#اینانج‌لار
هاوا ایلا ایلگیلی اَسکی اینانج‌لار

🔸باجالاردان تۆستو دۆز قالخماییب، اطرافا یایێلارسا، دئمه‌لی یاغیش یاغاجاق

🔸قوراقلیقدا ائششگی چایا سالیب ایسلاتسان، یاغیش یاغار

🔸قوشلار یووالارین آغاجلارین گۆنشه  ساری طرفینده قورسالار، دئمه‌لی یای سرین اولاجاق

🔸پالتار یویولاندا کۇلک اَسسه، دئیرلر، اَر آروادینی سئومیر

🔸سحر چاغی بولودلار گۆنش چیخان طرفه آخسا، دئیرلر یاغیش یاغاجاق

🔸اٶردک‌لر باشلارینی قانادلاری‌ آلتینا سالیب، سس‌سیز، سمیرسیز دورسالار، هاوا نمیشلیک و سویوق اولاجاق

🔸آی هاله‌لنسه، دئمه‌لی صاباح هاوا چیسکینلی، دومانلی اولاجاق

🔸قارانقوشلار آلچاقدان اوچسالار، یاغیش یاغار

🔸قاریشقالار یووالاری آغزیندا تورپاق توپاسی دۆزلتسه‌لر، دئمه‌لی قیشدا چوخ قار یاغاجاق

📚آذربایجان شیفاهی خالق ادبیاتی آنتولوگیاسی


داشلی بولاق
@dashlibulaq

📹 خانم آشیق‌لار قروپو
🔹شیروان اورتا مخمس
🔸قروپون اؤندری:خاطره خانلو
🔹قاوال:الهه جهانبخش

داشلی بولاق
@dashlibulaq

#آتالار_سٶزو ( آیری اٶلکه‌لردن)

🔹بیلَگی گۆجلو اولان بیرینی یێخار، بێلیگی گۆجلو اولان، مینینی (اٶزبک)

🔹بالیق‌لار قارماق‌لا، اینسان‌لار شیرین دیل‌له اوولانار (آلمان)

🔹بیر آدام کٶرپو قورار، مین آدام کئچر (اٶزبک)

🔹بو دونیا بیزه آتالاریمیزدان قالمادی، بیز اونو اوشاقلاریمیزدان بورج آلدیق( آفریقا)

🔹آسلان‌لار اٶز حیکایه‌لرینی یازمازسالار، اووچولار ناغیل‌لارینا اینانمالیییق (فرانسه)

🔹آللاه اینسانی جزالاندیرماق ایسته‌ینده، عاغلینی الیندن آلار (یونان)

🔹دۆیونون اێچینده‌کی قارا داشدان یوخ، آغ داشدان قورخون (ژاپن)


داشلی بولاق
@dashlibulaq

گون چیخاجاق یوردا داریخما

بیر گون گله‌جک، گۆن چیخاجاق یوردا، داریخما
گوللر آچاجاق، یاز اولاجاق بوردا، داریخما
صولح ایله صفا پارلایاجاق اؤلکه‌میز ایچره
هر بیر بوجاغی غرق اولاجاق نوردا، داریخماق
یوردون چوبانی یاتمایاجاق گؤزله‌یه‌جکدیر.
تاپشیرمایاجاق آغ قوزونو قوردا، داریخما
یوکسلمه‌یه‌جک کیم کی اونون ذاتی خارابدیر.
الدَن دوشه‌جک، خار اولاجاق، زور دا، داریخما
ظولمون نه قدَر قوّه‌سی وار، داغجا ساماندیر.
اود وورماغا بسدیر دوشه بیر قور دا، داریخما


بختیار_وهابزاده🌿


داشلی بولاق
@dashlibulaq

تورپاق
#ائل_ناغیلی


دونیانین بیر کٶشه‌سینده بیر ماحال واریدی، لاله‌لی-جئیران‌لی، چٶل‌لری توراج‌لی، دۆزلری ریحان‌لی، بولاق‌لاری اٶرد‌ک‌لی.
مئشه‌لری باخان‌لارینی حئیران قویوردو. اێلخی-اێلخی آت‌لاری، سۆرو-سۆرو قویونلاری سایا گلمز ایدی.
اوردا یاشایان اینسان‌لار اٶز حالال زحمت‌لری ایله اَکر، بیچر، عٶمور سۆرردیلر. کێمسه‌نین وارێندا دٶلتینده گؤزلری اولمازدی، دلی‌- قانلی اێگیدلری آت بئلینده قوش کیمی سَکر، قێلینج اویناداردیلار.
اونلار آغ ساچلی بیر دۆشونجه‌لی اینسانی اٶزلرینه باشچی سئچمیشدیلر، آدینا " بٶیوک آتا " دئییردی هامی، دونیا داغیلسایدی، بێر سٶزونو اێکی ائدن اولمازدی.حٶرمتی حٶرمت، احترامی احترام ایدی. قان- قادا ایله اێشی اولمازدی اونون.
"داوانیزی داغلا- داشلا ائدین اێگیدلریم "! دئیردی همئشه.  قایا یارێن، یول چکین داغلارا، چٶل‌لره سو چێخارین، قان آخێتمایین، تَر آخێدین جانێنیزدان. اێشینیز اوندا یۆنگول اولار، ترینیز سۆنبول اولار، دئیردی همئشه.
قوجالار دا، جاوان‌لار دا بو قوجا- عاغیل‌لی آتانین سٶزلرین قولاق‌لارینا سێرقا ائدردیلر.

اوزاق-اوزاق اٶلکه‌لردن گلن غارت‌چی‌لرین گؤزلری گؤتورمزدی بو فیراوانلیغی، بو بوللوغو. همئشه ده اونلارین بورونلاری ازیلردی. بیر ساواش قوربان‌سیز اولمازدی. نئچه غئرت‌لی ایگید ائل یولوندا جانینی قوربان وئرردی، نئچه آنانین سینه‌سی داغلی، نئچه سئوگی‌نین گؤزو یاش‌لی قالاردی داوادان سونرا،  هامی‌دان دا چوخ "بؤیوک آتا" یاناردی، یاخیلاردی اٶز ایگیدلری اوچون.

بێر گۆن یئنه دوشمان قاپی‌نی کسدیردی، اٶز پیس نیّتی ایله. ماحالین دلی‌- قانلی ایگیدلری سیلاحا ساریلیب آتلاندیلار آت اۆستونه.
بٶیوک آتا دئدی :
- "صبیر ائدین گؤرک اێگیدلریم"
ایگیدلر صبیر ائدیب دایاندیلار . دوشمان ائلچی‌لری گلیب چیخدی. خراج ایسته‌دیلر بٶیوک آتادان، بٶیوک آتا قیزیرقالانمادی، ائل‌ین واریندان بیر کیسه قێزیل وئردی اونلارا.
سحر تئزدن ائلچی‌لر یئنی‌دن گلدیلر. بٶیوک آتا دئدی :
- بویورون، ایندی طلب‌ینیز نه‌دیر؟
ائلچی‌لردن بێری دئدی :
- اۇلو خانیمیز سێزین شخصی دٶیوش آتینیزی ایسته‌ییر.
ایگیدلر حیددتلندیلر بو سٶزدن . بٶیوک آتا اونلاری ساکینلشدیریب دئدی:
- وئرین منیم دٶیوش آتیمی اونلارا ! تکی قان-قادا سووشسون بیزدن .
ائلچی‌لر بٶیوک آتانین دٶیوش آتینی آلیب آپاردیلار.
سحر اولدو، ائلچی‌لر یئنه گلدیلر.
بٶیوک آتا دئدی:
- داها نه ایسته‌یینیز وار؟
یئنه ائلچی‌لردن بێری دئدی:
- اۇلو خاقانیمیز سێزین یگانه اوغلونوزو اٶزونه نؤکر ائتمک ایسته‌ییر.
یئنه دلی قانلی ایگیدلر حێرصله‌نیب ، باغیردیلار:
- بیز ساواشماق ایسته‌ییریک!
بٶیوک آتا اونلاری ساکیت‌لشدیریب، دئدی:
- بو ساواشدا اٶله‌جک ایگیلدلریمیز منیم بیر اوغلومدان هئچ اسکیک دییل.
ائلچی‌لر  بٶیوک آتانین تک اوغلونو قاباقلارینا آلیب قول کیمی آپاردیلار.
بٶیوک آتا سئویندی کی بونونلا قان- قادا سوووشوب گئتدی، ساکیت‌لیک یاراندی ماحال دا، آنجاق هئچ ده بئله قالمادی.
سحر ائلچی‌لر یئنه بٶیوک آتانین قاپی‌سینی کسدیردیلر، بٶیوک آتا اٶزونو زورلا اله آلدی و حیددتله سوروشدو:
- داها نه ایسته‌ییرسینیز؟
ائلچی‌لردن بیری دئدی:
- اۇلو خاقانیمیز مسکن سالماق اۆچون بیر پارچا تورپاق ایسته‌ییر ماحالیندان.
هامی‌نین گٶزلری بٶیوک آتایا دێکیلدی. اونون گٶزلری غضب‌دن آلێشیب یاندی. آیاغا قالخیب دئدی:
- های‌دی منیم ایگیدلریم! دوشمان حددینی آشدی! دۆشمنه وئردییم خراج‌لار منه عایید ایدی. آنجاق تورپاق منیم دییل، خالقیما عایید دیر، دوشمانا آمان وئرمه‌یین!

دلی‌قانلی ایگیدلر بٶیوک آتانین بیر کلیمه سٶزو ایله آتلارا آتلاندیلار، ساواش باشلاندی، نه باشلاندی! قێلینج‌لاردان شێمشک قوپدو، قوچ ایگیدلرین نعره‌سیندن یئر- گؤی دیله گلدی، آنالار دا باجی‌لار دا قیلینج گٶتوروب دٶیوشه آتلاندیلار، بێرجه گونون ایچینده دوشمانین قوشونون تار- مار ائتدیلر، ماحالدان اٶلن ده اولدو، یارالانان دا . آمما اٶلن‌لره یاس ساخلامادیلار .
- "یاس‌لا غلبه بیر یئره سێغماز "- دئدی بٶیوک آتا .
ماحال‌دا هامی شادلیق ائتدی، اوْزان‌لار بٶیوک آتانین شرفینه سٶز سٶیله‌دیلر،
بٶیوک آتا دئدی:
" نه بٶیوک ثروت‌دیر بیر پارچا تورپاق"
وطن‌ین بیر پارچا تورپاغینا داستان قوشدولار او گئجه. همین گۆندن مقدّس‌لشدی ماحالین بیر قاریش تورپاغی بئله‌جه .


داشلے بولاق
@dashlibulaq

قیلینج‌لا دۆشمنین اۆستونه یۆگور
قلم‌له اٶلکه‌نی اداره ائله

شاه اسماعیل صفوی(ختایی)


داشلی بولاق
@dashlibulaq

#آتالار_سوزو

🔹گۆل تیکانسیز، دره اێلانسیز اولماز

🔹یئتیم یاریماز، یاریسا دا قاریماز

🔹ضررین یاریسیندان قاییتماق، قازانجدیر

🔹لام آخان چای، درین اولار

🔹یئیێن قاچان، تئز یێخیلار

🔹اَبلَه اودور بو دونیادا غم یئیه
تانری بیلیر کیم قازانا، کیم یئیه!


داشلی بولاق
@dashlibulaq

دَوَه ایله تیکان
#ائل_ناغیلی

بیر دَوَه چٶلده اوتلاییردی، یارپاقلانمیش بیر تیکان کولونا یاخینلاشیب، ایسته‌دی اونون یارپاقلارینی یئسین، آغزینی کولا طرف اوزاداندا، گٶردو کی اونون ایچینده بیر اێلان قێوریلیب یاتیب، دوه گئری قاییتدی.
کول بئله خیال ائتدی کی؛ دوه اونون تیکانلاریندان قورخوب چکیلدی.
دوه کولون فیکرینی اوخویوب دئدی:
- منیم قورخوم سندن دئییل، بلکه، ایچینده گێزلنمیش قوناغینداندیر.


داشلی بولاق
@dashlibulaq

گلین گئدک فیرنگه
#نغمه‌لر

دێرین- دێرین دیرینگه
گلین گئدک فیرنگه
فیرنگ زرگر مکانی
اێچی آلتون دۆکانی
دۆکانلاردا آغاجلار
دٶوره‌سینده باغچالار
باغچاسیندا، خان قیزی
گئیینیبدی قیرمیزی
قیرمیزی دونوم اولا
تبریزده تویوم اولا
توی‌دا قورشاق توتاللار
حنا- پیلته ساتاللار
حنانی تئز یاخایدیم
آقوشقادان باخایدیم
آقوشقادا اوخورام
بَی جورابین توخورام

آقوشقا؟


داشلی بولاق
@dashlibulaq

تورپاغین سٶزو
بهلول و ایکی کندلی

ایکی کندلی قونشولوقدا یئر شوملاییرمیش، بیر آخشام ایشدن سونرا اۆز- اوزه گلیرلر، کندلی‌نین بیری او بیرینه دئییر:
- سن منیم تورپاغیمی اٶز تورپاغینا قاتێبسان!
او بیری کندلی دئییر:
یوخ، سن منیم تورپاغیمی اوغورلاییبسان!
اونلار او قدر بحث ائلیرلر کی آخیرده ووروشمالی اولورلار. بو زمان بهلول یولدان کئچیرمیش، کندلی‌لرین دالاشدیغینی گٶروب، اونلارین یانینا گلیر، مسئله‌نی بیلندن سونرا دئییر:
- سیز ایکی آددیم گئری چکیلین من تورپاقدان سوروشوم گٶروم، اونون بو حاقدا فیکری ندیر؟
کندلی‌لر گئری چکیلیر، بهلول اَیێلیب قولاغین یئره سٶیکه‌ییر.
بیر آزدان سونرا قالخیب دئییر:
- تورپاق دئییر کی، اونلار یالان دانیشیرلار، من اونلارین دئییلم، اونلار منیم‌دیر.
کندلی‌لر بیر آغیزدا دئییرلر:
- بو نئجه اولور کی، بیز تورپاغین اولوروق؟
بهلول دئییر:
- تورپاق دئمک ایسته‌ییر، ای اینسانلار، سیز مندن عمله گلیبسینیز،  سونرا دا اٶلوب تورپاغا قاریشاجاقسینیز، بیر قارێش یئر اۆستونده بیر- بیرینیزی قێریرسینیز.


داشلی بولاق
@dashlibulaq

فولکوریک خاطیره‌لر
🔹پیچاق ایتیلدن

کۆچه‌میزه پیچاق ایتیلدن گلنده، تپه‌م اۆستده قاچاردیم ائومیزه، آز قالاردیم قاپینی چرچیوه‌سیندن چیخارام، اننه‌م دئیردی:
- ائوین تێکیلسین، باش خبری گتیریبسن؟
تئز اول قیچی پیچاقلاری وئر آپاریم، دئیه تلسدیرردیم بیله‌سین،
- یاریمچیلیق قالمیش! کیریخدیریما گٶروم نه غلط دارتمالییام آخی! به نییه غرق ائلیرسن آدامی؟ دئیردی اننه‌م.

پیچاق ایتیلدن گلیب "دٶرد باجیلارین" قاپیسیندا دایاناردی، چونکی کۆچه‌میز اوردا اۆچ یولا آیریلاردی، دربندیمیزین اوراسی بیراز گئنیشلیک‌ایدی. ناهارا بیرآز قالان گلردی همئشه، سسینی باشینا آلاردی:
- قئییییچی، پیچااااااااق اێتیلدیرم.
قئیچی- پیچاق دئینده  ساغ اَلینی قویاردی قولاغی‌نین دێبینه، وار گۆجو ایله باغیرراردی، آما " اێتیلدیرم" دئینده بیراز سسینی گتیرردی آشاغییا، عیناً ائومیزده‌‌کی خوروز کیمی.
قێش‌دا گلمزدی، نم‌نییه؟ بلکه‌ده پیچاق اێتیلدن دستگاهینی کوچه- کوچه سۆروتله‌مک چتین اولاردی، قدیمین قارلی- قێروولو خیاوانلاریندا. یایدا گلردی، بیزیم کۆچه‌ده اوینادیغمیز واختلاردا. من تلسردیم هامیدان قاباق آپارام پیچاقلاری وئرم کیشی‌یه. نم- نئچه سئری دئمیشدیم او کیشی‌یه:
- عمی! قوی من‌ ده آیاغیمی باسیم او تخته‌یه.
بیرآز ات آجی، بیر آز دا قیقاجی باخیب" سن باشارماسان" دئمیشدی.
" او نه‌دی کی، من باشارمییام؟ قوی بیر دفعه آیاغیمی باسیم، سن ده پیچاغی جیزیلدات داااا، اننه‌مین ده چرخین ائوده من فێررادارام" دئدیم.

هویوخوب دئدی:
- مه‌یه اننه‌ن پیچاق ایتیلدن‌دی؟
قێریلدیم گۆلمکدن،" یوخ بابا، خیاطدیخ چرخین دئییرم بااا"
بورنونون سویونو دێرسه‌ییندن قولونون آغزینا کیمین چکدی کوتونون قولونا. " قوی ایشیمیزی گٶرک، قئیچییییی، پیچاااااق ایتیلدیرم....
آیاغین باساردی تخته آیاق یئرینه، قئییش تسمه‌سی اولان بیر گیرده چرخ فیرلاناردی، چرخ فیرلاناندا زومباتا داش دا فیرلاناردی، پیچاغین یا دا قیچی‌نین آغزینی توتاردی فیرلانان او ایتیلدن داشا و هئی آیاق ووراردی ظرافت‌له پیچاغین آغزینی، دَبردیب، قووزاییب دقت‌له باخاردی، دَمیر داشا توخوناندا جیززا-جیزز سسی وئرردی، دمیر قێزیشیب چاققاچاق قور داشلاناردی هر طرفه و دقیقا لاپ منیم کئف ائله‌دیییم منظره، ایشین بو قسمتی‌ایدی.

یاواش- یاواش خانیملار چادیرا باشلاریندا، اللرینده آشپزخانا پیچاغیندان، قئییچی‌دن،گلیب یێغیشیب ازدحام ائلردیلر "دٶرد باجی‌لارین" قاپیسیندا، بعضاً کیشی‌لر ده بالتا، قند سێندیران، بوشقودان زاتدان گتیرردیلر.
من ده کیشی‌نین اَل- آیاغی‌نین آلتیندان چکیلن دئییلدیم، آز قالیردی باشیمی قولتوغوندان اوزالدام باخام او جیزیلتییا، جیززززز، جیززززز...

✍ رحمتلی سوسن نواده‌رضی


داشلی بولاق
@dashlibulaq

سن چوخ گوزل خانیمسان!
#روایت‌لر

بئله روایت ائله‌ییبلر کی گنجه خانی‌نین، ناخیرلاری، سۆرولری و اێلخی‌لاری گٶی قێشلاق کندینده ساخلانیلیرمیش، بیر گۆن خان، اٶز مال- داوارینا باش چکمه‌یه او کنده گئدیر، هر یول گئدنده باش چوبان‌لا گٶرۆشمه‌میش ناخیرلارین، سۆرولرین اٶروشونه چیخمازمیش.
بو دفه‌ ده همئشه‌کی کیمی آتینی باش چوبانین قاپیسینا سۆرور، باش چوبان ائوده اولمور، اونون قاباغینا باش چوبانین آروادی" قمر خانیم" چیخیر، قمر ده بیر قمر ایمیش کی اونون تایی گٶزل ولایت‌ده یوخوموش.

گنجه خانی وورغون وورموش کیمی دونوب یئرینده قالیر، اٶز- اٶزونه دئیر؛ آللاهین باش چوبانینا باخ، اونون آروادینا باخ! " آرمودون یاخشی‌سینی آیی یئیر" مثالی دۆز ایمیش، بو اونون خوره‌یی دئییل، اصل‌ده منیم مالیمدیر!
خانا بئله گلیر کی ائله بیر زیغلی- زێمیریقلی چوبان‌لا عٶمور- گۆن کئچیرمک قمرین ده خوشونا گلمز، اونونلا باش بیرلیک ائتمک ایسته‌‌دییینی بیلدیرسه سئوینر، اونا گٶره ده بیر یۆنگول دیل دولاشدیریب ایهام‌‌لا قمره دئدی:
- سن چوخ گٶزل بیر خانیمسان!
قمر هئچ نه دئمه‌ییب، ائوه گیریر.

آخشام اَرینه دانیشیر کی، خان منه بئله دئدی، سنین باشینا پیس اویون گتیره‌جک، من ده سنسیز اٶزومو بیرجه گۆن ساغ قویمارام، گل بوردان کٶچک.
باش چوبان قمری‌ ده بیر آتا مێندیریب، شاه اسماعیل‌ین یانینا شکایته گلیر، اونا هر شئی‌یی اولدوغو کیمی عرض ائلیر.

شاه اسماعیل ختایی، باش چوبان و قمره باخیب دئییر:
- گنجه خانی سهو ائله‌مییب، قمر خانیم چوخ گٶزل گلین‌دیر، اَری ده خانلیغا لاییق بیر کیشی‌دیر.

بئله دئییرلر کی، شاه اسماعیل گنجه خانین حضورونا چاغیتدیریر، قمره " قمر خاتون" و باش چوبانا " زیادخان" آدی وئریر، گنجه خانین دا اونلارا چوبان ائله‌ییر.


داشلی بولاق
@dashlibulaq

#آتالار_سٶزو

🔹سو آخار، یولون تاپار

🔹ایکی باش بیر قازاندا قایناماز

🔹کیشی‌نین اٶزونه باخما، سٶزونه باخ

🔹قورد یوواسیندان سۆموک اسکیلمز

🔹یاخشی آت یئمینی آرتیرار، یامان آت قامچی‌سینی

🔹یێخیلان آغاجا، بالتا ووران چوخ اولار

🔹چاغریلان یئره آر ائله‌مه، چاغریلمایان یئری دار ائله‌مه


داشلی بولاق
@dashlibulaq

او کیمدی کسسک آتان؟
#نغمه‌لر

او کیمدی کسسک آتان
کسسگی آتماسینلار
قایادا یاتماسینلار
قایادا بیرجه قوش وار
بوینوندا یۆز ناققیش وار
یۆز ناققیش بیر قوش‌ایدی
قایادا قونموش‌ایدی
شاه اوغلو گٶرموش‌ایدی
اوخ ایله وورموش‌ایدی
اوخ مندن هزار بئزار
کتان کٶینک‌لر یازار
گل اوخو بیزیم دیلی
بیزیم دیل اورمو دیلی
اورمودان گلن آت‌لار
آرپانی یئیر چاتلار
آرپانین گٶیون یئدیم
شاهیما شیروان دئدیم


داشلی بولاق
@dashlibulaq

بوللو پول ایستر داداش


آت یَهر ایستر گۆلوم، آلتی چول ایستر  داداش
تورکی قزئت یایماغا، بوللو پول ایستر داداش

قیشقیریسان آی یازیق، های وئره ملت  سنه!
های وئره ملت سنه، تا اولا جرئت سنه!
سن یازاسان مطلبی، ائل وئره قیمت سنه!
چاپدیریسان آتینی، دٶرد نالا، هایدی یاواش!
تورکی قزئت یایماغا بوللو پول ایستر داداش!

چوخلاری سٶز وئردیلر، باشلا... دالیندا واریق
سن قاباغا دۆش فقط، بیز ده سن ایله یاریق
یۆز تومن، اللی تۆمن، قئیدینه بیز قالماریق
ایندی باخیرسان دالا، یوخدو اوشاق، یئر ده یاش
تورکی قزئت یایماغا، بوللو پول ایستر داداش

دۆزدو کی دیلده سیزه، قوربان اولور جانیمیز
آما دئین سٶزلره، یوخدو چوخ ایمانیمیز
مۆفته بوشالسین نییه، پوللو جیبیشدانیمیز
گئت بالا چوخ توکمه بئله قانلی یاش
تورکی قزئت یایماغا، بوللو پول ایستر داداش

دیلده اێگید اَرلریک، ایشده سیچاندان بتر
چون هاوادیر سٶز گئدر، ایشده‌دیر آنجاق خطر
باشلا ائله بیر ایشه، اولماسین عٶمرون هدر
من بئله درس آلمیشام، سن ده بیلئیدین‌سه کاش
تورکی قازئت یایماغا، بوللو پول ایستر داداش

پول خان الینده گزر، یا حاجی‌لاردا اولار
کندلی نه‌دیر، پول نه‌دیر، پوللو بازاردا اولار
آی نه قدر سٶیله‌دیم، اونلارا سن آز ساتاش
تورکی قزئت یایماغا بوللو پول ایستر داداش

بانلاما کی " دیل گئدیر" من کیمی یوم گوزلری
دانلاما کی؛ گل یازاق، آستار ائدک اۆزلری
گئت چورک آختار داداش! بوشلا بئله سٶزلری
یاغلی ایشه گئت گیریش، حالی دۆشون ساخلا باش
تورکی قزئت یایماغا، بوللو پول ایستر داداش

گئت بالا چک بَنگینی!
اێسته‌مه فرهنگینی!
من کیمی دالدا اوتور!
یور فقط اٶز اَنگینی!

📚دده قورقود، آیلیق مجله‌سی، ۱۳۶۱

داشلی بولاق
@dashlibulaq

پیشیکدن ده کیچیک اولاردیم
#ائل_ناغیلی

پلنگ مئشه‌ده بیر پیشیک گٶروب و حئیرته قالیر:« بو کی بیزیم نسیل‌دن‌دیر، باشی‌نین یئکه‌لیگیندن، قارنی‌نین ساللاقلیغیندان بیلینیر کی یاشی چوخدو، قوجالیب، بس نییه کیچیک قالیب؟»
پلنگ بونون سببی‌نی سوروشدوقدا، پیشیک دئییر کی: « من تک دئییلم، منیم کیمی‌لری چوخدور، بیزی بو کٶکه سالان اینساندیر. »
پلنگ سوروشور:
- انسان نجور بیر شئی‌دیر، او کیمدی بیزیم نسلین دوشمنی‌دیر؟ اونو منه تانیت، اوندان هامیمیزین انتقامین آلیم!

پیشیک پلنگی مئشه‌دن دۆزه گتیریر، گلیب گورورلر کی، جۆتجو کل- اٶکوزلری سووارماغا آپاریب، خئشی یئره سانجیلمیش، بویوندورق‌لاری یئره سریلمیش گٶرن پلنگ، پیشیک‌دن سوروشور:
- بو نه‌دیر؟
پیشیک دئییر:
- بو بویوندوروق‌لارا کل- اٶکوز قوشارلار، بو خئش‌له یئر اَکرلر، هامیسی اینسانین‌دیر.
پلنگ دئییر؛
- بو بویوندوروغو منیم بوینوما قوش، بونلارین هامیسی‌نی مئشه‌یه چکه‌جه‌یم،  یییه‌سی او اینسان دالیمجا گلر، اوندان سیزین انتقامی اوندان آلارام!

پلنگین یئکه‌لێیینه، گۆجونه آرخایین اولان پیشیک، بویوندوروغون بیر تایین اونون بوینونا قوشور.
پلنگ، ها گۆج وئریرسه، خئشی ترپه‌ده بیلمیر، ائله بو زامان اینسان گلیب چاتیر، پیشیک قاچیر، پلنگین بوینو قالیر بویوندورقدا.
اینسان اونا دئییر:
- «اٶکوزومون بیری آزارلاییب، آللاه سنی یامان یئریمده یئتیریب، یوخسا بویوندوروغون بیر طرفینی گٶتورن اولمایاجاق‌ایدی.»

او، بیر تای اٶکوزو ده قوشور، بیر اَلی ایله خئش‌دن یاپیشیب، پلنگی قامچی‌یا توتور، قامچی بئل- بوخونوندا شاققیلدادیقجا، پلنگ اٶزونو بویوندوروغا وئریر، اٶکوزله بیرلشیب، خئشی اێره‌لی چکیر. آز مدّت کئچیر، داها طاقتی قالماییب ییخلیر کی بلکه اینسانین اونا یازیغی گله، اونو آچیب بوراخا.
اینساندا هاردایدی او مرحمت؟ اَلینه بیر اٶزگه مالی دۆشموشدو، اونون بئلینده بوستان اَکمسه، هئچ اۆره‌یی سویویاردی؟
پلنگی قامچی ایلا داغ- داغ ائلیردی، سونرا خئش قاشییان‌لا دٶیور، پلنگ جانینی دێشینه توتور، بیر ده ایره‌لی جومور، یئنه ده هئی‌دن گئدیر، بیر اٶلو کیمی یئره اوزانیر، اینسان اونو دٶیدوکجه قیشقیریر؛ « آی اٶلدوم، آی یاندیم»
هارایینا هئچ بیر جانلی- جین‌لی چاتمیر، اٶل ها اٶل‌ده نئجه اولورسا بویوندوروغون باغی قیریلیر، پلنگ بویوندوروغون آلتیندان چیخیب مئشه‌یه ساری گٶتورولور.

مئشه‌نین گیریشینده پیشیگی گٶروب، تانیییر، لیکن پیشیک اونو تانیمیر. دئییر؛
- سن پلنگ دئییلسن، پیشیک‌لرین بیریسن!؟
پلنگ دئییر:
- من هله انسانین اَلینده بیرجه ساعات قالیب بو گۆنه دۆشموشم، او منه بیر گون یئر اَکدیرسه‌یدی، سندن ده کێچیک اولاردیم!


داشلی بولاق
@dashlibulaq