#НароднаяЛексіка з Дзісеншчыны: ацяро́бкі - астаткі, недаедкі, абрэзкі.

Прыклад ужывання: нада сабраць у кучу гэныя ацяро́бкі. Усё пазйідалі, і ацяро́бак ні асталося.

#СловоДняПолісскою з Драгічыншчыны: выпру́к - кабан.

Прыклад ужывання: выпрука́ де́дько ошмалэ́в соло́мыю, шоб сало було́ смачнíшэ.

#НароднаяЛексіка з Старадарожчыны: кіжла́ч - невысокі, крываногі чалавек.

Прыклад ужывання: Манін бацько сам кіжла́ч і дзеці ўсе такіе - крываногіе і малые і дзяўкí, і хлопцы.

Ідуць новыя выходныя і мы зноў маем для вас прапанову чытанкі і наш чарговы 1️⃣7️⃣-ты выпуск літаратуры па дыялекталогіі!

Дыялектызмы ў творах беларускіх савецкіх пісьменнікаў (1979)

Негледзячы на тое, што шмат каго з вас такая назва можа насцеражыць, дадзены зборнік утрымлівае добрую падборку незвычайных для літаратурнай мовы слоў, якія ўжываліся такімі нашымі вядомымі літаратарамі як Цішка Гартны, Якуб Колас, Міхась Лынькоў, Васіль Быкаў і г.д. З кнігі вы можаце даведацца што такое драбкач, як можна рабіць нешта наманы, і чаму неварта фатыгавацца з-за драбніц.

#СловоДняПолісскою з Лунінеччыны: ба́лішні - колішні, даўні.

Прыклад ужывання: не́колі прышла я первы раз до ятро́ўкі, а ў іх у хаці шчэ ба́лішні, мо проба́пкі, дубо́вы стол стоіць, але засла́ны і покра́шаны ло́ўко.

#НароднаяЛексіка з Сенненшчыны: патто́па - тое, чым распальваюць дровы; распал.

Прыклад ужывання: мама, дай мне патто́пу.

#СловоДняПолісскою з Маларытчыны: вы́шчэр - месца ў лесе, дзе многа карчоў.

#НароднаяЛексіка з Расоншчыны: ільня́га - яловы лес, ельнік.

Былі ўжо ў лесе гэтай зімой?

#СловоДняПолісскою з Бярозаўшчыны: домына́ты - даймаць, перашкаджаць.

Прыклад ужывання: іды, ны домына́й мні.

#НароднаяЛексіка з Вушаччыны: падстру́ністы - стройны.

Прыклад ужывання: дзяўчына стройная, прыгожая, падстру́ністая.

Усіх з надыходзячымі святамі!🎄🎄🎄

Сёння прадстаўляем вашай увазе выпуск літаратуры па дыялекталогіі №1️⃣8️⃣!

Беларуская дыялекталогія: матэрыялы і даследванні (2018)

Пяты выпуск зборніка прысвечаны лексікаграфіі і тэкстаграфіі. Значная частка прац у выданні - гэта архіўныя лексічныя матэрыялы са спадчыны гаворак 19-20 стст.
Сучасныя мясцовыя беларускія гаворкі прадстаўленыя абмежавана. У тэкстаграфічную частку кнігі ўключаныя галоўным чынам запісы з дзяржаўнага беларуска-расійскага, беларуска-польскага і беларуска-латышскага памежжа.

#СловоДняПолісскою з Жабінкаўшчыны: в дыч - у невядомым кірунку, неведама куды.

Прыклад ужывання: надойíлы вжэ мні всі гэты проблемы, за́ра як пойду в дыч, а вітэ́ шо хо́чтэ, то й робíтэ са́мы.

#НароднаяЛексіка з Валожыншчыны: ляпу́н - насценны гадзіннік з маятнікам.

Прыклад ужывання: прывезлі мне ляпуна́ летась.

#СловоДняПолісскою са Століншчыны: пока́мусь - пакуль.

Прыклад ужывання: прыíхаў молоды до молодо́і, прывю́с коровая, на стул станоўля́ть і свого́ станоўля́ть і стоять на столу, пока́мусь нэ прыíдуть з вэнца́.

#НароднаяЛексіка з Мядзельшчыны: во́лін - вэлюм; галаўны ўбор нявесты, лёгкая белая накідка.

Прыклад ужывання: во́лін не такі кароткі быў, як цяпер, а доўгі, аш да пят.

#СловоДняПолісскою з Драгічыншчыны: му́чаныца - кравяная каўбаса (з грэцкіх круп, свіной крыві і сала).

Пакаштавалі такога б? Мо ў каго з вас яе яшчэ робяць?

#НароднаяЛексіка з Ганцавіччыны: гамана́ - шумная размова.

Прыклад ужывання: паўстаўлялі жалезные дзьверы, дак якая ў калідоры гамана́ - ўсё ў кварціры чутно́.

Напярэдадні Новага году🥳 ладзім для вас 1️⃣9️⃣-ты выпуск літаратуры па дыялекталогіі!

Фразеалагічны слоўнік Косаўшчыны

Багатай крыніцай папаўнення і ўзбагачэння фразеалагічнага складу беларускай літаратурнай мовы зʼяўляецца фразеалогія асобнага дыялекту. У "Фразеалагічным слоўніку Косаўшчыны" прадстаўлена фразеалогія насельнікаў паўночнай часткі Івацэвіцкага раёна Брэсцкай вобласці. Да кожнага фразеалагізма даецца тлумачэнне, прыводзіцца прыклад з жывой гутарковай мовы, што зноў жа такі дазваляе вызначыць сэнс кожнага выразу і пабачыць яго ў кантэксце.
Кніга разлічаная на самыя шырокія колы чытачоў - усіх, хто любіць і шануе народную словатворчасць.

Прайшлі святы🎄 і мы ізноўку павяртаемся да вас з мноствам цікавостак і кантэнту прысвечанага гаворкам, народнай культуры, дыялектам Беларусі і ейнага памежжа. Зычым вам, шаноўнае падпісанства, прадуктыўнага году і невычэрпнай прагі да вывучэння роднага слова!

Сачыце за намі на ўсіх або на зручных вам пляцоўках📲. Усе нашыя сацсеткі цяпер сабраныя ў адным месцы. Завітвайце і падпісвайцеся, рэкамендуйце нас сябрам, родным і ўсім нераўнадушным.

Захоўвайма нашае моўнае багацце і спадчыну разам❗️

Пачнем год з чарговай падборачкі рэкамендацый беларускіх тэлеграм-каналаў вартых вашай увагі. Спадзяемся, кожны знойдзе тут нешта на свой смак і густ!

❄️ ❄️ ❄️

@poshtabel — Беларусь і яе жыхары на старых паштоўках, рэтраспектыва, вінтажныя здымкі, друк беларусаў на эміграцыі і шмат чаго цікавага па тэме.

@modaNaMovu — прыказкі, прымаўкі, фразеалагізмы і розныя моўныя цікавосткі: усё,што робіць працэс вывучэння беларускай мовы нашмат прасцейшым і захапляльным.

@supermova — энцыкляпэдыя годных асобаў і падзеяў, прызначаная падняць сьвядомасьць і пачуцьцё гонару беларусаў. А таксама афіша беларускамоўных афлайн і анлайн мерапрыемстваў.

@tropinki— падарожжы на Беларусі, старыя фотаздымкі, экатурызм і архітэктура Беларусі, а таксама навіны рэстаўрацыі і аднаўлення архітэктурнай спадчыны.

@brestgid — гісторыя і цікавосткі Берасця, непапсовыя маршруты па Беларусі, зборныя экскурсіі і вандроўкі.

@knihi_kazki — канал прысвечаны выданню кніг на беларускай мове для дзяцей і дарослых.

#беларускі_тэлеграм

Бара́ныця - авечая скура.

Прыклад ужывання: Бобэлько Коля взев бара́ныцю, накрывся е́ю і ка́ля клуба ляка́в дывче́т.

#СловоДняПолісскою #Драгічын #Галоўчыцы