"ባየነው ነገር ሁሉ  ደስተኞች ነን በዚህም ቤተ ክርስቲያን ክፍ ብላ ስላየናትና ኦርቶዶክሳውያን  በዝተው ስለተመለከትን እግዚአብሔርን እናመሰግናለን"

ብፁዕ ወቅዱስ አቡነ ማትያስ ፓትርያርክ

የእንኳን ደህና መጡ አቀባበሉ  በመንበረ ፓትርያርክ ቅድስተ ቅዱሳን ማርያም ገዳም የቀጠለ ሲሆን በርካታ ብፁዓን ሊቃነ ጳጳሳት፣የገዳማትና የአድባራት አስተዳዳሪዎች ሊቃውንተ ቤተ ክርስቲያን ተኝተዋል።

በቅዱስነታቸው የእንኳን ደህና መጡ  አቀባበል መርሐ ግብር ላይ የመናገሻ ገነተ ጽጌ ቅዱስ ጊዮርጊስ ቤተ ክርስቲያን  ሊቃውንትና ወጣት ሰንበት ትምህርት ቤት መዘመራን  ዝማሬ  አቅርበዋል።

እንዲሁም የቅዱስነታቸውን ሐዋርያዊ አገልግሎት የሚገልጽ ቅኔ የኔታ ሐረገ ወይን  የመናገሻ ገነተ ጽጌ ቅዱስ ጊዮርጊስ ቤተ ክርስቲያን የቅኔ መምህር  አቅርበዋል።

የእንኳን ደህና መጡ መልእክት ያቀረቡት ብፁዕ አቡነ አብርሃም በደቡብ አፍሪካ ሀገረ ስብከት የነበራቸው ሐዋርያዊ አገልግሎት አጠናቀው ስለመጡ እንኳን ደህና መጡ ያሉ ሲሆን በዚህ ክብረ አበውን የጠበቀ አቀባበል የተገኙትን ሁሉ አመስግነዋል።

ብፁዕነታቸው ቀጥለው በደቡብ አፍሪካ ሀገረ ስብከት የነበራቸው ዝርዝር ሐዋርያዊ አገልግሎት ያብራሩ ሲሆን  በሆነው  ሁሉ  ደስታው የኦርቶዶክሳውያን ክብሩም የቤተ ክርስቲያን ነው ብለዋል።

በዚህም ቅዱስነታቸውን በክብር የጋበዙትንንና አገልግሎቱም የሠመረ እንዲሆን በሁሉም መልክ መደላድል ለሆኑትን ለብፁዕ አቡነ ሕርያቆስ የደቡብና የምዕራብ አፍሪካ የከንባታና የሐዲያ ስልጤ ሀገረ ስብከት  ሊቀ ጳጳስ ምስጋና አቅርበዋል።

ቅዱስነታቸውን ተከትለው ከሄዱት አበው ሊቃነ ጳጳሳት መካከል  አገልግሎታቸው ምን ይመስል እንደነበር ብፁዕ አቡነ ፊልጶስ የቅድስት ሥላሴ ዩኒቨርስቲ ፕሬዝዳንትና የደቡብ ኦሞ ሀገረ ስብከት ሊቀ ጳጳስ  ምስክርነት ሰጥተዋል።

ብፁዕነታቸው የነበረው አገልግሎት በእጅጉ  መልካም እንደነበር አውስተው በሁሉም መልክ አገልግሎቱ የተቃና እንዲሆን  ኦርቶዶክሳዊ ድርሻቸውንና የልጅነት ተግባራቸውን ለገለጹ ለደቡብ አፍሪካ  ሀገረ ስብከት ለሚገኙ ማኅበረ ካህናትና ምዕመናን ምስጋና አቅርበዋል።

ብፁዕ ወቅዱስ አቡነ ማትያስ ፓትርያርክ በሰጡት ቃለ በረከት "የእግዚአብሔር ቸርነት የአባቶችና የምዕመናን  ጸሎት ረድቶን በሰላም ተመልሰናል" ብለዋል።

በደቡብ አፍሪካ የሚገኙት ኦርቶዶክሳውያን ፍቅራቸውን ያሳዩን ከ500 ኪሎ ሜትር በላይ ተጎዘው  ሊቀበሉን ከመምጣት ጀምሮ ነው ብለዋል።

ከደቡብ አፍሪካ  በቅራቢያ በሚገኙ የአፍሪካ ሀገራትም በብፁዕ አቡነ ሕርያቆስ አማካኝነት ቤተ ክርስቲያን እየተስፋፋች መሆኑንም አይተናል ሲሉ ገልጸዋል ቅዱስነታቸው።

"ባየነው ነገር ሁሉ  ደስተኞች ነን ለዚህም ቤተ ክርስቲያን ክፍ ብላ ስላየናትና ኦርቶዶክሳውያን  በዝተው ስለተመለከትን እግዚአብሔርን እናመሰግናለን" ሲሉ ገልጸዋል።

በመጨረሻም ከቦሌ ዓለም አቀፍ አየር ማረፊያ  ጀምሮ ክብሩ የቤተ ክርስቲያን ነው ብላችሁ ላደረጋችሁት  መልካም አቀባበል በእጅግ አመሰግናለሁ ብለዋል።

ብፁዕ ወቅዱስ አቡነ ማትያስ ፓትርያርክ ብፁዓን አባቶችና የጠቅላይ ቤተ ክህነት የመምሪያ ሓፊዎችን  በማስከተል ለሐዋርያዊ አገልግሎት  ግንቦት ፪/፳፻፲፮ ዓ/ም ወደ ሥፍራው እንዳቀኑ  የሚታወስ ነው።


✅የአዲስ አበባ ሀገረ ስብከት ሚዲያ