የኢትዮጵያ ልማት ባንክ የማኔጅመንት አባላት ሐበሻ ሲሚንቶ ፋብሪካን ጎበኙ።

የኢትዮጵያ ልማት ባንክ ፕሬዝዳንት ዶ/ር እመቤት መለሰ ከባንኩ የማኔጅመንት አባላት ጋር በመሆን ዛሬ ጥቅምት 21 ቀን 2018 ዓ/ም ፋብሪካው ያለበትን ሁኔታ ተዛዋውረው የተመለከቱ ሲሆን ከጥሬ እቃ ጀምሮ ምርቱ እስኪወጣ ያለውን ሂደት ጎብኝተዋል።

ዶ/ር እመቤት መለሰ በጉብኝቱ ወቅት ፋብሪካው ያለውን ጠንካራ ጎን የገለጹ ሲሆን በቀጣይ ሊስተካከሉ ስለሚገባቸው ጉዳዮች አንሰተው ፋብሪካው የሚያስፈልገውን ማስፋፊያ መመልከታቸውን ገልፀዋል።

የኢትዮጵያ ልማት ባንክ የማኔጅመንት አባላትና የሀበሻ ሲሚንቶ ፋብሪካ ከፍተኛ አመራሮች ባደረጉት ውይይት ከደንበኞች ምን እንደሚጠበቅና ባንኩ ሊያደርግ ስለሚችላቸው ጉዳዮች ተወያይተዋል።

ሐበሻ ሲሚንቶ ፋብሪካ እንደ ሀገር ያለውን ከፍተኛ የሆነ የሲሚንቶ ፍላጎት ከመሸፈን ባሻገር ከፋብሪካው ሰራተኞች ጀምሮ እስከ አከፋፋዮች ድረስ ከፍተኛ የሆነ የስራ ዕድል በመፍጠር ለሀገር ኢኮኖሚ ድጋፍ እንደሚያደርግም በውይይቱ ተመላክቷል።

የኢትዮጵያ ልማት ባንክ ለሐበሻ ሲሚንቶ ፋብሪካ በቀን 3,000 ቶን ማምረት የሚያስችል አቅም እንዲኖረው የፋይናንስ ድጋፍ በአውሮፓውያኑ 2013 ያደረገለት ሲሆን በተለያዩ ጊዜያት ተጨማሪ ብድር እና የተለያዩ ድጋፎችን እያደረገ ይገኛል።