直擊海洋公園野豬家族逾10口中秋造節
阿豬媽爸帶B仔女馬路散步

海洋公園水上樂園啱啱正式開幕，有好多一家大細都趁中秋節去玩，包括⋯⋯野豬。

網上流傳幾段影片，話月圓之夜有一群野豬喺水上樂園對出行嚟行去，佢哋有大有細，睇得出係野豬家長帶住佢哋嘅BB出嚟散步。佢哋有時企喺馬路中間、又係咁聞地下同路邊。適逢中秋佳節，見到佢哋「一家豬」聚埋一齊賞月真係幾得意，但當Channel絲諗起，佢哋可以居住嘅環境越嚟越細、連飯都應該食唔飽搞到要係咁聞地下，就有啲內疚⋯⋯

大家應承Channel絲，之後就算見到野豬，都唔好嚇親佢哋同攻擊佢哋，好嗎？

#channelchk #野豬 #海洋公園 #水上樂園 #中秋

直擊中秋滿月高掛！雲隙間觀賞若隱若現
https://www.facebook.com/101870318844226/posts/132886089075982/

明月幾時有？把「餅」問青天！相信不少人在中秋夜跟小編都抱有相同疑問。Channel C與月餅達人Toby在YouTube直播玩遊戲、食月餅後，到午夜終於等到「八月十五」露出來、在雲隙間若隱若現。

Channel C在Facebook為大家直播在荃灣看到、並以簡單手機器材拍攝的「Out focus月」，由旁白師與天氣師李鈺廷︱講天氣主持。不過該直播因版權問題被下架，Channel C非常抱歉，現已將相關內容剪輯，並重新上載，希望大家可以欣賞到好靚嘅滿月🌝

#月亮 #滿月 #賞月 #中秋節 #團團圓圓 #channelchk

移民潮下過中秋｜ 剩下孤獨長者隔空過節 社企銀杏館派月餅送暖
https://youtu.be/OuP5tZIpjFM

中秋人圓兩團圓，但對於一些長者來說，今年中秋從始不一樣，過去一年，不少年輕家庭離開香港，遺下一班孤苦伶仃的長者。這批長者，昔日有仔女陪伴、有仔女送上月餅一齊歡度佳節，但今年，甚至往後的中秋節，都可能無法再團圓。

每日向有需要人士派發熱飯的社企銀杏館，今年亦為呢班孤獨長者，以及其他貧窮人士，一併送上月餅，希望在亂流下，帶畀佢哋一絲溫暖。

一個月餅，對你，對我，可能無乜特別，但對呢班家人已移民嘅老人家來說，月餅背後的意義，遠遠大過一切，今個中秋，你又有無為一個月餅增添多一份意義呢？

＝＝＝＝＝＝＝＝＝＝＝＝＝＝＝＝＝
記得Like、Share同Comment條片，Subscribe我哋
YouTube Channel，仲有撳埋鐘仔搶先睇片喇！
https://youtube.com/channel/UCQRdJCdUVkXYPvWZ6_Omkag

#中秋節 #月餅 #移民潮 #銀杏館 #派飯 #channelchk #嘮動新聞 #長者

過咗個中秋佳節，Channel絲今日要同大家告假，因為我要留喺屋企食埋啲月餅同隔夜盆菜，唔得閒打字。🤕

講笑啫，係就係請假，但我哋休息係為了走更長的路，畀多啲好嘢大家睇，所以Channel C仝人於9月22日會休息一日，大家記得掛住我地呀！😘

#channelchk #中秋節翌日 #休息

5米巨貓葵芳新都會廣場曬蛋蛋 25隻高像真1比1主子任打卡

🐱你哋班愚蠢嘅人類，畀機會你同我打卡仲唔快啲現身~喵！🐾

由9月19日至10月31日，5米高巨型肥貓「碌碌」會現身葵芳新都會廣場Metroplaza (SHKP)，大曬蛋蛋，一眾奴才可以近距離一澤芳香！場內滿佈1米高毛線球、巨型貓抓柱、喵之秋橋等玩具供主子享樂，全區更聚集咗25隻像真度極高的1比1主子，仲有6大主子打卡位，等大家可以盡情自拍！每晚6-10pm有「夢幻彩光騷」，整個場地會變成幻彩遊樂園，仲唔快啲嚟朝聖。

影完相唔夠喉？由10月14日至17日可以去「主子美食街」買野孝敬下主子！

「喵喵遊園會Meow Plaza」
地址：新都會廣場L3 – L4露天廣場及L5空中花園
日期：2021年9月19日至2021年10月31日
時間：10:00am-10:00pm

#喵喵遊園會 #MeowPlaza #新都會廣場 #channelchk #主子 #貓奴 #葵芳 #打卡

觀塘巨月疑遭50km/h強陣風吹落海
瞬間穿窿變生根 「淥到腍晒 撈起食啦」
https://youtu.be/xJbVDoQOJKE

中秋節假期完咗過後，喺觀塘海濱亮相咗幾日嘅巨型月亮亦跌落海，轉眼變「生根」！

本港今早部份地區大雨又行雷，觀塘海濱附近嘅啟德氣象站亦多次錄到超過每小時40公里（強風程度）嘅陣風，最高達時速50公里。有網民今早就拍攝到巨型月亮疑被強風吹落海後，隨水向九龍灣方向漂流嘅片段，可以見到月球表面有明顯裂口，漂流期間不時撞向海堤，一邊開始漏氣，最後有網民更影到月球「謝晒皮」喺海上漂嘅情況，被笑指同「腍咗嘅生根」一樣。

月球表面最後喺避風塘一帶沉沒，負責單位要派人打撈，被網民形容係「海底撈月」。主辦單位喺社交平台發帖話，原定昨晚（22日）活動完成後，今早收回月球，但受天氣影響，索帶撕裂致月球墮海，主辦單位已盡快將月球撈回海面處理。

「每日X官塘老母」版主接受Channel C訪問就話，唔知「月亮」係點樣變成「生根」：「如果唔係主辦機構整爆嘅，我淨係覺得好危險。如果係早兩日好多人嗰陣爆點算，同埋漂咗出海都對啲船危險。」大大話，佢未去過現場「賞月」，因為真係太多人：「睇人哋影啲相都覺得OK靚嘅！」咁有冇覺得多咗個「月亮」之後觀塘更加塞？大大話：「官塘係唔係都咁塞，我諗又唔會好大分別。」

天氣師李鈺廷翻查資料，原來天文台今早8時39分已預告本港有局部地區強烈狂風雷暴，預料有高達每小時90公里或以上嘅猛烈陣風繼續吹襲。而早上9時，天文台於觀塘海濱附近嘅啟德氣象站錄得最高陣風每小時50公里。

中秋活動「全民燈月」周日（19日）起喺觀塘海濱舉行，15米高嘅巨型月亮着係活動重頭戲之一，連日來吸引唔少人去打卡，中秋夜更逼滿市民賞巨型月亮，可惜深夜過後留下不少垃圾。

（Facebook群組「社區天氣觀測計劃 CWOS」Eric Darky提供片段）

#channelchk #巨型月亮 #中秋 #月亮 #觀塘 #觀塘海濱 #全民燈月 #賞月 #月球 #天文台

譚仔上市集資11億 大陸設新中央廚房
股評人正大師唔敢睇好：炒賣小注無妨

分別請得動七師傅七仙羽同花姐拍廣告嘅「譚仔雲南米線」同「譚仔三哥米線」，早於4月已經話要上市，到今日終於公佈，營運商譚仔國際（02217.HK）本月23日起至下周二（28日）公開招股，計劃發售3.35億股份。當中90%將作國際發售，10%香港公開發售，將於10月7日掛牌，每手1,000股計入場費約$4,212。

「譚仔國際」喺香港有150間餐廳。今次招股，每股招股價範圍介乎3.33至4.17元，涉集資約11.16億至13.97億。集資所得，其中約57.4%將用於擴大香港、內地、新加坡、日本及澳洲的餐廳網絡；約10.5%用於翻新餐廳及提升經營設備；約9.8%用於一般企業用途及營運資金；約9.4%擴充香港的中央廚房，及在內地、新加坡及澳洲設立新的中央廚房；約7.8%用於國際品版建設及新市場進入推廣；約5.1%提升資訊科技基礎設施。

《港股策略王》節目主持、股評人正大師接受Channel C訪問，表示對「譚仔國際」招股保持觀望態度，建議如股民如想作長線投資，可以等其公佈上市業績後，再比對招股書藍圖才作決定：「如果炒賣嘅話，小注無妨，你唔會預佢有好吸引嘅升幅；如果你想落飛賺番餐米線嘅話，我寧願你唔好抽，攞啲錢去抽其他嘢，慳慳地去食米線仲好。」

正大師解釋，「譚仔國際」招股書提到，很大部份集資用途為拓展海外市場、及於內地設新中央廚房打大灣區。「大灣區固然係一個幾吸引嘅投資主題，但係你將內地發明嘅麻辣米線打返上大陸，個比喻就好似，用美國嘅漢堡包打返美國市場，係咪咁易呢？」他擔心，香港跟內地人口味不同，易「水土不服」：「你用一個香港品牌打返上大陸，唔係想像中咁簡單。」

他指，「譚仔國際」最大問題是產品單寡，且餐飲股亦非新鮮事，吸引力有限。「你睇吓香港其他上市嘅股票，例如大家樂、大快活、太興，佢哋除咗做快餐同燒味，都會出好多副線餐廳；譚仔嘅技術只停留喺淥麻辣米線、湯底加好多好索味嘅料，擴展空間有幾大呢？」

正大師以「奈雪之茶」為例，指兩品牌均屬熱門餐飲項目，惟「奈雪之茶」上市至今，股價仍停滯，「好似冇乜好過，而家甚至冇乜人睇，譚仔會唔會雷聲大雨點小，要睇吓市場反應。」


#譚仔國際 #譚仔 #譚仔三哥 #新股 #IPO #正大師

不禁煙．設CCTV．禁賭博
砵蘭街粉紅公園 19個月翻新一半 500萬有找？

香港有個地方，啱晒啲小粉紅。呢個公園唔平㗎，起碼要450萬，大家一生人至少經過過一次——砵蘭街休憩花園。佢有一半變咗粉紅色；另一半保持原貌。好似試用化妝品咁，化半邊面睇效果。

翻新工程由康文署聯同建築署及「信言設計大使」（Design Trust）合作，預算用$450萬。Design Trust包辦埋翻新咸美頓街休憩花園。呢個平啲，18年預算工程費係$320萬。

政府文件顯示，砵蘭街休憩花園料2020年初開始工程，同年底完成。公園去年2月開始圍封，而家係2021年9月；成個花園約376平方米，全面翻新嘅只係一半，仲delay咗，可能比大家想像更貴。

睇番建築署極少而珍貴嘅網上公開資料，預算工程費用係$100萬至$500萬。唔知$500萬係咪封頂費。點解整一半？政府話係要為「老用家」保留情意結。當時個plan係要有「玩味和現代感」，顏色要為社區帶來活力，「對使用者有正面的心理影響」。難怪特首同高官議員都著粉紅。咁，佢哋應該好buy粉紅教主至係㗎。

工程其中一個賣點係枱櫈可被移動。唔使地膽都知，個公園嘅target係邊類型人士；而作為全港少有嘅康文署轄下不禁煙休憩處之一，砵蘭街呢個location，啱晒用家戙高腳踩住粉紅櫈，吞雲吐霧chilling，放聲演繹廣東粗口嘅博大精深。公園加裝咗CCTV，好安全呀。

翻新完畢，油尖旺當區區議員李偉峰表示，之前睇過啲櫈係石屎櫈，而家變成木櫈，水漬難以清理。另一當區議員胡穗珊表示：「靚唔靚就見仁見智，到我知道時已經開工，生米煮成熟飯。」作為用家，咁點睇？胡議員提出幾個points：

1.花槽旁座椅有積水問題，落完雨積水不能自然流走，做死清潔工；

2. 供人搬動石櫈的把手凹槽，將來9成9會堆滿廁紙、煙頭，有礙衛生。做死清潔工。

3.所謂可移動石櫈，與地面空間有積水問題，次次要工友搬開刷乾，做死清潔工；

Design Trust 聯合創辦人及執行總監姚嘉珊搽晒粉紅色指甲油，請埋一身粉紅嘅徐濠縈到場打卡。姚嘉珊話，團隊曾作多次調查，又指研究發現粉紅色可以令人感愉快同放鬆……

有新idea，點都好過因循守舊，但最好融入社區得嚟，又唔好做死清潔工啦…

#砵蘭街 #DesignTrust #信言設計大使 #胡穗珊 #李偉峰 #徐濠縈 #粉紅教主 #channelchk

偵破首宗WeChat 增值劫案
笨賊係前便利店職員

尖東麼地道一間7-11便利店本周日(19日)凌晨，遭一名男子持刀闖入，指嚇女店員，然後逕自操作收銀電腦，為手機支付程式「WeChat Pay HK」增值5,000港元，警方昨以行劫和盜竊罪，拘捕31歲劫匪，並在其同行的48歲男友人身上，搜獲小量懷疑冰毒及俗稱「鐵蓮花」武器，警方以涉嫌藏毒及管有違禁武器，拘捕男友人，但相信他與劫案無關。

警方今日帶同劫匪返回案發現場，重組案情，現場拉起封鎖線，劫匪被蒙頭，雙手鎖上手扣，腰纏鐵鏈，由兩名警員押解。警方揭發，劫匪有黑幫背景，因曾在便利店工作，故熟悉收銀電腦操作，為手機支付程式增值。

案發前他先在尖沙咀一間超市偷走一把廚刀，再到便利店行劫，但被增值的「WeChat Pay 」戶口並非由他本人登記，究竟當中有否隱情？ 劫匪是否被人威脅而犯案，則未有交代，警方現正追緝戶口真正登記人，不排除再有人被捕。

警方指，今次以增值手機支付程式的行劫手法屬近年首見，相信劫匪已透過朋友將錢轉走，再提取現金。警方強調，行劫屬嚴重罪行，一經定罪可被判終身監禁，籲市民勿以身試法。

#channelchk #便利店 #劫案 #尖東麼地道 #7eleven #WeChat #手機支付程式

狂風雷暴大驟雨襲港 吹烈風至暴風級陣風

【天氣師李鈺廷提提你】
一股清勁至強風程度的偏東氣流，今日持續令本港多區落大驟雨及狂風雷暴。從天氣雷達可見，雷雨區不斷由東南向西北移動，掃過香港。天文台先後在多區錄得烈風（至少63km/h）至暴風（至少88km/h）程度的陣風；橫欄島、維港青洲、塔門和大美督，陣風分別高達91、75、71和66km/h。

天文台預測，本港今晚仍間中有驟雨及狂風雷暴，初時部份地區雨勢較大。

#wind #weather #thunder #rain #天文台 #驟雨 #雷暴 #狂風 #雷達 #天氣 #雷雨 #烈風 #暴風 #陣風 #李鈺廷 #氣象 #偏東氣流

中秋追月追到落海！巨月彷彿同大家講：「走先嘞～係咁先嘞～下次再玩啦～」現在由旁白師和Channel絲，為大家改詞聲演： https://youtu.be/xJbVDoQOJKE

＝＝＝＝＝＝＝＝＝＝＝＝＝＝＝＝＝
記得Like、Share同Comment條片，Subscribe我哋
YouTube Channel，仲有撳埋鐘仔搶先睇片喇！
https://youtube.com/channel/UCQRdJCdUVkXYPvWZ6_Omkag

#channelchk #巨型月亮 #中秋 #月亮 #觀塘 #觀塘海濱 #全民燈月 #賞月 #月球 #天文台 #試當真 #係咁先啦 #嘮動新聞 #改歌