許瑋甯宣佈與邱澤結婚 晒超閃巨鑽婚戒

因為拍攝電影《當男人戀愛時》傳出緋聞嘅男女主角邱澤同許瑋甯，一直未有回應戀情，但許瑋甯今朝就喺ig突然宣佈佢哋已經結婚：「曾經說過，如果有好消息會跟大家分享的，這個好消息是，我們結婚了，謝謝所有人關心。」佢喺ig兩人嘅sweet爆合照，相中許瑋甯從後抱住老公，當然最閃嘅都係許瑋甯無名指上嘅鑽戒啦！

台灣傳媒報道，邱澤經理人表示兩人已經登記，但就未有透露幾時登記的：「這個我就保密，希望外界給他們一點空間」，只係話許瑋甯已成為「邱太太」，兩人計劃婚禮中。

許瑋甯同邱澤因為合作拍攝《當男人戀愛時》結緣，電影今年4月喺台灣上映。有網民之後喺許瑋甯分享嘅照片中發現，景色似邱澤喺汐止家中嘅窗景，因而傳出熱戀，但兩人一直未有承認關係。到今年10月初，邱澤憑《當》奪得《第23屆台北電影獎》最佳男主角時，喺台上話過︰「謝謝我的女主角許瑋甯。」當晚慶功宴上，兩人又被拍攝到並肩而坐，深情對望兼咬耳仔。兩人今日終於傳出婚訊，一眾網民都留言送上祝福。

#channelchk #許瑋甯 #邱澤 #當男人戀愛時 #結婚 #婚訊

動態結婚？政府禁辦婚禮彈弓手 兩日兩改准出席人數：
如果婚禮等得 都唔好太多跨家庭聚集

政府公佈新一輪社交距離措施後，大家除咗關心可否經商場回家外，結唔結得婚都令一眾準新人非常關注。因為呢個問題，政府喺兩日內都改咗兩次，似乎係呼應緊特首林鄭月娥嘅「動態清零」，要一眾新人「動態結婚」～

網民發現，政府「同心抗疫」網站噚日（9日）最先嘅資料顯示，今日（10日）起至23日期間，不能舉行婚禮，亦不能舉行婚宴或餐飲宴會；不過到夜晚就彈弓手，網站改成「可以在活動場所舉行不多於20人的婚禮，前提是該婚禮上並無供應食物或飲品」。

到而家，據網站最新資料顯示，今日起至23日期間，婚禮只可以有登記官、婚姻監禮人或主持婚禮的神職人員，結婚雙方及兩名見證人，意味一對新人的父母，其中一人應會被拒諸門外，唔可以同場見證子女結婚。

食物及衞生局常任秘書長陳松青噚晚喺港本台節目《自由風自由Phone》解釋話，而家疫情嚴峻，「婚禮本身如果可以等得嘅話，可能呢段時間都唔好有太多跨家庭群組聚集」。但政府明白婚姻註冊本身牽涉法律程序，所以若新有人需要都容許，但由於法例限制，只「容許註冊，但唔容許婚禮舉行。」至於喪禮則可豁免群組聚集。

不過，節目主持都提到大家其實好難逐個場景去問，例如跨家庭商討喪禮安排又係咪准許，當局會否有查詢熱線，或常見問題畀市民參考，陳松青說，政府正收集唔同問題及情景，以「常見問題」方式，喺「同心抗疫」網站持斷更新，供市民參考，「婚禮唔准舉行，都係啱啱更新嘅」。

#channelchk #結婚 #婚禮 #社交距離 #限聚 #教堂 #婚宴 #賓客