「試當真」九展開騷 附近反車封路大塞車
警員派駐場外及巴士站截查市民

跌咗嘢試吓唔好搵 跌咗嘢試吓唔好炆 跌咗嘢 試吓唔好急 跌咗嘢 試吓唔好執…跌咗張飛，唔好唔搵。

YouTuber「 試當真 Trial & Error」今日成軍一周年，同日九展舉行Live Show，分3pm同8pm兩場。之前佢哋推$10,000門票降價實驗，有13位幸運兒成功出價仲買到$10,000飛；降價至$1,000後，門票賣出1,550張。$10飛係完全冇機會出現。

一票難求，無論你係用一皮嘢定係$5,000買飛，都係想enjoy the show，不過，有啲意外，發生咗，例如，有觀眾係又嗌唔係又嗌，黃昏時份九展附近突然多警察截查途人，仲要九展出面啟祥道反車，一波三折。

首先係交通消息。九龍灣啟祥道往啟德隧道方向、近九展部份反車，行車線受阻，至下午5時18分左右，龍尾排到啟歷學校；而因為路面油污，啟德隧道往尖沙嘴方向管道內慢線曾封。至一個鐘之後，啟祥道先至完成清場，但往啟德隧道方向近九展一帶仍然多車。

睇個騷啫，唔使咁齊心嘛？有網民表示：「冇飛睇『試當真』都唔使攬炒啫！」有冇聽過 物理學嘅雙縫實驗？實情係 愛因斯坦都搞佢唔掂……

現場除咗多車，亦都多警。有觀眾發現，九展外有大批警員戒備，有警員截查途人，包括部份入場睇騷觀眾。下午4點左右，德福二期九展穿梭巴士站附近一帶，已有一豬一衝同多名警員，截查途人。有認真毛表示，每個入九展門口嘅人都會俾警員「眼望望」。也有人表示：「佢哋係保護演出成員同入場市民。」

另有苦主表示，佢睇3點場，觀眾興奮到係咁嗌——正確嚟講係「係又嗌唔係又嗌」。苦主話：「呢個舞台show嚟㗎，無字幕㗎。係咁嗌！係咁嗌！我同我朋友經常聽唔到台上表演者講咩囉。我唔係俾錢入嚟聽人嗌，我入場睇show㗎，唔該！」有人問呢位苦住係咪俾一皮嘢嗰位……

#試當真 #九展 #香港警察 #截查 #認真毛 #試當真一周年 #StarHall #channelchk