☀️☀️ ФАЗИЛАТЛИ ЎН КУН – ЖАННАТГА ЙЎЛ ОЧИҚ!☀️☀️

Эй, мўмин биродарим! Эй, мўмина синглим!
Агар сиз Зулҳижжанинг аввалги ўн куни қай даражада улуғ эканини чинакам ҳис қилганингизда, Расулуллоҳ соллаллоҳу алайҳи васаллам Рамазоннинг охирги ўн кечаларида қандай ибодат қилган бўлсалар, сиз ҳам худди шундай ибодат қилишга ғайрат қилар эдингиз.

Аллоҳ таоло бу ўн кунга қасам ичган:
«Вал-фажр! Ва лаялин ашр!»
("Фажр" сураси, 1-2-оятлар)

Уламоларнинг таъкидлашича, бу ердаги «ўн кеча» – айнан Зулҳижжанинг аввалги ўн кунидир.

Ушбу кунлар йилнинг энг фазилатли кунлари ҳисобланади.
Абдуллоҳ ибн Аббос розияллоҳу анҳумодан ривоят қилинган ҳадисда Расулуллоҳ соллаллоҳу алайҳи васаллам бундай дедилар: «Аллоҳ таоло ҳузурида ҳеч бир амал ушбу ўн кунликда қилинган амаллардан маҳбуброқ эмас…»
(Имом Бухорий ривояти)

Рўза тутиш фазилати

Ҳофиз Ибн Ҳажар раҳимаҳуллоҳ:
«Бу ҳадис Зулҳижжанинг ўн кунида рўза тутишнинг фазилатига далилдир.»
Имом Нававий раҳимаҳуллоҳ:
«Бу тўққиз кун рўза тутиш учун мустаҳаб кунлардир. Хусусан, 9-куни Арафа куни рўза тутиш жуда эътиборли амалдир.»

Арафа рўзаси – икки йиллик (кичик) гуноҳлар каффоратидир!
(Саҳиҳ ҳадис)

Зулҳижжа – исломий тақвимнинг сўнгги ойи. Бу ой:
✅ Қурбонлик ойи,
✅ Қурбон ҳайити байрам қилинувчи ой,
✅ Аллоҳ таоло муқаддас деб белгилаган, уруш ва қон тўкиш ҳаром қилинган ой.

Шундай экан, бу улуғ кунларни ғанимат билиб, кўп зикр қилайлик:
Аллоҳу акбар, Лаа илаҳа иллаллоҳ, Алҳамдулиллаҳ!

Расулуллоҳ соллаллоҳу алайҳи васаллам дедилар: «Шундай экан, бу кунларда такбир, таҳлил ва таҳмидни кўпайтиринглар!»
(Имом Аҳмад ривояти)

Ушбу ўн кунликда амал қилиш тавсия этиладиган амаллар:

✅ Нафл намозлар – ҳар бир ракатга мукофот бор, иншааллоҳ!

✅ Нафл рўзалар – хоссатан Арафа кунини унутманг!

✅ Кўп дуо қилиш – бу кунларда дуо рад этилмайди!

✅ Такбир, (Аллоҳу акбар) таҳлил, (Лаа илаҳа иллоллоҳу) таҳмид (Алҳамдулиллаҳи) – кўчада ҳам, уйда ҳам, ишда ҳам айтинг!

✅ Қуръон тиловати – қалбларни покловчи нур!

✅ Садақа ва хайриялар – камбағалларни хурсанд этинг!

✅ Силаи раҳм – қариндошлар билан алоқани тикланг!

Хулоса ўрнида

Эй азиз биродарим!
Йил мобайнида жуда кўп кунлар ўтиб кетди. Фурсатлар қўлдан кетди. Аммо Аллоҳ бизга яна бир неъмат – фазилатли ўн кунни насиб этди. Ундан унумли фойдаланайлик!

👉👉 Илтимос, ушбу холис эслатмани яқинларингизга ҳам улашинг!
Сизнинг битта улашишингиз – бошқа бир мусулмоннинг ундан баҳраманд бўлишига сабаб бўлади.
Иншааллоҳ, бунинг учун сизга икки карра ажру савоб ёзилади!
Валлоҳу аълам
Дониёр қори

📌 Эслатма:
Дарвоқе, бугун — 27 май, сешанба, 2025 йил
Исломий тақвим бўйича — 29 Зулқаъда, 1446 ҳижрий йил

http://myurls.co/doniyorqori