🐟🌐🆕🆕
2月1號以色列國防部長話，會繼續望南推進到加沙搭埃及个邊境丄个城市拉法(Rafah)。路透社話，加沙230萬个居民有得一半軋扗居拉法，要是以色列進攻拉法，巴勒斯坦个平民就嘸末場化好去爻。
路透社還話，2月1號美國國務院擔4個㑭指控參與西岸暴力活動个以色列人制裁爻，白宮扗聲明中話，會得對襲擊搭恐嚇巴勒斯坦人以及沒收巴勒斯坦人財產个個人實施金融制裁搭簽證限制。
美聯社話，2月1號英國外交大臣表示，英國好在加沙停火着就正式承認巴勒斯坦國，弗再等以色列搭巴勒斯坦个談判。

2月1號，歐盟通過着200億歐圓對烏克蘭个援助。之前馬喬爾國（匈牙利）堅持反對，歐洲各國關於箇樁事體壓力，講要是馬喬爾國礙要否決，可能扣留對佢个全部援助貸款或者暫停佢个否決權。

2月2號，中國滬指一度跌破2700點。中國股市進入2024年之後一直在許跌，到現在跌幅有得7%到10%爻。
《第一財經》報導，中指院發布个1月百城房價數據顯示，二手房平均價鈿環比跌着0.56%，連續廿一個號頭環比下跌；同比个跌幅擴大到3.96%。

2月1號10點鍾，中國中央氣象台發布頭一隻冰凍橙色預警。是從2010年設置冰凍預警標準以來頂高級別个冰凍預警。寒冷天氣可能影響春運交通。

#新聞

#日逐聖經 😇

馬可 4:9

#標吳 試譯
又搭佢拉話，「有耳朵會聽个，應該聽。」

#寧波
Yi teng gyi-lah wô, “Yiu ng-to we t’ing go cü-kwu, kæ t’ing.”
又搭佢拉話，「有耳朵會得聽个主顧，該聽。」

#溫州
Yih tai gi-dà-ko koá, Yaó n-tó whai t’ing-ge, iang-ke t’ing.
又對佢大家講，有耳朵會聽个，應該聽。

#台州
Yi teh ge kông, “Yiu ng-tô we t’ing cü-ts ing-ke t’ing.”
又搭佢講，「有耳朵會聽主旨應該聽」

#有聲
🐟🌐🆕🆕 頭〡期
一週新聞吳語有聲播報
使用標準吳語搭上海話混合播報

🐟🌐🆕🆕

中國中部東部有得大規模个雨雪天。中央氣象臺2月4號天光連牢着發扗大風藍色預警、大霧黃色預警、暴雪橙色預警、冰凍橙色預警。箇是中國2009年以來冷天頂結棍个雨雪冰凍天氣。到2月4號，交關多个高速公路、國道省道封閉，武漢天河機場6成航班取消。

2月5號，北京第二中級法院以間諜罪判處澳洲籍作家楊恆均死緩兩年。澳洲外長黃英賢在扗判決之後發表聲明，表示覺着交關震驚，並召見中國駐澳大使。
2月5號，山東臨沂市法院拿煽動顛覆國家政權罪擔人權搭女權行動者李翹楚判着有期徒刑3年8個號頭。關於李翹楚，推薦閱讀箇篇報導。

1月29號，上海浦東機場弗容許網約差頭進去接客。隻通知發出來後引發輿論批評，懷疑背後有得利益關系。2月3號，上海市交通委講4號開始恢復浦東機場網約差頭个營運。

2月2號，新加坡內政部話新加坡註冊處處長畀一個叫陳文平个人發出通知，要求14日內對註冊官提交陳情以反對擔佢列入「具政治影響力者」。箇是新加坡頭一屆指定「具政治影響力者」。根據新加坡2021年10月通過个《防止外來干預（對應措施）法令》，新加坡當局擔直接參與新加坡政治个人全列作「具政治影響力者」，並加以管制。必須申報外國政府畀个移民福利、公開1萬以上个捐款，披露搭外國政治或立法機構个關係。

2月4號，烏克蘭總統澤連斯基扗採訪裏丄話在許考慮解僱總司令柴盧氏尼(Zaluzhnyi)。

2月3號，暫停着快2年个北愛列（北愛爾蘭）議會復會，並批准新芬黨領導人奧尼爾出任首席部長。箇趟是主張統一愛列个新芬黨頭一屆任首席部長。

#新聞

🐟🌐🆕🆕
2月5號，中國證監會，發現多樁惡意做空个事體。證監會話要維持股市穩定運行搭保護投資者合法權益。證監會暫停爻新增轉融券規模，宣布打擊弗當套利。證監會指出會引導機構投資者加大力度入市，鼓勵公司加大回購增持，爲A股引入增量資金。

2月4號，美職球會國際梅阿密搭香港隊个表演賽裏丄，梅西朆出席，引發香港球迷弗滿。6號梅西在採訪裏丄話是身體弗寫意个原因。

2月6號，香港教資會公布8爿大學2022/23學年教學人員離職數字，是1997/98學年——即香港主權移交以來个新高。上半學年一共380人離職，離職率7.6%.

2月5號，英國皇室話，英國國王㑭發現罹患癌症，扗許接受治療。國王推遲出席公衆場合，但是會繼續照常處理國家事務。

2月4號，美國國務卿勃林肯從舊年10月以來第五屆訪問中東。5號，勃林肯會見沙地國王。美國國務院話勃林肯強調解決加沙个人道主義需求搭防止衝突進一步蔓延。
#新聞

#日逐聖經 😇
哥林多前書 12:25-27

#標吳 試譯
讓身丄向嘸沒紛爭，多化肢體互相照應。假使一個肢體受着苦，百體一道受苦；一個肢體得仔天憫末百體大家一道快活。㑚是基督个基身咾，各人做佢个肢體。

#上海
以致拉身體上無啥分爭，倒使多化肢體彼此照應。若然一个肢體受苦，蓋未多化肢體一同受苦，一个肢體受榮耀蓋未多化主體一同快活。㑚是基督个身體咾，各人做一个肢體。

#寧波
S-teh sing-zông m-kao hao feng-k’æ, pah-t’i we-dô-kô kwu-djôh. Ziah-z ih-go ts-t’i ky’üoh-kw’u, pah-t’i dô-kô ky’üoh-kw’u; ih-go ts-t’i yiu t’i-min, pah-t’i dô-kô kw’a-weh. Næn-kæn ng-lah z Kyi-toh-go kyi-sing; kôh-nying tso Gyi-go ts-t’i.
使得身上嘸告好分開，百體爲大家顧着，若是一個肢體覺苦，百體大家覺苦；一個肢體有天憫，百體大家快活。難改尔拉是基督个基身；各人做佢个肢體。

#台州
Peh sing-zông m-kao hao feng-tsang; ts-t’i we jü-de tsiao-ku. Ziah-z ih-ke ts-t'i ky’üoh-k’u: ihke ts-t’i tu jü-de ky’üoh-k’u: ih-ke ts-t’i yiu t’i-min, ts-t’i tu jü-de kw’a-weh. Yin-ze ng-he z Kyi-toh-keh kyi-sing, koh-nying tso Ge-keh ts-t’i.

🧧Sīn-niāe khuá-lok🧧

🐟🌐🆕🆕

臺灣交通部觀光署宣布停止到大陸个旅遊團。陸委會話箇是因爲舊年8月以來開放兩岸跟團遊个事體朆收着大陸方面个回應，「還在兩岸製造事端，令人高度遺憾」。交通部觀光署話原本規劃大年之後恢復赴大陸个團體旅遊，但是中國方面朆開放大陸遊客跟團到臺灣旅遊，前蹌又單方面改變M503航線影響飛行安全，所以中止原本个規劃。

新華社2月7號報導，中共中央搭中國國務院撤脫證監會原主席易會滿，調成工吳清。

據《衛報》報導，美國前總統川普㑭聯邦上訴法院駁回爻了一項豁免申請。川普目前在四樁刑事案件裏丄面臨91項指控。另據BBC報導，特朗普會想辦法拖延佢搭2021年1月6號國會山騷亂有關个聯邦審判。

據《衛報》報導，路透社日前披露着一份哈馬斯通過卡塔爾搭埃及中介个三階段停火計畫，希望搭以色列停火並交換所有人質。以色列《國土報》報導，以色列官方表示𣍐(𠀾)停止戰爭。加沙地區衛生部門統計話已經有得2萬7千个巴勒斯坦人死扗戰爭裏丄。

據新華社報導，中共中央總書記習近平在農曆新年前頭按慣例代黨內退休个老幹部致新年問候，但名單裏丄朆看見舊年退休个前國防部部長魏鳳和。外媒報導流傳佢受火箭軍个事幹牽連。

#新聞