یازیق اورمو گؤلوم

گؤزلریمده باخیشلار
گؤینه دی،یاندی
کیرپیکلریم ..
سنی دوروخدو !.

سویون یوخ کی
دوزلارین یاندیران
توپراغی سؤندوره

سنده کی خاطیره لری
سو دئییل
دوز بوغور
الوان دویغوجیق لار !
دوز دومانیندا
بوغولماقجاسینا چیرپینیرلار

..
بورنوموزدان
سئوینجیمیز
فیتیل-فیتیل گلدی ،
آنا دؤشوندن امدیگیمیز سوت کیمی..
بوغازیمدا کی سؤزلر
قان کیمی لخته لندی
دوز کیمی سپه لندی
سنی قوروموش گؤرنده ـ
کوراوغلونون قیرآتی
کیشنه مه دن گئچدی ،
بابکین قلینجی
دوزو کسمه دی


اولونجه سینه سسیزیلیک !!
دانیشان دیللر دوستاغدا!
نه دئییم آخی
آی هاواااررررر
بو همان اورموگولودو؟؟؟؟؟؟!!!!!!!!


بو آغیر نیسگیلده
داغلارا یاندیم
سس سیز،سمیرسیز
سولان باغلارا یاندیم
دورنالار بیزیم یئریمیزه
اوتاندیلار
لئی لکلر
دیمدیکلرینی باغرینا تاخدیلار

آما بیز اوتانمازجاسینا
هله ده
دوزلاردا گومولموش
لئتگه لرین گلمه سینی
گوزه له ییریک
یالانجاسینا
اورموگؤلونو
اوزه له ییریک

#کاتب_اوغلو
#کؤنولدن_دیله

@dedekatib

....آغلادیم.... .
🍁

نازلی دلبر سندن اوزاق دۆشه‌لی
گؤزوم یولدا قالا - قالا آغلادیم
گؤزو یاشلی ائوین بوجاقلاریندا .
سنی یادا سالا - سالا آغلادیم .
🍁
فلک وئردی آیریلیغی پای منه
ماتم توتدو گۆنش منه آی منه
خزان اولدو باهار منه یای منه
کؤنول باغیم سوْلا - سوْلا آغلادیم
🍁

باهار بیتدی پاییز اولدو گلمه‌دین
بوجاقلاردا یالقیز قالدیم بیلمه‌دین
گؤز یاشلاریم آخار اولدو سیلمه‌دین
گؤیلومه قان دوْلا - دوْلا آغلادیم .
🍁

کاتيب اوغلو سنسیز اولدو پریشان
کیم بیلیر آیریلیق دردینه درمان .
ائو - ائشیگیم منه اولوبدو زندان
ائل ایچینده گۆله - گۆله آغلادیم

🍁
#کاتب_اوغلو
#کؤنولدن_دیله

@dedekatib

...بو گونلر....
🍁

بیلمیرم باشیمین نه قضاسی وار ؟
هر نئینیرم اوزوم گولمور بوگونلر.
نه دوداق ترپنیر نه دیل دولانیر .
الیم گؤز یاشیمی سیلمیر بو گونلر.
🍁
اؤلو کیمی قالدیم ساغلار ایچینده.
گونوم باتدی قارا چاغلار ایچینده.
یاوان چوره ک کیمی یاغلار ایچینده
کیمسه چکدیيیمی بیلمیر بو گونلر .
🍁
گناه منده دیر یا یازیب سیلنده .؟
نئچه ایل آغلادیر بیرگون گولنده.
گؤزون یومور فلک دردی بؤلنده.
انصاف ایله دردی بؤلمور بوگونلر.
🍁
کاتيب اوغلو بلا دوشدی پاییما .
شاختا گلدی باهاریما یاییما .
یامان گونده کیمسه گلمز هاییما
قارا گئجم صاباح اولمور بو گونلر..
🍁
#کاتب_اوغلو
#کؤنولدن_دیله

@dedekatib