陳同佳3個月前搬入深山 回復自由身
警收回安全屋 保護人員全撤

觸發政府修訂《逃犯條例》的台灣殺人案疑犯陳同佳，前年10月23日因洗黑錢案出獄後，曾表明願意赴台自首，但至今仍未成行。今日有報道指，出獄近兩年的陳同佳，本來後一直居於警方提供的安全屋，接受警方保護，惟3個月前已搬離，警亦已撤走保護陳的警員，意味陳同佳已「回復自由身」。至於赴台自首時間表，仍然未有。

「香港01」指，陳同佳3個月前已搬往遠離市區地方暫住。報道指陳居於「偏遠深山」，與母親間中同住，一日三餐獲安排，還可上網，生活不再受限。報道又引述消息指，陳同佳身型較出獄時圓潤不少。

另一報道亦引述政府消息人士承認，本港警方已不再為陳提供安全屋，負責人身保護陳的警員亦已撤走。

死者潘曉穎母親上月中秋節（21日）透過香港網媒「MIHK TV」播出錄音帶，再公開呼籲陳自首，又指今年是第四個沒有女兒的中秋節，每日仍感到痛心難過，質疑警方向陳同佳提供「安全屋」保護的做法，追問為何至今「仲保住呢個殺人犯」。

潘母又向協助陳同佳的香港聖公會教省秘書長管浩鳴表示：「管牧師如果你真係有心幫阿女（潘曉穎）嘅話，我希望你盡快解開呢個死結。」管牧當時回覆傳媒稱，要視乎有關入台手續何時獲批，才能決定赴台時間。

#陳同佳 #赴台自首 #潘曉穎 #管浩鳴 #安全屋 #香港警察 #自首 #逃犯條例 #channelchk

憂陳同佳逍遙法外 潘媽媽哽咽：可憐我嘅阿女仍未沉冤得雪
擬邀陳下周政總外直接對話

涉嫌喺台灣殺害女友潘曉穎嘅疑犯陳同佳，因洗黑錢罪在港判囚獲釋近2年，一直受警方保護，至今年6月搬離安全屋，但始終未兌現赴台自首承諾。痛失愛女4年嘅潘媽媽透過錄音回應事件，擔心陳同佳可能遠走他方，但作為父母仍未能為女兒討回公道，忍唔住哽咽起來：「可憐我嘅阿女始終都唔可以沉冤得雪，唔可以還佢一個公道，我想問邊個可以真心幫到佢嘅呢？」潘媽媽下星期會喺政府總部外召開記者會，邀請陳同佳出席，「有啲嘢我想直接問清楚佢，得個明白」。

一直以來希望能為女兒潘曉穎討回公道而奔波勞碌嘅潘媽媽，噚晚（14日）透過網台廣傳媒同MIHK.tv發佈錄音，話睇新聞先知陳同佳已經冇住安全屋，住喺深山，「深山有個殺人犯，我仲以為拍戲先有嘅橋段，真係令我好震驚，真係想問吓，市民應唔應該仲去行山呀？生命有無受到嚴重威脅呀？」

潘媽媽質疑警方靜雞雞畀陳同佳「重獲自由」，而且「特區政府完全無對我哋受害者家屬交代」：「一個殺人犯殺咗人仲可以自由自在喺香港出入自如，自由上網，簡直係非常之嚴重危害社會嘅安寧。但係警方可以完全視若無睹，真係令我哋好無奈同埋好難過。」

講到呢到，潘媽媽開始語帶激動，之後提到愛女仍沉冤莫白，更忍唔住哽咽，「殺人犯隨時可以離開香港，遠走他方，永遠都搵唔到佢，無辦法將佢繩之於法，可憐我嘅阿女始終都唔可以沉冤得雪，唔可以還佢一個公道，我想問邊個可以真心幫到佢嘅呢？」

「特區政府同埋警方係唔係暗示畀大家聽，如果一個人去咗一啲香港無任何引渡條例嘅地方，係咪嗰啲殺咗人同埋犯咗殺人罪嘅人，以後就可以返嚟香港，以後就可以甩身，無事㗎喇，就可以逍遙法外嘅呢？」潘媽媽激動地說。

潘母又提到台灣已將特別電話交畀管浩鳴，認為管可以打電話聯絡：「求吓佢哋啦！還返個女畀我啦！咁咪唔使我日日都咁痛苦囉，同埋咁辛苦要做咁多嘢。」

潘媽媽下周將會舉行記者會，邀請陳同佳出席對話，即使擔心陳會對佢作出傷害：「陳同佳話當時呀女講咗啲嘢刺激佢，然後就殺咗佢。但係而家我成日都喺傳媒講佢，我真係好驚俾佢殺咗我。我諗我真係要要求警方保護我先得架。但係我驚都無辦法，我都要約陳同佳出嚟直接對話，有啲嘢我想直接問清楚佢，得個明白。」

#channelchk #陳同佳 #潘曉穎 #管浩鳴 #潘媽媽 #赴台自首 #安全屋 #自首