⚡️ "Ескі Қазақстан" мен "Жаңа Қазақстан" сотта кездесті

Бүгін "JYSAN HOLDINGS" халықаралық акционерлері Қазақстанды сотқа берді. Қазақстанға қарсы американдық "Willkie Farr & Gallagher LLP", "Holland & Hart LLP" заң фирмаларының тәжірибелі заңгерлері - Тарик Мундия, Майкл Готтлиб, Джеффри Б., Дж. Стивен Пик пен Эрик Медлилер соттасатын болады.

Оның алдында Қазақстанның Бас Прокуратурасы «Pioneer Capital Invest» ЖШС мен Jusan Technologies Ltd арасындағы «First Heartland Jusan Bank» банкінің, сондай-ақ онымен байланысты ұйымдардың активтерін шетелдік юрисдикцияларға беру туралы шартты жарамсыз деп тану туралы талап арызын жариялаған болатын. Ал Алматы қаласы Бостандық ауданының соты Прокуратура арызы бойынша іс қозғаған.

Jusan Technologies Ltd - АҚШ-тың Невада штатында тіркелген компания. Ол біздегі Жусан банктің қожайыны болып табылады. "Жаңа Қазақстан" Жусан банкті өзіне қайтарып алғысы келеді. Бірақ оған артында Назарбаев тұрған "Jusan Technologies Ltd" түбегейлі қарсы.

Невада соты керек деп тапса, Қазақстанның 💰 Ұлттық Қорын блоктап тастай алады. Жусан ісі - біз үшін екінші Стати деуге болады. Анатол Стати Қазақстанның ERG корпорациясынан алатын дивидендін бұғаттап тастады. Невада соты да біз үшін оңай болмайын деп тұр.

Dalainside бұл даудың барысын бақылауда ұстайды. Арнаға тіркеліп алыңыз👇

https://t.me/dalainside

💥 Мәсімовтің украин сыбайласы: сіз кімсіз, Крупенко ханым?

Қаңтар оқиғасын ушықтырды, мемлекетке опасыздық жасады деп айыпталған Мәсімовтың cіз бен біз біле бермейтін құпиясы көп.

Dalainside ҰҚК-ның экс-төрағасы туралы жиынтығы 3 тараудан тұратын зерттеу материалын ұсынады.

Қазақтілді ортада "қияқ мұрт" атанып кеткен Мәсімовтің экс-президентке еліктеп кітап жазатын әдеті бар-тын. Біз оның комитетті басқарып тұрған тұста "Amanat" деп аталатын баспа үйін ашқанын анықтадық. Атауы қазақша болғанмен, жағрафиясы Қазақстаннан жырақта – Вашингтонда тіркелген.

Баспа үйінің қоныс-мекені етіп 🇺🇸 АҚШ астанасын таңдап алуы тегін емес. Алыс құрлықта Мәсімовты қолдайтын ықпалды лобби бар.

Бұған сәл кейінірек тоқталамыз, "Amanat-қа" қайтып оралайық.

Баспаның корпоративтік сайты жып-жылмағай, күдік туғызарлық дәнеңе жоқ. "Amanat" өзін ешкімнің сөзін сөйлемейтін, дербес компания ретінде таныстырады. "Сұранысқа ие үздік туындыларды жариялауға әркез даяр екенін" мәлімдейді.

Солай бола тұра, осы күнге дейін баспадан небәрі 3-ақ кітап жарық көрген. Түсінген боларсыз, үшеуі де Мәсімов әулетіне тиесілі.

📚 "Amanat" баспасынан Мәсімовтың - "Тамыр" және "Әлемнің келесі қожайыны: жасанды интеллект" атты кітабы басылып шыққан. Ал үшінші кітаптың егесі – Кәрімнің әкесі марқұм Қажымұқан ақсақал. "Естеліктер" деп аталатын кітапта Мәсімовтер әулетінің өткені мен кеткені баяндалған.

Dalainside бұдан да тереңге үңгіп, Мәсімовтің АҚШ-тағы сыбайласын тапты. ҰҚК-ның бұрынғы басшысының төл туындыларын кеңінен таратуға, әрі оның АҚШ-тағы жағымды образын қалыптастыруға 🇺🇦 Украин азаматы болысып отыр.

Аксения Крупенко украин тумасы және біздің болжам бойынша Мәсімовке тиесілі "Amanat" баспасына тікелей қатысты тұлға, тіпті осы баспаның қожайыны болуы да ғажап емес. Баспа үйінің веб-сайтында оның есім-сойы жоқ, алайда құрылтайшылардың құжатында – Крупенко мекеменің белді қызметкері деп көрсетілген.

Мәсімовтың қолымен жазылған туындыларды АҚШ-тағы ығай мен сығайға тарату жұмысы тікелей Крупенкоға жүктелген деуге негіз бар.

Аксенияның құзіреті мұнымен шектелмейді. Dalainside оның әлемжелідегі парақшаларын ақтарып, келесідей қызықты мағлұмат тапты.

Крупенко Мәсімовтың дәуірлеп тұрған шағында Вашинтонға түрлі мақсатпен ат сабылтып келетін шенеуніктер мен дипломаттарға арнап агенттік ашқан. Былайша айтқанда, VIP клиенттерге қызмет көрсеткен. Оларға оққағар ұсынған, қонақ үйге орналастырған, ат-көлігі мен ас-суын қамдаған.

Баспаның корпоративтік құжатында Крупенкодан өзге Мәсімовтың ұлы - Ескендір Кәрімнің де аты-жөні жүр.

Әлбетте, Крупенко Мәсімовтың хәлі мүшкіл екенін жақсы біледі, оған жанашыр екені жасырын емес. Украинаға басып кірген Путин Крупенконың "Кәрімге қол ұшын созсам..." деген жоспарын бұзған тәрізді.

Ксения атажұртына жәрдемдесуге білек түре кіріскен. Оның ұйытқы болуымен Украинаға гуманитарлық көмек жөнелтетін арнайы қор құрылыпты. Әлбетте, мұнысы құптарлық іс. Десе де, бізді Мәсімовтың мәселесі көбірек қызықтырады.

Dalainside анықтағанындай Крупенко Мәсімовтың төл туындыларын АҚШ-тың ішкі-сыртқы саясатын айқындайтын бірталай ықпалды тұлғаларға арнайы тарту еткен. Осыған қарап-ақ америкалық элита да өз тарапынан "мұрттымен" байланыс орнатуға мүдделі болғанын аңғарамыз. Әлгі кітаптар бұл арада "орамал тон болмайды, жол боладының" деген ишараның рөлін атқарып тұр.

Сонда мұның түпкі мәні неде? Кәрімнің көңілін табуға тырысқандар нені көздеді? Ілгеріде айтқанымыздай, алыс құрлықта Мәсімовтің мәселесіне бей-жай қарамайтын мықты лобби бар. Мәсімовке кімдер араша түсуде?

Бұл туралы зерттеудің 2-ші тарауында кең-молынан сөз етеміз. Арнаға тіркеліп алыңыз👇

https://t.me/dalainside

🔥 "Мәсімов Ақорданың жертөлесінде жатты...". ҰҚК-ның экс-төрағасын қорғаштап отырған америкалық лоббист жайлы не білеміз?

Dalainside Мәсімов ісіндегі қалтарыста қалған нюанстерге үңіледі.

Алғашқы тарауда 👆 "мұрттының" АҚШ-та тіркелген баспа үйін басқарған, әрі осы жерден шыққан Мәсімовтың кітаптарын таратумен айналысқан Ксения Крупенко туралы айтқанбыз.

Оның Кәрімнің адамы екенінде күмән жоқ, әйткенмен Мәсімовтің ісіне ықпал етуге Крупенконың саяси салмағы жетпейді. Бұл миссия - оған қарағанда әлдеқайда көлемді калибрлерге, соның ішінде Ақ үйдің маңындағы саясаткерлерге жүктелген.

Соның бірі - АҚШ Мемдепартаменті мен Қауіпсіздік кеңесінің экс-қызметкері Дэвид Меркель. Кейбір дереккөздің мағлұматы бойынша Меркель Nazarbayev University директорлар кеңесіне де кіріп алған.

Трансұлттық компаниялардың лоббиімен айналысатын Меркельді өткен жылдың сәуірінде 💰 Шеврон компаниясы Қазақстан бойынша кеңесші етіп жалдапты.

Intelligence Online таратқан мәліметке сәйкес - Шеврон Мәсімовтің басынан бақ таяды деп күтпеген, елдегі ең ірі инвестор мен Ақорданың арасындағы келіссөзде Мәсімов делдал есебінде жүрген. Былайша айтқанда, мұнай-газ саласындағы ірілі-ұсақты түйткілдер "мұрттының" көмегімен реттелген.

Соған қарағанда Меркель Назарбаев әулетіне де бөтен емес.

Dalainside-қа белгілі болғандай karimmassimov.com сайтының "админі" де осы кісі. Сайттың қазақ-орыс нұсқасы жоқ, тек ағылшын тілінде тарайды. Тіркелген жері - 🇺🇸 Аризона штаты, Феникстің іргесіндегі Скоттсдейл дейтін шағын шаһар. Дәл осы жерде Меркельге тиесілі Summit International Advisors компаниясы орын тепкен.

Меркельдің өткен-кеткеніне үңіліп жатпайық. Ақ үйдегі ықпалдылармен әмпей-жәмпей екенін ілгеріде айттық. Бізге оның қазіргі риторикасы қызық.

Ол Мәсімов қамауға алынғалы Жаңа Қазақстанды жатпай-тұрмау жамандаумен келеді. Айтуынша, Мәсімовтың тұсында Ақорда АҚШ пен Батыстың, Қытай пен Ресейдің бабын тауып, сыртқа саясатты сауатты жүргізген. Қазақстандағы президент сайлауы сүреңсіз өткен, саяси реформа жүргізуге серт берген Тоқаев косметикалық өзгеріспен шектелген. "Мұрттыны" қуғын-сүргінге ұшырату арқылы өз репутациясын ойсыратқан.

"Ақорданың қолында оның Қаңтар оқиғасына қатысы барын растайтын айғақ жоқ. Мәсімов Қауіпсіздік кеңесінің отырысы аяқтала салысымен іле-шала қамауға алынды. Аш-жалаңаш күйінде, ресми айып тағылғанша Ақорданың жертөлесінде жатты. Ас-судан айырды, табанынан сыз өтті, тиісті ем-дом көрсетілмеді...", - деп дабыл қағады Меркель.

DALA INSIDE оның сөзін сөйлеуден аулақ. Қазақтілді аудитория Мәсімовке әлдеқашан әділ бағасын берген. Ал Жаңа Қазақстан үшін Мәсімовтың қорғаушысы бас ауруға айналатын түрі бар. Меркельдің мәлім еткеніндей АҚШ Мемдепартаментідегі ықпалды тұлғалар ҰҚК-ның экс-төрағасына бостандыққа берілуін талап еткен. Бұлардың босағасын тоздырған Меркель "мұрттының" үгіт-насихатын жүргізгенге ұқсайды.

Меркельден тағы бар маңызды инсайд: Мәсімов Батыс пен АҚШ-қа сыйлы.

Dalainside-қа жеткен мәлімет бойынша алдағы уақытта Мәсімовті дәріптейтін ағылшынтілді медиа агенттіктер көбейеді. Америкалық лоббист Мәсімовті Қаңтар құрбаны ретінде көрсетуді көздейді.

❗️Анығы, алыс құрлықта Мәсімовтің мәселесіне бей-жай қарамайтын ықпалды күш бар. "Мұрттыны" қорғаштаған Меркель кімдердің алдына барды?

Бұл туралы зерттеудің 3-ші тарауында кеңінен сөз етеміз. Арнаға тіркеліп алыңыз👇

https://t.me/dalainside

⚡️ Жастар сөйлей бастады! Олар Жаңа Қазақстанда өмір сүргісі келеді...

Елімізде Мәжіліс пен мәслихат сайлауына түскелі отырған жас кандидаттарды қолдайтын "Жастар үні" блогы құрылды.

Бұл туралы журналистер Ерқанат Көпжасар, Ақбөпе Тәңірберген, Нұрсұлтан Құрман және Мәжілісі депутаттығына үміткерлер Яков Федоров пен Мақсат Халық жария етті.

"Ашық алаң" саяси ток-шоуының жүргізушісі Ерқанат Көпжасар айтуынша ұйымның қатарына жас кандидаттарды қорғаймын, қолдаймын, кеңес беремін деген белсенді жастар еш кедергісіз кіре алады.

"Мақсатымыз – халық қолдауына ие белсенді жастарды Мәжіліс пен мәслихат сайлауына қатысуға шақыру", - дейді ол.

Танымал блогер Яков Федоров қазақстандық жастарға қатысты стереотиптерге тоқталды:

"Жастар саясатқа қызықпайды деген стереотип бар, алайда бұл олай емес.

Бұған дейін жастарда мүмкіндік пен таңдау болмады. Қазіргі уақытта кез келген азамат өзін-өзі ұсына алады.

Ең бастысы – жастар өзгеріс енгіземін деген шын ниетімен бара жатыр", - деді ол.

Экономист, Мәжіліс депутаттығына үміткер Мақсат Халық партиялардан жасалып жатқан қолдауға тоқталды.

"Шыны керек, бізді бірде-бір партия қолдап жатқан жоқ, "Аманат", "Ауыл", "Республика" партиясы болсын. Сондықтан да, қазіргі уақытта өзімізді ұсынып, болашаққа үлес қосамыз деген ниет бар.

Әрине, өңірлерде әділетсіздік орын алатын шығар, бірақ өзгерістерді өзіміз жасап, Қаңтардан бастап айтылып келе жатқан 🇰🇿 "Жаңа Қазақстанды" бірге құру керекпіз", - деп атап өтті.

"Жастар үні" жас кандидаттарды қолдау блогы – өз-өзін бір мандаттық жүйемен ұсынғандарды да, партия атынан ұсынылып отырғандарды да бөліп-жармай қолдауға дайын. Бастысы 21-35 жас аралығындағы жастар санатына жататын азаматтар болуы тиіс.

#ақылынегізде

🏦 Jusan bank әдеттегі жұмысын жалғастыра береді

"First Heartland Securities" акцияларына Алматы қаласы Бостандық аудандық сотының шектеу қою банк қызметіне кедергі келтірмейді.

🇰🇿 Қазақстан Республикасы Бас Прокуратурасының мәлімдемесінде айтылғандай, Jusan тобы құрылымдарының біріне қатысты азаматтық талап-арыз қаралуда. Оның аясында акцияларды уақытша шектеу сынды стандартты рәсімдер мен процессуалды әрекеттер жасалды.

"Jusan bank" АҚ баспасөз қызметі азаматтық талап тек Банктің шетелдік акционерлеріне қатысты екенін және Банк қызметіне, сондай-ақ серіктестермен немесе халықаралық корреспондент-банктермен, халықаралық төлем жүйелерімен жасалатын қарым-қатынасқа әсер етпейтінін алға тартады.

Банк әдеттегідей еш шектеусіз жұмыс істей береді.

Jusan Bank тікелей немесе жанама түрде де жауапкер немесе соттасып жатқан тарап болып табылмайды. Сондықтан Банкке ешқандай санкциялар қолданылмайды.

Jusan Bank және оның активтері Қазақстанда орналасқан. Банк қаржылық жағынан тұрақты. Ол Қаржы нарығын реттеу мен дамыту агенттігінің барлық нормаларын асыра орындап отыр.

Сондықтан Бас Прокуратура да "Jusan" тобына қатысты арызының Jusan Bank қызметіне қатысы жоқтығын атап көрсетті 👉 www.gov.kz

Jusan Bank өз қызметін әдеттегідей жалғастыра береді.

Клиенттер алдындағы барлық міндеттемелер орындалады. ҚР Қаржы нарығын реттеу мен дамыту агенттігі де қаржы институтының тұрақтылығын және банктің барлық заң талаптары мен пруденциалды нормативтерге сәйкестігін растады 👉www.gov.kz/memleket

https://t.me/dalainside

🇰🇿🇺🇸 Тоқаев Байденнің мәлімдемесін мұқият тыңдады: Жаңа Қазақстан Киев пен Мәскеудің үстел басына отырғанын қалайды...

Dalainside Байденнің Варшавадағы жолдауын зейін қоя тыңдады. АҚШ президенті Кремль көсемі ұқсап толғатып жатпады. Ұзын-сонар баяндамадан бас тартқан Ақ үй басшысы Украинаға келгенде бір адым кері шегінбесін кесіп айтты. Компромиске жол жоқ, Мәскеу Батыстың алдында тізе бүгуі керек. АҚШ пен оның одақтастары Киевті жау қолында қалдырмайды.

Ал, Путиннің ақыры - Гаагамен аяқталады. Ресей диктаторы мен жанындағы жендеттер тегіс жазаға тартылып, түрмеде шіриді. Мұндай азаптан арылудың жалғыз амалы - Путинге опасыздық жасау, Батыспен ымыраласып, Кремль көсемінің қылмысын әшкерелеу.

"АҚШ-тағы әрбір үйдің маңдайшасында 🇺🇦 украин туы ілулі тұр", - деп түйіндеді сөзін Байден.

Батыс осы арқылы Кремльге күшті психологиялық месседж жолдады, қазақша айтқанда "артыңды қыс..." деген белгі берді!

Dalainside "Тоқаев Байденнің мәлімдемесін мұқият тыңдады..." деуі тегін емес. Жаңа Қазақстан Киев пен Мәскеудің тездетіп үстел басына отырғанын қалайды. Тараптардың бітімге келуіне шын мүдделі. "Кеселді түйін шешілсе" дейді.

Оның экономикалық сипаты бар:

Путиннің кесірінен Украина Ресейдің энерго-инфрақұрылымына байланған 🛢 мұнайдың барлық сортынан бас тартты. Cалдарынан Каспий құбыр консорциумы арқылы тасымалданатын (негізінен Теңіз, Қарашығанақ және Қашаған кен орнынан шығатын) мұнай Одесса портына жеткізілмейтін болды. Қазір бұл жердегі терминал шикізатты АҚШ-тан алады.

Украинадағы мұнай өңдеу зауыттары ресейлік инвесторлардан толық "тазарған". Киев қазақ билігімен ара-қатынасы тәуір деген "Лукойлдың" инвесторларын Одессадағы мұнай өңдеу зауытынан қуып шықты. Бұл өз кезегінде қазақстандық шикізатқа деген сұранысты шектеп, елдің экспорттық әлеуетіне теріс әсер етті.

Еліміздегі көмір өнеркәсібі де соғыстың кесірінен еңсе тіктей алмай отыр. Ресей соңғы 7-8 жылдың бедерінде қазақ көмірін Украинаға транзиттеуге кедергі келтіріп келеді. Соғыс басталғалы бері Қазақстан мен Украина арасындағы алыс-беріс 40 пайызға қысқарған.

Dalainside-тың тұжырымын Сыртқы істер министрі Мұхтар Тілеуберді де растап отыр. Әзірде ғана Португалияның Diário de Notícias басылымына сұхбат берген Тілеуберді Путин шапқыншылығы ел экономикасын есеңгіретіп кеткенін мойындады.

"Санкция? Қазақстан Батыстың шектеуіне қосылмайды. Бұл Ресейге жәрдемдескеннің белгісі емес. Еліміздің аумағын санкцияны айналып өтетін алаңға айналдырмаймыз...", - деп алып-қосты министр.

Айтқандай, Ресейдің "Дружба" құбыры арқылы Берлинге мұнай жөнелтпек болған қазақ билігі берілген уәдені созып, сөзбұйдаға салып отыр. Мұның саяси себебі бар ма? Оны алдағы уақытта анықтаймыз.

Арнаға тіркелуді ұмытпаңыз👇

https://t.me/dalainside

🇨🇳 Бүгіннен бастап Қытай әлемдегі "халық саны ең көп ел" статусын жоғалтты

2022 жылдың қортындысы бойынша Үндістан халқының саны World Population Review (WPR) мәліметтері бойынша 1,417 миллиард адамды құрады. Бұл Қытайдағы көрсеткіштен 5 миллион адамға көп. Ал Қытайдағы халық саны - 1,412 миллиард адам.

Қытайда 1959-1961 жылдардағы ашаршылықтан кейін халық саны алғаш рет азайып отыр. Және бұл азаю өз қарқынын күшейткен. Ол Компартияның алаңдаушылығын туғызды.

Жас отбасылардың бала туу көрсеткіші азайған және келіншектердің күйеуге шығуға деген ынтасы төмендеп кеткен. "Чайлдфри" пропагандасы да күшейген.

Еңбекке қабілетті адам санының қысқаруы Қытай экономикасына соққы болып тимек. Жұмыс күшінің құны артып, халықаралық компаниялар өз өндірісін Қытайдан Үндістан, Бангладеш, Индонезия мен Вьетнам сияқты жұмыс күші көп, әрі арзан елдерге ауыстыруы мүмкін. Бұл өз кезегінде әлемдегі логистика картасын өзгертеді.

Қазақстан экономикасы үшін Қытай экономикасының өсе бергені тиімді. Себебі, ондағы тұтынудың артуы біздің экспорттық табыстарымызды қамтамасыз етіп келді. Ал Үндістанмен аса қатты байланысымыз бар деуге келмейді. Себебі, ортақ шекара жоқ.

https://t.me/dalainside

📈 Базалық ставка: түсе ме, түспей ме?

Бүгін Ұлттық Банк базалық ставка бойынша кезекті шешімін жариялайды. Қазіргі деңгейі 16,75%. Және біздің ойымызша ол өзгеріссіз қалады.

Инфляциялық күтулер деңгейі төмендесе де, қаңтар айында нақты инфляция құламаған. Сондықтан жоғары базалық ставканың эффектісі әлі білінген жоқ. Дәл қазір ставканы төмендету оған дейін жасалған барлық жұмысты бұзып тастайды және біз инфляцияны ауыздықтай алмай қаламыз.

Кеше биржада ұлттық валюта аздап әлсіреді. USD/KZT жұбының орташа бағамы бір долларға 448,99 теңгені құрады. Оның алдындағы бағамына 2,13 теңге қосқанын көрдік. Биржа үшін салық аптасының әсері аяқталды деуге толық негіз бар. Себебі, долларды сату көлемі 88,7 миллион долларға дейін төмендеді. Оның алдында биржада күніне 130 миллион доллардай сатылып келген еді.

UPD. Ұлттық Банк базалық ставканы сол 16,75% межесінде қалдырды

https://t.me/dalainside

🏥 Биылдан бастап Қазақстанда медицина орталықтары жабыла бастамақ

Коммерциялық медицина саласын банкроттық күтіп тұр. Ulagat Consulting Group жүргізген зерттеу 2023 жылы саланың басым бөлігінің банкротқа ұшырау қаупін көрсетеді.
Өйткені, медицина қызметкерлерінің жалақысын көтеру мәселесі мемлекет тарапынан жеткілікті қаржыландырумен қамтамасыз етілмеген. 2020-2021 жылдары медорталықтардың жалпы шығынында жалақы үлесі 51-52 пайызға жеткенде, мемлекеттің медицинаға деген шығындары өскен болатын. Мысалы, ГОБМП 36 пайызға, ал ОСМС 42 пайызға өсті.

2022 жылдан бастап мемлекет медицина қызметкерлерінің жалақысын тағы 25%-ға көтеруді талап етіп отыр. Бірақ ГОБМП, ОСМС тарифтерін ұлғайтпады. Сонда жекеменшік медорталықтар айлықты өз қалтасынан 25 пайызға өсіруі тиіс. Бұл ретте олардың жалақыға деген шығындары жалпы шығын үлесінде 67%-ға жетпек.

Ulagat Consulting Group жүргізген сауалнамаға сай, Қазақстандағы жекеменшік медорталықтарының 47 пайызы 2022 жылды шығынмен аяқтаған. Ал 2023 жылы шығынға бататын медициналық орталықтар үлесі 71,5 пайызға жетеді.

Олар жаппай жабыла бастаса, азаматтарды емдейтін жер таппайтын боламыз.

https://t.me/dalainside

💥 Путиннің арманы орындалады: Жаңа Қазақстан "газ одағын" құруға қадам жасады...

Qazaq Gaz ұлттық компаниясы "Газпромның" алдына өзі барды.

Біздікілер ресейлік монополиске 🇨🇳 Қытайға жетіп жығылатын жаңа газ құбырының құрылысын жүргізуді ұсынған.

Мәскеу мен Бейжіңнің арасын жалғайтын жаңа транзитті бағыт Қазақстанның аумағын басып өтеді.

Qazaq Gaz осының есебінен еліміздің шығыс өңірін газдандырып алмақ.

"Шығыс Қазақстанның территориясын түгел қамтитын транзиттік бағыт тек осы өңірмен шектеліп қалмай, оған жапсарлас орналасқан аймақтарға да септігін тигізеді. Жобаның кем-кетігі жоқ, екшеліп-текшелді, есеп-қисабы жасалды...", - дейді Qazaq Gaz-дағылар.

Ресейлік компания қазақтардың ұсынысын бірден қабыл алмай, ойланып-толғануға мұрсат сұрапты.

Есесіне ресейлік телеграм-арналар малақайын аспанға атып, алақай жаңалықты Путиннің кезекті жеңісіне балауда.

"Бұл келісім екі елдің Үкіметі деңгейінде әлдеқашан шешілген. Қазақтардың теріскей пен шығысты өз газымен қамтамасыз ететін қауқары жоқ. Әдеттегідей, біз оларға қол ұшын созамыз...", - дейді ресейлік пропаганда.

Батыс жаңарақта ғана "Газпромның" бірнеше топ -менеджерін санкциялық тізімге енгізді.

Dalainside мұны "газ одағын" құрудың бастамасы деп санайды. Бұл дұрыс па, бұрыс па дегенді оқырманның еркіне қалдырайық.

Айтқандай, бүгін Ресейдің "Дружба" құбыры арқылы қазақ мұнайының алғашқы партиясы 🇩🇪Германияға жөнелтілді.

"ҚазТрансОйл" 20 мың тоннадан асып жығылатын мұнайды "Дружбамен" қуалап әкеп, Польшадағы "Адамов заставасы" қабылдау пунктіне жеткізіп береді.

Ресей бұл транзит үшін тәп-тәуір төлем алады, әрі мұнай құбыры да қаңырап тұрмайды.

Ал, "газ одағының" жай-жапсарын алдағы күндері айтатын боламыз. Арнаға тіркеліп алыңыз👇

https://t.me/dalainside

🙅 Алматыдағы "Мәдениет" ықшамауданынан жер, үй сатып алу аса қауіпті

Алматыдағы "Мәдениет" ықшамауданындағы барлығы 836 гектар жерді мемлекет толығымен өз қарауына алмақ. Бас жоспар бойынша мұнда "Алматы-3" теміржол бекеті салынбақ. Қазір ондағы 525 үйдің иелері жанталасып жер телімдері мен учаскелерін арзан бағамен сата бастады. Бірақ жаңа қожайындарын үлкен проблема күтіп тұр. Себебі, мемлекеттің заң бойынша бекітілген ставкасы нарықтық бағадан әлдеқайда арзан.

Қала сәулетшілері "Алматы-2" вокзалын сүріп тастап, оның орнына "Мәдениет" ықшамауданында жаңа теміржолы вокзалын салуға шешім қабылдаған. Ол БАКАД-пен байланысатын болады. Сонда "Мәдениет" ықшамауданындағы Байжанов, Жансүгіров, Балқаш, Құрты, Мамыражай көшелеріндегі жерлер мемлекет қарауына өтуі тиіс.

Боралдай кентінен алыс емес "Мәдениет" ықшамауданы баяғыда "Рахат" ауылы деп аталып, Алматы облысы Қарасай ауданының құрамында болған. 2016 жылдардан бері Алматы қаласының "Алатау" ауданына қосылды. Сарапшылар, "енді бұл жерден арзан бағамен жер немесе үй сатып алатын адамдар кейін үлкен проблемаға тап болуы мүмкін" деп ескертіп отыр.

https://t.me/dalainside

🇺🇸🇰🇿Блинкен келе жатыр: Жаңа Қазақстан АҚШ-тың ықпалды шенеунігімен ауыр әңгіме өрбітеді...

Ақ үй санкцияға қосылмай, сайғақтап жүрген елдерге салмақ салғалы отыр. Бұдан былай 🇷🇺 Кремльге жылы қабақ танытқан елдермен әңгіме басқаша өрбиді. Dalainside осы туралы талдау жүргізген Bloomberg-тің мақаласын сатып алды.

"Кремльмен алыс-берісті үзе қоймаған елдерге кеңшілік жасайтын заман келмеске кетті. Санкцияға қосылмаудың амалын тауып, сан түрлі сылтау айтып үйренгендер бұдан былай АҚШ-тың қаһарына ұшырайды. Ресеймен арадағы экономикалық байланысты үдетіп, құлқыны ашылған бұларға таңдау жасау туралы талап қойылады", - деп жазады америкалық басылым.

Bloomberg-тың айтуынша американың Қаржы мин-інде істейтін бір топ шенді осы месседжді жеткізу үшін 🇹🇷 Түркия мен 🇦🇪Біріккен Араб әмірлігіне аттанған. Ақ үй идеологтары алдағы күндері Бейжіңнің өкілдерімен жүздесіп, "АҚШ пен Батыс санкциялық соғыстың келесі сатысына көшкенін" хабарлайды.

Dalainside мемхатшы Блинкеннің Орта Азия сапарында экономикалық әріптестіктен бөлек санкция мәселесі сөз болады деп топшылайды. Негізгі ауыртпалық - Астана мен Ташкентке түскелі отыр.

"Мемхатшы аймақтағы есеп-қисапты доллармен жүргізетін компанияларға ақпараттық-түсіндіру дәрісін өткізеді", - дейді Bloomberg бұл орайда.

Түсінгеніміз, АҚШ аймақ басшыларының саяси позициясына сабырмен қараса да, корпоративтік сектордың бейтарап ұстанымын кешірмейді. Аймақтағы қаржы институттары мен компаниялар Ресеймен арадағы коммерцияны кідіртуі немесе кілт үзуі тиіс. Әйтпесе, қолымен істегенді, мойнымен көтереді. Блинкен осыны айтуға келе жатыр. Неге?

"Ақ үй Ресеймен ауылы аралас, қойы қоралас елдердің басқыншы мемлекетке жәрдемдесіп, түрлі тұрмыстық (кіржуғыш, шаңсорғыш т.б) техниканы жеткізіп жатқанын біледі. Ресейдің Қорғаныс министрлігі бұлардың бойындағы чипті жұлып алып, қару-жарақ өндірісіне жұмсауда", - дейді Bloomberg.

❗️ Су жаңа санкция пакетін сүзіп шыққан DALA INSIDE келесідей қызықты мәлімет тапты.

АҚШ Ресей мен Беларуське құны 300 💲- дан асатын смартфондар мен жылыту пештерін, ыдыс-аяқ жуатын мәшіне және принтерлерді тасымалдауға тыйым салыпты. Құны 750💲- дан асатын тоңазытқыштар, желдеткіштер мен кондиционерлер де бұдан былай Ресей нарығына кірмейді. Әңгіме, тағы сол чипке тіреліп тұр.

Айтқандай, Батыстан қол үзгісі келмейтін қаржы институттары мен компаниялар санкцияның жаңа пакетіне сай қарамағындағы Ресей активі туралы мәлімет беруі тиіс.

Бізге жеткен ақпарат бойынша осы сапарда Блинкен Қаңтар трагедиясының егжей-тегжейін сұрап, Ақорданың не себепті ОДКБ көмегіне сүйенгенін білмек ойы бар. Ол бұл сауалға былтырдан бері жауап ала алмай жүр.

"ОДКБ - Ресейдің ашса алақанында, жұмса жұдырығындағы әскери құрылым. Қазақ билігі мұны біле тұра, қауіпті қадамға барды. Біз бұдан секем алып қалдық", - деген еді АҚШ мемхатшысы.

Блинкеннің сапары Кремль пропагандасының жамбасына батуда. Ресейдің Сыртқы істер министрлігі аймақ елдерін Ауғанстанмен қорқытып отыр. "Блинкеннің кө..еніне көпшік қоймаңыздар, жетегіне ермеңіздер. Олар ауған жерінің тоз-тозын шығарды. Америка әрдайым бір бармағын бүгіп жүреді", - дейді.

📌 C5+1 форматындағы Блинкен бастаған америкалық делегация мен Орта Азия Сыртқы істер министрлерінің кездесуі 28-ші ақпанда өтеді.

Бұл туралы әлі де айтамыз, арнаға тіркелуді ұмытпаңыз👇

https://t.me/dalainside

💥 Сырымбек Тауды сөйлеттік. Танымал кәсіпкер Қаңтар, ҚТЖ және қандастар жайлы айтты...

Respublica партиясының тең төрағасы, белгілі кәсіпкер Сырымбек Тау Dala экосистемасына қарасты Dalanews тілшісімен тілдесті.

Dalainside осы сұхбаттың lite нұсқасын арна оқырманының назарына ұсынады.

Кәсіпкер сайлаудан шеттелерін күтпеген. Науқанға қатысардан бұрын "Сайлау туралы" заңмен мұқият танысып шыққан.

"Мәжіліске үміткер кез-келген адам ел аумағында 10 жыл тұруы шарт. Қазақстанға келіп, тұрып жатқаныма биыл аттай 17 жыл. Сондықтан сайлаудан шеттетілем деген ой үш ұйықтасам түсіме кірмеді", – дейді Тау.

Respublica-ны құру туралы идея Айдарбек Қожаназаров екеуіне ортақ. Кейін бұларға блогер Бейбіт Әлібеков қосылған.
Таудың айтуынша, Жаңа Қазақстанның саяси кеңістігі Respublica сынды жаңа, тың ұйымға сусап отыр.

"Ақжол? Олар бізге бәсекелес емес. Олар бизнестің мүддесін мүлде қорғаған жоқ, мұны бәрі біледі", – деп сайлаудағы басты бәсекелесін түйреп өтіпті.

Сырымбектің сөзінен аңғарғанымыз, асығы алшысынан түсіп жатса, Respublica мәжілісте бизнестің сөзін сөйлейтін болады.

Сонда қандастардың мүддесі қайда қалды?

"Қандастардың арасынан заң шығарушы органда бір емес, бірнеше депутат болуы керек деп есептеймін. Сыртта жүрген қандастарға "елге көшіңдер" деген екі ауыз сөз жеткіліксіз", – дейді Тау.

Қаңтар оқиғасы Сырымбектей бір топ азаматтың саясатқа келуіне жол ашқан.

❗️ "Анық білетін дүнием – Қасіретті қаңтар өзім секілді жігіттердің саясатпен айналысуын жеделдетті. Қаңтар бізді ортақ мүддеге біріктіріп, күресуімізге негіз болды. Егер бұл оқиға орын алмағанда біріміз ерте, біріміз кеш саясатпен айналысар едік. Бірақ оның әсері бүгінгідей болмас еді".

Кәсіпкер Смайылов үкіметінің қымбатшылық үшін әкімдерді кінәлайтын саясатымен келіспейді.

"Шетелден өндірілетін халыққа қажетті тауарларды елімізге әкімдер әкеліп жатқан жоқ қой.

Қымбатшылық тежеуде теміржол саласындағы жемқорлықты түбегейлі жою керек. 🚂 ҚТЖ жемқорлықтың ұйығына белшеден батқан. Кәсіпкерлер ішкері Қытайдан тауарды шекарамызға дейін оңай, әрі арзан бағада жеткізеді.

Ал еліміздің шетіне келген тауарды қалаларға жеткізуде жең ұшынан жалғасқан 💸 жемқорлық жолыңды кес-кестей береді. Үкімет әкімдерді жазғырғанша, кеден мен теміржолдағы жемқорлыққа көбірек назар аударсын", – дейді Тау.

Respublica-ның тең төрағасы бұдан бөлек соңғы кездері жыпырлап көбейіп кеткен "мотиваторларды" сынға алыпты.

"Олардың дәрісін тыңдар алдында, әлгі адамның бизнесте қандай жетістікке жеткенін саралап алуы керек. Табысқа жетудің "ақылмандар" айтатындай құпиясы жоқ", – дейді кәсіпкер. Толық нұсқасы мына тұста: dalanews

Айтпақшы, арнаға тіркелуді ұмытып барасыз👇

https://t.me/dalainside

👏 Оптимист экономистер инфляцияны тым ерте жеңіп кеткенге ұқсайды

Айбар Олжаев "Қазақ елі инфляция нәубетін еңсере бастады" деген фейсбук сараптамасында Ұлттық Банктің базалық сценарийі бойынша биылғы жылдық инфляция 9-12 пайыз болуы керек деп жазады. Және оның үш факторын келтіреді.

Бірақ сарапшы базалық сценарийге ғана сүйеніп, басқа факторларды елемегенін, әлде әдейі жасырып қалғанын көріп отырмыз. Мысалы, 2023 жылғы қаңтарда жылдық инфляцияның өсуін жалғастырып, 20,7%-ды құрағанын неге айтпаған?

Оның ішінде қымбаттауы 25,7%-ға дейін жеткен азық-түлік өнімдері проблемасының шешімі де тілге тиек етілмеген. Үкіметтің инфляцияны ауыздықтаудағы рөліне баға берілмеген.

Ия, айлық инфляция төрт ай бойы баяулауын жалғастырды. Бірақ, айлық инфляцияның төмендегеніне қарамастан, ол бәрібір орташа тарихи мәндерден жоғары деңгейде қалыптасып отыр. Бұл жағдайда қалайша "біз инфляцияны жеңдік" деп жар салып жазуға болатынын түсінбедік.

Экономикада бәрібір жоғары инфляциялық орта сақталғанын естен шығармау керек. Бүгінгі күтулер ертең өзгеріп кетуі мүмкін.

Ұлттық Банк төрағасы Ғалымжан Пірматовтың сөзі бойынша, биылғы қаңтарда Қазақстанда нақты жалпы ішкі өнімнің өсу қарқыны өткен жылғы төмен база есебінен 5,6%-ды құрады. Тауар өндірісі 2,3%-ға, қызмет көрсету саласы 7,6%-ға өсті. Тұтынушылық кредиттеудің өсуіне, жоғары инфляциялық күтулерге орай азық-түлікке жатпайтын тауарлар саудасының өсуі сақталуда. Бұл азық-түлікке жатпайтын импорттың артуына әкеледі.

https://t.me/dalainside

🚝 LRT: ел бюджетінің жаңа насосы

Астанадағы LRT онсыз да дефициттен көз ашпайтын Қазақстан бюджетін әбден зорықтырмақ.

2023 жылы LRT құрылысын жалғастыруға республикалық бюджеттен 50 миллиард теңге бөлу жоспарланды. Бұл шешім республикалық бюджет комиссиясының отырысында бекітілді. Енді жоба Парламент қарауына ұсынылуы керек, бірақ Мәжіліс құрамы дайын емес. Сондықтан жоба сайлаудан кейін талқыға түседі. Жоспар бойынша осы сәуір айында әкімдікке ақша аударылуы тиіс.

Қазір тұрған LRT бағандарын орнату үшін 475 миллион доллар кетті. Ол Қытайдан қарызға алынған ақша. Мемлекет ай сайын осы кредитті төлеп отыр. Онымен қоймай, LRT-ға өткен жылдың соңында 1 миллиард доллардан астам қаржы бөлінген еді. Енді 580 миллион доллар қажет. Сонда шамамен төлеп жатқан қарыздан бөлек 700 миллиард теңге кетеді. Қаржы осылай 50 миллиард теңге болып жырымдап беріліп отырады. Ал LRT-ның өзі 2024 жылы дайын болуы тиіс.
Шығын мұнымен бітпейді. Себебі LRT кіріс әкелмейтін транспорттық жоба. Оның жүріс-тұрысы: техникасы, вагондары, құрал-саймандары, тоқ, коммуналды шығындар, қызметкерлердің жалақысы - осының барлығын Астана әкімдігі субсидиялап отырады. Жыл сайын кем дегенде 20 миллиард теңге шығын әкеліп отырмақ.

Астана халқына пайдасы бар ма?

Дәл қазіргі жағдайында, яғни бірінші кезеңнің маршрутында дым пайдасы жоқ. Астанада есі дұрыс адам әуежай мен жаңа "Нұрлы жол" вокзалының арасында жүрмейді. Астана тұрғындарына оң жағалау мен сол жағалауды жалғастыратын, одан әрі қарай Қосшы жаққа баратын LRT керек. Себебі, таңғы мен кешкі уақыттарда осы бағытта көлік кептелісінен көз ашу мүмкін емес. Оның бәрі LRT-ның тек екінші кезеңінен бастап жоспарланған. Яғни, егер миллиард долларлап үздіксіз ақша құйған жағдайда, Астана тұрғыны оң жағалаудан сол жағалауға ЛРТмен тек 2030 жылдары ғана бара алады.

Сонымен, қортындысы не болды? 1 триллион теңге жұмсап салған LRT Астананың қарапайым тұрғынына керек емес болып шығады. Одан кейін, ЛРТ астаналықтарға шын қажет болуы үшін (оң жағалау - сол жағалау) тағы 1 триллион теңге жұмсау керек болады.

Сонда бір LRT бүкіл Қазақстан халқының бір жылдық пенсиясымен теңеспек.

https://t.me/dalainside

🏭 Электр жабдықтары саласының кәсіпкері Азат Қонысбек: Біз АЭС-тің керек екенін түсініп отырмыз

“Қазақстанның дамуы үшін атом электр стансасын салу керек. Мұндайда тәуелсіздік алғалы бері толыққанды жандандыра алмаған қайта өңдеуші саланы аяғынан тік тұрғызып, экономикамызды диверсификациялауға ақыры қол жеткізе алар едік”, - дейді, электр жабдықтары саудасы саласындағы кәсіпкер Азат Қонысбек.

Оның айтуынша, мемлекет басшысының өзі 2030 жылы Қазақстанда электр энергиясының жетіспеушілігі байқалуына алаңдап отыр. Кәсіпкердің ойынша, осы мәселені қазір шешуіміз қажет.
«Бұл біздің бүкіл халықтың мүддесіне қатысты. Өзіміздің АЭС-іміз болса, онда елімізде технологиялық ірі өндірістер ашылып, бұған дейін құра алмаған қайта өңдеуші саланы дамытып, экономиканы диверсификациялауға ақыры қол жеткізе алар едік», – дейді кәсіпкер.

Қазақстан қазір 4 компаниядан тұратын шорт-парақ жасақтады. Атап айтқанда, Ресейдің Росатом, Қытайдың CNNC, Оңтүстік Кореяның KHNP және Францияның EDF компаниялары. Барлығымен келіссөз бірдей деңгейде жүріп жатыр. Әзірге ешқайсысына да басымдық беріліп отырған жоқ.

Осы компаниялар ұсынатын реакторлардың қуаты шамалас: 1200 – 1400 МВт.

https://dalanews.kz/bas-takyryp/86848-vendor-tangdauda-qatelespeu-kerek-ka

💥 Жаңа Қазақстан Назарбаевты тағы бір құзіреттен айырады

Экс-президент жетекшілік ететін "Самұрық-Қазына" қорын басқару жөніндегі кеңес таяу арада тарап тынады.

Кеңес қордың бәсекелік иммунитетін көтеретін әрі дамудың тың әдістерін ұсынатын жұмыспен айналысқан.
Самұрық басшылығы "Кеңес қордың құрылымына кірмеген еді. Назарбаев бастаған қор мүшелері ақыл айтқаны үшін ақы алған жоқ", – дейді.

Ұлттық экономика министрлігі Кеңесті қысқартып тастау үшін қолданыстағы заңнамаға өзгеріс енгізгелі отыр.

❗️ Айта кетелік, қорды ұзақ уақыт бойы Назарбаевтың ет жақыны Ахметжан Есімов басқарған болатын. Тоқаев оның тұсындағы "Самұрықты" талай мәрте сын садағына алып, мемхолдингілерден халыққа қайыр болмай тұрғанын айтқан.

“2007-2018 жылдар аралығында мемхолдингілерге 7 трлн теңге бөлінді. Бұл үлкен ақша. Ел оның өтеуін көрді ме? Есеп комитеті бұларды тексере келе біраз шикілік тапты. Мемхолдингілердің жұмыс алгоритмі бір-біріне ұқсас, штат саны ұзынсонар.
Бір ғана “Бәйтеректің” әкімшілік шығыны 54 млрд теңгені құраған, оның 24 млрд-ы жалақыға жұмсалған”– деген-тұғын Тоқаев Қаңтардың алдында.

Бұған бұлқан-талқан болған Есімов экс-президенттің алдына барған.

“2019 жылы қордың таза табысы 1 трлн 256 млрд-ты құрады. 922 млрд теңге көлемінде операциялық табыс таптық. Бұл белгіленген жоспардан 38 пайызға артық. Сіз берген тапсырманы асыра орындадық”, – деп есеп берген еді Ахметжан мырза.

Алайда сол жылғы табыстан ел бюджетіне тек 190 млрд теңге аударғанын айтпай кеткен.

Айтқандай, арнаға тіркелуді ұмытпаңыз👇

https://t.me/dalainside

⚡️ “Ауыл” партиясының мүшесі Қошановтың алдында “Amanat” жайлы пікір білдірді

Ринат Зайытов, Мақсат Толықбай бастаған "аманаттықтар" Сыр өңірінде жүр. Күріш өңдейтін "Жан Арай" зауытына барған партия мүшелері жұмысшылардың талабын тыңдады.

❗️Ашық әңгіме барысында егін суаратын су тапшылығы, субсидиялау жүйесіндегі және тағы басқа да мәселелер талқыланды.

Кездесуге қатысқан “Ауыл” партиясының мүшесі “Amanat-тың” сайлауалды бағдарламасына оң баға берді.

#әріптестікнегізде

💥Перуашев: Бізде байлар және кедейлер бар! Орта таптың орны ойсырап тұр...

"Ақжолдықтар" осы алшақтықты жойып, middle class-тың қалыптасуына күш салмақ.

Ақтөбе облысы, Қобда ауданында жүрген "Ақ жол" демпартиясының төрағасы Азат Перуашев жергілікті тұрғындармен жүздесуде Жаңа Қазақстанға салмақ сала сөйледі.

"Саяси жүйеге түбегейлі өзгеріс қажет. Бұл өзгерістер елдің әл-ауқатын арттыруға тиіс.

"Ақ жолдың" миссиясы – әрбір азаматтың еркін дамуына жағдай жасау, оның құқығы мен бостандығын құрметтеуге, халықтың тұрмыс деңгейі мен өмір сапасын көтеруге бағытталған. Біздің партия Қазақстанның экономикалық, әлеуметтік және саяси өрлеуі үшін қызмет етеді, – деді Перуашев.

Партияның белді мүшесі Қазыбек Иса "Ақ жолдың" Алаш қозғалысының ізбасары екенін, қазақ қоғамын еуропалық жолмен жаңғыртуды, өркениеттің озық жетістіктерімен ұлттық мүдделерді тоғыстыруды мақсат еткенін атап өтті.

Басқосуда партия атынан саяси додаға түсіп жатқан кандидаттар "Ақ жол" партиясының саяси бағдарламасын таныстырып, Мәжілісте атқарылған жұмыстарға тоқталды.

Бағдарламаның негізгі "6️⃣ қағидатын" атаған ақжолдықтар жемқорлықпен күрес, әлеуметтік әділеттілік, ауылды ипотекалық несиелендіру, ауыл жастарын қолдау және медициналық сақтандыру бойынша жиналғандардың сауалдарына жауап берді.

Бұдан кейін Ақтөбе қаласына ат басын бұрып, осында орналасқан "Атамекен" кәсіпкерлерімен кездесті. Перуашев жиында кәсіпкерлерді толғандырған мәселелерді көтерді.

"Ақ жол" – кәсіпкерлер мен отандық өндірушілердің өкілі. Біз бизнестің мүддесін қорғау үшін жұмыс істейміз.

❗️Бүгінде елдің ең үлкен мәселесі – бай мен кедей арасындағы алшақтық. Бұл мәселені толыққанды орта тапты қалыптастыру арқылы шешуге болады.

Жаңа Қазақстанда бизнестің жұмысына кедергі келтірілмеуі керек. Мақсатымыз – сіздер сияқты өз ісін дамытып, отбасын асырап, жұмыс орындарының ашылуына үлес қосып жүрген азаматтарымызға қолдау көрсету, – деді Азат Перуашев.

Жиынға қатысқан қауым "Ақжолдың" саяси бағдарламасын қолдап, бизнеске қолайлы орта жасауға және әділ салық төлеуге ықпал ететін жаңа заң әзірлеуде ШОБ мүддесін ілгерілетіп отырғаны үшін "Ақ жол" демпартиясына алғыс айтты.

Партия мүшелері Ақтөбе халқын, 19 наурызда "Ақ жол" демпартиясын қолдау үшін сайлау учаскелеріне келуге шақырды.

#әріптестікнегізде

https://t.me/dalainside