華記突「轉軚」組反對林鄭連任大聯盟
爆夏寶龍第一個多謝何君堯撐《國安法》
嚇到林鄭面青
嘮動新聞👉 https://youtu.be/YbHB-TrenaQ

下屆特首選舉明年舉行，特首林鄭月娥雖未有表明會爭取連任，但向來撐政府嘅華記正能量就突「轉軚」，表明「倒林鄭」兼力數佢五宗罪，包括從不贊成實施《國安法》，但實施後就邀功；錯判7.21形勢等，直言「過去4年我受夠喇！我忍唔到林鄭！」。華記呼籲成立「反對林鄭連任大聯盟」，雖然佢利申無個人利益，但有撐政府嘅網民就質疑華記「反政府，香港點會好呀」、「難以令人信你冇政治利益。對你好失望！」

華記喺YouTube頻道話，林鄭死罪係唔贊成現屆政府推行廿三條及實施《國安法》，「基本上林鄭月娥從來唔贊成推動《國安法》，但阿爺見到219萬民意後，畀咗《國家安全法》香港，而家林鄭揸住《國家安全法》認屎認屁，好似《國家安全法》係林鄭月娥爭取返嚟，呢度令我好反感。」

華記又話實施《國安法》其實最大功勞係立法會議員何君堯。華記解釋，何君堯喺去年2月嘅一次大會上，已大力推動《國安法》同廿三條，最終《國安法》喺同年6月30日出爐，仲透露港澳辦主任夏寶龍頒佈《國安法》後，「第一個多謝就係何君堯，當時你見到林鄭月娥塊面係一青一白」，但結果今日「個個人做何君堯，你知啦！何君堯面對好多把刀」。華記又指林鄭忌才，隨後他與何君堯推動健康碼、廿三條，都被林鄭當「臭四」。

至於喺7.21事件上，華記又批評時任政務司司長張建宗，居然話警隊要向市民道歉，質疑佢支持黑衣人，而林鄭錯信張建宗，就錯判形勢定性7.21為暴動，華記就重申事件只係互相毆鬥，「攞藤條叫暴動？」

華記又話林鄭搞到司法大倒退，大量冤案出現後，就叫人唔好批評法官；4年任期無作為，仲整咗《逃犯條例》出嚟；又無能力對抗5眼聯盟。華記問林鄭「美國領事館點解會有千幾人喺我哋度返工」，稱入境處應拒續簽證，又問點解美領館地權係永久，認為行政長官如果係鷹派、有作為，應即刻改變土地，得返30年期，「你要有承擔有作為有前瞻性！」

華記鬧林鄭唔重視民意，希望佢做埋今屆就算，勸佢相夫教子，做開心快活人，「畀個政協你做，畀個國家領導人你做咪得囉！好似CY（梁振英）咁，CY落返嚟做特首就最好喇！」

#channelchk #林鄭 #特首選舉 #華記 #華記正能量 #何君堯 #鄧炳強 #夏寶龍 #國安法

反同組織立會示威 促TVB停拍《仔仔一堂》
趙佩玉屈hehe勁播甲肝：將「污糟嘢」擺入口

ViuTV 《賭命夫妻》由開播到差唔多播完，到而家都仲係話題節目，Channel絲以為已經好犀利啦，但有個節目仲勁，播都未播就引嚟唔同團體嘅口誅筆伐⋯⋯咪就係TVB 嘅男男配對真人騷《仔仔一堂》囉～

繼周二（26日）一班家庭、宗教組織大鬧批評《仔仔一堂》不道德、埋沒良知，灌輸有違聖經的歪理，喺網上發起聯署要求TVB停止製作節目後，今日一班反同團體仲去埋立法會外示威，批評《仔仔一堂》涉及男男配對，代表香港同性戀解放的情況已經十分「嚴峻」。

反同組織「性傾向條例家校關注組」成員趙佩玉仲話，甲型肝炎嚴重係因為「男男性行為，將啲污糟嘅嘢擺入口」，要個節目即刻停拍。除此之外趙佩玉仲鬧埋ViuTV嘅《賭命夫妻》「好淫亂」、「好污穢」，又話《大叔的愛》荼毒年輕人⋯⋯而之前反對「同樂運動會」舉行嘅建制派議員何君堯有份接組織嘅請願信，佢繼續大鬧「同志平權人士破壞綱紀」，但就無乜點發表對《仔仔一堂》嘅睇法。

小編借此提提大家，即使為異性口交，只要清潔不足和不戴好安全套，同樣是「將啲污糟嘅嘢擺入口」，一樣有機會感染可經性接觸傳播的疾病，包括甲型肝炎。要做到安全性行為，無分性傾向，只關乎良好性教育。

其實《仔仔一堂》引嚟反同團體關注，有幾位節目參加者早前已經喺網上吐心聲，其中藍源瑋（Juzco）話，其實絕大部分同志都唔希望呢類節目喺無綫播出，但覺得「整個節目目的是希望對同志/LGBT有偏見或不接納的人去看」，所以無綫可能係一個更合適嘅平台，畀佢哋嘗試去接納同性戀。

而《仔仔一堂》原本預計11月會喺J2播出，但上周播出嘅《TVB節目巡禮2022》竟然無晒佢哋嘅相關介紹，引嚟外界猜測節目會唔會臨時被抽起，不過TVB就話唔會就有關揣測作出回應，而J2創意總監C君就話「唔係我一個人決定播唔播」，唔知到底最尾趙女士有無機會睇住嚟鬧呢？

#channelchk #ViuTV #賭命夫妻 #TVB #仔仔一堂 #反同組織 #無綫 #投訴 #示威 #C君 #何君堯