#CU1738
「覺悟」
大家好，我係中大嘅被捕同學，被告暴動。
前幾日睇梁天琦同811轉暴動嘅判決，覺得有啲sad，因為聞到自己離入冊越嚟越近嘅味道，未來可能真係有六七年要喺監獄度過。Sad 下sad下有一種新諗法。其實香港人係咪要有一種覺悟？
當你選擇投身抗命，反抗暴政嘅時候，你所選擇嘅唔只係一種政見，而係一種摒棄正常人生活嘅覺悟。所謂做黃絲，唔理你嘅角色係後到和理非定係金主，就要有心理準備，你餘下嘅人生不斷進出監獄只係一種日常。

點解咁講？因為極權對任何異見者唔會有任何容忍，只會越來越誇張無理咁打壓，條底線只會越嚟越低，唔會有任何常理存在。幾年前本民前係港獨，而家泛民就等於港獨，過幾年後支持一國兩制，都已可能係港獨。
貼地啲講，你而家做鍵盤戰士會俾人拉（追擊TVB群組），捐錢會俾人拉（洗黑錢），貼文宣會俾人拉（刑事毁壞），唔好以為你唔上街就冇事，遲啲過咗23條你IG分享新聞都會俾人拉。反正而家喺內地，你有任何投訴，信基督教，錯口講錯一句野，都已經係叛國，夠你坐返十年八載。
係一個冇民主自由嘅社會，你揀得對抗極權，所謂人生規劃，天倫之樂，平淡幸福都已經同你再無任何關係。罰錢，虐打，坐監，威脅，綁架，虐待，軟禁，消失，「自殺」，呢啲先係你嘅日常。你睇吓李旺陽，劉曉波，陳光誠，佢哋就係我哋嘅未來。
所以其實唔需要為手足坐監感到痛心，坐監只係抗爭不可或缺嘅一部分。坐完出嚟繼續行落去。邊有唔需要受苦唔需要死人嘅革命？
我哋而家享受緊，視之為理所當然嘅平等自由權利，全部都係過去無數無名英雄嘅血同汗灌溉得來。
1910年代英國嘅女權分子係會俾人拉去坐監，1886年美國爭取標準工時嘅工會領袖俾人判死刑，廢除黑奴嘅美國內戰死咗五十萬人。Winter on fire 好好睇？烏克蘭93日內死咗125人。人類嘅歷史，制度嘅進步，就係由無數人嘅犧牲寫成。
香港人有冇呢個覺悟，為咗下一代視之為理所當然嘅民主自由，放棄自己生活係進步社會嘅假像，接受追求良知就冇可能有正常人生嘅事實，接受呢種地獄般嘅生活成為我哋嘅日常？直接啲問，香港人有冇覺悟，為香港付出所有？