陳志全（慢必）

【#快慢奸爸爹 ～ 5 / 3 / 21 】
【快必還押第178日 / 慢必還押第5日】

1）今日慢必好友C君（唔係嗰個C君）早上八點已經買齊物資排隊探訪，可能晨早關係，荔枝角唔算太擠迫，亦都撞到一啲47被告嘅家人朋友；

2）C君係第一批入探訪室嘅朋友，28號窗，慢必已經換上灰色囚衣，見到好友立即展露愉快迷人嘅笑容，當然關心佢瞓得好嗎？慢必話都可以啦，精神唔錯，只係暫時未有鬚刨，比較鬍鬚核突啲；

3）由於佢仲未批到私飯，依家食阿公飯，但係佢覺得OK喎，頂得順喎（慢必係一個好易滿足嘅人）；阿公早餐通常係碟頭飯，中午食粥再加麵包；（好似同平時我哋食飯嘅Pattern 有啲唔一樣）

4）慢必交代咗需要嘅物資、書籍和探訪安排嘅事宜，好友告知先前交帶已辦妥，也訂埋蘋果畀佢睇。但點知下午就收到電話，話轉咗佢去赤柱喎！激氣⋯⋯ 好彩士多老闆立即幫手退order，跟手去返赤柱再order；

5）搬咗去赤柱雖然係遠啲，但聽說比荔枝角乾淨、有秩序，所以不用擔心去赤柱的同伴；

6）由於快必入咗荔枝角半年，人力義工都知道點樣幫慢必安排打點，但也想特別感謝石牆花嘅義工朋友，好有心幫47家人安排物資，提醒佢哋探訪嘅流程同注意嘅地方，雪中送炭令到佢哋冇咁徬徨；

7）至於快必，家人今日十點已去到探訪室，排隊入物資嘅龍非常之長，好不容易入咗物資，要繼續等探訪，最後差唔多三個半小時才結束；見到不少47同伴嘅親友，都有互相慰問；

8）快必一貫精神爽利，佢訴說原本嗰個四正獨居單位，比尹兆堅佔據了，好慘！（其實唔關佢事嘅，都係職員指派嘅啫），而家搬咗去舊翼嗰邊，同胡志偉同倉，先幾日Gphone 喺荔枝角Staycation 都係佢鄰居；

9）佢同家人講，呢47個同伴入面，最淡定嘅就係胡志偉、Gphone、戴教授同佢四個。尋日宣判前，三個九東之友同戴教授坐埋一齊，又「同車」返荔枝角，快必覺得佢哋同自己一樣咁坦然面對；(𠵱，爭咁一個九東初選「大總監」聚舊喎）

10）Gphone同戴教授都轉會了，快必繼續同胡志偉做鄰居，早上放風改咗10:30，佢哋仲會喺1400呎嘅大球場，一起奔跑一起做運動。可能懲教署知道人力成立係因為當年不滿民主黨，所以才有呢個咁美妙嘅二人世界安排。佢哋兩個雖然冇抱頭相擁，但都相處融洽，互相支持；

11）快必問家人有冇留意到商台今朝先有報道關於初選47案，佢好嬲，問商台點對得住何佐芝先生嘅教誨：#商業考慮其次，#社會責任行先；

#寫信比快必慢必，可以寄去以下地址～人民力量快必收～九龍灣宏光道7號興力工業中心619室

#撑快必撑到底 #快必fastbeat好狠快