❤️ Blog yuritish, smm, marketing, kopirayting va shu kabilarda faoliyat yuritayotganlarga manfaatli bo‘ladi deb umid qilamiz, in shaa Allah.

Boshlagan ishing xolis niyatda bo‘lsin. Oliy o‘rinda Alloh sendan rozi bo‘lishini ko‘zla, so‘ngra bandalari uchun manfaat, o‘zing va ahli oilang uchun halol rizq, jamiyat uchun foyda olib kelishini so‘rab Allohga duo qil!

❗️ Shunchaki, faqatgina hayotingni, oilangni, ishingni, shaxsiyatingni ommaga ochish, yoyish uchun bu ishni boshlabsanmi, bilki, bu amal zararingda, Alloh saqlasin! Chunki bu ishingdan hech qachon Alloh taolo rozi bo‘lmaydi. Bu bilan nafaqat o‘zingga zarar keltiryapsan, balki seni kuzatayotgan minglab ko‘zlarning vaqtlariga zulm qilib ularni-da maʼsiyatlarga tomon sudramoqdasan!

Joylayotgan kontentlaring (video, audio, matn-hammasi) dan layk, alqov, maqtov, obro‘, shuhrat kabilarni kutma, talab qilma, so‘rama! Zeroki, hech bir qilayotganing, qilganing, qilmoqchi bo‘lganlaring sening ojizona aqlingdan emas, sendan bo‘lishi ham mumkin emas!
   
  ☝  O‘zingda bor jamiki yaxshiliklar—Alloh taolo senga berib qo‘ygan ilm, aql-zakovat tufaylidir! Yaxshilab tafakkur qil: agar u bu neʼmatlarni senga bermaganida kontentingni joylayotgan qo‘llaringni ham qimirlata olmasding-ku?! Shunday ekan, insonlarning "voy qanday zo‘rr, dahshat, qoyil, barakalla!"-kabi maqtovlaridan nega semirib ketmoqdasan, ichingga sig‘may ketyapsan? U Zot borki, sen borsan! Alloh subhanahu va taolo O‘z ilmidan, fazlidan cheksiz rahmati va karami bilan senga bu isteʼdodni beribdimi, shukrini ado et, Allohga hamd ayt va buni ibodat darajasiga chiqar (niyatni Alloh roziligi uchun deb qilsang, blogingda faqat va faqat manfaat ulashsang, bilki, sen ibodat ustidasan. Illo, riyo, shuhratparastlik, taʼma kabilarni aralashtirmasang!)

🔖O‘sha tilni mukammal bilishga intil! Imloviy, uslubiy, juzʼiy, ishoraviy xatolarni umuman qilmaslikka harakat qil. Negaki sen ilm ulashyapsan, maʼrifat hech makon, hech zamonda ko‘cha tilida, adabiy meʼyorlarga amal qilinmagan holda ulashilmagan va ulashilmaydi ham!

👩‍💻 Nashriyotlar, televideniya, radio kabi davlat nazoratidagi rasmiy muassasalarning faoliyatini kuzatsang, birgina ishoraviy (tinish belgi) yoki uslubiy (gap qurilishi) xato uchun qanchalik badal to‘lashlarini ko‘rasan:

➡️ Tuzatishlar, uzr so‘rashlar▶️ minglab kitoblarning orqasiga oq listni qirqib yopishtirilgan "falon betdagi so‘z falon deb o‘qilsin" yozuvlarini, televideniya, radiodagi beixtiyor nutqida adashib ketib, uzr so‘ragan jurnalistlar...ni ko‘rgansan-ku, to‘g‘rimi?)

➡️ Sen ham ulardan kam emassan ➡️ bilki, blogging sohasi ham jurnalistikadek ummonga uning bir tarmog‘i, irmog‘i sifatida qo‘shilib bormoqda (balki qo‘shilib bo‘ldi ham). Ilmsiz, savodsiz jurnalistlar, muxbirlar, muharrir, musahhih, noshirlarni hech kim ishga olmaganidek sen yuritgan blogdan ham biror kimsa manfaat ko‘rmasa nega bu ishni kasb qilib olding?

❔ Hech bo‘lmasa, shu taraflariga boq, o‘yla. Har bir so‘zing uchun hisob-kitob qilinishing-ku dahshat, ammo dunyoyingda ham nafaqat o‘zingga, balki o‘zgalarga ham zarar keltirishing nahot seni umuman o‘ylantirmayapti?