شاه اسماعیل خطایی ایله عرب زنگی


عرب زنگی:
یئنه غافیل بیر اوو چیخدی قارشیما
هۆرکوب اووچوسوندان، باش وئریب گئدر
قورخوسوندان دوداق‌لاری چاتلایار
آغلاییب، گٶزوندن یاش وئریب گئدر

شاه اسماعیل:
قندهاردان گلدیم موراد آلماغا
یول وئر، عرب، یول وئر، اینجیتمه منی
من گلمدیم بو دیاردا قالماغا
یول وئر عرب، یول وئر، اینجیتمه منی

عرب زنگی:
چوخلاری آدلاییب او یاندان بری
ایگیدلر اَلیمدن چکیب‌لر زاری
کلّه‌دن میناره، لئش‌دن حاصاری
بورایا گلن‌لر باش وئریب گئدر

شاه اسماعیل:
قارادیر قاشلارین، کعبه معراجی
چکرم، ییخارام حاصاری، بورجو
کسرم باشینی، یوخدور علاجی
یول وئر، عرب، یول وئر، اینجیتمه منی!

عرب زنگی:
اوغلان مئی ایچمیسن، یوخسا دا بنگی؟
قورخودان سارالیب اۆزونون رنگی
هله ائشیتمه‌دین، عرب زنگی؟
چوخ سنین کیمی‌لر باش وئریب گئدر!

شاه اسماعیل:
بیر سن باخ قایناغیما، جوشوما
ال وورا بیلمزسن ترلان قوشونا
باخ شاه اسماعیلین تر ساواشینا
یول وئر عرب، یول وئر، اینجیتمه منی!

داشلی بولاق
@dashlibulaq

ایلانا دٶنن قیز
#ائل_ناغیلی

بیر کندلی اوغلان مئشه‌ده گزیرمیش، بیردن گٶرور کی قایانین دیبینده چیلپاق بیر قیز وار، قیز اوندان پالتار ایسته‌ییر.
اوغلان کنده گلیب، پالتار آپاریر اونو گئییندیریب ائوینه گتیریر. نئچه مدّت سونرا اوغلان قرارا گلیر کی بو گٶزل قیزلا ائولنسین، بیر گۆن اوغلانین قاپیسینا بیر درویش گلیر، او اوغلانا دئییر کی:
- سنین ائوینده‌کی قیز بیر ایلاندی کی قیز جیلدینه دۆشوب، اونونلا ائولنسن سنی اٶلدوره‌جک.
اوغلان اینانمیر، دئییر کی:
- بو قیز منیم ائویمه گلندن، منیم روزیم آرتیب، هارا گئتمیشم، ایشیم دۆز گلیب، سن یالان دانیشیرسان.
درویش دئییر کی:
- اینانمیرسان، اونا دۇزلو یئمک وئر، ائوه ده سو قویما، قاپی‌نی باغلاییب، گیزلن، باخ گٶر نه اولور؟
اوغلان ائله ائدیر، گورور کی قیز ائوده سو تاپا بیلمه‌دی، قاپی باغلی اولدوغوندان ائشیگه ده چیخا بیلمیر، بیردن نازیک ایلانا چئوریلیب بیر دئشیکدن ائشیگه چیخدی، سو ایچیب قاییتدی ایچری. یئنه ده دۆشدو قیز جیلدینه.
اوغلان گٶرور کی درویش دۆز دئییرمیش، سوروشور بس من نه ائدیم؟
درویش دئییر:
-قیزا دئه چٶرک یاپسین، او چٶرک یاپاندا سال تندیره یاندیر. اوغلان ائوه گلیب قیزا دئییر کی: دور چورک یاپ!
قیز چٶرک یاپاندا اوغلان اونو ایته‌له‌ییب تندیره سالیر، تندیرین ده آغزینی اٶرتور. بو واقت درویش گلیب اوغلانا دئییر کی: منه سو گتیر.
اوغلان گئدیب سو دولدورور، تئز گتیریر کی وئرسین درویشه، گٶرور کی درویش قیزی تندیردن چیخاریب. آنجاق قیز یانماییب. باشدان- آیاغا قیزیلا دٶنوب، او واخت درویش قیزی گٶتوروب قاچیر، اوغلان دۆشور آرخاسیجا، آمما اونو توتا بیلمیر، کور- پئشمان قاییدیر ائوینه.

او گۆندن اوغلانین هئچ بیر ایشی دۆز گلمیر، هارا گئدیرسه الی بوش قاییدیر، یئمگه قورو چٶره‌یی ده اولمور

#غیرعادی_واریانتلار

داشلی بولاق
@dashlibulaq

🔸 یورد قایغی‌سی
✍علی بی حسین زاده

اوجوندادیر دیلیمین
حقیقتین اعظمی
نه قویدولار سٶیله‌یم
نه کسدیلر دیلیمی

بیلیرمیسیز جۆهلا؟
نه ائتدیلر وطنه؟
نه قویدولار اویویا
نه قویدولار اویانا

بٶیله دورماق اویوشوق
روامی بیر دیری‌یه؟
نه گئتمه‌ده ایره‌لی
نه دٶنمه‌ده گئری‌یه

عدو قێریر قاپی‌یی
بیز ائوده بی‌خبریز
نه باشقا باشقالاریز
نه اتحاد ائده‌ریز

آییلتمادی قلمیم
بو تورک ایله عجمی
نه قویدولار یازاییم
نه قیردیلار قلمیم


داشلی بولاق
@dashlibulaq

اوتوردوغو بوداغی کسن ماللا
#ماللا_نصرالدین

گون‌لرین بیر گونو ماللا اودون توپلاماغا مئشه‌یه گئدیر، بیر آغاجا چیخیب، اونون بیر بوداغی‌نین اوستونده اوتوروب، اونو کسمه‌یه باشلاییر، یولدان کئچن بیری، قضیه‌نی گوروب ماللایا دئییر:
- ماللا! اۆستونده اوتوردوغون بوداغی کسسن، بوداق‌لا قاریشیق سن‌ده یئره دۆشرسن!
، ماللا بو اویاری‌نی هئچ اٶزونه آلماییب، کسمه‌یه دوام ائدیر، چوخ کئچمیر بوداق‌لا قاریشیق یئره دۆشور، یئردن قالخیب، اۆستو- باشینی سیلیب تئز آتیلیر ائششگی‌نین بئلینه، آداما یئتیشمک همن سوروشور؛
- سن منیم آغاجدان دۆشه‌جگیمی بیلدین، اٶله‌جگیمی ده بیلیرسن؟ دئه گٶروم من نه زامان اٶله‌جگم؟
آدام باخیب گٶرور ماللانین الیندن قورتولاجاغی اولمایاجاق، بئله دئیر؛
- بو میندیگین ائششک بیر یئل چیخارتسا، جانین آغزینا گله‌جک، بیر داها یئل چیخارتسا جانین چیخاجاق!
ماللا جاوابینی آلیب دٶندو اودون توپلادیغی یئره، اودون‌لاری ائششگی‌نین اۆستونه یۆکله‌ییب یولا دۆشور، یۆکون آلتیندا زورلانان ائششک بیر یئل چیخاریر، ماللانین احوالی دئییشب یئره دۆشور، ایکینجی یئلین سسینی ائشیدن ماللا گٶزلرینی یوموب، جانینین چیخدیغینی سانیر،
یول‌دان کئچن‌لر ماللانی یئره سریلی گٶرمک همان، اونون اٶلدویونو سانیرلار، تئز بیر تابوت تاپیب، اونو تابوتا قویورلار، کندین یولوندا بیر آز گئدینجه، یول ایکی‌یه آیریلیر، تابوتو داشییانلار، باشلاییرلار موباحیثه ائتمه‌یه، بیریسی دئییر:
- یول بو یاندان دی
او بیریسی دئییر؛
- یوخ، یول بو یانداندی
ماللا موباحیثه‌نین اوزاندیغینی گٶرونجه، تابوت‌دان باشینی چیخاریب، دئییر:
- واللهی، من ساغ ایکن بو یول‌دان گلیب- گئدردیم، آمما یئنه‌ده سیز اٶزوز بیلرسیز!

داشلی بولاق
@dashlibulaq

قیزیل گۆل ایله بۆلبول
#‌ائل_ناغیلی

کئچمیش زامانلاردا بیر اوغلان بیر قیزی چوخ سئویرمیش، اوغلانین آدی بۆلبول، قیزین آدی ایسه قیزیل‌گۆل‌ ایمیش، بونلارین سئوگیسی‌نین ماجراسی هر یانا یاییلیر، آخیرده گلیر قیزین آتاسی‌نین قولاغینا چاتیر.
قیزین آتاسی غضب‌لنیر، اونو چاغیریب دئییر:
-گرک بو اوغلاندان اَل چکه‌سن و باشقا اوغلان‌لا ائولنه‌سن!
قیز چوخ یالوار- یاخار ائدیر، آتاسی قبول ائله‌میر
قیز سئوگیلیسی‌ایله قاووشمایاجاغینی باشا دوشوب، باشقاسی‌ایلا ائولنمک‌دنسه، آللاه‌دان اٶلوم ایسته‌ییر.آللاها یالواریر کی بو آرزوسونو یئرینه یئتیرسین!
آما قیزیل گۆل اٶلمور، بیر قیزیل گۆله چئوریلیر.

اوغلان سئوگیلیسی‌نین باشینا گلن احوالاتدان خبردار اولوب، گٶز یاشی توکور، اونون آهی گٶیلره چاتیر.
بیر گون خبر گلیر کی اوغلان یوخدور. اونون یئرینه، قیزیل گۆلون باشینا دولانیب، غملی- غملی اوخویان بیر بۆلبول قوشو وار.
بۆلبول، قیزیل گۆلون باشینا دولاندیقجا اٶزون ضرب ایله اونون تیکانلارینا چیرپیر، تیکانلار بولبولون سینه‌سینی داغیدیب، قانا غلطان ائیله‌ییر، بو قان، گۆل کولونا سپه‌لنیب اونون رنگینی قیزاردیر.

دئییرلر او واختدان همین گۆلون آدی قیزیل گۆل قالیب،، بولبولو گۆله یاخین قویمایان، اونون سینه‌سینی قانا غلطان ائیله‌ین تیکانلار، قیزین آتاسی دیر..


داشلی بولاق
@dashlibulaq

دیلیمیزده سۆت سٶزو ایله دۆزه‌لن دئییملر و کلیمه‌لر:

سۆت:  شیر
سۆت آشی/سوتلوآش:  شیر برنج
سۆت گٶلونده یاتماق: خوش خیالی، خامی
سۆتول:  نیم رس، نوجوان، سنبل نرسیده
سۆتچو:  شیرپز
سۆت پولو/باشلیق: شیربها
سۆت امَر: شیرخوار
سۆت اَجَر:  بچه محروم از شیر مادر
سۆتلوک/ساغمال:  حیوان شیر ده
سۆت قارداش: برادر شیری
سۆت آنا:  مادر شیری
سۆت اوغول:  فرزند شیری
سۆت گۆنو: روزی که در آن روز سهم شیر چوپان بره چران را میدهند / روز یکشنبه
سۆتونو حلال ائله‌مک: بخشیدن شدن فرزند از طرف مادر
باللی سۆت: شیر عسل
سۆت دیشی: دندان شیری
سوت‌تیکن/ سوت‌دیکن: فرفیون، علف سگ

داشلی بولاق
@dashlibulaq

خاقانی‌دن یوخاری‌دا اوتورسانا نه اولار؟
شعر: خاقانی شیروانی
ترجمه: معاریف سلطان


خاقانی‌دن یوخاری‌دا اوتورسانا نه اولار؟
نه بو سنه بیر هنر دیر، نه خاقانی‌یه عار
چونکی گٶی‌ده قارا اۆزلو، پیس عمل‌لی زۆهل‌ ده
خوش صیفت‌لی مۆشتری‌نین اۆستونده توتموش قرار
هاردا کی سو نفت‌ایله بیرلشرسه قایدادیر
آشاغیدا سو یئرلشر، یوخاری‌یا نفت قالخار
گٶرمه‌دینمی خیرماندا دا دٶیوم وقتی همئشه
آغیر دَنلر آلتا یاتار، بوش سامان اۆسته چیخار؟

داشلی بولاق
@dashlibulaq

ماللانین ائششگه ترسه مینمه‌یی‌نین سببی
#ماللا_نصرالدین

گونلرین بیر گۆنو ماللا ائششگی‌نی ترسه مینیب بیر آیری کنده گئدیرمیش، یولدا گٶرن‌لر چوخ تعجب‌له باخیب سوروشورلار:

- آی ماللا! ائششگین اۆستونده نه اوچون ترسه اوتوربسان؟

ماللا گۆلومسه‌یه‌رک جاواب وئریر:

- چونکی ائششک‌له عینی طرفه گئتدێییمی، ایستمیرم گٶرم!


داشلی بولاق
@dashlibulaq

🎼 آنلاتمام دردیمی دردسیز اینسانا
🎧 عاشیق وئیسل

@dashlibulaq

قوجا و قورو کلّه
#‌ائل_ناغیلی

کئچمیش زاماندا بیر قوجا، چایین کناریندا دایانیب سویا باخیرمیش، بیردن سو ایله بیر قورو اینسان کلّه‌سی گلدییینی گٶرور، او کلّه‌نین دانیشدیغینی ائشیدیر.
کلّه دئییردی:
- الله سن ساخلا
بو سٶزه قوجانین گۆلمه‌یی گلیر، اٶز- اٶزونه فیکیرلشیرکی:
- آی قورو کلّه! سن‌ نه دن قورخورسان؟
ائله بو زامان گۆر آخان سو، کلّه‌نی بیر بویوک داشا چیرپدی، کلّه قیریق- قیریق اولوب، سویون اۆزونه داغیلدی، سونرا کله قوجایا دئدی:
- آی عاغیلسیز قوجا! من بو گۆنومدن قورخوب آللاها یالواریردیم


داشلی بولاق
@dashlibulaq

#آتالار_سٶزو /تورکیه

🔹دوست ایله، یئه- ایچ، آلیش- وئریش ائتمه

🔹 یابانجی کٶپک یئددی محله‌دن قووولار

🔹 ایشینه خور باخان، بوینونا توربا تاخار

🔹اێیی گئتمه‌یینجه کیشی‌نین ایشی
موهللبی یئیرکن قیریلار دیشی

🔹اوتوز ایکی دیشدن چیخان[سٶز] اوتوز ایکی محله‌یه یاییلیر

🔹جومَرت دئیرلر مالدان ائدرلر، ایگید دئیرلر جاندان ائدرلر

🔹آنا رحمیندن گلدیک بازارا
کفن آلدیق گئدیریک مزارا

🔸🔸🔸
سٶزلوک
موهللبی: فرنی
جومرت: سخاوتمند
یابانجی: غریبه

داشلی بولاق
@dashlibulaq

ساری عاشیق
#ائل_ناغیلی

آغ‌بولاق کندینده اوغولسوز- اوشاقسیز بیر عایله‌ واریدی، تَرَکَمه‌لر آران‌دان گلیب داغا گئدنده، اونون ائوینه دۆشرمیش‌لر، بیر گۆن، بیر تَرکمه ائوین کیشی‌سینه دئییر:
- اوشاغین اولمازسا، بیرده بو ائوه آیاق یاسمایاجاییق.
کیشی بو سٶزدن چوخ اۆزولور.
آی کئچیر، ایل دولانیر، ترکمه‌لرین یایلاغا قالخماق واختی یاخینلاشیر. کیشی‌نین آروادی چیخیر اوجا بیر یئردن باخیر، گٶرور کی ترکمه‌لر گلیر. گٶتورور حیط ده بیر آغاجدان بئشیک آسیر، بئشیگین ایچینه بیر چلتیک دیبَگی قویور، اۆستونو اٶرتور، ترکمه‌لر گلیب آغاجدان آسیلان یۆروگو گٶرورب، چوخ سئوینیرلر کی ائو صاحیبی‌نین اوشاغی اولوب، کیشی‌یه گٶز آیدینلیغی وئریب ایچری گیریرلر.

بیر آز کئچندن سونرا گٶرورلر اوشاق سسی گلیر، ائو صاحیبی‌نین آروادینا دئییرلر کی، اوشاق آغلاییر. نییه گئدیب گٶتورمورسن؟
آرواد بیر آز آغیر ترپنیر، قوناق‌لار اٶزلری چیخیرلار ائشیگه، آرواد دا اونلارلا چیخیر، باخیب گٶرورلر کی، بئشیکده ساری بیر اوشاق وار، آغلاییر، سن دئمه ایلاهی‌نین امری‌له چلتیک دیبگی دٶنوب بیر اوشاق اولوب.
اوشاغین آدینی "ساری " قویورلار، اوشاق بٶیویوب حاقق عاشیقی اولور، اونا "ساری عاشیق" دئییرلر


داشلی بولاق
@dashlibulaq

کوراغلو دا قوجالارمیش
✍ رقیه کبیری
سس: حمیده رنجبر
ایشیق سایتیندا👇
https://ishiq.net/?p=35675

" باش" سٶزجوک ایله بیر نئچه دئییم(اصطلاح)
#دئییملر


+ باشا گلمک
+ باش آغری وئرمک
+ باشا قالخماق
+ باش- باشا قالماق
+ باش- باشا وئرمک
+ باش بلاسی اولماق
+ باش چکمک
+ باشا چالماق
+ باش اَیمَک
+ باش وئرمک
+ باشینی بوش بوراخماق
+ باشی بدنینه آغیرلیق ائتمک
+ باشی درده سوخماق
+ باشینی دیک توتماق
+ باشی شولوق اولماق
+ باشینا بلا گتیرمک
+ باشینا سعادت قوشو قونماق
+ باشینا دولانماق
+ باشیندان سالماق
+ باشینا سویوق سو/ ایستی سو تٶکمک
+ باشیندان بٶیوک ایش‌لره گیریشمک
+ باشی آشاغی
+ باشی آشاغی ائتمک
+ باشینی گٶتوروب گئتمک
+ باشی باغلی اولماق
+ باشینی بوش بوراخماق
+ باشینی اَزمک
+ باشینی قاشیماغا وقتی اولماماق
+ باشی‌نین چاره‌سینه باخماق
+ باشی‌نین اَتینی یئمک
+ باشینی یئمک
+ باش یئمیش
+ باش قایناتماق
+ باش توولاماق
+ باش تاجی ائتمک
+ باشدان سووماق
+ باشدان سالماق
+ باش اۆستونده یئری اولماق
+ باش وورماق


داشلی بولاق
@dashlibulaq

🔹 پرپیله‌مک (pərpiləmə)
✍دکتر یونس قاسمی‌دن بیر خاطیره
#اینانج‌لار

بدنیمی قیزدیرما گوتورموشدو، گٶزلریمی قارا باسیردی، بیردن چیغیریب قالخیردیم، آنام بیر "کاشا کالامین" زور ایلا بوغازیما ایته‌له‌دی کاشا کالامین چوخ بویوک، منیم بوغازیم ناپ- نازیک.
آنام صبحه قدر باشیم اوسته دایاندی. صبح اولجاق  منه پالتار گئییندیریب،  منجیل‌ده دوکتور افرامیان‌ین مطبینه آپاردی.
دوکتور افرامیان جۆیود دوکتوریدی، بو یهودی دکترین طبابتی طاریم‌دا منجیل‌ده آدلیم‌ ایدی.
دکتور منی ویزیت ائتدی، ایکی دنه اینه یانیما ووردو، منیم فریادیم مطبی گٶیه گٶتوردو ، بیر توربا حب‌دن- شربتدن وئردی الیمه و من آخسییا- آخسییا آنام‌لا بیرلیکده سید ماحمودون قهوه خاناسینا گلدیک.

مقبیله رحمتلیک آنامی تانیدی، بیزه چوخ حرمت ائله‌دی. دبیری نین مینی بوسو گلدی، مسافیرلر میندیلر، بیز اورتا صندلی ده یئر تاپیب اوتوردوق.
بیر آزدان سونرا بیر یاشیل پاپاق ساققاللی سیّد مینی بوسا میندی،
شوفر، هابئله مسافیرلر بو سیّده چوخ حرمت ائتدیلر سیّد اول صفدن باشلادی مسافرلرین قولاغی‌نین دیبینه شاپالاق وورماغا و مسافیرلر هره‌سی بیر تومن اونا جدّ مالی وئریردیلر
آنام سید یاقوب-و گٶرمگ همن، روحو تازالاندی :
- قوربان اولوم جددینه سیّد جان، بو اوشاق چوخ ناخوشدو بونو مٶحکم پرپیله!
بیر ۵ تومن اسکناس سیّدین اوووجونا قویدو.

دئمه بو سیّد پولون قدری‌جه پَرییلیر، اونلار کی بیر تومن وئرمیشدیلر، فقط اۆزلرینه یاواشجا اَلین چکیردی، اونلار کی ایکی تومن وئرمیشدیلر بیر از مٶحکم، اما منیم انام ۵ تومن وئرمیشدی، الین قووزادی یوخاری بیر مٶحکم شاپالاق قولاغیمین دیبیندن یاتیرتدی،گوزومدن ایشیق قالخدی قولاغیم جینگیلده‌دی.

من قاوزانیب سیّده حیرص ایله دئدیم:
- نییه وورورسان نامرد؟ قولاغیم پارتلادی!
ایستیردیم وورام بیله‌سین، آنام دیل- دوداغین دیشله‌دی، منی اوتورتدو یئریمه.
سید غورولدایا- غورولدایا چیخیب گئتدی، آنام دفه‌لرجه سیددن عوذر ایسته‌دی.
مسافیرلر هامی منی دانلاغا باسدیلار کی:
- سن سیدی نییه یامانلادین؟
شوفر ده سیدین جدیندن قورخموشدو آینادا منه باخیب، دوداغی‌نین آلتیدا دئدی:
-بیلسه‌یدیم میندیرمزدیم .
سید یاقوب صندلی‌یه ائله دایانمیشدی سانکی نادرشاه تاج وتخته تکیه وئرمیش!

من ائوه چاتان کیمی حالیم سازالمیشدی، چوخ قیبراق اولموشدوم آنام دئدی:
- سید یاقوبون جددینه قوربان،
پرپیله‌دی نه تئز یاخچیلاشدین!
من گولومسه‌ییب دئدیم:
جویود دکتورون داواسی‌نین نتیجه‌سی‌دی، سید کی قولاغیمین پرده‌سین ییرتدی!
آنام دئدی:
- سیّدین جددینه شک گتیرمه بالا! اوجور کی سن اونا ساتاشدین اوره‌گیندن چیخماسایدی بللی دگیل سنین باشینا نه گلردی٫ ایندی شک ایلیرن؟ اوتان! خجالت چک!
من قبول ائیله‌مه‌دیم دئدیم :
جویود دکتورون داواسی‌نین نتیجه‌سیدی.
آنام دئدی:
- سید یاقوبون پرپیله‌مه‌سی سنه ساغلیق باغیشلاییب.

ایکی گون اوندان سونرا سید یاقوب بیزیم کنده گلدی، آنام سیددن چوخ- چوخ تشکور ائتدی، بیر خوروز توتوب وئردی، دئدی بیردفه‌ده منی پرپیله‌یه.
سید منه ساری قدم گوتوردو، زیل باخدی گوزومه، ایسته‌دی یاخینلاشا من اونون قولتوغونون التیندان بوروق وئریب قاچدیم.

+ کاشا کالامین: قدیمی سویوق دَیمه و قیزدیرما حبّی


داشلی بولاق
@dashlibulaq

سن ده حاقلی‌سان
#ماللا_نصرالدین

ماللا نصرالدین‌ قاضی اولان زامانلار، بیر گۆن قاپیسی چالینیر، قاپینی آچماق همن، قونشوسونو قارشیسیندا گٶرور، قونشو چاره‌سیز بیر حالدا ماللایا دئییر:

- " قاضی بَی، فیلان آدامدان شیکاتچی‌یم"

ماللا قونشوسونو ساکیت‌لشدیرمه‌یه چالیشاراق سوروشور:

- سٶزون نه‌دیر؟ دئه گٶروم!

قونشو سٶونو دئییر، دئییر و ماللا باشینی آشاغی سالیب قولاق آسیر، سٶز قورتولاندان سونرا " قونشو سن حاقلی‌سان" دئییب و اونو یولا سالیر.

بیر نئچه ساعات کئچمه‌دن، ماللانین قاپیسی تکرار چالینیر، بو دفه قاپینی چالان آدام، نئچه ساعات اٶنجه یولا سالدیغی قونشوسونون شیکایت‌چی‌سی‌دی، ماللا بونون دا سٶزونه قولاق آسیب سونوندا دئییر: " سن حاقلی‌سان" و اونو دا یولا سالیر.

اولان‌لاری ایچری‌ده ائشیدن ماللانین خانیمی حیرت‌له دئییر:

- سن نجور قاضی‌سن، ایکی شیکایت‌چی‌ده بیردن حاقلی اولا بیلر؟

ماللا خانیما ساری اۆز چئویریب دئییر:
- سن ده حاقلی‌سان!

داشلی بولاق
@dashlibulaq

#آتالار_سٶزو

🔹تله‌سه‌نین کۆنده‌سی کۆت گئدر

🔹 واختسیز آچیلان گۆل، تئز سولار

🔹ساری یاغ‌لا یاغلاییر، ساریمساق‌لا داغلاییر

🔹ساغلیغیندا کور فاطما، اٶلنده بادام گٶزلو

🔹اٶزون ائتدین اٶزونه، کۆلو سپدین گٶزونه [گٶزووه]

🔹 ائوینده یوخ اوروالیق، کٶنلوندن کئچیر کندخودالیق

🔹اوجا- اوجا داغلار باشی، قارلی دا اولور، قارسیز دا
ایگیدلرین جانی ساغ اولسون، وارلی دا اولور، وارسیز دا

+ اوروالیق؟


داشلی بولاق
@dashlibulaq

شاه منم
شاه اسماعیل ختایی

آلله- آلله، دئیین غازی‌لر
غازی‌لر، دئیین، شاه منم
قارشو گلین، سجده ائدین
غازی‌لر، دئیین، شاه منم

اوچماقدا طوطی قوشویام
آغیر لشگر اَر باشی‌یام
من صوفی‌لر یولداشی‌یام
غازی‌لر دئیین، شاه منم

نرده اَکرسن بیتَرم
خاندا چاغیرسان یئتَرم
صوفی‌لر اَلین توتارام
غازی‌لر دئیین، شاه منم

منصور ایله داردا ایدیم
خلیل ایله ناردا ایدیم
موسی ایله توردا ایدیم
غازی‌لر دئیین شاه منم

قیرمیزی تاجلی، بوز آتلی
آغیر لشکر نیسبت‌لی
یوسف پیغمبر صیفت‌لی
غازی‌لر دئیین، شاه منم

ختایی‌یم، آغ آتلی‌یام
سٶزو شکردن دادلی‌یام
مرتضی علی ذاتلی‌یام
غازی‌لری دئیین شاه منم


داشلی بولاق
@dashlibulaq

یئددی نار چوبوغو
#ائل_ناغیلی

بیری وار ایدی، بیری یوخ‌ ایدی، بیر کیشی وار ایدی، بو کیشی‌نین یئددی اوغلو وار ایدی، بو قارداشلار همئشه بیر یئرده یئییب- ایچر، بیر یئرده ده دولاناردیلار، هامی اونلارین مهربانلیغینا حسد آپاراردی، هئچ بیر دوشمن اونلارا باتا بیلمزدی، یئددی قارداشا دوشمن هئچ، یێرتیجی حیوان‌لاریندا گۆجو چاتمازدی.

بونلار اووا گئدنده ده بیرلیکده گئدردیلر، آیی‌نی، جاناواری، شیری، پلنگی دێری- دێری توتاردیلار، ظارافات دئییل، یئددی قارداشین بیری شێرین قویروغوندان، بیری الیندن، بیری باشیندان، بیری آیاغیندان ... الغرض هره‌سی بیر طرفیندن یاپیشسا، شیر دئییل هئچ فیل ده بونلارا باتا بیلمزدی.

آی‌لار دولاندی، ایل‌لر کئچدی، قارداشلار ائولندی، آرواد- اوشاق صاحیبی اولدولار، هره‌سی بیر یئرده عیمارت آلیب، آیریلدیلار، بیر- بیرلری‌نین ائوینه گئت- گل‌لری آزالدی، اووا گئدنده تک- تک گئتدیلر، آرالاریندا سویوقلوق عمله گلدی، دوشمانلار بو فورصت‌دن استفاده ائدیب، اونلارا بیر- بیر هجوم ائدیب ائولرینی تالادیلار، اٶزلرینی حرمت‌دن سالدیلار، قارداشلار اووا تک گئتدیکلری اوچون الی بوش قاییتدیلار.

آتالاری لاپ قوجالیب، الدن- آیاقدان دوشموشدو، اولادلاری هردن بیر اونون یانینا گلنده، اٶز دولانیشیقلاریندان ناراضی‌لیق ائدیردیلر.

آتا گٶردو کی بئله گئتسه، اوغلانلارینین حالی یاخشی گئچمه‌یه‌جک، اودور کی اونلارین هامیسی‌نی بیر یئره ییغیب دئدی:

- اوغلانلاریم، صاباحاه منیم یانیما گلرسینیز، اٶزوده هره‌نیز بارماق یوغونلوغوندا بیر نار چوبوغو گتیررسینیز.

اوغلانلار هامیسی "باش اوسته" دئییب گئتدیلر، سحر آتالاری‌نین یانینا گلنده هره‌سی بیر نار چوبوغو گتیردیلر، آتالاری یئددی نار چوبوونو الینه آلیب دسته‌لدی، اورتاسیندان مٶحکم بیر اێپ‌له باغلادی، اوغلانلارینا وئریب دئدی:

- اوغلانلاریم! گۆجونوزو سینایین گٶروم، بونو هانسینیز سیندیرا بیلرسینیز؟

قارداشلار هر نه قدر چالیشدیلارسا، هئچ بیری چوبوق دسته‌سینی قیرا بیلمه‌دی، بو دفه کیشی دسته‌نی آچیب، چوبوق‌لاری تک- تک اوغلانلارینا وئریب دئدی:

- ایندی بو چوبوق‌لاری قیرین گٶروم، گۆجونوز چاتیرمی؟

قارداش‌لار هره‌سی بیر نار چوبوغون اله آلیب، قاتلایان کیمی ایکی بٶلدولر. سونرا اۆزلرینی آتالارینا توتوب دئدیلر:

- آتا، بو چوبوق‌لاری قیردیرماقدا مقصدین نه‌دیر؟ بیزی آگاه ائله.
قوجا دئدی:

- بالالاریم، بو چوبوقلار، سیز یئددی قارداشسینیز، نه قدر کی بیر- بیرینه باغلانمیش بو چوبوقلار کیمی بیر یئرده‌سینیز، کئفی کٶک، داماغی چاغ دولاناجاقسینیز، هئچ کیمین ده سیزه گۆجو چاتمایاجاق، ائله کی بیر- بیرینیزدن آیریلدینیز، دوشمن‌لر سیزی تک‌له‌ییب، نه ایسته‌سه‌لر ائده بیلرلر، گلین بیر- بیرینیزدن اوزاق گزمه‌یین، بیر- بیرینیزین سٶزوندن چیخمایین، اوندا گۆجلو خوشبخت اولارسینیز.

قارادشلار آتالاری‌نین بو دوغرو نصیحتیندن سونرا، یئنی دن بیرلشدیلر، بیر- بیرینه کٶمک ائتدیلر، گۆن‌لرینی خوش کئچیرمه‌یه، مهربان یاشاماغا باشلادیلار، او گۆندن سونرا هئچ کیم یئددی قارداشین قاباغینا چیخا بیلمدی.

گٶی‌دن اۆچ آلما دوشدو، بیری ناغیل دئیه‌نین، بیری قولاق آسانین، بیری ده منیم..

داشلی بولاق
@dashlibulaq

نخجیوان آغیزلاریندا کیچیک باش حیوان‌لارا وئریلن آدلار

🔹مایا: یئنی دوغولان قوزو
🔹هراغاش قوزو/ اَرَزن قوزو: زامانیندان اٶنجه دوغولان قوزو
🔹ساوا قوزو/ گئج دوشن: زامانیندان گئج دوغولان قوزو
🔹سۆد اَمَر قوزو: هنوز اوت یئمگه باشلامامیش، بیر- ایکی هفته‌لیک قوزو
🔹اوتوخان/ اوتوخموش قوزو: اوت یئمگه یئنی باشلامیش قوزو
🔹قوزویا قاریشار: دٶرد- بئش آیلیق قوزو
🔹اَملیک: آناسیندان آیریلمامیش آلتی- یئددی آیلیق قوزو
🔹توخلو/ توغلو: بیر یاشیندا اَرکک و یا دیشی قوزو
🔹شێشک: اۆچ یاشیندا دیشی قویون
🔹اٶیَش/ اٶوَج/ اٶیج: اۆچ یاشیندا اَرکک قویون
🔹قارا دیش: دٶرد یاشیندا اَرکک قویون
🔹آزمان : بئش یاشیندا اَرکک قویون
🔹دێزمان: آلتی یاشیندا اَرکک قویون


📚نخجیوان آغیزلاریندا حیوانجیلیقدا قوللانیلان کلیمه‌لرین آدلاندیریشی اۆزرینه بیر دگرلندیریلمه
✍نورای علییئوا

داشلی بولاق
@dashlibulaq

#آتالار_سٶزو

🔹آزا قانع اولمایان چوخا چاتماز

🔹جواهیرین قیمتی وار، سٶزون قیمتی یوخدو

🔹من گتیریرم قیسا- قیسا، آرواد داغیدیر کیسه- کیسه

🔹شیطان‌لا اورتاق اولان، بوغدا اَکر، سامان بیچر

🔹پیچاق یارار ایز قویار، دیل یاراسی کٶز قویار

🔹واردیر پولون، هامی قولون
یوخدور پولون، آچیقدیر یولون

🔹باغ آلما، باغلانارسان
داغ آلما، داغلانارسان
قویون آل، یاغلانارسان


داشلی بولاق
@dashlibulaq