陳虹秀

#致一直還在堅持的人

琴日睇到一位朋友喺獄中嘅呼籲，突然覺得自己心底入面好似好多嘢想分享，但又好似唔知可以講乜。面對香港嘅未來，走或留低都唔係容易抉擇，因為如果有人因為留低而承擔沉重後果，無人想見到。不過，睇住唔少朋友一個又一個離開，睇住政權不斷地用所有方法趕盡殺絕，滴水不漏，要打散晒所有公民社會嘅連結，有時又真係好灰，唔知大家日後可以點樣連結同彼此支援，因為大家依家都步步為營。即使盡量做到幾多就幾多，但又唔知道可以令幾多香港人繼續謹記初心同初衷，大家會唔會慢慢遺忘。有時真係覺得好攰，因為戰友好似越嚟越少，一日24小時又唔夠用，但需要支援嘅被檢控人士又有好多。

喺呢晚竟然又喺 #ERROR自肥企画 得到提醒，多謝 #無限制OT編集團，令我明白喺唔同崗位都可以有嘢可以做。當一個整蠱人嘅陷阱用兩年時間去諗，爭取民主嘅工程必定需要更多時間去諗點做。當我哋未搵到屬於自己嘅出路前，我哋可以做嘅嘢就係 #堅持，繼續堅持嘗試運用自己嘅能力、經驗同專業去守護歷史、真相、對人和對大自然嘅良知。只要我哋堅持落去，無論我哋身在何方，一定可以用生命影響生命，令我哋或我哋嘅下一代有機會追夢成功。

一個也在堅持的香港人