(ឃុំអង្កោល, ខេត្តកែប)៖ នាព្រឹកថ្ងៃអាទិត្យ ទី២១ ខែមិថុនា ឆ្នាំ២០២៦ នៅទីស្នាក់ការគណបក្សប្រជាជនកម្ពុជាឃុំអង្កោល ឯកឧត្តម ហូ ស៊ីវយ៉ុង ប្រធានក្រុមការងារគណបក្សចុះមូលដ្ឋានស្រុកដំណាក់ចង្អើរ បានអញ្ជើញដឹកនាំកិច្ចប្រជុំឆ្លងសេចក្តីព្រាងរបាយការណ៍បូកសរុបលទ្ធផលការងារប្រចាំឆមាសទី១ ឆ្នាំ២០២៦ និងលើកទិសដៅអនុវត្តបន្តរបស់គណៈកម្មាធិការគណបក្សស្រុក និងក្រុមការងារចុះមូលដ្ឋានស្រុក ដែលកិច្ចប្រជុំនេះ មានការអញ្ជើញចូលរួមពីសំណាក់ លោក ឆាង ឆៃ ប្រធានគណៈកម្មាធិការគណបក្សស្រុក លោក ហ៊ួរ មិថុនា និងលោកស្រី គឹម ចន្នី អនុប្រធានក្រុមការងារចុះមូលដ្ឋានស្រុក ព្រមទាំងថ្នាក់ដឹកនាំក្រុមការងារចុះមូលដ្ឋានឃុំ និងភូមិទាំង ១១ សរុបចំនួន ៧៣នាក់។

ក្នុងឱកាសនោះ ឯកឧត្តមប្រធានអង្គប្រជុំ បានពាំនាំនូវការផ្តាំផ្ញើសាកសួរសុខទុក្ខ និងសេចក្ដីនឹករលឹក ពីសំណាក់ ឯកឧត្តមកិត្តិសេដ្ឋាបណ្ឌិត ប្រធានកិត្តិយសក្រុមការងារ និងលោកជំទាវប្រធានក្រុមការងារគណបក្សចុះមូលដ្ឋានខេត្តកែប ជូនចំពោះសមាជិក សមាជិកានៃអង្គប្រជុំទាំងអស់ដោយសេចក្តីនឹករលឹក។

បន្ទាប់ពីបានស្តាប់ការអានរបាយការណ៍ពីអនុប្រធានក្រុមការងារ និងមតិគាំទ្រពីតំណាងក្រុមការងារឃុំទាំងពីររួចមក ឯកឧត្តម ហូ ស៊ីវយ៉ុង បានសម្តែងនូវការកោតសរសើរ និងវាយតម្លៃខ្ពស់ចំពោះសមិទ្ធផលការងារនានាដែលគណបក្សស្រុកសម្រេចបានក្នុងឆមាសទី១ នេះ។ ទន្ទឹមនឹងនោះ ឯកឧត្តមប្រធាន បានដាក់ចេញនូវទិសដៅការងារចលនាយ៉ាងម៉ឺងម៉ាត់ រួមមាន៖ ការបន្តចុះមូលដ្ឋាន និងចិញ្ចឹមចលនាជាប្រចាំ, ការពង្រឹងនិងពង្រីកសមាជិកបក្ស, ការជំរុញផ្សព្វផ្សាយប្រជាពលរដ្ឋមកធ្វើបច្ចុប្បន្នភាពអត្តសញ្ញាណប័ណ្ណ សំដៅដោះស្រាយសំណូមពរនិងបញ្ហាប្រឈមជូនប្រជាពលរដ្ឋទាន់ពេលវេលា។ បន្ថែមលើនេះ ក្រុមការងារបានសង្កត់ធ្ងន់លើការត្រៀមរៀបចំផែនការសកម្មភាពសម្រាប់យុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ នៅថ្ងៃទី០៦ ខែមិថុនា ឆ្នាំ២០២៧ និងការរំលឹកពីលក្ខណៈសម្បត្តិស្របច្បាប់របស់បេក្ខជនឈរឈ្មោះផងដែរ។

ជាមួយគ្នានេះ អង្គប្រជុំបានបង្ហាញនូវជំហរក្នុងការបន្តគាំទ្រ និងជឿជាក់យ៉ាងមុតមាំលើការដឹកនាំប្រកបដោយគតិបណ្ឌិតរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជាប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីនៃព្រះរាជាណាចក្រកម្ពុជា ក្នុងការស្វែងរកសន្តិវិធី និងកិច្ចការពារអធិបតេយ្យភាព បូរណភាពទឹកដីនៃមាតុភូមិ។ ភ្លាមៗបន្ទាប់ពីបានបញ្ចប់កិច្ចប្រជុំ ឯកឧត្តមប្រធាន ក៏បានបន្តដឹកនាំក្រុមការងារចុះអញ្ជើញជាអធិបតីក្នុងការដំឡើងស្លាកគណបក្សប្រជាជនកម្ពុជាថ្មីចំនួន ២ផ្ទាំង នៅទីតាំងយុទ្ធសាស្ត្រក្នុងឃុំអង្កោល ដើម្បីបង្កើនការផ្សព្វផ្សាយ និងបង្ហាញពីវត្តមានដ៏រឹងមាំរបស់គណបក្សនៅក្នុងដួងចិត្តប្រជាពលរដ្ឋមូលដ្ឋាន៕
...
ភ្ជាប់ទំនាក់ទំនងជាមួយយើង៖
Connect with Us:
🌐 Facebook
🌐 Telegram

(ក្រុងកែប)៖ នារសៀលថ្ងៃអាទិត្យ ទី២១ ខែមិថុនា ឆ្នាំ២០២៦ នៅទីស្នាក់ការគណបក្សប្រជាជនកម្ពុជាក្រុងកែប ឯកឧត្តម ហូ ស៊ីវយ៉ុង ប្រធានក្រុមការងារគណបក្សចុះមូលដ្ឋាន បានអញ្ជើញដឹកនាំកិច្ចប្រជុំបូកសរុបលទ្ធផលការងាររបស់គណបក្សក្រុង និងក្រុមការងារគ្រប់ថ្នាក់ប្រចាំឆមាសទី១ ឆ្នាំ២០២៦ ព្រមទាំងលើកទិសដៅអនុវត្តការងារបន្ត ដែលកិច្ចប្រជុំនេះ មានការអញ្ជើញចូលរួមពីសមាជិក សមាជិកាក្រុមការងារចុះមូលដ្ឋានក្រុងកែប សរុបចំនួន ៧៤នាក់ (ស្រី ១១នាក់)។

ក្នុងឱកាសនោះ ឯកឧត្តមប្រធានក្រុមការងារ បានពាំនាំនូវការផ្តាំផ្ញើសាកសួរសុខទុក្ខដោយសេចក្តីនឹករលឹកពីសំណាក់ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ប្រធានកិត្តិយសក្រុមការងារគណបក្សចុះមូលដ្ឋានខេត្តកែប និងលោកជំទាវ ចម និម្មល សមាជិកាគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកែប ជូនចំពោះអង្គប្រជុំទាំងមូល។

បន្ទាប់ពីបានស្តាប់របាយការណ៍បូកសរុបលទ្ធផលការងារដែលអានដោយ លោក ឃន វុទ្ធី ប្រធានគណៈកម្មាធិការគណបក្សក្រុងកែប និងមតិចូលរួមពី ឯកឧត្តម ទិត្យ ឫទ្ធីពល ប្រធានក្រុមការងារចុះមូលដ្ឋានសង្កាត់អូរក្រសា ព្រមទាំងមតិឯកភាពពីតំណាងក្រុមការងារសង្កាត់ទាំង៣ រួចមក ឯកឧត្តម ហូ ស៊ីវយ៉ុង បានសម្តែងនូវការកោតសរសើរ និងវាយតម្លៃខ្ពស់ចំពោះសមិទ្ធផលការងារដ៏ឆ្នើមដែលគណបក្សក្រុងសម្រេចបាន។

ជាមួយគ្នានេះ ឯកឧត្តមប្រធានបានដាក់ចេញនូវទិសដៅការងារចម្បងៗ រួមមាន៖ បន្តចុះមូលដ្ឋានចិញ្ចឹមចលនាជាប្រចាំ, ពង្រឹងនិងពង្រីកសមាជិកបក្ស, ជម្រុញការធ្វើបច្ចុប្បន្នភាពអត្តសញ្ញាណប័ណ្ណជូនប្រជាពលរដ្ឋ និងជាពិសេសត្រូវយកចិត្តទុកដាក់ខ្ពស់លើការងារបម្រើសេវាសាធារណៈ (សេវាតម្រូវការ និងសេវាសំណូមពរ) ជូនប្រជាពលរដ្ឋឱ្យបានល្អប្រសើរ ត្រឹមត្រូវ និងមានតម្លាភាពខ្ពស់ ស្របតាមគោលនយោបាយគិតគូរពីសុខទុក្ខរបស់ប្រជាជនជាចម្បង។

ទន្ទឹមនឹងនេះ ក្រុមការងារគ្រប់លំដាប់ថ្នាក់ បានត្រៀមលក្ខណៈរួចជាស្រេចក្នុងការរៀបចំផែនការសកម្មភាពសម្រាប់យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងប្រព្រឹត្តទៅនៅថ្ងៃទី០៦ ខែមិថុនា ឆ្នាំ២០២៧ ខាងមុខ ដោយបានក្រើនរំលឹកយ៉ាងហ្មត់ចត់អំពីលក្ខណៈសម្បត្តិស្របច្បាប់របស់បេក្ខជន។ លើសពីនេះ អង្គប្រជុំទាំងមូលបានសម្តែងនូវស្មារតីប្តេជ្ញាចិត្តយ៉ាងដាច់ខាត ក្នុងការបន្តគាំទ្រ និងជឿជាក់លើការដឹកនាំប្រកបដោយគតិបណ្ឌិតរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជាប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ក្នុងការថែរក្សាសន្តិភាព ស្ថិរភាពនយោបាយ និងការការពារអធិបតេយ្យភាព បូរណភាពទឹកដីនៃមាតុភូមិជាទីស្នេហាឱ្យបានគង់វង្សជានិរន្តរ៍៕
...
ភ្ជាប់ទំនាក់ទំនងជាមួយយើង៖
Connect with Us:
🌐 Facebook
🌐 Telegram