🚩Ադրբեջանի պաշտպանության նախարարությունն օրվա ընթացքում 3-րդ ապատեղեկատվությունն է տարածել:

Ադրբեջանի ՊՆ հաղորդագրությունն այն մասին, թե իբր ՀՀ ԶՈՒ ստորաբաժանումներն օգոստոսի 21-ին՝ ժամը 10:25-10:30-ն ընկած ժամանակահատվածում, կրակ են բացել սահմանագոտու արևելյան հատվածում տեղակայված հայկական դիրքերի ուղղությամբ, հերթական ապատեղեկատվությունն է:

ՀՀ ՊՆ

🚩 Ադրբեջանի նախագահ Իլհամ Ալիևի հրավերով օգոստոսի 22-23-ը պետական ​​այցով երկիր կժամանի Ուզբեկստանի նախագահ Շավքաթ Միրզիյոևը։

Օրակարգում ներառված են Ուզբեկստան-Ադրբեջան ռազմավարական գործընկերության հարաբերությունների հետագա խորացումը և տարբեր ոլորտներում գործնական համագործակցության ընդլայնումը։

🚩 Մեկնարկել են ՀՀ վարչապետի հովանու ներքո անցկացվող բանակային խաղերը

Օգոստոսի 21-ին Մ. Մելքոնյանի անվան ռազմամարզական վարժարանում տեղի է ունեցել ՀՀ վարչապետի հովանու ներքո ուժային կառույցների միջև առաջին անգամ անցկացվող բանակային խաղերի բացման հանդիսավոր արարողությունը։

Ինչպես տեղեկացնում են ՀՀ ՊՆ-ից, միջոցառմանը ներկա էին ՀՀ ԶՈՒ ԳՇ պետ, պաշտպանության նախարարի առաջին տեղակալ, գեներալ-լեյտենանտ Էդվարդ Ասրյանը, ՀՀ ԿԳՄՍ նախարար Ժաննա Անդրեասյանը, ուժային գերատեսչությունների ներկայացուցիչներն ու պաշտոնատար այլ անձինք:

🚩 Կիմ Չեն Ընը հետևում է թևավոր հրթիռի փորձարկմանը. սկսվում են Հարավային Կորեա-ԱՄՆ զորավարժությունները

Հյուսիսային Կորեայի առաջնորդը խոստացել է «ճնշող» պատասխան տալ Հարավային Կորեայի և ԱՄՆ-ի այս ամսվա զորավարժություններին:

Հյուսիսային Կորեայի առաջնորդ Կիմ Չեն Ընը վերահսկել է ռազմավարական թևավոր հրթիռի փորձարկումը, երբ Հարավային Կորեան և Միացյալ Նահանգները սկսել են ամենամյա զորավարժությունները, որոնք Փհենյանը համարում է պատերազմի փորձ:

🚩 ՄԱԿ ԱԽ հրատապ նիստի ձևաչափը քննարկում է։ Այն չի ենթադրում ուղղակիորեն փաստաթղթի (բանաձևի կամ հայտարարության) ընդունում։

▫️ Բանաձևի նախագիծ ներկայացնելու և քվեարկության դնելու իրավունք ունեն ՄԱԿ ԱԽ 15 անդամները։ Հայաստանը, ՄԱԿ ԱԽ անդամ չէ և նման իրավասություն չունի։

ՀՀ ԱԳՆ մամուլի խոսնակ

🚩 Միացյալ Նահանգները կոչ է արել Չինաստանին դադարեցնել ճնշումը Թայվանի վրա այն բանից հետո, երբ Պեկինը պատերազմական խաղեր է սկսել ինքնակառավարվող կղզու շուրջը՝ որպես «խիստ նախազգուշացում» Թայվանի փոխնախագահ Ուիլյամ Լայի՝ Նյու Յորք և Սան Ֆրանցիսկո վերջերս կատարած այցերի կապակցությամբ:

Հայտարարությունը հնչել է այն ժամանակ, երբ Թայվանը կիրակի հայտարարել է, որ վերջին 24 ժամվա ընթացքում չինական օդուժի մոտ 25 ինքնաթիռ հատել է Թայվանի նեղուցի սահմանը։

🚩 ՀՀ ԱԳՆ մամուլի խոսնակը պատասխանել է լրատվամիջոցներից ստացված հարցերին։ Այս մասին հայտում են ԱԳՆ-ից։

«Հարց. Օգոստոսի 16-ին կայացավ ՄԱԿ-ի անվտանգության խորհրդի հրատապ նիստ Լեռնային Ղարաբաղում ստեղծված մարդասիրական իրավիճակի առնչությամբ: Երկրներն արտահայտեցին իրենց դիրքորոշումները, բայց դա որևէ փաստաթղթով չարձանագրվեց։ Ինչո՞ւ որևէ որոշում չընդունվեց։ Հայաստանը չէ՞ր ներկայացրել նման փաստաթուղթ։

Պատասխան. Ինչպես արդեն նշել ենք, մենք բարձր ենք գնահատում ինչպես այս և ՄԱԿ-ի ԱԽ նախորդ՝ դեկտեմբերին կայացած նիստի ժամանակ, այնպես էլ մինչ օրս միջազգային այլ հարթակներում մեր գործընկերների, միջազգային կառույցների կողմից հնչեցված սկզբունքային դիրքորոշումները, որոնք համահունչ են միջազգային անվտանգության ու խաղաղության պահպանման հարցում ՄԱԿ ԱԽ առաջնային մանդատին, մարդու իրավունքների պաշտպանության համընդհանուր արժեքներին և, որ գուցե ամենահրատապն է այս պահին, Ադրբեջանի ագրեսիվ գործողությունների և ԼՂ-ում նոր մարդասիրական աղետի կանխարգելման գիտակցմանը:

Շարունակությունը` https://detq.info/arm/node/3292

⚡ Օգոստոսի 22- ին, ժամը 06:00-07։00 հատվածում ադրբեջանական ԶՈւ-ն Մարտակերտի և Մարտունու շրջաններում խախտել է հրադադարը` կիրառելով հրաձգային զենք։ Հայկական կողմում տուժածներ չկան։

Արցախի ՊՆ

🚩 Իրանի Իսլամական Հանրապետության արտաքին գործերի նախարարության պաշտոնական ներկայացուցիչ Նասեր Քանաանին հայտարարել է, որ ԱՄՆ-ի հետ բանտարկյալների փոխանակման և Իրանի ֆինանսական ակտիվների ապասառեցման վերաբերյալ համաձայնությունները կյանքի կկոչվեն երկու ամսվա ընթացքում։

#Դետքի_հետագծով

Իրանի և ԱՄՆ-ի միջև անուղղակի բանակցությունների արդյունքում վերջերս պայմանավորվածություն ձեռք բերվեց՝ կապված իրանական արգելափակված ակտիվների ապասառեցման և գերիների փոխանակման հետ։ Այս միջոցները կարևոր նշանակություն ունեն Իրանի համար, որոնք երկիրը կարող է օգտագործել առկա տնտեսական խնդիրները լուծելու նպատակով։

⚡ Ադրբեջանի պաշտպանության նախարարության տարածած հաղորդագրությունն այն մասին, թե իբր օգոստոսի 21-ին՝ ժամը 22:50-ից մինչև օգոստոսի 22-ի 02.05-ի սահմաններում, ՀՀ ԶՈՒ ստորաբաժանումները կրակ են բացել սահմանագոտու հարավարևմտյան և հարավարևելյան հատվածներում տեղակայված ադրբեջանական դիրքերի ուղղությամբ, չի համապատասխանում իրականությանը:

ՀՀ ՊՆ

🚩 Ադրբեջանը կազմել է, այսպես կոչված, «Արևմտյան Ադրբեջան» վերադարձողների համար համակարգող մարդկանց հատուկ ցուցակներ. Թաթոյան

Մարդասիրական քողի ներքո ադրբեջանական իշխանությունը, կեղծ ցուցակներ կազմելով, Հայաստանի ամբողջ տարածքը ներկայացնում է Ադրբեջան: Այս մասին «Ֆեյսբուքի» իր էջում գրել է ՀՀ նախկին ՄԻՊ Արման Թաթոյանը:

«Ադրբեջանի իշխանության ուղիղ համակարգմամբ, նկատի ունենալով Հայաստանը, «Արևմտյան Ադրբեջան» բացարձակ կեղծ հայեցակարգի շրջանակում կազմվել են, այսպես կոչված, «Արևմտյան Ադրբեջան» վերադարձողների համար համակարգող մարդկանց հատուկ ցուցակներ:

Այդ ցուցակներում Հայաստանի քաղաքների ու գյուղերի անվանումները ներկայացված են ադրբեջանական կեղծ անվանումներով։

Սա իրականում ադրբեջանական իշխանության ռազմաքաղաքական ծրագիր է, բայց փորձ է արվում դրան տալ մարդասիրական բնույթ՝ թաքցնելու համար Հայաստանի Հանրապետությանն ուղղված տարածքային նոր նկրտումները և սպառնալիքները։

Շարունակությունը` https://detq.info/arm/node/3298

🚩Օգոստոսի 21-ին Միջազգային իրավական հարցերով ներկայացուցիչ Եղիշե Կիրակոսյանը Ռասայական խտրականության բոլոր ձևերի վերացման մասին միջազգային կոնվենցիայի շրջանակներում քննվող Հայաստանն ընդդեմ Ադրբեջանի դատական գործով Հայաստանի Հանրապետության անունից Արդարադատության միջազգային դատարան է ներկայացրել Ադրբեջանի Նախնական առարկությունների առնչությամբ Հայաստանի Գրավոր դիտարկումները։

Միջազգային իրավական հարցերով ՀՀ ներկայացուցիչ

🚩Ադրբեջանի պաշտպանության նախարարության տարածած հաղորդագրությունն այն մասին, թե իբր ՀՀ ԶՈՒ-ն կրակ է բացել ադրբեջանական դիրքերի ուղղությամբ, որի հետևանքով վիրավորում է ստացել Ադրբեջանի ԶՈՒ զինծառայող, չի համապատասխանում իրականությանը:

ՀՀ ՊՆ

⚡ Օգոստոսի 22-ին, ժամը 12:30-ի սահմաններում ադրբեջանական զինուժը կրակ է բացել Սարուշենի դաշտերում աշխատող կոմբայնի ուղղությամբ՝ կիրառելով հրաձգային զենք. հայկական կողմում կորուստներ չկան։

Արցախի ՊՆ

🚩Ադրբեջանի ՊՆ տարածած հաղորդագրությունն այն մասին, թե իբր ՊԲ ստորաբաժանումների կողմից ադրբեջանական դիրքերի ու հաղորդակցման ուղիների նկատմամբ դիտարկման ու հսկման նպատակով տեղադրվել են տեխնիկական միջոցներ, և որոնք իբր օգոստոսի 21-ին ճնշվել են ադրբեջանական ԶՈւ ստորաբաժանումների կողմից, հերթական ապատեղեկատվությունն է:

ԱՀ ՊՆ մամուլի ծառայություն

🚩Իրանի Իսլամական Հանրապետության ցամաքային զորքերի հրամանատար Կիյումարս Հեյդարիի գլխավորած պատվիրակությունը ժամանել է Մոսկվա՝ քննարկելու երկկողմ ռազմական համագործակցության հարցերը:

#Դետքի_հետագծով

Ռուսաստանը և Իրանը վերջին տարիներին ակտիվորեն խորացնում են իրենց համագործակցությունը ռազմական և ռազմատեխնիկական ոլորտներում։ Այդ փոխգործակցությունն արտացոլվում է նաև երկու երկրների զինված ուժերի ցամաքային զորքերի միջև, որոնք կարևոր նշանակություն ունեն Իրանի և Ռուսաստանի զինված ուժերի համակարգերում։

ՆԱՏՕ-ին Շվեդիայի անդամակցելու մասին որոշումը պետք է կայացնի Թուրքիայի խորհրդարանը, սակայն թե որքան կտևի այդ գործընթացը, հայտնի չէ, ամեն ինչ կախված է Ստոկհոլմի գործողություններից։

Այս մասին Բուդապեշտից վերադառնալուց հետո լրագրողներին հայտարարել է Թուրքիայի առաջնորդ Ռեջեփ Թայիփ Էրդողանը։

«ՆԱՏՕ-ին Շվեդիայի անդամակցության մասին արձանագրություն խորհրդարան ներկայացնելու և դրա հաստատման գործընթացն ուղղակիորեն կապված է Շվեդիայի կողմից իր պարտավորությունների կատարման հետ։ Որոշումը պետք է ընդունի խորհրդարանը, թե ինչքան ժամանակ կքննարկվի հանձնաժողովներում, որքան կտևի այս գործընթացը, մենք չգիտենք։ Սկզբի համար Շվեդիան պետք է ապահովի Ստոկհոլմի փողոցների վերահսկողությունը: Եթե ​​նրանք (Շվեդիայի իշխանությունները) դա չանեն, եթե հարձակումները մեր սրբավայրի վրա շարունակվեն, ապա թող չնեղանան»,- Էրդողանի խոսքերն է մեջբերում TRT հեռուստաալիքը։

🚩 Հայաստանը շահագրգռված է ցանկացած անաչառ, չեզոք միջնորդությամբ, և մենք բարձր ենք գնահատում բոլոր այն ջանքերը, որոնք արվում են՝ այս նկատառումներից ելնելով։ Այս մասին ասել է ՀՀ ԱԳ նախարար Արարատ Միրզոյանն օգոստոսի 22-ին Բելգիայի ԱԳ նախարարի հետ համատեղ ճեպազրույցին։

«Բազմաթիվ կարևոր հանդիպումներ են տեղի ունենում Բրյուսելում, ինքս իմ ադրբեջանցի գործընկերոջ հետ մի քանի անգամ հանդիպել եմ Վաշինգտոնում՝ պետքարտուղար Բլինքենի միջնորդությամբ։ Հանդիպումներ ենք ունենում նաև Մոսկվայում, այլուր։ Հանդիպումներ են լինում և՛ երկրների ղեկավարների, և՛ արտաքին գործերի նախարարների մակարդակով։ Բառացիորեն վերջերս այդպիսի հանդիպումների եմ մասնակցել և՛ Վաշինգտոնում, և՛ Մոսկվայում։ Տարբերություն չդնելով հարթակների միջև՝ մեզ համար էական է, որ հարթակներում ձեռք բերված պայմանավորվածություններն աշխատեն և կյանքի կոչվեն»,- ասել է Միրզոյանը։

Մանրամասն անդրադարձել ենք Լեռնային Ղարաբաղում իրավիճակի ծայրահեղ բացասական ու անդառնալի հետևանքներին, ՄԱԿ-ի անվտանգության խորհրդի հրատապ նիստին, դրա շրջանակում, ինչպես նաև 2022 թվականի դեկտեմբերից Ադրբեջանի կողմից Լաչինի միջանցքի արգելափակումից ի վեր միջազգային գործընկերների, կառույցների, այդ թվում՝ Բելգիայի ու ԵՄ մյուս անդամների հասցեական ուղերձներին, որոնք խիստ կարևորում ենք։ Այդուհանդերձ, ի հեճուկս այդ ամենի և հակառակ Արդարադատության միջազգային դատարանի փետրվարի 22-ի և հուլիսի 6-ի որոշումներին՝ Ադրբեջանը շարունակում է Լաչինի միջանցքի արգելափակումը։ Իհարկե, սա մյուս զարգացումներից անջատ դրսևորում չէ, մենք շարունակաբար ահազանգում ենք, որ Ադրբեջանի գործողությունների հիմքում դրված է Լեռնային Ղարաբաղն էթնիկ զտումների ենթարկելու բացահայտ քաղաքականությունը»,- ասել է արտգործնախարար Միրզոյանը։

🚩 Թուրքիայում Ֆրանսիայի նորանշանակ դեսպանին թուրքերը որակել են որպես թշնամի

Թուրքիայում Ֆրանսիայի նորանշանակ դեսպան Իզաբել Դյումոնտը, որն այս շաբաթ իր հավատարմագրերն է հանձնելու Թուրքիայի նախագահ Ռեջեփ Թայիփ Էրդողանին ու ստանձնելու իր պարտականությունները, թուրքական լրատվամիջոցների ուշադրության կենտրոնում է։

Լրատվամիջոցները նշում են, որ Դյումոնտը նախկինում եղել է Եվրոպայի ու Թուրքիայի հետ հարաբերությունների հարցում Ֆրանսիայի նախագահի խորհրդականը: Հիանալի տիրապետում է թուրքերենին։

Քանի որ Դյումոնտը բազմիցս քննադատել է քուրդ զինյալների դեմ Թուրքիայի ռազմական գործողությունները Սիրիայում, նրան որակել են որպես թշնամի։

Մասնավորապես նշվում է, որ մինչ Թուրքիան Լեռնային Ղարաբաղի շուրջ Ադրբեջանի և Հայաստանի միջև վերջին լարվածությունում ամբողջությամբ անցել է Բաքվի կողմը, Ֆրանսիան և ԵՄ-ն Ադրբեջանին կոչ են արել հեռու մնալ այնպիսի քայլերից, որոնք կարող են տարածաշրջանում հումանիտար խնդիրներ ստեղծել: Ըստ լրատվամիջոցների` Ֆրանսիան ցանկանում է, որ Թուրքիան օգտագործի իր ազդեցությունն Ադրբեջանի վրա՝ Բաքվի և Երևանի միջև «‎համապարփակ խաղաղության» պայմանագրի հասնելու համար։

🚩 Իրանի Իսլամական Հանրապետության նախագահ Էբրահիմ Ռայիսին հայտարարել է, որ հակաիրանական պատժամիջոցները չկարողացան կանգնեցնել Իրանի առաջընթացը, իսկ երկրի թշնամիները զայրացած են, որ պատժամիջոցներն անարդյունավետ են եղել։

#Դետքի_հետագծով

Իրանի Իսլամական Հանրապետության նկատմամբ Արևմուտքի և հատկապես ԱՄՆ-ի կողմից սահմանվել են բազմաթիվ պատժամիջոցներ, որոնք խոչընդոտում են երկրի տնտեսական զարգացումը։ Չնայած այս ամենին` Իրանի իշխանությունները հստակ քայլեր են ձեռնարկում՝ հիշյալ պատժամիջոցների հետևանքները մեղմելու, իսկ հնարավորության դեպքում առհասարակ վերացնելու ուղղությամբ։