🗣Муфтий ҳазрат: Жамиятда қандай мартаба ва мақомда бўлишимиздан қатъи назар қонун-қоидага амал қилишимиз шарт!

✅ Шу йил 10 апрель куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари иштирокларида Тошкент вилоятида меҳнат қилаётган имом-хатибларнинг кенгайтирилган йиғилиши бўлиб ўтди.

🌙 Муфтий ҳазратлари диний соҳа ходимлари масъулияти ҳақида сўзлаш асносида ҳар бир имом-хатиб дин ва меҳроб омонатини чуқур ҳис этиши, фаолиятини давр талабларига мос олиб бориши, замон билан ҳамнафас билим-малакаларини ошириши ва шариат ходими сифатида адолат, ҳалоллик, тақво ва садоқат билан хизмат қилиш зарурлигига урғу қаратдилар.

📋 Йиғилишда вилоятдаги соҳа ходимларининг меҳнат мажбуриятлари, ҳужжат юритиши, молия-хўжалик ва устав фаолиятига оид хато-камчиликлари танқид қилинди. Шунингдек, белгиланган тартиб-қоидаларга риоя этмаганларга тегишли чоралар кўрилгани айтилди.

😄Муфтий ҳазратлари юртимиз аҳолиси ҳуқуқий давлат ва қонун устувор бўлган жамиятда истиқомат қилишини таъкидлаш баробарида соҳа ходимларига бундай дедилар: “Жамиятда ким қандай мартаба ва мақомда бўлишидан қатъи назар қонун-қоидаларга амал қилиши шарт”.

📝 Шайх Нуриддин Холиқназар ҳазратлари томонларидан вилоят вакиллиги штат жадвали, таркибий тузилмаси, лавозим йўриқномаси ва ички меҳнат тартиб-қоидалари каби меъёрий ҳужжатларнинг янги таҳририни ишлаб чиқиш ҳамда диний соҳа ходимларининг касб-маҳоратини ошириш учун махсус тренинглар ташкил этиш топшириғи берилди. Шунингдек, масжидларда ёнғин ва техника хавфсизлигига амал қилиш, қурилиш-таъмирлаш ишларида архитектура талабларига риоя этиш ва ортиқча ҳашаматга берилишдан сақланишни алоҳида таъкидладилар.

😄Мажлисда вилоятдаги ижтимоий-маънавий ва диний вазиятни ривожлантиришда имом-хатиблар олдида турган вазифалар, мўмин-мусулмонлар эҳтиёжини таъминлаш юзасидан комплекс чора-тадбирлар дастурларини ишлаб чиқиш ҳамда ижросини таъминлаш масъулларга топширилди.

✅ Ўзбекистон мусулмонлари идораси Матбуот хизмати

@diyonatli