Ойбекни эслаб...

Бугун Мусо Тошмуҳаммад ўғли Ойбек уй-музейида адибни хотирлаш куни ўтказилди. Шу муносабат билан Ўзбекистон Ёзувчилар уюшмаси томонидан у ерда журналистлар учун музей бўйлаб пресс-тур ташкил этилди.
Тадбирда ижод аҳли ва журналистлар адибнинг уй-музейи билан танишди. У билан замондош бўлганлар илиқ хотираларни ёдга олди. Ижоди ҳақидаги кўплаб маълумотларни тақдим этди.
Музей билан танишар эканмиз, адабиётшунослар Наим Каримов, Сувон Мели, Шуҳрат Ризаев Ойбекнинг болалик йиллари, ижодининг гуллаган даври, адабиётни севиши ва у билан боғлиқ адабий жараёнлардаги гурунглар ҳақида айтиб берди. Инсоний фазилатларини эслашди.
Адиб яшаган уйнинг ҳовли марказидан ўрин олган ҳайкали сиймосида унинг ижодни ва адабиётни севиши, ўта нозик дидли инсон экани акс этган. Музейда жам бўлган китоблар, қўлёзмалар, уй жиҳозлари, кийимлар, барча-барчасини кўриб, бир муддат адиб билан юзма-юз бўлгандек, унинг ижодий нафасини ҳис этгандек бўласиз.
– Менинг ота-онам Ойбек ва Зарифа опа билан дўст бўлишган, – деди адибнинг маҳалладоши Мавлуда Латипова. – Уларнинг оилавий дўстлиги жуда мустаҳамкам бўлган. Жуда кўп маротаба адабий суҳбатларга гувоҳ бўлганман. Ойбек домла ва Зарифа опа ўртасида ирода, матонат, муҳаббат кучли эди. Кичкиналигимдан шу ҳовлида катта бўлганман. Бу вақт орасида адибнинг қатор асарларини ёзилиш жараёнини кўрганман. Улар ҳамиша бир-бирини ижодда қўллар эди.
Ушбу музей пойтахтимиздаги Ифтихор 1-тор кўчаси 26-уйда жойлашган бўлиб, нақшинкор ёғоч дарвоза бу ерга келган ҳар бир меҳмонни ўзига чорлайди. Адиб ўз қўли билан эккан дарахтлардан эсаётган майин шамол эса келаётган ижодкорларни унинг ўзи қарши олаётгандек, гўё.
Пресс-турда меҳмонлар Ойбекнинг ҳаёти ва ижод йўлларига назар ташлади. Қизиқарли маълумотларга эга бўлди.

Зулайҳо Аҳмаджонова,
журналист