🔸لما يجيلك حد الصيدلية ويشتكي ان ظهر عنده سواد في الجلد مش طبيعي ومش بيروح مهما يعمل او لو بنت ومهما استعملت من كريمات تفتيح وغيره خاصة في منطقة تحت الابطين او العنق زي مهو واضح في الصور
يبقي لازم تاخد بالك وتاخد بالك قوي كمان .

🔸لان الحالة دي اسمها acanthosis nigricans او الشواك الاسود ودي بتبقي نتيجة لارتفاع مستوي هرمون الانسولين في الدم ومقاومة الجسم ليه بشكل كبير وغالبا العلامة دي بتحصل للناس اللي وزنها زايد شوية او عندها دهون بكميات كبيرة (مرض السكري من النوع الثاني).

🔸لان الدهون لو زايدة ومتراكمة علي الكبد وعلى خلايا الجسم هتمنع الانسولين ان يمسك في المستقبلات بتاعته علي سطح الخلايا فبالتالي هو مشتغلش ومنزلش نسبة السكر في الدم (وظيفته الاساسية) يقوم البنكرياس مطلع انسولين كمان عشان هيحس ان لسا السكر عالي في الجسم وهو في الاساس الجسم اللي مقاوم الانسولين.

🔸المهم الانسولين الكتير دا هيروح يهجم علي خلايا الجلد ويرتبط بمستقبل ليه هناك اسمه insulin like growth factor ودا لما بينشط بيعمل مشاكل في ال keratinocytes او خلايا الجلد ويكسرها فتدي اللون الاسود دا اللي مش هيختفي غير لما الشخص يخس ويلعب رياضة وينظم الاكل وينزل الدهون من جسمه ويلتزم بعادات صحية.

🔸لما تشوف العلامة دي عند اي حد حاول تنبهه انها مؤشر لمقاومة الجسم للانسولين ولازم يروح لدكتور في اقرب وقت وأنها مش قلة نضافة او محتاجة تفتيح للبشرة.

تابعو قناة اليويتوب:👇
https://youtube.com/channel/UCZMWE6ZtlcXbQArUyoiqCTw
#دمتم_بخير ♥️