د افغانستان او ترکمنستان چارواکو، په هېواد کې پر بنسټيزو پروژو او د سړکونو پر رغولو خبرې وکړې
د ټولګټو وزیر ملا محمدعیسی ثاني، په کابل کې د ترکمنستان له سفیر خواجه عوضوف سره په کتنه کې؛ افغانستان کې پر بنسټيزو پروژو او د سړکونو پر رغولو خبرې کړې دي.
د ټولګټو وزارت د رسنيز دفتر د معلوماتو له مخې؛ په دې کتنه کې دواړو لوريو د تورغونډۍ بندر د عملي کار د پيل، د نويو تأسيساتو او د تخليې او بارګيرۍ لپاره د نويو هنګرونو د جوړولو، د مزارشريف – هرات او هرات – کندهار مسيرونو د تفصيلي سروې او ډيزاين او د يادو پروژو د رغولو، له تورغونډۍ بندر څخه د سوداګريزو انتقالاتو پر زياتوالي او د اوسپنې پټلۍ پروژو د پراختيا ترڅنګ؛ په افغانستان کې د بنسټيزو پروژو او د سړکونو د رغولو په اړه خبرې کړې دي.
د ټولګټو وزیر ویلي دي: “اوسمهال په افغانستان کې د اوسپنې پټلۍ په برخه کې د ګڼ شمېر پروژو د سروې او ډیزاین چارې روانې دي او په دې برخه کې کورنیو او بهرنيو پانګه والو ته د پانګونې ښه زمینه برابره شوې چې کولای شي په دې برخه کې پانګونه وکړي”.
د کتنې په پای کې، دواړو لورو پر دوامداره اقتصادي او سوداګریزو اړیکو سربېره، د زېربنایي پروژو په برخه کې پر دوه اړخیزه همکارۍ ټینګار کړی دی.
تلګرام

دید خبرې آژانس: د اسلامی امارت د ریاست‌الوزراء د اقتصادي مرستیال ملا عبدالغني برادر اخوند په مشرۍ، د کازان په ۱۶م اقتصادي فورم کې د اسلامي امارت د ګډون کوونکي پلاوي مشورتي ناسته نن په مرمرینه ماڼۍ کې ترسره شوه.
د ریاست‌الوزراء اقتصادي معاونیت د مطبوعاتي دفتر د معلوماتو له مخې؛ په دې ناسته کې د بهرنیو چارو وزارت مسئولینو، د پلاوي له غړيو سره د کېدونکي سفر په اړه لازم معلومات شریک کړي او د ریاست‌الوزراء اقتصادي مرستیال له لوري ورته لازمې سپارښتنې شوې دي.
ټاکل شوې ده چې د ریاست‌الوزراء اقتصادي مرستیال ملا عبدالغني په مشرۍ د افغانستان اسلامي امارت لوړپوړی پلاوی، د کازان په ۱۶م اقتصادي فورم کې د ګډون په موخه، سبا تاتارستان جمهوریت ته سفر وکړي.

تلګرام

دید خبرې آژانس: د ریاست‌ الوزراء د اقتصادي مرستیال ملاعبدالغني برادر اخوند په مشرۍ د اسلامي امارت لوړپوړی پلاوی نن د کازان ۱۶م نړیوال اقتصادي فورم کې د ګډون په موخه تاتارستان جمهوریت ته روان شو.
ټاکل شوې، چې یاد پلاوی به د کازان ۱۶م نړیوال اقتصادي فورم په څنډه کې د یوشمېر هېوادونو له لوړ پوړو چارواکو سره رسمي لیدنې هم ولري.
کازان فورم د روسیې او اسلامي نړۍ ترمنځ د اقتصادي همکاریو او هر اړخیزو اړیکو په پراختیا کې مهم رول لري.
په پام کې ده، چې د اسلامي امارت لوړ رتبه پلاوی به په دې فورم کې د ګډون ترڅنګ په یوه بله اقتصادي ناسته کې د افغانستان او روسیې د ګډو اقتصادي او سوداګریزو مناسباتو په اړه هم خبرې وکړي.

تلګرام

دید خبرې آژانس: د عامې روغتیا سرپرست وزیر او د بهرنیو چارو وزارت مالي او اداري مرستیال ټینګار کړی چې اسلامي امارت د هیواد روغتیا سکتور ته پاملرنه کوي.
د اسلامي امارت دغو دوو چارواکو د افغانستان لپاره د بې پولې ډاکټرانو بنسټ مشر مایکل لیپي سره په جلا کتنو کې له هغه وغوښتل چې د روغتیا سکتور د پرمختګ، د هېوادوالو لپاره د روغتیایي خدماتو د ښه کولو او د روغتیایی کارکوونکو د ظرفیت لوړولو په برخه کې لا نږدې همکاري وکړي.
د بهرنیو چارو وزارت د عامه اړیکو مسوول ضیاء احمد تکل و ویل: « ښاغلي لیپي د اسلامي امارت په ځانګړې توګه د بهرنیو چارو وزارت له همکاریو مننه وکړه او ډاډ یې ورکړ چې د مور او ماشوم د روغتیا او د روغتیایي پرسونل د ظرفیت لوړونې برخو کې به خپلې مرستې جاري ساتي.»
په دې کتنو کې لیپي په افغانستان کې د روغتیا خدمتونو د ښه والي او پراختیا پر اهمیت ټینګار کړی او ډاډ یې ورکړی چې بې پولې ټاکټرانو بنسټ به د افغانستان له روغتیا برخې سره خپلو مرستو ته ادامه ورکوي.
د هېواد ډاکټران د «بې‌پولې ډاکترانو» په څېر بنسټونو حضور د روغتیايي خدمتونو په ځانګړې توګه د لېرې پرتو سیمو لپاره ګټور او ارزښتناک بولي.
ډاکټر، اسدالله حلیمي په دې اړه و ویل: « که د میندو او ماشومانو ترمنځ وي او که د سړیو او ښځو ترمنځ، غیرساري ناروغۍ هر چیرته پیدا کیږي او باید دغو ناروغیو ته ځانګړی پام وشي. خپلې پروژې باید ډېرې کړي ځکه د غیرساري ناروغیو له امله د ناروغاتو مړینه زیاته شوې ده.»
په کابل کې یو بل ډاکټر تمیمی حکیمي بیا داسې و ویل: « موږ دا ډول بنسټونو ته که هغه بهرني وي او که کورني چې ډېری کارکوونکي یې افغانان دي اړتیا لرو. پولیو او د مور او ماشوم مړینه چې په لرې پرتو ولایتونو کې د روغتیايي پرسونل او توکود کمښت له کبله رامنځته کیږي، یوه جدي موضوع ده او موږ دې برخو کې مرستې ته اړتیا لرو.»
تر دې وړاندې د عامې روغتیا وزارت د هېواد د روغتیايي سکتور پر ځان ‌بسیاینې ټینګار کړی و او ویلي یې وو، چې د دغې موخې ته د رسېدول لپاره هڅې روانې دي.

تلګرام

دید خبرې آژانس: د ټرانسپورټ او ملکي هوایي چلند وزرت وایي چې د دغه وزارت له لوري موټرو ته د جي پي اس د لګولو بهیر روان دی.
دغه وسېلې چې په ځيرکو کولپونوهم مشهورې دي، هره شېبه د موټر د څارلو اسانتیا برابروي او د موټرو د سرعت په کنټرول کې مرسته کوي، چې د ټرافیکي پېښو په مخنیوي کې مهم رول لري.
د ټرانسپورټ او ملکي هوایي چلند وزارت ویاند حکمت‌الله اصفي ویلی: « د ټرانسپورټ او ملکي هوایي چلند وزرت مسافر وړونکو او بار وړونکو موټرو ته څه باندې اته زره جي پي اس الې لګولي دي. د دغو الو لګولو هېوادوالو ته ګڼې اسانتیاوې برابروي او د ټرافیکي پېښو د مخنیوي او د مسافرو د خوندیتوب لپاره غوره ګام دی.»
بلخوا، یو شمېر موټرچلوونکي او ټرنسپورټي شرکتونه هم د GPS د وسېلې لګول هره شېبه د موټرو د سرعت د کنټرول او ان د موټر چلوونکو د چلند د ارزونې لپاره مهم ګڼي او وايي، چې د GPS نصبول د مسافرو د خوندیتوب له زیاتېدو سره هم مرسته کوي.
موټر چلوونکی ولي محمد په دې اړه وایي: « د دې وسیلې د لګولو ښېګڼه دا ده چې دولت کولی شي کنټرول وکړي. دولت پوهېدلی شي چې چیرته یې، څنګه یې او که سرعت دې ډېر وي نو دولت زنګ درته وهلی شي او ویلی شي چې سرعت دې ډېر دی او د مسافرو ژوند په خطر کې دی نو سرعت دې کم کړه.»
د ټرانسپورټي شرکت استازي توفیق احمد و ویل: « د جي پي اس لګول یوه اسانتیا ده او کولي شي موټر تر کنټرول لاندې ولري.»
یو شمېر سوداګر هم سوداګریزو، ترانزیټي او مسافر وړونکو موټرو ته د څارونکو وسېلو نصبول، د ټرانسپورت د امنیت او د مسافرو او سوداګریزو توکو د خوندي لېږد لپاره اغېزناک بولي.
سوداګر امید حیدري د طلوع‌نیوز خبریال ته داسې و ویل: « کله چې بهرنیو هېوادونو ته صادرات کوو، په ټولو موټرو کې جي پي اس لګول کیږي او دا د صادراتو او وارداتو بهیر کې اسانتیا راولي او زیاتولی یې شي. دا چاره د ټرانسپورټ په سکټور کې هم پرمختګ رامنځته کوي.»
د مسافر وړونکو موټرو لپاره قانوني سرعت په ساعت کې ۱۰۵کیلومټره ټاکل شوی او دا وسېلې د ناقانونه سرعت راپور ورکوي. دغه راز، مرکز له موټر چلوونکو سر په اړیکه کې وي او د هغوی لپاره ټاکل شوی سرعت په دوام داره توګه تعقیبوي.
دغه طرحه، چې په ۲۰۲۲ کال کې جوړه شوه، ویل کیږي چې د ټرانسپورټ د تنظیمولو او د عصري ټکنالوژیو د کارولو لپاره د سرپرست حکومت د هڅو یوه برخه ده، او تمه کیږي چې د دغه سیسټم په پراختیا سره به د هیواد د ټرانزیټ سکټور کې روڼتیا او او اغېزنکتوب د پام وړ زیات شي.

تلګرام

دید خبرې آژانس: د امریکا متحدو ایالتونو ولسمشر ډانلډ ټرمپ سعودي عربستان ته په خپل وروستي سفر کې یو ځل بیا د جوبایډن د ولسمشرۍ پر مهال له افغانستانه د امریکايي ځواکونو د وتلو پر څرنګوالي سخته نیوکه وکړه.
هغه دغه پېښه «د امریکا د تاریخ تر ټولو شرموونکې شېبه» وبلله او ټینګار یې وکړ، چې که دی واکمن وای، نو د امریکايي ځواکونو د وتلو بهیر به یې «په ځواکمنه توګه» ترسره کړی وای.
ټرمپ دغه‌راز د داعش ډلې هغه ځانمرګي برید ته هم نغوته وکړه، چې د کابل نړۍوال هوايي ډګر د آبي دروازې مخې ته د تخلیې د بهیر پر مهال وشو او هغه یې یوه «ډېره وېرونکې غمیزه» وبلله.
د امریکا ولسمشر ویلي:«له افغانستانه د وتلو پر مهال یوه بله موضوع هم شته، چې موږ اوس پرې دومره فکر نه کوو؛ ۱۳ کسان ووژل شول؛ خو ۴۲ نور په ډېر وحشتناک ډول ټپیان شول او ټولټال سلګونه کسان ووژل شول؛ ځکه زه هغه کسان هم حسابوم، چې زموږ په مقابل اړخ کې وو. دا یوازې د ډېرې سختې بې‌ کفایتۍ نښه وه.»
د ۱۴۰۰ لمریز کال په اوړي کې د امریکایي ځواکونو وتل په افغانستان کې د امریکا د شل کلن حضور پای و. امریکايي ځواکونه د ۲۰۰۱ کال د سېپتمبر د یوولسمې له بریدونو وروسته د القاعدې د ځپلو په شعار سره راغلي وو. بالاخره، د وږي میاشتې پر نهمه د کابل له هوايي ډګره د وروستي امریکايي سرتېري په وتلو سره، متحدو ایالتونو خپله تر ټولو اوږده جګړه پای ته ورسوله او واک یوځل د اسلامي امارت لاس ته ولوېد.

تلګرام

دید خبرې آژانس: له پاکستانه د افغان کډوالو د ایستلو تر بهیره څو میاشتې وروسته، اوس یو ځل بیا اسلام اباد او راولپېنډۍ کې د افغانانو د نیولو او ستنولو بهیر چټک شوی دی.
دغو ښارونو کې مېشت افغانان د خپل وضعیت په تړاو اندېښنې څرګندوي او له اسلامي امارت او د کډوالو له ملاتړو سازمانونو غواړي چې دغه برخه کې پاملرنه وکړي.
پاکستان کې افغان کډواله، فرشته وایي: «په اسلام‌ اباد او راولپېنډۍ کې د افغان کډوالو ایستلو یو ځل بیا زور اخیستی او د ملګرو ملتونو د کډوالو د کمېشنرۍ او د کډوالو د نورو ملاتړو بنسټونو چوپتیا د پوښتنې وړ ده.»
بل افغان کډوال، عتیق منصور و ویل: «ښځې او ماشومان هم دغه بهیر کې شامل دي خو د افغان کډوالو د ملاتړ بنسټونو په ځانګړې توګه په پاکستان کې د دوی چوپتیا د اندېښنې وړ ده، ځکه افغان کډوال له سختو ستونزو سره مخ دي، که د ACC یا PoR کارتونه ولري او که بې اسناده وي.»
د کډوالۍ نړۍوال سازمان شمېرې ښيي، چې د اپرېل له لومړۍ د روانې مې تر دولسمې څه باندې ۱۲۸ زره افغانان له پاکستانه راستانه کړای شوي دي.
د کډوالۍ نړۍوال سازمان تازه ویلي:«د اپرېل له لومړۍ د مې تر ۱۲مې له پاکستانه څه باندې ۱۲۸زره افغانان راستانه شوي دي، چې ډیری یې په جبري توګه را ایستل شوي دي. د کډوالۍ نړۍوال سازمان له څه باندې ۶۸ زره راستنو شویو په ځانګړې توګه ښځو او ماشومانو سره د سرپناه، خوړو، روغتیایي خدمتونو او د خوندیتوب د ملاتړ برابرولو مرستې کړې دي.»
د کډوالو د حقونو فعال، جمعه خان پویا و ویل: «د ملګرو ملتونو د کډوالو کمېشنري، د کډوالۍ نړۍوال سازمان او د افغانستان مسوولین باید خپل مسوولیت ادا کړي، له پاکستاني حکومت سره خبرې وکړي او د اسنادو پر بنسټ د کډوالو د ایستلو مخه ونسي.»
تر دې وړاندې په ایران کې هم یو شمېر افغان کډوالو د جبري اېستنې بهیر پر زور اخیستو په نیوکې سره د دغه بهیر د درېدو غوښتنه کړې وه.

تلګرام

د افغانستان په تړاو د ټولیز امنیت تړون سازمان د وزیرانو شورا د کاري ډلې۴۱مه غونډه په مسکو کې جوړه شوه.
که څه هم د سرپرست حکومت له لوري په ځلونو ډاډ ورکړل شوی چې د افغانستان له خاورې به د نورو هېوادونو پر وړاندې کار وانخیستل شي؛ خو داسې برېښي چې د ځينو هېوادونو لپاره دا ډاډ کافي نه‌دي.
د دغه سازمان په خبرپاڼه کې راغلي، چې په دغې غونډه کې د افغانستان روان وضعیت، د دغه هېواد له خاورې احتمالي راپورته شوي ګواښونه ارزول شوي دي.
د ټولیز امنیت د تړون سازمان په خبرپاڼه کې راغلي:«د افغانستان د اوسني وضعیت په تړاو هر اړخیز توګه نظرونه تبادله شول او د دغه هېواد له خاورې بالقوه خطرونو او ګواښونو ته نغوته وشوه. په دې غونډه کې د سازمان د غړو هېوادونو لخوا د افغانستان د خلکو لپاره د بشري او اقتصادي ملاتړ د دوام پر اړتیا هم ټینګار وشو. ګډونوالو په افغانستان کې د وضعیت د څارنې او په دغه هېواد کې د سولې له بهیر سره د مرستې د دوام د اړتیا په تړاو ګډ دریځ غوره کړ.»
دا غونډه د ټولیز امنیت تړون سازمان د سرمنشي د مرستیال په کوربتوب او د غړو هېوادونو د پلاوو په ګډون په مسکو کې وشوه.
ګډونوالو د افغانستان د وضعیت د څارنې پر دوام ټینګار وکړ او د غړو هېوادونو له لوري یې د افغانانو د بشري او اقتصادي ملاتړ دوام مهم وباله دغه راز د دې غونډې ګډونوالو په افغانستان کې د سولې او ثبات د ټینګښت لپاره ګډ دریځ خپل کړ.
ورته مهال، د سیاسي چارو ځینې شنونکي وايي که‌چېرې د دغه سازمان غړي هېوادونه واقعاً غواړي له افغانستان سره مرسته وکړي، باید د څو اړخیزو سیاستونو پر ځای، د اسلامي امارت له چارواکو سره مخامخ په اړیکه کې شي.
د ټولیز امنیت د تړون سازمان له لوري د افغانستان وضعیت په داسې حال کې ارزول کېږي، چې پرون د افغانستان لپاره د ازبیکستان ځانګړي استازي هم د منځنۍ اسیا لپاره د اروپایي ټولنې له ځانګړي استازي سره وکتل او د افغانستان د روان وضعیت او د سیمې د امنیت پر ارزولو سربېره یې د افغانستان د ثبات لپاره د رغنده خبرو پر دوام هوکړه وکړه.

تلګرام

دید خبرې آژانس: د امریکا د بهرنیو چارو وزارت اعلان کړی، چې د افغان کډوالو د لنډمهالي خوندیتوب د وضعیت د پای ته رسېدو پرېکړه شوې ده.
د امریکا د بهرنیو چارو وزارت د ویاند مرستیال ټامي پیګوټ وايي، چې دغه پروګرم به د ۲۰۲۵ کال د جولای پر۱۲مه پای ته ورسېږي.
ښاغلی پیګوټ زیاتوي:«اوس هغه وخت رارسېدلی، چې د افغان کډوالو لپاره د لنډمهالي خوندیتوب حالت پای ته ورسېږي. دا حالت له پیله د یوه لنډمهالي اقدام په توګه په پام کې نیول شوی و او اوس یې دا موقتي دوره پای ته رسېږي. د نورو معلوماتو لپاره باید د امریکا د کورني امنیت وزارت ته مراجعه وشي.»
له دې سره هم‌مهاله، د اسلامي امارت د بهرنیو چارو وزارت د امریکا د دې پرېکړې هرکلی کړی او هغه یې د افغانستان د امنیتي او اقتصادي پرمختګ نښه بللې ده.
د بهرنیو چارو وزارت د عامه اړیکو رییس ضیاء احمد تکل په دې هکله وویل:«د افغانستان اسلامي امارت د متحده ایالاتو او نورو هېوادونو سره د هغو افغانانو د بېرته راستنېدو په اړه، چې نور په کوربه هېواد کې د پاتې کېدو شرایط نه‌پوره کوي. د رغنده خبرو اترو لپاره چمتووالی څرګندوي.»
خو دا پرېکړه له غبرګونونو سره هم مخ شوې ده.
د امریکا د استازو جرګې غړی جو مورل دا پرېکړه د نه‌منلو وړ بللې او ټینګار یې کړی، چې ډېری دغه کډوال هغه کسان دي، چې له امریکا سره یې له مرستې وروسته خپل هېواد پرېښې او اوسمهال د هغوی وتل ناعادلانه دي.
د امریکا د استازو جرګې غړی جو موریل څرګندوي:«ډېری دغو کډوالو د «متحده ایالتونو» له پوځ سره تر مرستې وروسته خپل هېواد پرېښی دی او له هغوی مخ اړول د منلو وړ نه‌دي.»
د افغان ایوک سازمان مشر چې امریکا ته د افغان کډوالو د لېږد ملاتړی دی، د امریکا دا پرېکړه یې غندلې او دغه کار یې «لیونتوب» بللی دی.
د افغان ایوک د سازمان مشر شان ون ډایو وايي:«دغه کسان د امریکا له خوا دغه هېواد ته راوستل شوي. دوی یوازې لنډمهالي ملاتړ ته اړتیا نه‌لري. کله چې موږ له افغانستانه ووتو، دوی هم زموږ له خوا دلته راوستل شول او درې نیم کاله کېږي، چې دلته ژوند کوي. موږ دوی دلته راوستي، نو موږ د دوی پر وړاندې مسوول یو. موږ باید دوی خوندي وساتو.»
دا په داسې حال کې ده، چې د امریکا د کورني امنیت وزارت هم اعلان کړی، چې د هغو افغان کډوالو لپاره د لنډمهالي خوندیتوب پروګرم به د ۲۰۲۵ کال د جولای په ۱۲مه پای ته ورسېږي چې د مخکیني حکومت له پرځېدو وروسته امریکا ته کډوال شوي دي.

تلګرام

دید خبرې آژانس: پکتیا ولایت مرکز ګردېز کې د اسلامي پولیسو له روزنیز مرکز څخه د سویل ختیځ زون په کچه ۴۴۷ پولیس له یوې میاشتې مسلکي، عقیدتي او روزنیزو زده کړو وروسته فارغ شول.
د کورنیو چارو وزارت د ښوونې او روزنې عمومي قوماندان قاري روح الله عبیده پکتیا ته د سفر پرمهال دغې فراغت غونډه کې پولیسو ته ویلي، چې اسلامي پولیس د ټولنې رښتینې خدمتګاران دي، د شفقت، عدالت او رښتینوالۍ په اساس کولای شی چې د ولسونو په زړونو کې ځای پیداکړئ او ټینګار یې کړی چې د خپلو دندو پرمهال د عالیقدر امیرالمؤمنین ټول فرامین په ښه ډول تطبیق کړئ.
نوموړي پولیسو ته سپارښتنه کړې:”په زور قوانین مه پلي کوئ، چک پواینټونو کې د تلاشۍ پر وخت خلکو سره ښه چلند وکړئ، تر څو خلک ستاسې قوانینو او اصولو ته غاړه کېږدي”.
د سویل ختیځ زون اسلامي پولیسو روزنیز مرکز قوماندان سمیع الله خالد وايي، چې فارغ شويو پولیسو ته په اسلامي، عقیدتي، مخابرې، اطفایې، د پولیسو عملیات او د سلاح تخنیک په برخو کې زده کړې ورکړل شوې دي، چې له دې وروسته به په ولایتونو کې خپلې دندې ترسره کوي.
چارواکو د یادې فراغت غونډې پرمهال، فارغ شویو پولیسو ته سپارښتنې وکړې چې د خپلو دندو پرمهال خلکو سره ښه چلند وکړي او ولسونو ته رښتینې خدمت وکړي.
فارغ شوي پولیس وايي، دوی ښه روزنه او مسلکي زده کړه ترلاسه کړې او ولس ته په رښتینې ډول د خدمت او امنیت ډاډ ورکوي.
د اسلامي پولیسو روزنیز مرکز مسوولینو د معلوماتو له مخې د اسلامي امارت راتګ وروسته تر دې مهاله یاد مرکز څخه ١١ زره ١١٢ پولیس له مسلکي او اخلاقي زده کړو وروسته فارغ شوي دي.

تلګرام

دید خبرې آژانس: د عدلیې وزارت د انسجام رییس د عمرې د فصل پای په نوم یوې غونډې ته د خبرو پر مهال د سیاحتي شرکتونو په ملاتړ په ټینګار سره ویلي، باید د دغو شرکتونو ستونزې حل شي.
د عدلیې وزارت د انسجام رییس، احمد ضیاء خبیب و ویل: «د اطلاعاتو او کلتور وزارت په همغږۍ موږ یو ځل بیا د دوی په ټولنو غور کوو، د دوی ستونزو ته به رسېدنه کوو. زموږ یو نظام دی، یو قاعد دی او یو مو امیر دی.»
دغه راز د اطلاعاتو او کلتور او د ټرانسپورټ او هوايي چلند وزارتونو مسوولینو هم دغه غونډه کې ټینګار کړی چې سیاحتي شرکتونه باید هېوادوالو او بهرنیو وګړو ته پر نړۍوالو معیارونو برابر خدمتونه وړاندې کړي.
د اطلاعاتو او کلتور وزارت د ګرځندوی، مالي او اداري چارو مرستیال، قدرت‌الله جمال و ویل: «که څه هم درون مسوولیت را پر غاړه دی خو په ورته مهال د ولس هم راته سترګې دي او د اسلامي مارت هم. اسلامي امارت دغه هېواد کې د ولس ستونزو لپاره یوازې نه دی.»
د ټرانسپورټ وزارت عملیاتي مرستیال، غلام جیلاني وفا و ویل: «هر هوایي ډګر کې له ۱۵۰ تر ۲۵۰ افغانان په دغو خدمتونو کې ښکېل دي او کوښښ کوي چې دغه خدمتونه د نړۍوالو معیارونو او د سفر د ټولو اسانتیاو سره ترسره کړي.»
تردې وړاندې د کار او ټولنیزو چارو سرپرست وزیر ویلي و چې ځینې دغه ډول شرکتونه په انساني قاچاق کې لاس لري.
له دې سره هم مهاله،، د دې غونډې جوړوونکو د خپلو لاسته ‌راوړنو په تړاو د مالوماتو پر وړاندې کولو سربېره، له سیاحتي شرکتونو وغوښتل چې د هېوادوالو لپاره په بېلابېلو برخو کې معیاري خدمات وړاندې کړي.
د سیاحتي شرکتونو د ټولنې رییس، محمد ګلاب سلطان ‌زوی و ویل: «له ټولو سیاحتي شرکتونو غواړم چې د عمري خدمتونو د معیاري کولو په برخه کې سالم رقابت وکړي.»
د غونډې په پای کې هغو سیاحتي شرکتونو ته چې غوره خدمتونو یې وړاندې کړي، ستاینلیکونه ورکړل شول.

تلګرام