#آتالار_سٶزو

🔹واقتسیز بانلایان خوروزون باشینی کسرلر

🔹اۆرک یانماسا، گٶزدن یاش چیخماز

🔹هره سققلیندن بیر تۆک وئرسه، کوسانیندا سققلی اولار

🔹گئدر باغ‌لار قوراسی، قالار اۆزلر قاراسی

🔹اٶکوزو بوینوزوندان، آدامی سٶزوندن توتارلار

🔹تنبل ائششگه، چولو آغیرلیق ائلر

🔹آغ پارچایا تئز لکه دۆشر

🔹عاغیللی‌نیز خیدیر آقا! بارماغین سالدی بارداغا


داشلی بولاق
@dashlibulaq

عینادچی خوروز
#ائل_ناغیلی(تورکیه)

بیری واریمیش بیری یوخ‌ایمیش، بیر خوروز واریمیش، کۆللوک‌ده ائشینیرکن آیاغینا بیر تیکان باتمیش. بیر ائوه گیریب، ائو صاحیبینه یالوارمیش، آرواد تیکانی چیخارمیش.
خوروز " یاشا ننه" دئمیش. آرادان زامان کئچمیش، بیر گۆن خوروز آروادین ائوینه گلیب " آیاغیمدان چیخاردیغین تیکانی وئر"  دئمیش.
آرواد حیرصلنیب، خوروزو قووالامیش، خوروز گئتمه‌میش، آرواد دئییب کی:
" تیکانی او زامان مانقالا آتدیم یاندی"
خوروز دئمیش:
" یا تیکانی وئر یا دا مانقالی"
آروادین باشی آغریییب مانقالی وئرمیش. خوروز مانقالی دالینا آلیب گتیریب باشقا بیر ائوه یئتیشمیش. او ائوین صاحیبی اینک ساغیرمیش، خوروز اونا دئمیش کی:
" خالا جان! بو مانقالی ساخلا گلیب آلارام"
قادین مانقالی آخورا قویموش. سحر خوروز مانقالی آلماغا گلمیش" خالا من مانقالین صاحیبی‌یم اونو آلماغا گلدیم"
قادین دئمیش کی: " مانقالی آخورا قویموشدوم، اینک سێندیردی"
خوروز دئمیش:
" یا مانقالی وئر یا اینگی آلارام"
قادین‌ین باشی آغریمیش، اینگی خوروزا وئرمیش، خوروز اینگی قاباغینا قاتیب بیر باشقا ائوه گتیرمیش، ائو صاحیبینه دئمیش؛
" اینک قالسین بوردا " سونوندا چیخیب گئتمیش، دونیانی گزیب گلمیش. همن ائوده توی واریمیش، خوروز دئمیش؛
" گلدیم اینگی آلام"
ائو صاحیبی دئمیش:
" اینگی کسدیک، نئجه ائده‌ک؟
خوروز گلینی گٶروب خوشونا گلمیش، گٶزونو یوموب دئمیش کی:
"امانته خیانت اولماز، گلین‌یزی وئرین"
ائو صاحیبی چوخ آلتین- گۆموش وئرمیش، آمما خٶروزون کٶنلونو آلا بیلمه‌میش. نهایت خوروز گلینی آلیب داغا دوغرو یوللانمیش. بیر چوبانا راست گلمیش، چوبان قاوال چالیرمیش، قاوال خوروزون خوشونا گلیر، گلینی وئریب قاوالی آلمیش. یوواسینا دٶنوب تویوق‌لارا دئمیش کی:
" تیکانی وئردیم، مانقال آلدیم، مانقالی وئردیم، اینک آلدیم، اینگی وئردیم گلین آلدیم، گلینی وئردیم قاوال آلدیم، قاوالی چالیب اوخوموش: قوقولوقووووو..
سونرا دا یئمیش، ایچمیش، یوواسینا کئچمیش...

داشلی بولاق
@dashlibulaq

#یانیتماجلار

🔸قارا قارانی، قارایلا قارالاییردی

🔸قالایچی قاسیم، قازانی قالایلایا قالایلایا قالدیریب قویوردو

🔸قیرخ کۆپ، قیرخینیندا قولپو قیریق کۆپ

🔸کئچی‌لر کٶچوردولر، کوچه‌دن گئچیردیلر
کۆچوک قاچدی کوچه‌یه
کئچی‌لرین کێچیگی
کئچی دئدی کۆچوگه

🔸آز گئتدیم اۆز گئتدیم
     دره- تپه دۆز گئتدیم
     چاییر- چیمن گئچه‌رک
     لاله- سۆنبول بیچه‌رک
     سویوق سولار ایچه‌رک
     آلتی آیدا بیر یازدا
     بیر آرپا بویو یول گئتدیم

+ هر بیری بئش دفه تکرار اولوناجاق


داشلی بولاق
@dashlibulaq

#ماللا_نصرالدین
دونیانین مرکزی هارادی؟

گۆنلرین بیرینده ماللا بیر شهرین اطرافیندان کئچیرمیش، ایکی کئشیش ماللا‌یلا یول بیر اولورلار، کشیش‌لر ماللانین بیلگیسینی یوخلاماق  اوچون باشلاییرلار ماللادان سوال سوروشماغا

کشیش‌لرین بیری سوروشور:
- ماللا! دونیانین مرکزی هارادیر؟
ماللا هئچ شۆبهه ائتمه‌دن جاواب وئریر:
- ائششگیمین قاباقداکی ساغ آیاغینی باسدیغی یئر دونیانین مرکزی‌دی!
کئشیش اعتراض ائلیر:
- بونو هاردان بیلیرسن؟
ماللا دئییر:
- اینانمیرسیز، اٶلچون!
بو دفه ایکینجی کئشیش سوروشور:
- ماللا! گٶی‌ده نئچه اولدوز وار؟
بو دفه‌ده ماللا هئچ حالینی پوزمادان، ائششگینی گٶستررک جاواب وئریر:
- گٶی اۆزونده، ائششگیمین قویروغواندا اولان قیل قدر اولدوز وار!
کئشیش:
- بونو نئجه اثبات ائده بیلرسن؟
ماللا دئییر:
- اینانماساز، سایا بیلرسیز!

ماللانین سوروشولان سوال‌لارا وئردیگی جاوابلار کئشیش‌لری گیجتلدیگی اوچون، داها ماللادان سوال سوروشماقدان واز کئچیرلر.

داشلی بولاق
@dashlibulaq

تپه گٶز
#ائل_ناغیلی

آتام تاجیر ایمیش، دانیشیرمیش کی مال ساتماقدان گلیردیک، دریادا گمی‌میز سویا باتدی و غرق اولدو، من ایکی یولداشمیلا بیر تخته اۆزرینده قالدیق، نئچه گۆن بیز او تخته‌نین اۆستونده اۆزدوک، گلیب بیر آدایا چاتدیق، آدا دا داغی- داشی آشیب گوردوک بوردا چوخ مال- قارا وار، حیوان‌لار بیزی گورمک همن ملَشدیلر، بیر آندا گٶردوک بیر آدام گلدی، تپه‌سینده بیر گٶزو وار، دئمه بورا تپه‌گٶزون یئری‌دیر، مال- قارا دا اونونکودور، تپه گٶز بیزی توتوب بیر ماغارایا سالدی، ماغارانین آغزینا دا یئکه بیر دییرمان داشی قویدو، سحر گلدی بیر اوجاق قوردو، یولداشیمیزین بیرین توتوب شیشه چکیب قیزارتدی، یئدی. گئنه ماغارانین آغزینا داش قویوب گئتدی، سحری گلیب او بیری یولداشیمیزی دا یئدی، بیریسی گۆن نوبه منه چاتدی، تپه گٶزون باشی قاریشاندا یئردن بیر میل گٶتوروب اوددا قیزارتدیم، منه یاخینلاشاندا شیشی سوخدوم تپه‌سینده‌کی گٶزونه. تپه گٶز اٶلدو، اوردان چیخدیم شهره گلیب چاتدیم. شهرده هئچ کیم یوخ‌ایدی چوخ گزیب  آغاجین دالیندا گیزلنن بیر کیشی‌یه راست گلدیم، دئدیم آ کیشی! نییه گیزله‌نیبسن، بو شهرین جاماعاتی هارا گئدیبدیر؟
دئدی کی: هامی تپه گٶزون قورخوسوندان گیزلنیب
دئدیم: من تپه گٶزو اٶلدوردوم.
کیشی بو خبری ائشدیب چوخ سئویندی پادیشاها خبر آپاردی، هامی سئوینیب بایرام ائله‌دی، پادشاه قیزین منه وئردی، بیزه قیرخ گۆن- قیرخ گئجه توی توتدولار.
#غیرعادی_واریانتلار

📚اساطیرلر، افسانه‌لر، روایت‌لر


داشلی بولاق
@dashlibulaq

#آتالار_سٶزو (تورکیه)

🔹آللاه قارداشی قارداش یاراتمیش، کیسه‌سینی آیری یاراتمیش

🔹 یازدا کٶلگه خوش، قیش‌دا آنبار بوش

🔹یالنیز داش، دووار اولماز

🔹بیر اَلین نه‌سی وار؟ ایکی اَلین سسی وار

🔹دووشان داغدان کۆسموش!
داغین خبری اولمامیش!

🔹دوغرو سٶیله‌یه‌نی دوققوز کٶی‌دن(کند) قووموشلار

🔹عجله بیر آغاجدیر، مئیوه‌سی پئشمانلیق

🔹ائششک درویش اولماز، اودون داشیماق‌لا تکیه‌یه
آدام حاجی اولماز، گئدیب- گلمک‌له مکّه‌یه


داشلی بولاق
@dashlibulaq

‍ اۆلکر اولدوزو
#ائل_ناغیلی

اۆلکر اولدوزو بیر زامانلار گوزل بیر قیز ایمیش. بیر دفه قیشین اوغلان چاغیندا اونون آتاسی‌نین اوتو قورتاریر ، قیشین بو واختیندا اوتو هاردان تاپماق اولار؟ مال- داوار تامام آجیندان اٶله‌جکمیش .
اۆلکرین آتاسی آغایا حال-قضیه‌نی دانیشیر، بو قوجا ظالیم آغا، کیشی‌‌ایله شرط کسیر کی؛
- من ایسته‌دیین قدر سنه اوت وئره‌رم، آنجاق سن گرَک اٶز قیزینی منه وئره‌سن !
کیشی چوخ یالواریر، آغا آز ائشیدیر دئدیییندن دٶنمور، آخیر علاج‌سیز قالیب راضی‌لاشیر، گلیب وضعیتی قیزینا دانیشیر، قیز بۆتون گۆنو گٶز یاشی توکور، اٶز حالینی دۆشونوب آغلاییر .

اۆلکر،گئجه قدَرلی-کدَرلی گٶیه باخیب اٶز احوالینی دانیشیر، کٶمک ایسته‌ییر، گٶی‌ده آی‌ین لاپ نازیک اولدوغونو گورور، گلیب آتاسی‌نی یوخودان اویادیب دئییر :
- آی گٶی‌ده ساللاندی آی دده!
داها  یازا  نه قالدی آی دده!
وئرمه منی قنیم الینه!

کیشی تئز ائشیگه چیخیر، گوزلرینه اینانمیر، هر یان دیزه قدَر بوی وئرمیش اوتلا دولو ایدی، بونو گوروب چوخ سئوینیر، آنجاق ائوه گیریب قیزینی گورمور، چۆنکو اونون گوزل قیزی اولدوز اولوب گٶیه چیخمیشدی، او واختدان دئییرلر:
-گوی‌ده‌کی اَن پارلاق اولدوز اۆلکر اولدوزودو، آتاسی یوخودان دورانا قدر گٶی‌لردن چکیلمه‌ییب یازا نه قدر قالدیغینی آتاسینا بیلدیریر.

داشلی بولاق
@dashlibulaq

#اینانج‌لار
یاساق‌لار

🔸لئیلَکه داش آتمازلار، کۆسوب گئدر، یاز یوبانار

🔸پای وئریلن قابی بوش قایتارمازلار، ایچینه شکردن، دوزدان بیر شئی قویارلار

🔸قادین ساچینی دارایاندا، تٶکولن ساچ‌لاری اودا آتماق اولماز، یوخسا ساچلاری آز زاماندا تامام توکولر

🔸قاینار سویو تورپاغا توکمک گوناهدی، دئییله‌نه گٶره تورپاق یێیه‌سی یانار، او دا غضب‌لنیب سنه صدمه یئتیرر

🔸ایلانی اٶلدورمک اولماز، چونکی اونلار یئددی قارداشدیلار، قالانلاری هاردا اولسا، اٶلدورن آدامی تاپیب جزالاندیرارلار

🔸یئرده اوزانمیش آدامین اۆستوندن آتلانماق اولماز، چونکی همن آدام اٶلر، آتلانسان گرک گئری قاییداسان

🔸اوشاغی گئجه جویز آغاجی‌نین آلتیندا ساخالاسان، سویون اۆستوندن آتلاتسان، وورغون وورار

🔸گئجه دیرناق توتماق، گۆندوز ناغیل دئمک گوناهدی، جهنمده اونلاری اودلو کٶسسونن دٶیه‌جکلر، دٶیه- دٶیه‌ده اٶلولر اوخویاجاق:
-گئجه دیرناق توتانلار
گوندوز ناغیل دئینلر
هیه بورا گلرسیز
اودلو کٶسسو یئیرسیز!


📚افسانه‌لر، اساطیرلر، روایت‌لر

داشلی بولاق
@dashlibulaq

#نغمه‌لر
اوخوتدو

آتام منی اوخوتدو
قارا ساچیم توخوتدو
قارا ساچیمین شیوه‌سی
قیزیلداندیر دۆیمه‌سی
قیزیل‌لاری ایتیردیم
وار- یوخومو بیتیردیم


باجادان باخان

باجادان باخان دَوه‌ره گٶز
بیری کهَر بیری بو٘ز
میندیم بوزون بئلینه
چیخدیم اورمو یولونا
اورمو یولو آزاندی
مٶولام یازی یازاندی
یازی مله‌یین ایشی
کۆللو کۆله‌یین ایشی
کۆللو کۆلک مینایا
اوجو عرشه دایانا
دایانماسین نئینه‌سین
ساققیز آلیب چئینه‌سین
ساققیز ساتان چرچی‌دی
چرچی نه چَرن‌چی‌دی
چرَن‌چیلر یێغیلسین
آغچا وئرک داغیلسین


داشلی بولاق
@dashlibulaq

#آتالار_سٶزو (یاز)

🔹 یازدا اَکسَن یۆز اولار، هر بیر ایشین دۆز اولار

🔹یازدا آیرانسیز اولما، قیش‌دا یورغان‌سیز

🔹یاز دومانی بار گتیرر، قیش دومانی قار

🔹یاز گۆنونون یاغیشی، اَر- آروادین ساواشی

🔹یازدا اَکمز روزی‌نی، قیش قارالدار اۆزونو

🔹یاز یوخودان اویاندی، عالَم یاشیل بویاندی

🔹یازدا اێشله، قیش‌دا دیشله

🔹یازدا ایشلر اێنجَلر، قیش‌دا یاتار دینجَلر

🔹یازین دومانی- چَنی، دولدور چووالا دَنی

🔹یازا چیخارتدیق دانانی، بَینمه‌دی آنانی


داشلی بولاق
@dashlibulaq

بس کیشی‌لر هانی؟
#ائل_ناغیلی

امیر تیمور قوشونو ایله بیر کنده چاتیر، او، قارشی‌داکی کنده چاپار گٶندریر کی:
- قیزلار، گلین‌لر، آنالار قیمت‌لی اشیالارین گٶتوروب، کنددن چیخسینلار، بیزیم ایشیمیز کیشی‌لرلندیر. اونلارلا ووروشماغا گلمیشیک.
قوشون چٶلده گئجه‌له‌ییر، صبح تئزدن عسگرلر کنده گیریرلر، تیمور کندی بوم- بوش گٶروب، مات قالیر. عسگرلر کندی ائو- ائو گزیب بیر قوجا کیشی تاپیرلار، اونو تیمورون حضورونا گتیریرلر، تیمور سوروشور:
- هانی بو کندین کیشی‌لری؟
قوجا دئییر؛
- حٶرمتلی حٶکمدار! سیز خبر گوندردینیز کی، قیزلار، گلین‌لر، قادین‌لار، قیمت‌لی اشیالارین گٷتوروب کنددن آرالانسینلار، اونلاردا سیزین امرینیزه عمل ائله‌دیلر.
تیمور قوجانین سٶزونون جانینی باشا دۆشمه‌ییب، غضب‌له سوروشور:
- بس هانی کندین کیشی‌لری؟
قوجا دئییر:
- ای بٶیوک حٶکمدار! دونیادا قیزا قارداش‌دان، آنایا اوغول‌دان، قاری‌یا اٶز عٶمور یولداشیندان قیمت‌لی نه اولا بیلر کی؟
قوجانین بو جاوابیندان تیمور درین بیر فیکره گئدیر، قوشونون کنددن چیخماسینا امر وئریر.


داشلی بولاق
@dashlibulaq

سنین ایچینی یاندیرسا، بیلمم
#ماللا_نصرالدین

گۆن‌لرین بیرینده قونشولاردان بیری ماللانی قوناق چاغیریر، خوش- بئش‌دن سونرا سوفرا آچیلیر، ماللا سوفرادا اولان یئمک‌لردن دویونجا یئییر، یئمک‌لر قورتولاندان سونرا ائو صاحیبی ماللانین قاباغینا بیر تاباق قارا شان بالی قویور، بالین کیفیت‌لی اولدوغونو آنلایان ماللا، بال‌دان قاشیق- قاشیق یئمگه باشلاییر، ائو صاحیبی‌ده بو وضعیته دایانا بیلمیر:

- ماللا! اگر بالی چٶرک‌سیز یئسن ایچینی یاندیرار!

ماللا شرایطی بئله گٶرونجه حالینی پوزمادان جاواب وئریر:

- واللاهی قونشو! بال منیم ایچمی زاد هئچ یاندیرمیر، سنین ایچینی یاندیرسا، اونو بیلمم!


داشلی بولاق
@dashlibulaq

اَریک ساتان کیشی‌نین ناغیلی
#ائل_ناغیلی

بیری واریدی، بیری یوخ‌ایدی، بیر کندده بیر قوجا کیشی یاشاییردی، بو قوجانین بیر اَریک باغی واریدی، بیر ده بو کیشی‌نین ۲۰ یاشیندا بیر اوغلو واریدی، بو اوغلانین ۲۰ یاشی تامام اولان زامان ائولنمک ایسته‌دی، ائولنمک اوچون آتاسیندان ایذن آلدی، آتاسی ایسه دئدی:

-اوغلوم! ائولنمک یاخشی ایشدیر. آمما تلسمه. اٶزونه یاخشی بیر قیز سئچ!

بیر گون بو کیشی اوتوروب فیکیرلشدی:
" منیم اوغلوم زحمت چکن بیر اوغلاندی، اونا یاراشان قیزی هاردان تاپماق اولار"؟ آز فیکیرلشدی، چوخ فیکیرلشدی و قرارا گلدی.

آراباسینی اَریک ایله دولدوروب ساتماغا آپاردی، یول‌لا گئدیر و قیشقیریردی؛
- اریک ساتیرام، یاخشی اریک، زیبیل گتیر اریک آپار!

جاماعات معطل قالمیشدی، نه غریبه ایشدیر! زیبیل یئرینه اریک؟ یقین بو قوجا عاغلینی ایتیریب!

لاکین قادین‌لار، قیزلار و حتی قوجا قاری‌لار زیبیل سوپورمگه ائولرینه قاچدیلار، چوخ جدّ- جهد ایله سۆپوروردولر، نه قدَر چوخ زیبیل چیخارسالار او قدَر ده چوخ اریک آلاجاقدیلار، هم ده تلَسیردیلر اریک قورتارماسین، بونلارا دا چاتسین، زیبیل یێغیشمیشدی کی گل گوره‌سن! کیمی‌سی توربا داشیییر، کیمی‌سی زنبیل گتیریر، کیمی‌سی اٶنلویونو، اَتگینی دولدورموشدو. قوجا زیبیلی چکیر، قیزلاری، قادین‌لاری تعریفله‌ییردی:
-آفرین، گٶر نه قدر زیبیل یێغمیسیز!

قیزلار- قادین‌لار ایسه اوتاناراق دئییردیلر:
- هله بیز تلَسیردیک! یوخسا بیر بو قدر ده گتیره بیلردیک..

بونو دئییب ائولرینه زیبیل دالینجا قاچیردیلار، دئمک اولار کی، قوجا بۆتون اریک‌لری زیبیل یئرینه وئرمیشدی، بیردن گوردو کی، کناردا چوخ گٶزل- نجیب بیر قیز دایانیب، الینده ده بیر یایلیغی وار. قوجا دئدی:

- یاخین گل گوزل قیز! اریک آپار

قیز یاخینلاشیب الینده‌کی یایلیغی قوجایا ساری اوزاتدی. یایلیقداکی زیبیل هئچ بیر آوووچ دا دئییلدی.

- آی گوزل قیز، نییه بئله آز زیبیل یێغمیسان؟ بیر چیمدیک زیبیله، سنه نه قدر اریک وئریم؟

قیز جاواب وئردی:
- عمی جان! من ده چوخ زیبیل ییغماق ایستردیم، آمما ائویمیزده یوخدور.بونو دا قونشولارین ائولرینی سۆپورمگه کٶمک ائتدیییم اوچون وئردیلر، بئله دئدی و گٶزلرینی یئره تیکدی،

قوجا ایسه چوخ سئویندی، گوردو کی، بو قیز چوخ زحمت‌ چکن، تمیز و نجیب قیزدیر، قیزی اوغلونا ایسته‌دی، قیز کٶنول وئردی، اونون اوغلو ایلا ائولندی، یئددی گئجه، یئددی گوندوز توی توتدولار، خوش‌لوق‌لا بیرلیکده یاشادیلار...


داشلی بولاق
@dashlibulaq

عادتیمیز داش‌ایدی دعوا گۆنو
✍میرزه علی‌اکبر صابیر

عادتیمیز داش‌ایدی دعوا گۆنو
توللاریدیق اَل‌ده ساپان قیژ ها قیژ

هر کسه دَیسه‌یدی ائدردی همان
بیر نئچه گون آه و فغان اوف ها اوف

مرهم اولوردو، ساغالیردی یارا
الده قالیردی یئنه جان، ساپ پا ساغ

ایندی رئوول وئردی، دٶنوم باشینا
ناگه اولور گۆلله فشان پارتا پارت

اوندا گٷرورسن یێخیلیب یان با یان
بیر نئچه نورَسته جاوان لای با لای

تۆف بئله دٶورانه کی، بدتر اولور
سئیری- فلک، دٶوری- زامان ایل به ایل

میللت-ی اسلام قێریر بیر- بیرین
آللاه آمان، بو نه یامان قیر ها قیر

قارداشا باخ قارداشینی اٶلدورور
وحشی اولوب اهل-ی جهان سر به سر

میللتی گٶردوکجه بئله هرج-و- مرج
کٶنلوم اولور دوپ- دولو قان، قات با قات

بٶیله گئدرسه باکی الدن گئدر
قالماز او مٲواده آمان هیچ، هیچ

باری، خدایا، اٶزون اصلاح قیل
تا ائده‌لر پیر و جاوان صولح- صولح


داشلی بولاق
@dashlibulaq

اوخای( oxayy)

دوشمن‌لری طیلیسم‌له‌ین و گیزلی خزینه‌یه صاحیب اولان سیحیر بازدیر، او بیری دونیانین تمثیلچی‌سیدیر، اوخای‌ین قصر‌نین دٶرد بیر یانی اینسان قانیندان قیرمیزی دنیزلرله اٶرتولودور، قصرین هر یئری اینسان جیلدینده حیوانلارلا دولودور، دیوارلاری اینسان کلّه‌سی ایله هٶرولوب.

#افسانوی_وارلیق‌لار

داشلی بولاق
@dashlibulaq

#آتالار_سٶزو (کرکوک)

🔹دردینی ساخلییان، درمان بولماز

🔹بالیغا بیچاق یوخدور

🔹عاییبسیز دوست ایسته‌ین، دوست‌سوز قالی

🔹آیاکلار نئجه وارسین، گَویل وارمایان یئره؟

🔹آج آمان بیلمز، اوشاق زامان بیلمز

🔹گاوور اکمگی یئین، گاوور قیلینجی آتار

🔹اسکی پانبوغ بئز اولماز، اسکی دوشمان دوست اولماز


داشلی بولاق
@dashlibulaq

او ترسه بیر قادین‌دیر
#ماللا_نصرالدین

بیر گون ماللانین آروادی پالتار یوماغا چایین کنارینا گئدیر، او چای‌دان دولچا ایلا سو گٶتوررکن چایا دوشور

ماللانین خانیمی‌نین چایا دۆشدوگونو گٶرن قونشولار، بو خبری تئز ماللایا چاتدیریرلار.
ماللا خبری ائشیتمک همن، چای کناریندا، سو آخیشی‌نین ترسه طرفینه قاچماغا باشلاییر، بو ماجرانی گورن قونشولار قیشقیریب ماللایا دئییرلر:
- ماللا باخ، چای آشاغییا ساری آخیر، سن ترسه طرفه قاچیرسان!

اونلارین جوابیندا ماللا دئییر:
- سیز منیم آروادیمین نه قدر عینادکار و ترسه اولدوغونو بیلمیرسیز، او چای آخیشی‌نین ترسه طرفینه گئدر..


داشلی بولاق
@dashlibulaq

شاه اسماعیل خطایی ایله عرب زنگی


عرب زنگی:
یئنه غافیل بیر اوو چیخدی قارشیما
هۆرکوب اووچوسوندان، باش وئریب گئدر
قورخوسوندان دوداق‌لاری چاتلایار
آغلاییب، گٶزوندن یاش وئریب گئدر

شاه اسماعیل:
قندهاردان گلدیم موراد آلماغا
یول وئر، عرب، یول وئر، اینجیتمه منی
من گلمدیم بو دیاردا قالماغا
یول وئر عرب، یول وئر، اینجیتمه منی

عرب زنگی:
چوخلاری آدلاییب او یاندان بری
ایگیدلر اَلیمدن چکیب‌لر زاری
کلّه‌دن میناره، لئش‌دن حاصاری
بورایا گلن‌لر باش وئریب گئدر

شاه اسماعیل:
قارادیر قاشلارین، کعبه معراجی
چکرم، ییخارام حاصاری، بورجو
کسرم باشینی، یوخدور علاجی
یول وئر، عرب، یول وئر، اینجیتمه منی!

عرب زنگی:
اوغلان مئی ایچمیسن، یوخسا دا بنگی؟
قورخودان سارالیب اۆزونون رنگی
هله ائشیتمه‌دین، عرب زنگی؟
چوخ سنین کیمی‌لر باش وئریب گئدر!

شاه اسماعیل:
بیر سن باخ قایناغیما، جوشوما
ال وورا بیلمزسن ترلان قوشونا
باخ شاه اسماعیلین تر ساواشینا
یول وئر عرب، یول وئر، اینجیتمه منی!

داشلی بولاق
@dashlibulaq

ایلانا دٶنن قیز
#ائل_ناغیلی

بیر کندلی اوغلان مئشه‌ده گزیرمیش، بیردن گٶرور کی قایانین دیبینده چیلپاق بیر قیز وار، قیز اوندان پالتار ایسته‌ییر.
اوغلان کنده گلیب، پالتار آپاریر اونو گئییندیریب ائوینه گتیریر. نئچه مدّت سونرا اوغلان قرارا گلیر کی بو گٶزل قیزلا ائولنسین، بیر گۆن اوغلانین قاپیسینا بیر درویش گلیر، او اوغلانا دئییر کی:
- سنین ائوینده‌کی قیز بیر ایلاندی کی قیز جیلدینه دۆشوب، اونونلا ائولنسن سنی اٶلدوره‌جک.
اوغلان اینانمیر، دئییر کی:
- بو قیز منیم ائویمه گلندن، منیم روزیم آرتیب، هارا گئتمیشم، ایشیم دۆز گلیب، سن یالان دانیشیرسان.
درویش دئییر کی:
- اینانمیرسان، اونا دۇزلو یئمک وئر، ائوه ده سو قویما، قاپی‌نی باغلاییب، گیزلن، باخ گٶر نه اولور؟
اوغلان ائله ائدیر، گورور کی قیز ائوده سو تاپا بیلمه‌دی، قاپی باغلی اولدوغوندان ائشیگه ده چیخا بیلمیر، بیردن نازیک ایلانا چئوریلیب بیر دئشیکدن ائشیگه چیخدی، سو ایچیب قاییتدی ایچری. یئنه ده دۆشدو قیز جیلدینه.
اوغلان گٶرور کی درویش دۆز دئییرمیش، سوروشور بس من نه ائدیم؟
درویش دئییر:
-قیزا دئه چٶرک یاپسین، او چٶرک یاپاندا سال تندیره یاندیر. اوغلان ائوه گلیب قیزا دئییر کی: دور چورک یاپ!
قیز چٶرک یاپاندا اوغلان اونو ایته‌له‌ییب تندیره سالیر، تندیرین ده آغزینی اٶرتور. بو واقت درویش گلیب اوغلانا دئییر کی: منه سو گتیر.
اوغلان گئدیب سو دولدورور، تئز گتیریر کی وئرسین درویشه، گٶرور کی درویش قیزی تندیردن چیخاریب. آنجاق قیز یانماییب. باشدان- آیاغا قیزیلا دٶنوب، او واخت درویش قیزی گٶتوروب قاچیر، اوغلان دۆشور آرخاسیجا، آمما اونو توتا بیلمیر، کور- پئشمان قاییدیر ائوینه.

او گۆندن اوغلانین هئچ بیر ایشی دۆز گلمیر، هارا گئدیرسه الی بوش قاییدیر، یئمگه قورو چٶره‌یی ده اولمور

#غیرعادی_واریانتلار

داشلی بولاق
@dashlibulaq

🔸 یورد قایغی‌سی
✍علی بی حسین زاده

اوجوندادیر دیلیمین
حقیقتین اعظمی
نه قویدولار سٶیله‌یم
نه کسدیلر دیلیمی

بیلیرمیسیز جۆهلا؟
نه ائتدیلر وطنه؟
نه قویدولار اویویا
نه قویدولار اویانا

بٶیله دورماق اویوشوق
روامی بیر دیری‌یه؟
نه گئتمه‌ده ایره‌لی
نه دٶنمه‌ده گئری‌یه

عدو قێریر قاپی‌یی
بیز ائوده بی‌خبریز
نه باشقا باشقالاریز
نه اتحاد ائده‌ریز

آییلتمادی قلمیم
بو تورک ایله عجمی
نه قویدولار یازاییم
نه قیردیلار قلمیم


داشلی بولاق
@dashlibulaq

اوتوردوغو بوداغی کسن ماللا
#ماللا_نصرالدین

گون‌لرین بیر گونو ماللا اودون توپلاماغا مئشه‌یه گئدیر، بیر آغاجا چیخیب، اونون بیر بوداغی‌نین اوستونده اوتوروب، اونو کسمه‌یه باشلاییر، یولدان کئچن بیری، قضیه‌نی گوروب ماللایا دئییر:
- ماللا! اۆستونده اوتوردوغون بوداغی کسسن، بوداق‌لا قاریشیق سن‌ده یئره دۆشرسن!
، ماللا بو اویاری‌نی هئچ اٶزونه آلماییب، کسمه‌یه دوام ائدیر، چوخ کئچمیر بوداق‌لا قاریشیق یئره دۆشور، یئردن قالخیب، اۆستو- باشینی سیلیب تئز آتیلیر ائششگی‌نین بئلینه، آداما یئتیشمک همن سوروشور؛
- سن منیم آغاجدان دۆشه‌جگیمی بیلدین، اٶله‌جگیمی ده بیلیرسن؟ دئه گٶروم من نه زامان اٶله‌جگم؟
آدام باخیب گٶرور ماللانین الیندن قورتولاجاغی اولمایاجاق، بئله دئیر؛
- بو میندیگین ائششک بیر یئل چیخارتسا، جانین آغزینا گله‌جک، بیر داها یئل چیخارتسا جانین چیخاجاق!
ماللا جاوابینی آلیب دٶندو اودون توپلادیغی یئره، اودون‌لاری ائششگی‌نین اۆستونه یۆکله‌ییب یولا دۆشور، یۆکون آلتیندا زورلانان ائششک بیر یئل چیخاریر، ماللانین احوالی دئییشب یئره دۆشور، ایکینجی یئلین سسینی ائشیدن ماللا گٶزلرینی یوموب، جانینین چیخدیغینی سانیر،
یول‌دان کئچن‌لر ماللانی یئره سریلی گٶرمک همان، اونون اٶلدویونو سانیرلار، تئز بیر تابوت تاپیب، اونو تابوتا قویورلار، کندین یولوندا بیر آز گئدینجه، یول ایکی‌یه آیریلیر، تابوتو داشییانلار، باشلاییرلار موباحیثه ائتمه‌یه، بیریسی دئییر:
- یول بو یاندان دی
او بیریسی دئییر؛
- یوخ، یول بو یانداندی
ماللا موباحیثه‌نین اوزاندیغینی گٶرونجه، تابوت‌دان باشینی چیخاریب، دئییر:
- واللهی، من ساغ ایکن بو یول‌دان گلیب- گئدردیم، آمما یئنه‌ده سیز اٶزوز بیلرسیز!

داشلی بولاق
@dashlibulaq