🆒 А ці ведаеце, як Андрэй Хадановіч пачаў свой шлях у YouTube?

Гэта адбылося роўна 2 гады таму з лекцыі, прысвечанай 200-годдзю вялікага творцы Шарля Бадлера ❤️

Сёння, 9 красавіка, французскаму паэту спаўняецца 202 гады, таму самы час паглядзець выпуск пра аўтара культавых “Кветак Зла” і “Парыжскага спліну”, пачынальніка паэзіі сімвалізму, бацьку ўсіх паэтаў-дэкадэнтаў Шарля Бадлера і яго цудоўную паэзію.

Лекцыя Андрэя Хадановіча па спасылцы:
↪️ https://www.youtube.com/watch?v=zC7Yg6pbRA4

▶️ "Дзікае паляванне караля Стаха" - найлепшы бестселер з хэпі-эндам для беларусаў

Новы выпуск на канале CHADANOVIČ

Пагаворым пра найпапулярнейшую сярод беларусаў і самую актуальную для нас тут і цяпер кнігу - аповесць Уладзіміра Караткевіча "Дзікае паляванне караля Стаха".

✅ Сёння расказваем:
- якія паралелі ёсць паміж "Дзікім паляваннем караля Стаха" і "Сабакам Баскервіляў";
- чым падобнае "дзікае паляванне" на сучасных беларускіх сілавікоў;
- як стваралася аповесць і прычым тут украінская свядомасць;
- навошта Караткевіч паказаў заняпад беларускай шляхты;
- якія прыёмы выкарыстоўвае класік, каб заблытаць чытача;
- ці спадабалася Караткевічу экранізацыя "Дзікага палявання караля Стаха" і дзе Андрэй Хадановіч паглядзеў гэты фільм;
- што за скандал здарыўся з лібрэта па аповесці класіка і прычым тут Раман Пратасевіч.
Бонус. Прыклады ўкраінізмаў ў кнізе "Дзікае паляванне караля Стаха".

🗯 Вось некалькі думак з відэа:

💡 Аўтар займае месца на трыбуне і пачынае казанне на карысць Беларусі - здратаванаму, занядбанаму, прыгнечанаму краю, падымаючы на паверхню яго таямнічасць, магічнасць, самабытнасць і непадобнасць да суседзяў, да ўсходніх суседзяў, што істотна. Аповесць гучыць выразна антыімперскі, але гэтая антыімперскасць выражаецца эзопавай мовай савецкага часу. Сякія-такія ахвяры і саступкі цэнзуры, пануючай ідэалогіі, аўтар мусіць зрабіць. Гэта раз-пораз інтэрнацыяналісцкія ноткі і раз-пораз знявага беларускай шляхты, да якой аўтар ставіцца з усёй магчымай сімпатыяй, але тут у сваёй ранняй аповесці ён гуляе па правілах гульні, у якую ўвязваецца.

💡 Што робіць аповесць найбольш актуальнай тут і цяпер? Гэта сітуацыя, на першы позірк, безнадзейнай рэакцыі, у якой пры наяўнасці цярплівасці, адвагі і розуму можна перамагчы. Аналагам нашых жахлівых сілавікоў выступае "дзікае паляванне", якое аказваецца такой дэнацыянальнай здэградаванай элітай. Ці не такія нашыя афіцэры са зброяй, у чорных масках са шлемамі і дубінкамі? Эскадрон смерці караля Стаха тэрарызуе беларусаў, але не толькі дзеля сваіх, але і дзеля імперскіх інтарэсаў. Пісьменнік як бы даследуе межы нашай цярплівасці, але ўрэшце паказвае, як пралітая кроў перапаўняе берагі, і мы бачым стыхійнае паўстанне. Так бы мовіць "сілавікі" выяўляюцца так бы мовіць "слабавікамі", як толькі сутыкаюцца з годным адлупам, як толькі ім супрацьстаяць не бяссільныя людзі, а арганізаваная маса, хай нават горш чым яны ўзброеная.

💡 Самы актуальны на сёння персанаж - малады і гарачы праўдашукальнік Андрэй Свеціловіч. Актуальны сваімі ўкраінскімі сімпатыямі. Гэта чалавек, які разумее, што Беларусь і Украіна абсалютна адзіныя ў сваім антыімперскім змаганні, бо маюць агульнага ворага. Самі разумееце, якога ворага.

❤️ Уладзімір Караткевіч стварыў аповесць з добрым фіналам, дзе "дзікае паляванне", як і ўсякая бязлітасная цемра, знікае, таму верым у святло, верым у саміх сябе, верым у Беларусь і беларусаў, як гэта рабіў наш легендарны класік.

Глядзім новае відэа Андрэя Хадановіча, ставім падабайкі, каментуем і дзелімся з сябрамі і сяброўкамі:
👉 https://youtu.be/ta5HV0wuIXY

«І няма ніякай розніцы паміж беларусам і ўкраінцам, калі над спінаю вісіць бізун» 🚩

🐎 Беларускі паэт і перакладчык Андрэй Хадановіч расказвае пра найпапулярнейшую кнігу сярод беларусаў, так актуальную для нас сёння - аповесць Уладзіміра Караткевіча «Дзікае паляванне караля Стаха».

Класік нашай літаратуры вучыўся ў Кіеве, таму дасканала разумеў, што Беларусь і Украіна абсалютна адзіныя ў сваім антыімперскім змаганні, пакуль расейская імперыя ў любым яе выглядзе не спыніць свае існаванне ✊

Падпішыся на канал ТРЭНДЫ: ПАПУЛЯРНЫЯ ВІДЭА БЕЛАРУСІ

Роўна год таму на канале CHADANOVIČ выйшла першае відэа 🎊🎉

🗣 Словы падзякі ад Андрэя Хадановіча:

"Шчыры дзякуй, сябры, за ўвагу і падтрымку, за цёплыя словы падзякі і прапановы! Некаторыя выпускі ўжо з'явіліся, а некаторыя яшчэ з'явяцца, бо так пажадалі вы. З прыемнасцю чую, што кагосьці з вас мае аповеды падштурхнулі перачытаць улюбёную кнігу, а камусьці і ўпершыню адкрылі нейкага аўтара ці твор. У сённяшні час рэпрэсіяў і цэнзуры беларускім аўтарам, перакладчыкам і выдаўцам не так проста і далей рабіць сваю працу, а чытачам - знаходзіць новыя вартыя кнігі. Рады, калі мае аповеды дапамагаюць нам усім сустрэцца!"

Дзякуем усім вам, хто кожны тыдзень наведвае "вандроўны ўніверсітэт" Андрэя Хадановіча на YouTube. За 1 год на канале выйшла 51 відэа, якое паглядзелі больш за 850 тысяч разоў з 40 краін свету.

Вельмі прыемна, што 88% гледачоў знаходзяцца ў Беларусі, а літаратурныя выпускі глядзяць аднолькава як мужчыны, так і жанчыны (50,5% і 49,5% адпаведна).

Самае папулярнае відэа - лекцыя пра Якуба Коласа, якая сабрала амаль 35 тысяч праглядаў.

А які выпуск ваш улюбёны? Пішыце ў каментарах 👇

Ці ведалі вы, што ў аповесці "Дзікае паляванне караля Стаха" ёсць ідэалагічная самацэнзура Уладзіміра Караткевіча? 😲

📖 Каб твор быў апублікаваны, класіку беларускай літаратуры давялося пайсці на пэўныя саступкі.

Перш за ўсё гэта заўважна ў дэманстрацыі заняпаду беларускай шляхты, што можна пачуць нават з вуснаў апошняй прадстаўніцы свайго шляхетнага роду Надзеі Яноўскай:

🗣 "Каб вы ведалі, колькі крыві, забойстваў, сірочых слёз, звычайнага бруду на кожным шляхецкім гербе! Колькі забітых, зашмаганых да смерці, пакрыўджаных! Мы не маем права на існаванне, нават самыя сумленныя, самыя лепшыя. У нашых жылах не блакітная, а брудная кроў".

Але ж чаму можна сказаць, што Караткевіч ставіцца да шляхты з усёй магчымай сімпатыяй? Сам сумленны, годны вобраз Надзеі Яноўскай - гэта ўвасабленне ўсяго найлепшага, што насіла ў сабе наша шляхта.

Глядзім новы выпуск пра Уладзіміра Караткевіча і яго бестселер "Дзікае паляванне караля Стаха:
➡️ https://youtu.be/ta5HV0wuIXY

А як вы ставіцеся да беларускай шляхты? 🤔

🎶 Пазнай песьні па беларускіх каверах

Мы запрасілі паэта і перакладчыка Андрэя Хадановіча згуляць у музычную віктарыну.

Ці пазнаў паэт уласны пераклад?
https://vm.tiktok.com/ZGJattfu3/

Дарэчы, у Андрэя ёсьць TikTok, Youtube ды нават Telegram пра беларускую літаратуру й ня толькі!

🤔 А Вы пазналі ўсе песьні?

▶️ Таямніца самагубства, каханне і містыка, свабода і савецкая Беларусь: паэтычны лёс Яўгеніі Янішчыц

Новы выпуск на канале CHADANOVIČ

Новая гераіня нашага відэа - "Палеская ластаўка" Яўгенія Янішчыц. Пагаворым пра 666 вершаў, паэтычныя палёты, жыццёвыя трагедыі і да сёння неразгаданую таямніцу смерці паэткі.

✅ Сёння расказваем:
- чаму Янішчыц не змагла назваць сваю першую кніжку "Непрыручаная птушка";
- у чым выяўлялася няўдачлівасць аўтаркі і прычым тут малпа;
- як Янішчыц прадчувала сваю смерць і што ў гэтым містычнага;
- ці перамог савецкі час геніяльную паэтку;
- як парадыравалі вершы Янішчыц;
- чаму ўсё жыццё аўтарка пражыла пад прозвішчам Янішчыц;
- як паэтка пісала ідэалагічныя вершы пра "гнілы Захад", але хавала пад імі персанальны боль;
- ці змагла Янішчыц справіцца з жыццёвымі трагедыямі: ад жудаснай аўтакатастрофы да хваробы сына.

🗯 Вось некалькі думак з відэа:

💡 Калі тваё прозвішча, усе каму не лянота: ад народнага паэта Ніла Гілевіча да апошняга графамана, рыфмуюць з дзеясловам "нішчыць", нават дадаючы адмоўную прыставачку, гэта гіпнатызуе і самаўнушае. Дзеля справядлівасці, паэтка сама ў сваёй творчасці называе ўласнае прозвішча "расстраляным".

💡 Раз за разам паэтка піша вершы пра самагубцаў. Больш за тое, пазіцыя савецкай назіральніцы за "гнілым Захадам" як бы дае ёй стопрацэнтнае алібі: гэта там у Нью-Ёрку магчымыя самагубствы, гэта там усё прадаецца і купляецца, гэта там можна смела па-беларуску рыфмаваць "Іўда і Галівуда", як у першым з такіх вершаў пра самагубчы лёс Мэрылін Манро. Але ўжо наступны тэкст пра самагубства амерыканскай паэткі Эн Сэкстан мае ў сабе шчыры нерв, горыч і надрыў. Ёсць і тут хадульныя адзнакі свайго часу - “У горадзе, што ачмурэў / Ад джазу і ад сексу”, але ёсць таксама і такое:

Так, ёсць паэзіі сакрэт
І ў лёсе асабістым:
Паэт з’яўляецца на свет,
Як ластаўка, як выстрал.

Хто такая "Ластаўка" мы з лёгкай рукі Ніла Гілевіча даўно памятаем. Перад намі аўтабіяграфічны вобраз.

Не ў самагубстве сілы соль,
Хоць ёсць тут знак пратэсту…

Колькі тут ад рыфмы да скразнога рэфрэну - імені Эн Сэкстан з рознымі прыметнікамі, эпітэтамі, а колькі тут ад навязлівай думкі, з якой паэтка жыве?

💡 Часам у цяжкія неспрыяльныя часы не варта цурацца і грэбаваць неўласцівым для яе загадным ладам, але гэты тэкст Яўгенія Янішчыц палічыла патрэбным напісаць так: "Гавары са мной па-беларуску". Можа быць, у гэтым апошняя тэрыторыя няскоранай, неадфарматаванай сістэмай, не знішчанай да канца свабоды, якая засталася з паэткай назаўсёды.

❤️ Глядзім разам новае відэа Андрэя Хадановіча пра адну з самых яскравых паэтак у гісторыі Беларусі Яўгенію Янішчыц, ставім падабайкі, каментуем і дзелімся з сябрамі і сяброўкамі:
➡️ https://youtu.be/wUlbfwwZKcM

Сто разоў шукай другой красы,
А тым больш што сьвет даўно ня вузкі!
...Ды калі ты не бязродны сын —
Гавары са мной па-беларуску!

Андрэй Хадановіч расказвае ў новым відэа пра адну з найталенавіцейшых беларускіх паэтак Яўгенію Янішчыц, якая ўзнёсла любіла свой родны край, за што жывыя класікі беларускай паэзіі называлі яе - "Палескай ластаўкай" 🐦

❤️ Паслухайце цудоўны верш аўтаркі "Гавары са мной па-беларуску", які быў і застаецца глытком свабоды для беларусаў у свеце пануючай імперыялістычнай цемры.

Глядзім новае відэа Андрэя Хадановіча пра чароўную паэзію Яўгеніі Янішчыц:
➡️ https://youtu.be/wUlbfwwZKcM

🔥 Праект "Будзьма" @budzmaby з нагоды сёлетняга юбілею Андрэя Хадановіча вырашыў павандраваць па апошніх зборніках паэта.

📌 З тэксту даведаецеся:
- чаму "Цягнік Чыкага-Токіё" хуліганскі, а "Школа травы" медытатыўны зборнік;
- як Андрэй Хадановіч прысніў адзін са сваіх найлепшых тэкстаў ува сне;
- у чым унікальнасць вокладак аўтара;
- чаму на правах эпіграфаў да кожнага раздзелу "Школы травы Андрэй Хадановіч перакладаў важных для сябе творцаў.

Чытаем матэрыял па спасылцы 👉 https://budzma.org/news/khuliganim-i-medytuem.html

Глядзім выпуск пра творчасць Андрэя Хадановіча да яго 50-годдзя:
➡️ https://youtu.be/Ih8wpiIGqLI

Выдавецтва "Янушкевіч" абвясціла аб супрацоўніцтве са Стывенам Кінгам 📚

🗣 «Цяпер сусветна вядомы пісьменнік – наш аўтар. Плануем выдаць як яго класічныя творы, так і найноўшыя. Выданне беларускіх перакладаў асабліва важна таму, што аўтар забараніў выдаваць свае творы ў Расеі. Гэта быў ягоны цвёрды адказ на ўварванне ў Украіну», - паведаміў выдавец Андрэй Янушкевіч у сваім Instagram.

Першую кнігу плануюць выдаць ужо сёлета. Што гэта будзе? Прыходзьце ў пятніцу, суботу і нядзелю на кніжную выставу ў Беластоку і даведайцеся першымі ад Андрэя Янушкевіча.

📌10. Targi Książki | Białystok 2023
📆 21-23.04.2023
🏢 Stadion Miejski, Słoneczna 1, Białystok, павільён нумар 24.

Мойшэ Кульбак па-беларуску разам з Андрэем Хадановічам 🌟

23 красавіка ў Вільні адбудзецца імпрэза Андрэя Хадановіча, прысвечаная творчасці аднаго з самых прыкметных літаратараў міжваеннага часу — Мойшэ Кульбака.

📆 Дата: 23 красавіка
🕔 Час: 17:00 па Вільні
🏫 Месца: CreateCulture Space, Вільня, Karmelitų gatvė 5

Перад лекцыяй нагадаем, што на старонцы “Дзеяслова” можна пачытаць вершаваны пераклад Андрэя Хадановіча паэмы Кульбака "Райсн/Беларусь". Спасылка 👉 тут.

Таксама прапаноўваем паглядзець выпуск пра Мойшэ Кульбака і іншых творцаў, якія былі расстраляныя ў Чорную ноч:
➡️ https://youtu.be/8ZPDTzszAm4

Маё адно–адзiнае свiтанне,
Мой матылёк на светлай мураве.
Я паўтару услед, як заклiнанне:
«Няхай мой сын мяне перажыве».

Адна з найвялікшых трагедый у жыцці паэткі Яўгеніі Янішчыц здараецца, калі яе сын Андрэй захварэў на цяжкі апендыцыт з перытанітам 🙏

Янішчыц мабілізуе ўсе сілы і стварае паэтычную нізку-малітву «Маё адно-адзінае світанне», якая становіцца сімвалам любові маці да свайго дзіцяці.

Паслухайце лірычныя радкі з вершаванага твора і адчуйце, як у адным моманце спалучаюцца любоў і боль, пяшчота і надзея.

❤️‍🔥 Працягваем любіць, верыць і спадзявацца толькі на лепшае. Глядзім новы выпуск Андрэя Хадановіча пра «Палескую ластаўку» Яўгенію Янішчыц і яе цудоўную паэзію:
➡️ https://youtu.be/wUlbfwwZKcM

«Мне б хацелася, каб больш беларусаў цікавіліся сваім» 👌

Андрэй Хадановіч у новым інтэрв'ю для «Радыё Свабода» расказвае пра пазітыўны фідбэк ад гледачоў, а таксама беларусаў у расійскім інфармацыйным полі, прафесійных троляў, якія топяць за беларускі рэжым, Маскву і Пуціна, і згадвае пра самыя папулярныя відэа на канале.

🔝 Бонус. Андрэй Хадановіч раіць кнігі, якія варта пачытаць беларусам бліжэйшым часам.

Чытаем тэкст па спасылцы ↪️ https://www.svaboda.org/a/32370046.html

▶️ «Шляхціц Завальня, або Беларусь у фантастычных апавяданнях» Яна Баршчэўскага - найлепшае беларускае фэнтэзі

Новы выпуск на канале CHADANOVIČ

Ці існуе беларускае фэнтэзі? Безумоўна! Ян Баршчэўскі ў сваёй кнізе «Шляхціц Завальня, або Беларусь у фантастычных апавяданнях» першым, на зайздрасць Дайенерыс Таргарыен, расказвае пра спосабы, як зрабіцца маці ці бацькам цмокаў, а таксама распавядае, як дыхаць пад вадой без жабраў і ператварыцца ў ваўкалака. Пагаворым пра галоўны твор у жыцці знакамітага беларускага пісьменніка Яна Баршчэўскага.

✅ Сёння расказваем:
- як цудоўным чынам знайшлася надмагільная пліта Яна Баршчэўскага;
- ці пісаў аўтар па-беларуску;
- як Ян Баршчэўскі пазнаёміўся з Адамам Міцкевічам і Тарасам Шаўчэнкам;
- ці ёсць паралелі паміж Белай Сарокай у творы Баршчэўскага і Кацярынай ІІ;
- чаму пісьменнік быў чужым як для Расійскай імперыі, так і для савецкіх уладаў;
- як Уладзімір Караткевіч спрабаваў "рэабілітаваць" Яна Баршчэўскага;
- чаму твор «Шляхціц Завальня, або Беларусь у фантастычных апавяданнях» уваходзіць у топ-10 беларускіх кніг.

🗯 Вось некалькі думак з відэа:

💡 За паўтара стагоддзя да Джорджа Марціна і яго сагі «Песня лёду і полымя» селянін Карпа выгадоўвае пад пахай цмока з яйка чорнага пеўня - магічны рэцэпт па-беларуску. Зразумела, што ў кожнай гісторыі Баршчэўскага за піратэхнікай і спецэфектамі магіі і цудаў ёсць пэўная мараль. Зразумела, што асуджаецца лёгкі авантурны шлях узбагачэння на карысць сумленнай гарманічнай працы. Так і гісторыя ваўкалака неаддзельная ад маральнага зместу: як бы табе ні было крыўдна, як бы несправядлівы лёс ні разбіў тваё сэрца, знайдзі сілы прабачыць і адмовіцца ад крывавай помсты - гэтага патрабуе прырода людзей.

💡 Багаты палац з дзікімі мядзведзямі. Нічога не нагадвае? Такі сабе стэрэатыпны намёк на прасторы Расійскай імперыі. Шмат даследчыкаў атаесамляюць Белую Сароку з імператрыцай Кацярынай ІІ, на якой прамая адказнасць за падзел і акупацыю Рэчы Паспалітай. Але найцікавейшы тут пан Скамароха, які ідзе на згоду, выракаецца свайго і дапамагае д'ябальскай істоце высмоктваць сокі з сваёй зямлі і сваіх людзей.

💡 Вядома, што магіла Баршчэўскага згубілася. А нядаўна цудоўным чынам была знойдзена яго надмагільная пліта. На пачатку 2000-х гаспадар у Чуднаве пракладаў газ у сваім двары і знайшоў абсалютна заржавелую з нечытэльнымі надпісамі 30-кілаграмовую пліту, якая проста 17 гадоў прастаяла ў яго ў падворку. А потым ён вырашыў зэканоміць на цэменце і ўмантаваў туды гэту пліту, умяшалася надвор'е, дажджом змыла гэту іржаўчыну з пліты, і юная дачка, прачытаўшы надпіс, пачала гугліць імя на пліце і атаясаміла гэта імя з іменем славутага польска-беларускага пісьменніка. На пліце надпіс па-польску: «Ян Баршчэўскі, які любіў Бога, прыроду і людзей. Пісьменнік натхнення і пачуцця. Жыў годна 70 гадоў». Вось гэта найлепшая творчая характарыстыка пісьменніка, хоць я дадаў бы сюды - любоў да Беларусі - галоўнай гераіні яго фантастычных апавяданняў.

❤️ Натхняемся беларускімі цудамі, легендамі і міфамі, памятаем сваё, глядзім новае відэа Андрэя Хадановіча, ставім падабайкі, каментуем і дзелімся з сябрамі і сяброўкамі:
👉 https://youtu.be/fZc2mB_2JZA

«Жыві з ім y дружбе, калі хочаш быць багаты, бо калі ўгнявіш, дык ён можа спаліць табе хату і ўсё тваё дабро» 🔥

🐉 Хто з нас не цікавіўся паходжаннем цмока?

Трымайце магічны рэцэпт ад Яна Баршчэўскага з галоўнай кнігі фэнтэзі ў гісторыі Беларусі - «Шляхціц Завальня, або Беларусь у фантастычных апавяданнях».

Хто ведае, можа Джордж Марцін прачытаў твор беларускага пісьменніка і натхніўся на напісанне свайго цыкла «Песня лёду і полымя»? 😀

Глядзім новы выпуск Андрэя Хадановіча пра Яна Баршчэўскага і яго геніяльную кнігу па спасылцы:
➡️ https://youtu.be/fZc2mB_2JZA

👌 Пашырайма сваю беларускасць. Лавіце крутую падборку беларускамоўных тэлеграм-каналаў, вартых вашай увагі:
#пашыраймасваё

@poshtabel — Беларусь на вінтажных паштоўках. Старыя здымкі нашых гарадоў ды мястэчак у рэтраспектыве, этнаграфія, цікавінкі з філакартыі.

@techleadby — новае мэдыя, якое публікуе навіны папулярнай навукі і тэхналёгій. Матэрыял падаецца простымі словамі на вельмі якаснай беларускай мове, бо аўтары — прафэсійныя журналісты.

@BelarusScience — інфармацыя пра ўсе значныя падзеі ў беларускім даследчым жыцці ў краіне і за мяжой з фокусам на сацыяльныя і гуманітарныя дысцыпліны. Даследаванні, навіны супольнасці і ўсё блізкае да гэтага тэмы.

@allabouttexnologys — навіны тэхналогій і гульнявога сьвету, цікавыя факты пра тэхніку на якаснай беларускай мове вы знойдзеце менавіта тут. Аўтар робіць новыя допісы кожны дзень!

@belarusium — старыя беларускія фота, мапы і іншыя цікавосткі, звязаныя з нашай Радзімай – Беларуссю.