​​✍️Fransuaza Sagan
📖”Ko'lmak suvda quyosh parchasi”

O’qigan, tushungan ayol bilan yashash birmuncha xotirjamroq, sababi u o'zini nima kutayotganini biladi, hamda seni oldinda nima kutib turganini ham sezib turadi.

Sagan ijodi bilan ilk bor shu asar orqali tanishdim va bu tanishuv ijobiy fikrlarga boy bo’ldi. Sagan shaxsiyati haqida ham turli xil gap-so’zlar qulog’imga chalingan edi, asari esa u haqidagi fikrlarimni yanada to’ldirib berdi.

Bosh qahramon Jil ismli jurnalist yigit bo’lib, u Parij, umuman olganda shahar hayoti, odamlardan charchagan, uni hech nima qiziqtirmay qo’yadi, hattoki sevimli ma’shuqasi Eloiza ham u uchun endi avvalgidek qiziq emas. Odatiy hayotda nimalardir qilib yashab yuribdi. Kunlarning birida, u opasinikiga, chetroqdagi viloyat Limuzinga o’z hayotidan chalg’ish maqsadida boradi, dastlabki kunlar odatdagi tarzda o’tadi, lekin Natali bilan uchrashuv uning hayotini 180 gradusga o’zgartirib yuboradi…

Sagan asarlarida odatda, qayg’u, ruhiy sinish, depressiya mavzulari oldingi o’rinda bo’lib, u qahramonlarini bu hayotda ushlab turish uchun ularbop sevgi qissalarini yaratadi. Muhabbatni ularni hayotda ma’lum vaqt davomida kurashishlari uchun vosita sifatida tanlaydi. Natali ham Jilni o’z muhabbati bilan qaytadan hayotga qaytaradi, butun borlig’ini unga bag’ishlaydi, ammo har qanday narsaning me’yori bo’lganiday ortiqcha muhabbat ham insonni o’ldiradi. Sevgi insonning kuchiga kuch qo’shishi, uni hayotga muhabbatini oshirishi bor gap, lekin, aytganimdek, haddan ortig’i insonni o’ldiradi. Ayni shu holatda Sagan ayollar muhabbatining qanchalik darajada kuchli bo’lishini ham ko’rsatib beradi. Ayol sevsa butun borlig’i bilan sevadi, unga hech nima to’sqinlik qila olmaydi.

Asarda toshqin Parij hayoti va qishloq sharoitli Limuzin viloyatining hayoti ajoyib tarzda taqqoslanadi. Parij hayoti tashqaridan qaraganda yoqimli bo’lib ko’ringani bilan insonni charchatish xususiyatiga egaligi, Limuzin hayoti esa sokin, odamlari ham juda oddiy holatdaligi ko’rsatib beriladi.

Asar nomi ham ajoyib. Nazarimda, Jil va uning odatlari ko’lmak suv bo’lsa, Natali esa unga ta’sir etuvchi quyosh parchasi. Jil o’ziga ishonchi past, zararli odatlarga beriluvchi inson. Hatto Natalining ham sevgisiga doim shubha bilan qaraydi, bir kuni uni tashlab ketishiga qattiq ishonadi. O’zini Nataliga mos inson sifatida ko’rmaydi. Albatta bu borada Natalining aql-zakovatiga tan bermaslikning iloji yo’q. Mana shu go’zal, aqlli xonim o’ziga ishonchi past erkakka oshiq bo’ladi, Jilning hayotiga quyoshdek kirib keladi. Ammo quyosh ko’lmakning chuqur-chuquriga yetib bora olmadi. Sagan aql-zakovatga boy ziyrak ayol va haminqadar fikrlaydigan erkakning muhabbati uzoqqa bora olmasligini yaxshi ochib bergan.

Asar yengil, murakkab dialoglardan holi bo’lib oson o’qiladi. Erkaklar ham, ayollar ham o’qishlari shart bo’lgan asarlardan biri deb ayta olaman.

@doctorsmind📖

#mutolaa

Kitob, adabiyot, musiqa yoki bir piyola qahva bilan kayfiyati ko‘tariladigan ayolni hech kim yenga olmaydi; hatto hayotning o‘zi ham uning qarshisida mag‘lub bo‘ladi.

@doctorsmind📖

Hademay shunaqa yomg’irli kunlarda xazonlarni shitirlatib yuramiz🍁🍂

Kimga qanday bilmadimu, kuz doim man uchun barakali fasl bo’lib kelgan. Ko’p va xilma-xil kitoblar o’qishga ulgura olaman, ish faoliyatimda ham sezilarli darajada samaradorlik bo’ladi. Bu kuz ham shunday o’tishidan umidvorman.

Kuz faslida qanday kitoblar o’qimoqchisiz? Man o’tkan yili kuzni Dostoyevskiy bilan boshlagandim. Bu yil uchun hali ro’yxat tuzmadim.

@doctorsmind📖

#book_store

Shanba kuni Golden books’ning Toshkentdagi filialining ochilish marosimi bo’lib o’tadi. Yangicha ko’rinish va yangicha muhitda ochilishi kutilayotgan do’konga sizlarni taklif qilib qolaman. Boring, ko’ring, o’zingiz baho bering! Keyin taassurorlaringiz haqida shu post tagida yozib ketishni unutmang! O’zim ham bu do’konning ochilish marosimini kutayotgandim. Balkim shu yerda ko’rishib qolarmiz)
Aytgancha, suratda ko’rganingizdek @doctorsmind’dan keldim desangiz chegirmalar qilib berishadi😊

@doctorsmind📖

​​✍️Sara Jio
📖”Mart binafshalari”

"Buyuk sevgi vaqtga, yurak og'rig'iga va masofaga bardosh beradi. Va hatto hamma narsa yo'qolgandek tuyulsa ham, haqiqiy sevgi yashaydi”.

Sara Jio “Mart binafshalari” asarida ham o‘quvchini bir vaqtning o‘zida ikki davrga sayohat qildiradi. Muallif o‘tmish va hozirgi hayotni shunaqangi bog‘laydiki, go‘yo vaqt chegaralari yo‘qolgandek tuyuladi. Kitob sahifalarini varaqlarkansiz, o’zingizni go’yo ikki zamonda yashayotgandek his qilasiz. Asarda o‘tmishda yashiringan sirlar, tugallanmagan tuyg‘ular va uzoq yillar davomida yechilmay kelgan tugunlar hozirgi kun qahramonlari hayoti bilan birlashib ketadi. Aynan mana shu sirlar kitobxonni kitobni qo’ymasdan o’qishga, sirlarni bilishga undaydi. Shaxsan o’zim ham asarning kulminatsiyasiga tushib olgandan keyin kitobni qo’limdan qo’ymay tuni bilan o’qib tugatdim. Go’yo tezroq o’qimasam kalavaning uchiga yeta olmaydigandek hissiyot uyg’otdi.

Asardagi bosh qahramon obrazi bugungi kundagi hayoti bilan band bo‘lsa-da, tasodifiy topilma uni o‘tmishga yetaklaydi. Shu paytdan boshlab o‘tmishda yashab o‘tgan insonlarning taqdiri bilan hozirgi hayot voqealari o‘zaro birlashib ketadi. Qadimiy sirlar, yillar davomida yechilmagan tugunlar, yashiringan sehrli his-tuyg‘ular asta-sekin yuzaga chiqadi va hozirgi hayotda yangi qarorlar qabul qilishga va shu bilan birgalikda o’tmishdagi tugunlarni yechishga sabab bo‘ladi.

Ushbu roman faqatgina romantik hikoya emas. “Mart binafshalari” insonning yo’qotishlar, qayg’u va tushkunliklardan o’tib yana yorug’ kunda baxtli yashashga intilishi haqidagi asar. Unda birgina ayol qalbi, uning muhabbatining sadoqati, vaqtida to’g’ri qilingan tanlovning kuchi haqida ham chuqur fikrlar bor. Sara Jio kitobxonni hayotdagi eng arzimas deb o’ylangan detallari ham katta ma’no kasb etishini ko‘rsatib beradi. Shoshilinchda va jahl ustida qilingan qarorlar keyinchalik o’z zararimizga ishlashini tushuntiradi.

Asarga “Yurakka yaqin asar” deb ta’rif berilgan ekan. Balkim o’z hissiyotlarimizni tushunishga va his qilishga yordam bergani uchun ham yurakka yaqin asardir.

Kitobda tilga olingan “Yo’qotilgan yillar” asari esa qiziqishimni yanada oshirdi. Bosh qahramon boshqalarga berishni qizg’angan asar qanday ekan? Keyin o’ylab qoldim, meni ham boshqalar o’qishini xohlamaydigan, qizg’anadigan asarim bormikan?)

Kuzgi mutolaa zavqini his qilish uchun o’qishingizni tavsiya qilgan bo’lardim. Hech qanday spoylersiz taassurotlarimni yozishga harakat qildim. Tarjima va tahrir a’lo darajada. Hech qayerda to’xtamay oson o’qiysiz.

@doctorsmind📖

Endi ko’nglim to’q)

“Oqsoch hikoyasi”ni siz ham o’qigan bo’larmidingiz?

@doctorsmind📖