【EomBuy易買特約：爆片爆相】
野豬媽帶2小豬出遊鰂魚涌南豐新邨
花槽掘窿瞓晏覺 讓豬BB自得其樂

讀者報料，噚日下晝3點幾，喺鰂魚涌南豐新邨第10座地下發現野豬一家出沒！

其實南豐新邨成日都會有野豬行嚟行去，附近街坊都見怪不怪。不過今次有啲特別，就係野豬媽媽同2隻小野豬BB出嚟。阿媽竟然由得啲B自己玩，再去10座地下花槽掘窿瞓晏覺！

讀者話，當時大約有10至20個街坊圍觀，都係靜靜地咁影吓相，仲有人好專業咁，拎咗啲攝影器材嚟拍低。「大家第一眼望見，都覺得好驚訝。豬媽竟然會喺呢個位，掘窿瞓晏覺。大家見到野豬BB，就嗌好得意，尤其啲師奶會大嗌。」

讀者仲話，啲街坊都好識做，叫周圍啲人唔好咁嘈，唔好打擾野豬媽媽瞓覺，仲幫手喺樓梯邊，守護住野豬BB，驚佢哋跌落樓梯。不過咪以為野豬媽媽淨係識瞓，佢一聽到野豬BB出聲，就會走埋去望吓，見到安心先繼續訓㗎！

#channelchk #鰂魚涌 #南豐新邨 #野豬 #爆片爆相 #EomBuy #易買