Саҳар чоғи кўзингиздан уйқу пардасини артиб ташланг. Сўнгра уйқудан туриб таҳоратни мукаммал адо этинг. Аллоҳ кўриб турганига ҳамда тазарруингиз, нолангиз ва йиғингизни эшитишига ишонган ҳолда ўзингизни хор тутиб туринг. Қалбингизни муроқаба қилишдан ғафлатда бўлганингиз ва Аллоҳ зикридан ғафлатда ўтган кунларингиз учун ҳам йиғланг.

Шайх Муҳаммад Саъид Рамазон Бутий роҳимаҳуллоҳ.

#Ўкинма

Ўкинманг! Чунки сиз Аллоҳни бир дегувчилардансиз, уммат ҳимоячисисиз, қибла аҳлидансиз. Сизда Аллоҳ ва унинг расулига (соллаллоҳу алайҳи васаллам) асл муҳаббат бор. Сиз гуноҳ қилсангиз, афсус чекасиз. Чиройли амал қилсангиз, севинасиз. Сизда ўзингиз билмайдиган кўп яхшиликлар бор.

📚 «Ўкинма»
Доктор Оиз Қарний.

"ЕГАНДАЙ БЎЛДИМ"

Истанбулнинг Фотиҳ районидаги Зейрек кўчасида бир масжид бор. Масжиднинг номи “Гўёки едим”.
Усмонли даврида Кечичизода Хайриддин афанди исмли фақр киши бор эди. Подшоҳларнинг масжид қурганларини кўриб ҳавас қилар ва у ҳам масжид қуришни орзу қиларди. Танишлари унга, қайси пулингга масжид қурасан воз кеч бу фикрингдан, дерди.
Аммо у бир йўлини топди. Қачон нафси бирор нарса тусаб қолса, “Егандай бўлдим”, – дер ва унинг пулини бир жойга сақлаб қўя бошлади. 20 йил давомида пул йиғди ва орзусидаги масжидни қурди. Масжидга “Гўёки едим” исмини берди.
Биринчи Жаҳон уруши даврида Фотиҳнинг Ўнкапани ҳудудида катта ёнғин чиқиб у масжид зарар кўрган эди. 1959 йилда эса маҳалла аҳли “Гўёки едим” масжидини қайта таъмир қилишган. Масжид атиги 100 м/кв.дан иборат. 200 киши сиғади, холос. Масжиднинг биттагина минораси, каттагина ибрати бор.

Баъзан мендан танишларим, ҳаётдан завқ ололмайман, яшаш қувончим йўқ деб қолишади. Мен уларга садақа қил кўрасан, ҳаётингга маза, таъм киради десам, чўнтагимда бир тийиним йўғ-у, қаердан бераман дейди.
Бериш фақат чўнтакдан бўлади десак янглиш фикрдамиз. Бериш, аввало, нафсдан, кўнгилдан, юракдан бўлади. Беришнинг индекси фақатгина пул эмас...
Европада инсонлар нега ўз ўзини ўлдиради биласизми, одатда беришни билмагани учун. Ҳамма нарсанинг мўллиги, борлилиги, ҳеч қийинчилик кўрмаслик, эҳтиёжсизлик инсонни тўйимсиз қилиб қўяди. Инсон ҳеч тўймайди, тўймасликнинг охири эса ўлимдир.
1939 йил 27 ноябр куни Туркиянинг Арзинжон шаҳрида 7,8 баллик зилзила бўлган эди. 32 минг 962 киши ўлиб кетган дейишади бу зилзилада. Арзинжон харитадан ўчиб кетган эди.
Шоир Нозим Ҳикмат маҳбус эди, қамоқхонада ёзган бир шеърида:

Арзинжон учун чўнтагимдан берадиган ҳеч вақом йўқ,
Юрагимдан бераман –

деб ёзган эди.
Садақа у эди. Юракдан беришлик.

Марзия САЙДАМ ёзди.

(Суратда "Егандай бўлдим", яъни "Sankı yedim camisi" масжиди акс этган)

👉@diyonatli

ИНСОННИНГ ҲАЁТИ МАШАҚҚАТДАН ИБОРАТ | Ҳасанхон Яҳё Абдулмажид

👉@diyonatli

Мусулмон мусулмоннинг биродаридир

Абдуллоҳ ибн Умар розияллоҳу анҳумодан ривоят қилинади:

Расулуллоҳ соллаллоҳу алайҳи васаллам дедилар:

✅Мусулмон мусулмоннинг биродаридир.

✅У унга зулм ҳам қилмайди ва ташлаб ҳам қўймайди.

✅Ким ўз биродарининг ҳожатини чиқарса, Аллоҳ унинг ҳожатини чиқаради.

✅Ким бир мусулмонни ғамдан фориғ қилса, Аллоҳ ундан Қиёмат кунининг ғамларидан бир ғамни фориғ қилади.

✅Ким мусулмоннинг айбини беркитса, Аллоҳ Қиёмат куни унинг айбини беркитади.

Бухорий ва Муслим ривоят қилишган.

👉@diyonatli

#Мулоҳаза

Уйланиш ташвишида юрган 25 яшар йигит, тинмай йиғлаётган 4 яшар болага деди: "Бунча йиғлайсан, маза қилиб овқатланиб, мультфильм кўриб ётмайсанми? Бирор ўйловинг бўлмаса. Сенга ҳавасим келяпти..."

Маошини у ойдан бу ойга етказаётган 35 яшар эркак, уйланиш ташвишида юрган 25 яшар бўйдоққа деди: "Бунча сиқиласан? Уйланарсанам, жонинга ҳам тегар. Мана, қарагин, аҳволимни. Сенга жуда ҳавасим келяпти..."

Бизнеси ўхшамаган ва банкрот бўлиб боши ташвишдан чиқмаётган 55 яшар киши, 35 яшарга деди: "Борига шукур қилинг. Кам маош олсангизам, қулоғиз тинч. Мана, умрим бўйи боримни берган бизнесим касодга учраб, қулоғимгача қарзга ботиб кетдим. Сизга қанчалик ҳавас қилаётганимни тасаввур ҳам қилолмайсиз..."

Унинг гапини эшитиб турган 70 яшар чол деди: "Бунча сиқиласан? Менга ўхшаб, белинг қақшаб, оёғинг қалтирамаяпти-ку, ўрнингда бўлганимда тоғни уриб, талқон қилардим. Ҳавасимни келтирма..."

Қабрда ётган марҳум уларга қараб нидо қилди: "Барчангизга ҳавасим келяпти, чунки сизда тавба қилиш имконияти бор. Қани эди менда шундай имконият бўлганида эди, бутун ҳаётимни унга фидо қилар эдим..."

👉@diyonatli

Дунё бало ва имтиҳон диёридир

Баъзида пули борнинг ҳузури, ҳузур борнинг пули бўлмайди.
Касал одамнинг егулиги, егулиги борнинг иштаҳаси бўлмайди.
Кимдир боласи йўқлигидан, яна кимдир боласининг азиятидан нолийди.
Бу дунёнинг синов диёри эканлигини унутмасдан, тоат-ибодатда бардавом бўлгангина ютади.

© Доктор Иҳсан Шеножак

Дунёдаги энг буюк зот ким?

Майкл Ҳарт... У ўз умрининг 28 йилини "Буюк юзлик" номли китобини ёзишга бағишлади. Китоб ниҳоясига етгач, у Лондонда, ўз маърузасида дунёдаги энг буюк сиймони эълон қилди. Аудиториядагилар ҳуштак чалишар, у ўз нутқини тугатишига ҳалақит бериш мақсадида шовқин-сурон сола бошлашди...

У шундай деди:

"Макка деб аталмиш кичик бир шаҳарда бир инсон бор эди. У инсонларга "Мен Аллоҳнинг сизларга юборган расули-элчисиман. Сизларнинг хулқларингизни батамом қилиш учун келдим", деди. Ўшанда унга 4 кишигина ишонди: Аёли, бир дўсти ва 2 нафар ёш бола...

Ҳозир орадан 1400 йил ўтди. Мусулмонларнинг сони бир ярим миллиарддан ошди ва йил сайин кўпая бормоқда. Бу ёлғон бўлиши мумкин эмас. Чунки ҳеч қандай ёлғон 1400 йил яшаши мумкин эмас!
Шунингдек, бир ярим миллиард кишини алдаш асло мумкин эмас!

Яна бир гап. Орадан шунча узоқ вақт ўтган бўлса ҳам, миллионлаб мусулмонлар ўз Пайғамбарларига қаратилган биргина ёмон сўз учун жонларини фидо қилишга тайёрлар!

Пайғамбарлари, ҳаттоки Роббилари учун шу ишни қила оладиган бир дона бўлса ҳам яҳудий ёки насроний борми?

Дунёдаги энг буюк шахсият эгаси бу - Муҳаммад соллаллоҳу алайҳи васалламдир".

Сўнгра зал чуқур сукунатга чўмди...

(Суратда Майкл Ҳартнинг китоби акс этган)

👉@diyonatli

Жума куни кўпроқ салавот айтиш

Авс ибн Авс розияллоҳу анҳудан ривоят қилинади:

عَنْ أَوْسِ بْنِ أَوْسٍ رَضِيَ اللهُ عَنْهُ، عَن النَّبِيِّ صلى الله عليه وسلم قَالَ: «إِنَّ مِنْ أَفْضَلِ أَيَّامِكُمْ يَوْمَ الْجُمُعَةِ، فِيهِ خُلِقَ آدَمُ، وَفِيهِ قُبِضَ، وَفِيهِ النَّفْخَةُ، وَفِيهِ الصَّعْقَةُ، فَأَكْثِرُوا عَلَيَّ مِنَ الصَّلَاةِ فِيهِ، فَإِنَّ صَلَاتَكُمْ مَعْرُوضَةٌ عَلَيَّ»، قَالُوا: يَا رَسُولَ اللهِ، وَكَيْفَ تُعْرَضُ صَلَاتُنَا عَلَيْكَ وَقَدْ أَرَمْتَ؟ فَقَالَ: «إِنَّ اللهَ عَزَّ وَجَلَّ حَرَّمَ عَلَى الْأَرْضِ أَجْسَادَ الْأَنْبِيَاءِ». رَوَاهُ أَبُو دَاوُدَ وَالنَّسَائِيُّ.

«Набий соллаллоҳу алайҳи васаллам дедилар:

«Афзал кунларингиздан бири жума кунидир.

Одам шу куни яратилди.

Унинг жони шу куни қабз қилинди. Унда пуфлаш бордир.

Унда қаттиқ қичқириқ бордир.
Унда менга кўп салавот айтинглар, чунки салавотларингиз менга арз қилинур»

Саҳобалар:

«Эй Аллоҳнинг Расули, сиз чириб кетган бўлсангиз, қандай қилиб бизнинг салавотимиз сизга арз қилинади?» – дедилар.


У зот соллаллоҳу алайҳи васаллам:

«Аллоҳ азза ва жалла анбиёларнинг жасадларини (чиритишни) ерга ҳаром қилгандир», – дедилар».

Абу Довуд ва Насоий ривоят қилиш­ган.

Абдуллоҳ ибн Абу Авфо розияллоҳу анҳудан ривоят қилинади:

عَن عَبْدِ الله بْنِ أَبِي أَوْفَى رَضِيَ اللهُ عَنْهُ، عَن النَّبِيِّ صلى الله عليه وسلم قَالَ: «أَكْثِرُوا الصَّلَاةَ عَلَيَّ يَوْمَ الْجُمُعَةِ؛ فَإنِّي أُبَلَّغُ وَأَسْمَعُ». رَوَاهُ الشَّافِعِيُّ وَابْنُ مَاجَهْ.

«Набий соллаллоҳу алайҳи васаллам: «Жума куни менга салавотни кўпайтиринглар. Албатта, менга етказилур ва мен эшитурман», – дедилар».

Шофеъий ва Ибн Можа ривоят қилишган.

وَقَالَ رَسُولُ اللهِ صلى الله عليه وسلم: «أَقْرَبُكُمْ مِنِّي فِي الْجَنَّةِ أَكْثَرُكُمْ عَلَيَّ صَلاَةً، فَأَكْثِرُوا الصَّلاَةَ عَلَيَّ فِي اللَّيْلَةِ الْغَرَّاء وَالْيَوْمِ اْلأَزْهَرِ». رَوَاهُ الشَّافِعِيُّ وَالْبَيْهَقِيُّ.

«Расулуллоҳ соллаллоҳу алайҳи васаллам:

«Сизларнинг жаннатда менга энг яқин бўладиганларингиз, менга кўпроқ салавот айтадиганларингиздир. Бас, ёруғ кеча ва нурли кунда менга салавот айтишни кўпайтиринглар», – дедилар».

Шофеъий ва Байҳақий ривоят қилишган

Ҳазрати Алий ибн Абу Толиб розияллоҳу анҳудан ривоят қилинади:
«Ким жума куни Набий соллаллоҳу алайҳи васалламга юз марта салавот айтса, қиёмат куни у юзида бир нур билан келади. Одамлар: «Бу нима қилар эди?» – дейишади».

Байҳақий ривоят қилган.

«Жума ҳақидаги оят ва ҳадис» китобидан

👉@diyonatli

Заҳарланган хушбўйликларнинг таъсири

Бугунги кунда хўшбўй, ўткир ҳидли атирлар ишлаб чиқариляптики, бундан асосий мақсад эркакларнинг эътиборини тортиш ва фикрини бузишдир. Агар аёл ана шундай атирларни сепиб кўчадан чиқса, атирининг ҳиди кўчани тутиб кетади. Улардан баъзилари “Poison”, “Passion”, “Come Closer” каби номлар остида ишлаб чиқарилмоқда.

Мўмина, муслима аёллар ҳаргиз шу номдаги атирлардан фойдаланишмасин. Чунки улар жуда ўткир ва тарқалувчидир. Ҳадиси шарифда келадики, аёл киши шундай хўшбуйлик ишлатсинки, ранги кўп, ҳиди кам бўлсин, токи фақат хонадон аҳли, яъни, маҳрамларигина уни билса, ёки яқин ўтирган аёл ҳидини сизса, жоиз.

Абу Мусо Ашъарий розийаллоҳу анҳу айтадилар: “Номаҳрам кишининг хушбўйлигини ҳидлашдан кўра, менинг наздимда ўлимтикнинг ҳидини ҳидлаш яхшироқдир”.

"Шарм ва ҳаё” китобидан

Дўстларингизга ҳам улашинг:
https://t.me/joinchat/AAAAAEGj0hkBXGlopIDbXA

#Ибрат
Эрининг ёрдамчиси бу‌лган аёл

Ҳазрати Абу Бакрнинг қизи ва Пайғамбар соллаллоҳу алайҳи ва салламнинг қайнопаси Асмо розияллоҳу анҳо ҳикоя қилади:

Жаннат билан муждаланган ўн кишининг бири бўлган Зубайр ибн Аввом билан никоҳланган эдик.

У кезларда Зубайрнинг сув ташийдиган туяси билан отидан бошқа на бир моли ва на бир хизматчиси бор эди.

Отининг емини мен берардим, уни суғорардим, сув тулуми йиртилса тикардим, хамирни мен қорардим.

Фақат нон ёпишни эплай олмасдим. Уни ҳам ансор деганимиз мадиналик қўшни аёллар ёпардилар.

Мадиналик аёллар қўшни ҳаққига қатъиян риоя қиладиган ёрдамсевар аёллар эди.

Пайғамбар алайҳиссалом Зубайрга бир хурмо боғи ҳадя қилгандилар. Бу боғ уйимиздан саккиз минг қадам узоқликда эди. Туяга едирмоқ учун у ердан бошимнинг устида хурмо уруғини таширдим.

Навбатдаги кунларнинг бирида хурмо уруғини кўтариб келаётганимда Пайғамбар алайҳиссалом билан дучлашиб қолдим. Ёнида ансорлардан бир неча киши бор эди.

Расули акрам менга овоз бердилар. Мени орқасига миндирмоқ учун туясини иҳ, иҳ, дея чўктирмоқчи бўлдилар.

Бироқ мен эркаклар билан бирга кетишдан уялдим. Яна Зубайрнинг рашки ёмонлигини ҳам хотирладим. Чунки Зубайр ўта рашкчи одам эди. Аллоҳнинг Расули менинг уялаётганимни кўриб, туясини ниқаб кетдилар.

Уйга борганимдан сўнг Зубайрга бўлган воқеани гапириб бердим:

– Бугун бошимда хурмо уруғини кўтариб келаётганимда Пайғамбар алайҳиссалом билан дучлашиб қолдим. Ёнида асҳобларидан бир неча киши бор эди. Мени мингаштириб олмоқ учун туясини чўктирдилар. Аммо мен уялдим ва сенинг рашкчилигинг ёдимга келди, – дедим.

Гапларимни эшитган Зубайр бундай деди:

– Худо ҳаққи, хурмо уруғини бошингда кўтариб келишинг Пайғамбар алайҳиссалом билан бир туяга миниб келганингдан менга оғир келди.

Асмо сўзини бундай давом эттирди: Отам ҳазрати Абу Бакр отга ва туяга қарайдиган бир хизматчи бергунига қадар бу ишларни қилишда давом этдим. Отам бизга бир хизматчи берганидан сўнг мен худди қулликдан озод бўлгандек роҳатландим.

©️ Профессор, доктор Меҳмет Яшар Кандемирнинг “Саҳобадан 101 хотира” китобидан

Манбалар:
Имом Бухорий, Никоҳ, 107;
Муслим, Салом, 34-358;
Аҳмад ибн Ҳанбал, Муснад, VI, 347

П/С: Асмо розияллоҳу анҳа ҳозирги муслима келин ва аёлларимизга гўзал намуна эдилар. Аллоҳ таоло у зотдан рози бўлсин!

Калимуллоҳ МАСЪУД

👉@diyonatli

Абдул Ҳамид домла |
Гиёҳвандлик – ўзни ҳалокатга ташлашдир

Каналимиз кузатувчилари таклифларини ҳисобга олган ҳолда Устоз Абдул Ҳамид домла жума ваъзларининг тўлиқ шаклини ҳам эътиборингизга ҳавола этишга қарор қилдик.

Ҳажми: 69:7 МБ
Давомийлиги: 33:41 дақиқа.

Дўстларингизга улашинг ва хайр иш қилганлар қаторида бўласиз, иншаа Аллоҳ.

👉@diyonatli

ТОШКЕНТ ВИЛОЯТИДАГИ ДИНИЙ-МАЪРИФИЙ, РАСМИЙ, ИШОНЧЛИ, АСОСЛИ каналларга обуна бўлинг!

#фиқҳ

НАМОЗНИ БУЗУВЧИ НАРСАЛАР

Намозни қуйидаги нарсалар бузади:

1. Мутлақ калом.

Намозда қасдданми, унутибми, билмасданми, хато тариқасидами ёки мажбуранми, гапирилса, у ботил бўлади. Бу нарса икки ҳарфни ёки фаҳмласа бўладиган бир ҳарфни нутқ қилиш билан бўлади.

Бу ҳукмнинг далили:

عَنْ زَيْدِ بْنِ أَرْقَمَ رَضِي اللهُ عَنْهُ قَالَ: كُنَّا نَتَكَلَّمُ فِي الصَّلَاةِ، يُكَلِّمُ الرَّجُلُ صَاحِبَهُ وَهُوَ إِلَى جَنْبِهِ فِي الصَّلَاةِ، حَتَّى نَزَلَتْ: وَقُومُواْ لِلّهِ قَانِتِينَ بِالسُّكُوتِ، وَنُهِينَا عَنِ الْكَلَامِ. رَوَاهُ الْخَمْسَةُ

Зайд ибн Арқам розияллоҳу анҳудан ривоят қилинади:
«Намозда сўзлашаверар эдик. Киши намозда ёнидаги шеригига гапираверар эди. Ниҳоят «Аллоҳ учун тоат ила жим туринглар» ояти нозил бўлганда сукут сақлашга амр қилиндик, гапдан наҳий қилиндик».
Бешовлари ривоят қилишган.

2. Қасддан берилган салом ва унга алик олиш.

Қасддан салом бериш намозни бузишига далил:

عَنْ عَبْدِ اللهِ رَضِي اللهُ عَنْهُ قَالَ: كُنَّا نُسَلِّمُ عَلَى النَّبِيِّ صَلَّى اللهُ عَلَيْهِ وَسَلَّمَ وَهُوَ فِي الصَّلَاةِ فَيَرُدُّ عَلَيْنَا، فَلَمَّا رَجَعْنَا مِنْ عِنْدِ النَّجَاشِيِّ سَلَّمْنَا عَلَيْهِ فَلَمْ يَرُدَّ عَلَيْنَا، فَقُلْنَا: يَا رَسُولَ اللهِ، كُنَّا نُسَلِّمُ عَلَيْكَ فَتَرُدُّ عَلَيْنَا. فَقَالَ: «إِنَّ فِي الصَّلَاةِ شُغْلًا». رَوَاهُ الشَّيْخَانِ. وَلِمُسْلِمٍ وَأَبِي دَاوُدَ وَأَحْمَدَ: «إِنَّ هَذِهِ الصَّلَاةَ لَا يَحِلُّ فِيهَا شَيْءٌ مِنْ كَلَامِ النَّاسِ، إِنَّمَا هُوَ التَّسْبِيحُ وَالتَّكْبِيرُ وَقِرَاءَةُ الْقُرْآنِ

Абдуллоҳ розияллоҳу анҳудан ривоят қилинади:
«Набий соллаллоҳу алайҳи васаллам намоздалик чоғларида у зотга салом берар эдик, у зот алик олар эдилар. Нажошийнинг ҳузуридан қайтгач, у зотга салом берсак, алик олмадилар. Шунда биз:
«Эй Аллоҳнинг Расули, сизга салом берсак, алик олардингиз?» дедик. У зот:
«Албатта, намозда машғуллик бор», дедилар».
Икки шайх ривоят қилишган.
Муслим, Абу Довуд ва Аҳмад келтирган ривоятда:
«Албатта, бу намозда одамларнинг каломидан ҳеч нарса мумкин эмас. У фақат тасбеҳ, такбир ва Қуръон қироатидан иборатдир», дейилган.

Ноқасддан бировга салом бериш намозни бузмайди, чунки салом хитобни ўз ичига олган зикрдир. Бас, у қасддан бўлганда одамларга хитоблиги эътиборга олинади ва намоз бузилади. Ноқасддан бўлган ҳолатда эса зикрлиги эътиборга олинади ва намоз бузилмайди. Саломнинг зикрлиги ташаҳҳудда ўқилишидир.

Аммо алик олганда қасддан бўлса ҳам, ноқасддан бўлса ҳам, намоз бузилади. Чунки аликнинг лафзи намознинг зикрида йўқ.

3. Инграш ва шунга ўхшаш овозли нарсалар.

Оҳ уриш ва уф тортишга ўхшаш нарсалар ҳам икки ҳарфдан иборат бўлса, намозни бузади. Бу нарсалар беморлик, дунё иши учун бўлса, намоз бузилади. Аммо охират учун бўлса, бузилмайди. Бемор ўзини тутиб тура олмаса ҳам бузилмайди.

4. Охират ишидан бошқа сабаб ила овозли йиғи.

Агар намоз ичида охират учун овоз чиқариб йиғланса, намоз бузилмайди. Бунинг далили қуйидагича:

عَنْ مُطَرِّفٍ، عَنْ أَبِيهِ رَضِي اللهُ عَنْهُ قَالَ: رَأَيْتُ رَسُولَ اللهِ صَلَّى اللهُ عَلَيْهِ وَسَلَّمَ يُصَلِّي وَفِي صَدْرِهِ أَزِيزٌ كَأَزِيزِ الرَّحَى أَوِ الْمِرْجَلِ مِنَ الْبُكَاءِ. رَوَاهُ أَصْحَابُ السُّنَنِ.

Муторриф отаси розияллоҳу анҳудан ривоят қилади:

«Расулуллоҳ соллаллоҳу алайҳи васалламнинг намоз ўқиётганларини кўрдим. Кўксиларидаги йиғидан тегирмоннинг ёки қозоннинг овозига ўхшаш овоз чиқиб турар эди».

«Сунан» эгалари ривоят қилишган.

Мусибат туфайли овоз чиқариб йиғласа, намози бузилади.

5. Узрсиз томоқ қириш.

Мажбур бўлиб ёки овозини яхшилаб олиш учун томоқ қирган кишининг намози бузилмайди. Аммо узрсиз икки ҳарф миқдорида овоз чиқариб томоқ қириш намозни бузади.

6. Акса урганга соғлик тилаш.

Намозхон акса урган кишига «Ярҳамукаллоҳ», деса, намози бузилади. Чунки бу нарса одамлар орасида урф бўлган каломдир. Акса урганга соғлик тилаш намозни бузиши ҳақида ҳадис ҳам келган.

7. Каломга зикр билан бўлса ҳам жавоб бериш.

Мисол учун, намозхон ўзига хурсандчилик ҳақида хабар етганда «Алҳамдулиллааҳ», деса, намози бузилади.

8. Имомидан бошқага луқма бериш.

Намозхон ўз имомидан бошқа кимсага, чунончи, қироатда адашиб қолган одамга луқма берса, намози бузилади. Чунки имомдан бошқага луқма бериш таълим қаторига киради. Шунингдек, намоздан ташқаридаги киши қироат қилаётган имомга луқма берса ва имом луқмани қабул қилса, барчанинг намози бузилади.

Шунингдек, агар имом бошқа оятга ўтиб кетган бўлса, олдинги адашган оятини луқма берса, луқма берувчининг намози бузилади. Агар имом унинг ноўрин луқмасини олса, унинг ҳам намози бузилади. Саҳиҳ гап бузилмайди.

Имомга луқма бериш жоизлигига далил:

عَنِ ابْنِ عُمَرَ رَضِيَ اللهُ عَنْهُمَا: أَنَّ النَّبِيَّ صَلَّى اللهُ عَلَيْهِ وَسَلَّمَ صَلَّى صَلَاةً فَقَرَأَ فِيهَا فَلُبِسَ عَلَيْهِ، فَلَمَّا انْصَرَفَ قَالَ لِأُبَيٍّ: أَصَلَّيْتَ مَعَنَا؟» قَالَ: نَعَمْ، قَالَ: «فَمَا مَنَعَكَ؟ . رَوَاهُ أَبُو دَاوُدَ وَابْنُ حِبَّان وَلَفْظُهُ: فَمَا مَنَعَكَ أنْ تَفْتَحَ عَليَّ؟.



Ибн Умар розияллоҳу анҳумодан ривоят қилинади:
«Набий соллаллоҳу алайҳи васаллам бир намозда қироат қилаётиб, илтибосга (шубҳага) тушиб қолдилар. Ўқиб бўлганларидан кейин Убайга:
«Биз билан намоз ўқидингми?» деб сўрадилар.
«Ҳа», деди.
«Нима сени ман қилди?» дедилар».
Абу Довуд ривоят қилган. Ибн Ҳиббоннинг лафзида:
«Сени менга луқма беришдан нима ман қилди?» дедилар», дейилган.

9. Мусҳафга қараб қироат қилиш.

Имом Абу Ҳанифа раҳматуллоҳи алайҳининг наздида Мусҳафга қараб қироат қилган намозхоннинг намози бузилади. Чунки бу иш кўп амалга қўшилади.

Абу Юсуф ва Муҳаммад раҳматуллоҳи алайҳимонинг наздида Мусҳафга қараб қироат қилган намозхоннинг намози бузилмайди, чунки намоз ҳам, қироат ҳам ибодатдир. Аммо бу иш аҳли китобнинг иши бўлгани учун макруҳ бўлади.

Мактубга назар солиб, ундаги маънони англаса, намози бузилмайди.

10. Нажасга сажда қилиш.

Чунки сажда намознинг бир бўлагидир. Бир бўлаги бузилган намознинг ўзи ҳам бузилади.

Шунингдек, нажас икки тизза ёки кафт қўйиладиган жойда бўлса ҳам намоз бузилади.

11. Одамлардан сўраладиган нарсани сўраб дуо қилиш.

Намозхон қаъдаи охирда ташаҳҳуд миқдорича ўтирмасдан олдин «Аллоҳим! Менга минг динор бергин! Аллоҳим! Менга фалончини хизматчи қилиб бергин!» каби дуоларни қилса, намози бузилади. Ташаҳҳуддан кейин мазкурларга ўхшаш дуо қилган одам ўша нарса ила намоздан чиқади ва намози бузилмайди.

12. Ейиш, ичиш.

Чунки бу икки иш кўп амалга киради. Бунда қасддан еб-ичдими ёки унутибми – фарқи йўқ. Тишининг орасига кириб қолган таомни еса, таом нўхатдан кичик бўлса, намози бузилмайди, агар нўхат билан тенг ёки катта бўлса, бузилади.

13. Кўп амал қилиш: икки қўлга муҳтож бўладиган ёки намозхон кўп ҳисоблайдиган, ёхуд назар солувчи «Буни қилаётган одам намоз ўқимаяпти», деб гумон қиладиган иш кўп амалдир.

Намознинг амалларидан бўлмаган ва намозни тузатиш учун бўлмаган кўп амал намозни бузади. Одатда икки қўл билан қилинадиган салла ўраш, кўйлак кийиш, изор, шалвор кийиш, камон отиш каби амалларни бир қўл билан қилинса ҳам намоз бузилади.

«Мухтасар»нинг муаллифи бу ердан бошқа жойларда, шунингдек, бошқа уламоларимиз «намозни бузувчи» деб айт­ган бошқа амаллар ҳам бор.

14. Қибладан юз ўгириш.

Бу узрсиз равишда гавдасининг қибладан бурилиши билан содир бўлади. Аммо таҳорат қилиб келиш учун бурилса, зарари йўқ. Намозда фақат юзни у ён-бу ёнга буриш ҳаром бўлса-да, намозни бузмайди.

15. Авратни қасддан очиш.

Агар шамол ва шунга ўхшаш нарсалар сабабли аврат очилса, уч тасбеҳ айтилгунча вақтда ёпиб олса, зарари йўқ. Аврат ундан кўп вақт давомида очиқ ҳолда қолса, намози бузилади.

16. Катта ёки кичик бетаҳоратлик содир бўлса, намоз бузилади.

17. Баданда, кийимда ва маконда афв қилиб бўлмайдиган даражада кўп нажосат пайдо бўлса, намоз ботил бўлади.

18. Намозхон ўзи эшитадиган даражада кулса, намози бузилади, таҳорати кетмайди. Агар ёнидагилар ҳам эшитадиган даражада кулса, намоз ҳам, таҳорат ҳам бузилади. Овоз чиқармай табассум қилса, намоз ҳам, таҳорат ҳам бузилмайди.

#руҳий_тарбия
ИХЛОСНИНГ ҲАҚИҚАТИ

Ихлоснинг ҳақиқати Аллоҳ таолодан бошқа барча нарсадан халос бўлмоқ – қутулмоқдир.

Ихлос – амални, гап-сўзни ва ибодатни уларга хиралик етказадиган риё, алдамчилик, ёлғон каби нарсалардан тозалашдир. Амалдаги ихлос унга ҳақ сўраш у ёқда турсин, уни биров билмайдиган тарзда қилишдир. Қўлидан келганича амални адо қилиб, ортидан хижолат бўлишдир.

Уламолар тоатдаги ихлос риёни тарк қилишдан иборат эканини бир овоздан таъкидлаганлар.

Фузайл ибн Иёз раҳматуллоҳи алайҳи:

«Одамлар учун амални тарк қилиш риёдир. Улар учун амал қилиш ширкдир. Ихлос ушбу икки нарсани тарк қилишдир», деган.

Қилинадиган амаллар ниятга қараб бўлади. Риё учун қилинган амалнинг эгаси мухлис бўла олмайди. Аллоҳ таолога қурбат ҳосил қилиш ниятида қилинган амалнинг эгаси мухлис бўлади.

Бандадан содир бўладиган ихлос тўрт қисмга тақсимланади:

1. Гап – сўздаги ихлос.

2. Иш – амалдаги ихлос.

3. Тоат – ибодатдаги ихлос.

4. Ҳол – қалбдаги ихлос.

Ихлос тасаввур ёки хаёл эмас, балки амалдир. Шунинг учун у давомли, тўлиқ, илм асосида ва даражама-даража бўлиши керак.

Ихлос билан содиқлик орасида фарқ бор. Содиқлик аслдир. Ихлос фаръдир. Ихлос амални бошлагандан кейин бўлади. Содиқлик ниятда, иш бошланишидан олдин бўлади.

Ихлоснинг кўринишларидан:

1. Тавҳидда ихлос қилиш.

2. Ниятда ва қасдда ихлос қилиш.

3. Намоз, сажда, рўза, Рамазон бедорлиги, Лайлатул қадр бедорлиги, масжидларга муҳаббат, закот, садақа, ҳаж, умра, тавба, зикр, истиғфор, дуо, Қуръони Карим қироати ва бошқа қурбатларда ихлос қилиш.

4. Барча гап-сўзларда ихлос қилиш.

5. Содиқлик, сабр, зуҳд, тавозе каби карамли ахлоқларда ихлос қилиш.

6. Аллоҳ таолога таваккул қилишда ихлос қилиш.

7. Барча ишларда ихлос қилиш.

Ихлоснинг даражалари:

Руҳий тарбия машойихларининг таъкидлашларича, ихлоснинг даражалари учтадир: авомларнинг даражаси, хосларнинг даражаси ва хосларнинг хосларининг даражаси.

1. Авомнинг ихлоси Ҳақнинг муомаласидан халқни чиқариш бўлиб, унда тан соғлиги, молу дунё, ризқ кенглиги, жаннат қасрлари ва ҳурлар каби дунёвий ва ухровий насибаларни талаб қилиш ҳам бўлади.

2. Хосларнинг ихлоси Ҳақнинг муомаласидан халқни чиқариш билан бирга, дунёвий насибаларни қўйиб, ухровий насибаларни сўрашдир.

3. Хосларнинг хосларининг ихлоси Ҳақнинг муомаласидан халқни ва барча дунёвий ва ухровий насибаларни бирйўла чиқаришдир. Уларнинг ибодати бандаликни юзага чиқариш ва Роббнинг жамолига мушарраф бўлиш учун У Зотнинг вазифаларини муҳаббат ва шавқ ила адо этишдан иборатдир. Бошқача қилиб айт-ганда, уларнинг Аллоҳга ибодати фақат Аллоҳ учун бўлади.

Ихлоснинг йўлини тўсувчи омиллар:

Биринчи тўсиқ.

Банданинг амалининг кўзга кўриниши. Унинг ўз амалидан ғурурланиши. Амали туфайли Унинг учун амал қилинган Зотдан тўсилиши.

Бу ҳолатдан қутулиш учун ўз нафсини таниш ва унинг хоҳишларини жиловлаш лозим.

Иккинчи тўсиқ.

Амали учун эваз талаб қилиш. Мазкур эваз бу дунёнинг ёки у дунёнинг нарсаси бўлиши мумкин.

Бу дунёнинг нарсаларига турли шаҳватли нарсалар, шуҳрат, кўзга кўринишга ўхшашлар киради. Шунингдек, мақомот, каромат, мукошафат кабилар ҳам бўлиши мумкин.

Охиратнинг, яъни у дунёнинг нарсаларига ундаги турли мақомлар ва нозу неъматлар кириши мумкин.

Амали учун эваз талаб қилишдан қутулиш ўзининг ожиз банда эканини ва фақатгина Аллоҳнинг фазли ила охират яхшиликларига эришиш мумкинлигини англаб етиш билан бўлади. Унинг ибодати бандалик бурчидир. Ажр, савоб ва мартабалар Аллоҳнинг фазлидандир.

Учинчи тўсиқ.

Банданинг ўз амалларидан рози бўлиши ва улар ила ғурурга кетиши.

Бу ҳолатдан қутулиш учун банда ўз амалларидаги нуқсонлари ила танишмоғи лозим.

Шунингдек, банда Аллоҳ таолонинг Ўз махлуқотларининг ички ва ташқи бандалик вазифаларига қанчалар ҳақли эканини англаб етгандагина бу тўсиқни енгиб ўта олади.

Хулоса қилиб айтадиган бўлсак, ихлос амални турли иллат ва нуқсонлардан поклашдир. Мазкур иллат ва нуқсонлар икки нарсага боғлиқ бўлади.

Биринчиси – одамларнинг мақтови ва улуғлашини исташ ёки уларнинг ёмонлашидан қочиш каби халққа боғлиқ нарсалар.

Иккинчиси – қилгани ила ғурурга кетиш ёки унга эваз талаб қилиш каби амалга боғлиқ нарсалар.

Ушбу тўсиқларни енгиб ўтиб, Аллоҳ таолога холис ибодат қилганлар ҳақиқий мухлислар бўладилар.

«Руҳий тарбия» китобидан

👉@diyonatli