(ព្រៃឈរ)៖ នាព្រឹកថ្ងៃសុក្រ ទី២ ខែមករា ឆ្នាំ២០២៦ នេះ ឯកឧត្តម រាជ រ៉ា ប្រធានលេខាធិការដ្ឋាននៃក្រុមការងារគណបក្សប្រជាជនកម្ពុជាចុះមូលដ្ឋានស្រុកព្រៃឈរ បានអញ្ជើញនាំយកថវិកា និងសាររំលែកមរណទុក្ខរបស់ លោកជំទាវ ចម និម្មល សមាជិកាគណៈកម្មាធិការកណ្តាល អនុប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកំពង់ចាម និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកព្រៃឈរ ប្រគល់ជូនគ្រួសារសព លោកនាយចំណង់ សឿន សាលី  ជាមន្ត្រីកងរាជអាវុធហត្ថ អង្គភាពបញ្ជាការដ្ឋានកងរាជអាវុធហត្ថ ស្រុកសិរីសោភ័ណ ខេត្តបន្ទាយមានជ័យ ដែលបានពលីជីវិត កាលពីថ្ងៃសុក្រ ៧កើត ខែបុស្ស ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៦ ខែធ្នូ ឆ្នាំ២០២៥ ដោយហេតុការណ៍ប៉ះទង្គិចគ្នារវាងកងទ័ពកម្ពុជា-ថៃ នៅសមរភូមិជោគជ័យ ខេត្តបន្ទាយមានជ័យ។

ក្នុងឱកាសនេះ ឯកឧត្តម រាជ រ៉ា បានពាំនាំសាររំលែកមរណទុក្ខរបស់ លោកជំទាវ ចម និម្មល ដោយ លោកជំទាវ ពិតជាមានសេចក្ដីក្តុកក្តួលរំជួលចិត្ត និងសោកស្ដាយឥតឧបមា បន្ទាប់ពីបានទទួលដំណឹងថា លោកនាយចំណង់ សឿន សាលី បានទទួលមរណភាពក្នុងពេលបំពេញបេសកកម្មការពារបូរណភាពទឹកដីនៅតាមបណ្តោយព្រំដែន។

ក្នុងវេលាប្រកបដោយសមានទុក្ខដ៏ក្រៀមក្រំនេះ លោកជំទាវ ចម និម្មល សូមចូលរួមរំលែកទុក្ខជាមួយក្រុមគ្រួសារនៃសព និងសូមសម្ដែងនូវសេចក្តីសង្វេគប្រកបដោយអនិច្ចលក្ខណធម៌យ៉ាងជ្រាលជ្រៅ ព្រោះការបាត់បង់វីរកងទ័ព សឿន សាលី ដែលជាការបាត់បង់កូន ស្វាមី និងលោឪពុក ប្រកបដោយសង្គហធម៌ដ៏ឧត្តុង្គឧត្ដមចំពោះឪពុកម្តាយ ភរិយា និងកូនៗ ហើយក៏ជាការបាត់បង់នូវយោធិនដ៏អង់អាចក្លាហាននៃកងយោធពលខេមរភូមិន្ទ ដោយបានធ្វើពលិកម្មនូវសាច់ស្រស់ឈាមស្រស់ប្រកបដោយភាពមោះមុត នៅក្នុងបុព្វហេតុការពារអធិបតេយ្យ និងបូរណភាពទឹកដីដ៏បវរនៃកម្ពុជា។

ជាមួយគ្នានេះ លោកជំទាវ ចម និម្មល សូមឧទ្ទិសបួងសួងដល់ដួងវិញ្ញាណក្ខន្ធវីរកងទ័ព សឿន សាលី សូមឱ្យឆាប់បានយោនយកកំណើតកើតក្នុងសុគតិភពកុំបីឃ្លៀងឃ្លាតឡើយ។

ឆ្លៀតក្នុងឱកាសនេះ រាជ រ៉ា បានប្រគល់សាររំលែកមរណទុក្ខ និងថវិកាមួយចំនួនរបស់ លោកជំទាវ ចម និម្មល ជូនគ្រួសារនៃសពផងដែរ៕