خصوصا في مجال زي مجالنا ( في البرمجه مش مهم انك تكون ذكي قد ما انك تكون مثابر ) و المثابره و الشغف في الغالب خطان متوازيان

هاذا واحد من الاخطاء الي كنت ندير فيهم زمان و جديات خسروني وقت واااااجد و تعبوني

تخصلت منها اخر سمسترين بس و فعلا فرقت معايا

في فرق بين الشغف و الدافع و انا مننكرش ان الشغف كويس بس كثرة الاعتماد عليه تعطي نتائج عكسية

الدافع هوا الهدف الي انت تبي توصله و الطريق الي يوصلك له بالنسبه ليا انا عندي اهدافي الخاصه من مجالي و ان شاء الله خطوه بخطوه نوصلهم و الحمد لله وصلت مرحلة كويسه لحد الان

الدافع هاذا شي مستحيل يختفي و مستحيل ينضب ف لذالك لما تعتمد عليه في انجازاتك حتلقى نفسك ماشي صح و متمكن مهما كان مجالك

الشغف عباره عن احاسيس ومشاعر بان في عندك رغبة انك تدير شي معين تنضب فتره و تزيد فتره ف الاعتماد عليها شي حيدمرك لانا خلينا واقعيين الشغف لاغلب الحاجات الي لازم نديروهم مش موجود

نرجع و نقول الموضوع يرجع لتركيبنا النفسي كبشر دماغنا يميل للكسل و الامور الي لازم نديروهم في الغالب ياخذو وقت و جهد نفسي و الدماغ يميل لانه يخلي الجسم ميستهلكش طاقه في امور ميحفزش استجابة القتال او الهرب

امور حياة او موت بمعنى اصح

ف لذالك يبعد نفس عن الاشياء الي لازم نديروهم و هاذا الي يدير فيه الشغف

حلو لو ان الشغف تلاقا مع الدافع حيكون الناتج حلو و جبار بس لو كان الدافع مش موجود الشغف مفيش منه فايده حرفيا

استهلاك طاقه على الفاضي

شوفو ابسط طريقه انكم تتغلبو على حاجز الشغف انكم تحولو اي مشتتات

اول شي سوشيال ميديا و العاب و ياما حكيت على سبب الي يخليني نقول سيبو الالعاب بالذات الي زي ببجي و فورتنايت و هذينا

سوشيال ميديا ممكن في فترة قادمه لو تذكرت و حصلت فضوه نحكي ليش هيا تشتت الموضوع برضو يرجع لتجربه في علم النفس

ثاني شي شوف الاوقات الي تحس انك معندكش شغف لشي و اجبر نفسك انك ديره

مره و اثنين و ثلاثه دماغك حيقاوم بس بعدها حيقعد الشي هاذا عندك عاده

بس اول ما يتعود عليه دماغك حيقعد تلقائيا معش يلقى صعوبه في الموضوع و في احيان يقعد الشي هاذا ممتع بالنسبه له

هل انا نقول مترتاحوش لا هل نقول اجبرو نفسكم على شي متبوش لا

بس احيانا تحتاجو الاجبار هاذا عشان تتقدمو

خصوصا عشان حاجات مهمة زي المهمام اليوميه و القرايا و العمل