အဲဒီအတွက် မြို့တွင်းက ကိုယ့်တပ်တွေ မြို့ပြင်ပြန်ထွက်ပေးတဲ့ သဘောပါပဲ။ အခုဆိုရင် ဒါ လှုပ်ရှားစစ်နဲ့ ရန်သူကို ပြန်ထိုးနေတဲ့အချိန်လို့ ကျွန်တော်တို့ ပြောချင်ပါတယ်" ဟု ဦးရည်မွန်က ဆိုသည်။

ထို့ပြင် ပြည်တွင်းရေးကို စွက်ဖက်နေသော တစ်ဖက်နိုင်ငံကြီးကြောင့် စစ်လက်နက်ပစ္စည်းရရှိရေး ဟန့်တားမှုတချို့ ဖြစ်နေသော်လည်း တော်လှန်ရေးတပ်များအနေဖြင့် ဆက်လက် တိုက်ခိုက်နိုင်ကြောင်း ပြောဆိုသည်။

"လက်နက်ခဲယမ်းမီးကျောက်နဲ့ ပတ်သက်ရင် လိုအပ်ချက်ကြီးကြီးမားမားရှိနေတယ်ဆိုတာကတော့ အမှန်ပါပဲ။ အထူးသဖြင့် အခုလိုအချိန်ပေါ့ တစ်ဖက် နိုင်ငံကြီးက ပြည်သူ့ရန်သူ စစ်အုပ်စုဘက်က ဗြောင်ကျကျရပ်၊ ကျွန်တော်တို့ ပြည်တွင်းရေးဝင်စွက်၊ နောက်ကျွန်တော်တို့ရဲ့ ညီနောင် တိုင်းရင်းသား တော်လှန်ရေးအဖွဲ့တွေအပေါ် ခြိမ်းခြောက်ကျပ်ကိုင် ဖိအားပေးနေတာကတော့ စစ်လက်နက်ပစ္စည်းရရှိရေးမှာ ဟန့်တားမှု တချို့ ဖြစ်နေတယ်လို့ ပြောရပါလိမ့်မယ်။ ဒါပေမဲ့ ရှာလို့စုလို့ရခဲ့သလောက် ရနေပါတယ်။ တစ်ဖက်မှာ ကိုယ်တိုင်ထုတ်လုပ်ရေးနဲ့ နည်းပညာအပိုင်းပေါ့ ။ ဒါဟာလည်းတိုးတက်နေတယ်။ ရန်သူ့လက်နက် ကိုယ့်လက်နက်ဖြစ်အောင် စွမ်းဆောင်နိုင်လာတာကတော့ အရေးကြီးတဲ့ တိုးတက်မှုလို့ဆိုရပါမယ်။ ကျွန်တော်တို့ ဆက်ပြီးတော့ တိုက်နိုင်ပါလိမ့်မယ်" ဟု ၎င်းက ဆိုသည်။

အခြားတစ်ဖက်တွင်လည်း စစ်တပ်က ထိုးစစ်ဆင်နေခြင်းနှင့်အတူ ရွေးကောက်ပွဲကိုလည်း ကျင်းပရန် ကြိုးပမ်းနေကြောင်း၊ စစ်တပ်က သူ၏ အမာခံ နိုင်ငံရေးပါတီကို အမည်ခံအာဏာလွှဲပြောင်းပေးပြီး တရားဝင်မှု ရှာချင်နေကြောင်း၊ NUG အနေဖြင့် စစ်ရေး၊ နိုင်ငံရေး၊ လူထုနည်းဖြင့် ဆန့်ကျင်တိုက်ဖျက်သွားမည်ဖြစ်ကြောင်း ၎င်းက ပြောဆိုသည်။

"အကြမ်းဖက်စစ်အုပ်စုအနေနဲ့ ဒီနှစ်ကုန်မှာ ရွေးကောက်ပွဲတစ်ခုလုပ်ဖို့ ပြင်ဆင်နေပေမဲ့ သူကိုယ်တိုင်လည်း မဝံ့မရဲဘဲဆိုတာကိုတော့ ကျွန်တော်တို့တွေ့ရတယ်ဗျ။ ဘာ့ကြောင့်လဲ တရားမျှတမှုလည်းမရှိ ဒီအတုအယောင် အလိမ်အညာရွေးကောက်ပွဲ တကယ်ဂုဏ်သိက္ခာရှိတဲ့ ဘယ်နိုင်ငံကမှ ထောက်ခံလိမ့်မယ်မဟုတ်ဘူးဆိုတာ သူတို့ ကောင်းကောင်းသိပါတယ်။ သူတို့ကို ထိုက်တန်သလောက် အသိအမှတ်ပြုနေတဲ့ အိမ်နီးချင်းနိုင်ငံကနေ ပြီးတော့လည်း အားလုံးပါဝင်တဲ့ ရွေးကောက်ပွဲမျိုးဖြစ်ဖို့ပေါ့ဗျာ။ ကျွန်တော်တို့ တွန်းအားပေးနေတယ်လို့လည်း ကျွန်တော်တို့ သတိပြုမိတယ်။ ပြည်သူအများစုကတော့ ဒီအကြမ်းဖက်စစ်အုပ်စုရဲ့ တရားမဝင်ရွေးကောက်ပွဲ ဒါကို ပြတ်ပြတ်သားသားဆန့်ကျင်ကြလိမ့်မယ်ဆိုတာ သိကြပါတယ်။ စစ်အုပ်စုလို့ပြောမယ်ဆိုရင် ပြည်ထောင်စုကြံ့ခိုင်ရေး ဖွံ့ဖြိုးရေးပါတီဆိုတာကတော့ သူ့ရဲ့ ကိုယ်ပွားအမာခံနိုင်ငံရေးပါတီပေါ့ဗျာ။ အဲ့တော့ ဒီရွေးကောက်ပွဲမှာ အဲ့လိုစစ်အုပ်စုရဲ့အမာခံနိုင်ငံရေးပါတီနဲ့ သူ့ရဲ့ နောက်မီးစွဲတွေ၊ လက်ဝေခံတွေတော့ ဝင်ပြိုင်ကြပါလိမ့်မယ်။ အာဏာသိမ်းပြီးတော့ တရားမဝင်ယူထားတဲ့ နိုင်ငံတော်အာဏာကို ရွေးကောက်ပွဲတစ်ခုနဲ့ သူ့ရဲ့ အမာခံနိုင်ငံရေးပါတီကို အမည်ခံလွှဲပြောင်းပေးပြီးတော့မှ တရားဝင်မှု ရှာချင်တဲ့အဓိပ္ပာယ်လို့ အဲဒီလို ပြောရပါလိမ့်မယ်" ဟု ဦးရည်မွန်က ဆိုသည်။

ယင်းအပြင် များမကြာမီ NUG အနေဖြင့် ပြုပြင်ပြောင်းလဲရေးများကို လုပ်ဆောင်သွားမည်ဖြစ်ပြီး တော်လှန်ရေးအင်အားစုများအနေဖြင့် စုစည်းညီညွတ်ကြရန် အရေးကြီး ၎င်းက ဆိုသည်။

"တကယ်တော့ဒီအချိန်က စစ်အုပ်စုအနေနဲ့ သူ ခေါင်းပြန်ထောင်နိုင်ဖို့ကြိုးစားနေတဲ့အချိန်ပဲ။ အဲဒီအချိန်မှာ ကျွန်တော်တို့အချင်းချင်း တစ်ယောက်ကိုတစ်ယောက် လက်ညှိုးထိုးပြစ်တင်ဝေဖန်နေရမယ့်အချိန်တော့မဟုတ်ဘူး။ ကျွန်တော်တို့ရဲ့ အားသာချက်တွေပိုပြီးတော့အားကောင်းအောင် အားနည်းချက်တွေကိုလည်း လိုအပ်သလိုဖြည့်ဆည်းနိုင်အောင် ကျွန်တော်တို့အားလုံးအတူတကွ ဝိုင်းရုန်းကြရမယ့်အချိန်လို့တော့ ကျွန်တော်တို့ဒီလို ကြည့်ပါတယ်။ ကျွန်တော်တို့ တစ်ယောက်တစ်ပေါက်ဖြစ်နေမယ်ဆိုရင်တော့ ရန်သူဝမ်းသာလိမ့်မယ်။ ရန်သူရဲ့ ဆိုက်ဝါးအသုံးချတာ ဖြစ်လိမ့်မယ်လို့တော့ပြောလိုပါတယ်ဗျ" ဟု NUG ကာကွယ်ရေးဝန်ကြီး ဦးရည်မွန်က ထုတ်ဖော်ပြောဆိုသည်။