📣 Compañeiro, compañeira:

A CIG manifesta o seu apoio á mobilización convocada polos sectores pesqueiro e ecoloxista, baixo o lema «En defensa do noso mar», o vindeiro domingo día 21 de xaneiro, con saída ás 12 h. da Alameda compostelá. A central sindical súmase á denuncia da máis que «nefasta» e «incompetente» xestión da Xunta de Galiza ante o vertido dos pellet.

A CIG fai un chamamento a participar masivamente nesta mobilización para denunciar o desleixo, as mentiras, a manipulación e a incompetencia do goberno de Rueda, que pretendeu minimizar o impacto ecolóxico dos pellet para eludir a súa responsabilidade abocando novamente ao pobo a autoorganizarse para suplir o abandono da administración galega das súas responsabilidades.

A central sindical denuncia ademais a inacción do Estado español, ao que tamén acusa de incompetente, por eludir, ao igual que o PP, as súas responsabilidades e reclama para Galiza as competencias para poder decidir sobre as nosas costas, máis en casos como este. Xunto a isto, fai súas as reclamacións dos sectores convocantes e exixe tamén un urxente plan de apoio ao sector pesqueiro e un inmediato plan de actuación contra as verteduras.


Por iso, en defensa do noso mar, en defensa das nosas rías, maniféstate este domingo 21 en Compostela!