كان في حديث ثاني دورته ملقيتاش

عموما كنت نعرف الحجامه و فوائدها و صراحة الحديث كنت نعرفه لعند الحجامة بس مع اني قاريه صحيح البخاري و مسلم و حلفظه منهم كم حديث

مش عارفه كيف ما انتبهتش

عموما جتني فترة قبل ما نفتح القناة بشوي مرضت مرضه قوية

وقتها كان جايه موجة فايروس برد قوية جدا لدرجة ان خدودي و وجهي كله اسود حرفيا

بدون مبالغه كانه حد ضاربني كف لين وجي قعد اسود تعرفو مكان الكدمه لما تحصلو خبطة قوية ( طلع بعدين في التهاب في الاذن الوسطى من البرد + مضاعفات عملية تصحيح حاجز انفي قديمة )

طبعا هيا عملية طبية مش تجميليه لاني لو ما درتهاش كنت حنفقد حاسة السمع بكل

برضو حرارتي منزلتش من 39 أو 40 و مكانش في حد يشيلني للعيادة ولا مستشفى

مش عارفه و الله من الي قالت لماما عليه بس جديات ربي يجزيها خير على نصيحتها

قالتلها خوذي كشيك صغير قسط هندي على كباية مية و عطيه لها مره في اليوم

أنا مشيت لدكتورتي الي دارتلي العملية بعد حصلت مواصلات بس برضو خذيتش الادوية و قعدت على القسط الهندي يومين ثلاثه بدون مبالغه قعدت كاني ممرضتش الاسوداد الي في وجي حول الصداع و ارتداد الالم حولو حرارتي نزلت كل الاعراض اختفيو

نحمد ربي انه مزادش اصابتي وقتها لانه كان يجي لكل حد بشكل وحده قريبتي سببلها شد عضلي من الالم في جسمها نين صارلها تمزق

بعدين بحثت عليه اكتشفت انه سنه و انه يدخل في تركيبات دوائيه

من فوائده يرفع المناعه و يحمي من السرطان عافانا الله و اياكم و ينظم عمل الغدد في الجسم ( بالذات الدرقية) يعني لو الغدد ناشطه أو خامله يردهم العمل الطبيعي متاعهم و ينظم السكر في الدم لمرضى السكر و في أحد الاحاديث علاج للشقيقه و الرعاف

جدتي تاخد فيه و عندها سكري و فعلا نزلها السكر من 200 الى 130 تقرببا

له فوائد واجد بكل غير هكي

خوذو كشيك صغير على كباية مية كبيره يوميا على الريق الافضل

من قبل ما نفتح القناة بكم شهر مداومه عليه و تقدرو تبحثو على فوائده اكثر

لو ما قدرتش تستصيغو طعمه لانه لاذع شوية حطو كم كشيك كبير قسط هندي في فازو عسل و حكطو كشيك كبير منه في كباية مية قديش مفيد

هوا هاذا الشي الي كنت نحكي عليه

Had vibes :-