EIO (ဆက်သွယ်ရေးနှင့်သတင်းပြန်ကြားရေး)

'ပြည်သူဆိုတာ မရှိဘူး' ဟု စုဆောင်းရေးတွင် တပ်အရာရှိများ ပြောကြားခဲ့ကြောင်း အလင်းဝင် စစ်ကောင်စီတပ်သား ထုတ်ဖော်

မောင်ခက်နွေ

(မဇ္ဈိမ) ။ ။ တော်လှန်ရေးတပ်ဖွဲ့ထံ အလင်းဝင်လာသော စစ်ကောင်စီတပ်သားတဦးက စစ်ကောင်စီ၏ စုဆောင်းရေးသင်တန်းတွင် ကြားခဲ့ရသည့် ၎င်းမကြိုက်ခဲ့သည့် စကားတခွန်းကို ထုတ်ဖော်ပြောကြားခဲ့သည်။

အာဏာသိမ်းစစ်တပ်၏ သတ်မှတ်ချက်အရ အပြင်လောကတွင် “ပြည်သူ” ဆိုသည်မှာ ရှိစရာအကြောင်းမရှိဘဲ၊ “တဖက်တွင် တပ်မတော်နှင့် တဖက်တွင် သူပုန်အဖွဲ့များ” သာရှိသည်ဟု ဆိုကာ၊ နောက်ဆုံးတွင် ထိုသို့သာ ဖြစ်သွားမည်ဟု ၎င်းတို့က ပြောကြားခဲ့ကြောင်း အလင်းဝင်လာသော စစ်ကောင်စီတပ်သားက ဖွင့်ဟခဲ့သည်။

ဓနုပြည်သူ့လွတ်မြောက်ရေးတပ်တော် (DPLA) က အလင်းဝင်လာသော စစ်ကောင်စီတပ်သားနှင့် ပြုလုပ်ထားသည့် အမေးအဖြေ ရုပ်သံဖိုင်တခုကို ယနေ့ (ဇူလိုင်လ ၁၄ ရက်) တွင် ထုတ်ပြန်ခဲ့ရာ၊ ယင်းရုပ်သံဖိုင်တွင် ၎င်းက ထိုသို့ အခိုင်အမာပြောကြားထားသည်။

“အဲဒီမှာ ကျွန်တော် စုဆောင်းရေးသင်တန်းမှာ မကြိုက်ခဲ့တဲ့ စကားတခွန်းရှိတယ်။ သူတို့က ဘာပြောလဲဆိုတော့၊ သူတို့သတ်မှတ်ချက်ထဲမှာ အပြင်လောကမှာ ပြည်သူဆိုတာ ရှိစရာအကြောင်းမရှိဘူးတဲ့။ တဖက်က တပ်မတော်၊ တဖက်က သူပုန်အဖွဲ့တဲ့။ နောက်ဆုံးမှာ အဲဒီလိုပဲ ဖြစ်သွားမယ်တဲ့” ဟု ၎င်းစစ်ကောင်စီတပ်ဖွဲ့ဝင်က ပြောသည်။

“မကွေးတပ်မ (၈၈) မှာ ကျွန်တော်တို့ကို ပြောကြားခဲ့တဲ့ စကားပါ” ဟု အလင်းဝင်တပ်သားက ဆက်လက်ပြောကြားသည်။ ၎င်းသည် မကွေးတိုင်း၊ စလင်းမြို့နယ်တွင် ကုန်စည်ပို့ဆောင်နေစဉ် စစ်ကောင်စီလက်အောက်ခံ ပျူစောထီးအဖွဲ့၏ ဖမ်းဆီးပေါ်တာဆွဲမှုခံရပြီး စစ်မှုထမ်း အပတ်စဉ် (၁၀) သို့ ပို့ဆောင်ခံရသူဖြစ်သည်။

“အဲဒါဆိုရင် ပြည်သူဆိုတာ မရှိဘူးဆိုရင် ကျွန်တော်တို့ ဘယ်လိုရပ်တည်မှာလဲ မသိဘူး။ သူတို့က မင်းတို့အဆွဲမခံရတဲ့ အချိန်ထိ မင်းတို့လိုချင်တဲ့ အခြေနေဘက်ကို ရွေးချယ်ခွင့်ရှိတယ်"

“မင်းတို့ကြိုက်ရာဘက်ကို သွားလို့ရတယ်၊ ဒါပေမယ့် မင်းတို့က ပေါ်တာဆွဲခံရတာနဲ့ မင်းတို့စစ်သားဖြစ်သွားပြီ၊ သူတို့ကတော့ အဲဒီလို သတ်မှတ်တယ်” ဟု ၎င်းက ရုပ်သံဖိုင်တွင် ပြောထားသည်။

လက်ရှိတွင် အိမ်များအထိ တက်ဝင်ပြီး ပေါ်တာဆွဲမှုများ ပြုလုပ်နေသည့် ဒေသများရှိကြောင်းလည်း ၎င်းက ဆက်လက်ပြောဆိုသည်။ “သင်တန်းသားတွေ မေးကြည့်တော့ အိမ်ထဲမှာ တံခါးပိတ်ထားတာတောင် ရိုက်ဖွင့်ပြီး ဝင်ဆွဲခံရတဲ့ အခြေအနေထိ ကြုံတွေ့ခဲ့ရတယ်” ဟု ၎င်းက ပြောသည်။

ထို့ပြင် ပေါ်တာဆွဲခံရသူများသည် စိတ်ဓာတ်ကျပြီး စိတ်အားငယ်နေသူများဖြစ်သည့်အတွက် ရွာထဲ စစ်ကြောင်းထိုးပါက ကြိုက်ရာပစ္စည်းများကို ယူပိုင်ခွင့်ပြုထားပြီး စစ်တပ်ဘက်သို့ စိတ်ပါဝင်စားအောင် သွေးဆောင်ထားသည်ဟု ၎င်းက ဆိုသည်။

“အဲဒီလို ယူဆောင်တာကို အပြစ်မရှိဘူး၊ ‘ဥပဒေမရှိဘူး’ လို့ဆိုပြီး ပေါ်တာဆွဲခံရသူတချို့က ပျော်မွေ့နေကြတယ်” ဟု ၎င်းက ပြောသည်။

“ကျွန်တော်တို့ သင်တန်းကျောင်းကို စရောက်တဲ့အခါမှာ ဆွဲစိတွေပေါ့။ ဆွဲစိနဲ့ ကိုယ့်စိတ်နဲ့ကိုယ်ဝင်တဲ့သူတွေကို ကန့်သတ်တဲ့အခါ ကျွန်တော်တို့ အပတ်စဉ် (၁၀) မှာ လူ ၂၃၅ ယောက်ရှိတယ်။ အဲဒီထဲမှာ ၁၈၀ က ဆွဲစိဖြစ်နေတယ်” ဟု ၎င်းက ပြောသည်။

ဥပဒေအရ အတည်ပြုခွင့်မရှိသည့် ပြည်သူ့စစ်မှုထမ်းဥပဒေကို စစ်ကောင်စီက အတည်ပြုပြီးနောက် ဖမ်းဆီးခံရသည့် အရပ်သားပြည်သူများ တဆတဆ တိုးပွားလာပြီး၊ လက်ရှိအချိန်ထိ စစ်သား ၇၀,၀၀၀ ခန့် စုဆောင်းထားကြောင်း မြန်မာနိုင်ငံရှေ့နေများကောင်စီက ဇူလိုင်လ ၁၁ ရက်တွင် ထုတ်ပြန်ထားသည်။

နောင်ချိုမြို့နယ်နှင့် အနီးတဝိုက်တွင် ဓနုပြည်သူ့လွတ်မြောက်ရေးတပ်တော် (DPLA)၊ တအာင်းအမျိုးသားလွတ်မြောက်ရေးတပ်မတော် (TNLA) ပူးပေါင်းတပ်ဖွဲ့နှင့် စစ်ကောင်စီတို့ကြား ဇွန်လ ၂၄ ရက်မှစတင်ကာ နှစ်ဖက်ထိတွေ့တိုက်ပွဲများ ပြင်းထန်နေသည်။

တောင်းခမ်းမှ နောင်ချိုသို့ စစ်ကြောင်းထိုးလာသော စစ်ကောင်စီ၏ စစ်ကြောင်းတွင် ပေါ်တာဆွဲခံရသူ တပ်သားအများအပြားပါဝင်ပြီး၊ အလင်းဝင်လာသူများရှိသလို ထွက်ပြေးသူများလည်း ရှိကြောင်း DPLA က ယနေ့ ထုတ်ပြန်ထားသည်။

စာတည်း။ ။ နောင်နောင်

#စုဆောင်းရေး
#အလင်းဝင်
#DPLA
#ဓနု
#MizzimaBurmeseNews
#မဇ္ဈိမသတင်းဌာန

👍3😢1

228 views04:05