فتت الكلام المهم وقعدت نقرا في يلي مكتوب بالبيرو 🤣🤣

سلام عليكم ورحمه الله وبركاته.

رحلتي بدت زي أي طالب طالع من الثانوية بنسبة عالية، خشيت الجامعة ما نعرف حد بكل، والغربة النفسية كانت واعرة. طريقة القراية في الكلية غير الثانوي بكل؛ الدكتور يشرح بسرعة ويقرا من الشيت، وأني ما نندريش لا على كورسات ولا على منصات.

في نصفي السمستر الأول كليت على راسي لأن طريقة القراية كانت جديدة عليا وما عرفتش نقرا بروحي. بعدها تعرفت على قروب متع قراية ومكتبات، خشيت معاهم وبديت نقرا، بس القروب هذا كان السبب اللي قريب خلاني نسيب الطب بكل.



سمعت بالكورسات والمنصات، اشتركت في المواد كلهم، وشدّيت و تنيت ركابي ولحقت روحي. صفّيت موادي كاملة في الوقت اللي هلبا سحبوا ملفاتهم، صح كانت أقل نسبة نجيبها في حياتي، بس أصرّيت نكمل.

في السمستر الثاني، قريت كل يوم مع نفس القروب، وجبت درجات ممتازة في النصفي، وفرحت وحسيت إن حلمي بدي يقرب.



يوم من الأيام في مكتبة البشري، الشباب قعدوا يحسبولي في النسبه قالولي: "حتى لو سكرت باقي المواد فل، نسبتك ما تفوتش 70%، والبشري العام اللي فات طالعة بـ 80% وبدا الضحك و التسهويك زعميتك بصاره: "المفروض قريت من الأول"، "الطب مش لكل حد"، "امشي خش خاص ولا تمريض ولا بيطرة" (مع احترامي الكامل للتمريض والبيطرة لأنهم أساس المجتمع، بس حلمي أني كان بشري). كلامهم تحسسته هلبا، وكل ما نفتح الشيت نذكر كلامهم ونوقف.

شفت إعلان في التليجرام كانت عباره عن ورقه أو تعهد إنك تقدر تعاود التمهيدي من الأول بشرط تسيّب أكثر من 3 مواد، ولو فشلت تنطرد. من غير ما نندّم أو نقول لي حد، اتخذت قرار حاسم ما خشيتش باقي الامتحانات باش نعاود السنة ونضمن البشري.

الصدمة وين؟ بعد فترة اكتشفت إن الكلية فتحت القبول للبشري بـ "طلب كتابي" حتى للي جايبين 50%! و فيه جماعه من القروب اللي كانوا يقرو معايا خشو بطلب أني هني جاني ذهول ونفسيتي خشت في حيط لأن ضحيت بسنة كاملة.

رضيت بما كتبه ربي، وتوكلت عليه، وقريت من جديد بشغف وإصرار... والحمد لله، اليوم أني طالب في الطب البشري - دفعة 59 ومستمر في رحلتي

رسالتي ونصيحتي ليكم :

ما تستسلمش: كل ما كتبه ربي خير، حتى لو شفته في وقت صدمة.

ما تخليش حد يحبطك: كلام الناس ما يحددش قدراتك ولا حلمك، وما تسمعش للمثبطين.

تنظيم الوقت: قراية الجامعة تبي تنظيم وقراية أول بأول، مش زي الثانوي تماماً.

استعين بالعوامل المساعدة: ما تاجلش حاجه، و استغل الكورسات، المنصات، اليوتيوب، والمراجع باش تسهل على روحك.

أخوكم: علي الخمسي

شباب زي الورد بدو يكتبو ف medical student 🙂‍↔️

🇦🇺🔥 حلقة مختلفة… لأن الطريق هذه المرة ما كانش مباشر.

من جامعة طرابلس إلى منحة تشيفنينغ وماجستير في شيفيلد، ثم AMC والعمل الطبي في أستراليا.

مع د. صفاء الرائس بنحكوا على:
الطريق لأستراليا، الـAMC، الـPrevocational Training، البحث العلمي، الطب النفسي والأعصاب، وشن يحتاج الطبيب الليبي باش يبدأ صح.

🗓 الخميس 3/9
⏰ 1:30 ظهرًا بتوقيت طرابلس

من ليبيا إلى العالم… رحلة واحدة ممكن تغيّر مستقبلك. 🌍✈️

حلقات ممتعة وشيقة مليئة بالشغف ليكم يا دكاترة المستقبل🌎🩺

مع ان الشعب سلبي والدولة مهمشة للطب والدكاترة

الا ان الدكاترة وطلبة الطب مع كل الاجواء المشحونة والضغط معبيين جرعة امل وتفاؤل وايجابية وحب للمساعدة💗

▪️صارحني لتلقي النقد البناء بسرية تامة

▫️ هنا يمكنك ارسال اي رسالة لي , انا مستعد لمواجهة الصراحة 😅 .
-

الدفعة 61
أناتومي مقدمه
الشيت الأول في المنهج
💚🧡💚