(English Below)
គាំទ្រតម្រូវការហេដ្ឋារចនាសម្ព័ន្ធរបស់កម្ពុជា

ដោយមានការគាំទ្រពីប្រទេសអូស្រ្តាលី កម្ពុជាបានដាក់ចេញនូវប្រកាសស្តី ការបោះផ្សាយលក់សញ្ញាបណ្ណហេដ្ឋារចនាសម្ព័ន្ធដែលជាជំហានដ៏សំខាន់មួយ ក្នុងការផ្តល់មូលនិធិសម្រាប់ហេដ្ឋារចនាសម្ព័ន្ធសំខាន់ៗ ដូចជាផ្លូវថ្នល់ ស្ពាន និងគម្រោងហេដ្ឋារចនាសម្ព័ន្ធផ្សេងៗទៀតទូទាំងប្រទេស។

នេះគឺជាផ្នែកមួយនៃកិច្ចខិតខំប្រឹងប្រែងរបស់កម្ពុជាក្នុងការប្រមូលថវិការ ៣៦ ពាន់លានដុល្លារ ដើម្បីអនុវត្តនូវផែនការមេគ្រប់ជ្រុងជ្រោយស្ដីពីហេដ្ឋារចនាសម្ព័ន្ធជាតិកម្ពុជា ២០៣៣ ដើម្បីជម្រុញកំណើនសេដ្ឋកិច្ចប្រកបដោយបរិយាបន្នបន្ថែមទៀត។

តាមរយៈកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) អូស្ត្រាលីបានចាប់ដៃគូជាមួយនិយ័តករមូលបត្រកម្ពុជា (SERC) ដើម្បីបង្កើតនូវបទប្បញ្ញត្តិថ្មីមួយ បង្កើតកាលានុវត្តភាពថ្មី សម្រាប់ក្រុមហ៊ុនក្នុងការបង្កើនដើមទុនរយៈពេលវែង និងសម្រាប់វិនិយោគិនដើម្បីគាំទ្រដល់ការអភិវឌ្ឍជាតិ។

សូមអាន : https://cambodia.embassy.gov.au/files/PENH/20250722-AustralianEmbassy-joint-media-release-Infrastructure-Bond-Prakas-Launch-FINAL.Khmer%20(002).pdf

អូស្ត្រាលីជាដៃគូដែលមានការប្តេជ្ញាចិត្ត និងយូរអង្វែង នៅអនុតំបន់មេគង្គ។

កាលពីសប្តាហ៍មុន លោកឯកអគ្គរដ្ឋទូត យីប បានចូលរួមក្នុងវេទិកាមេគង្គឆ្នាំ២០២៥ ដែលមានក្រសួងផែនការរបស់កម្ពុជាជាម្ចាស់ផ្ទះ និងវិទ្យាស្ថានមេគង្គជាអ្នករៀបចំ។ វេទិកានេះមានការចូលរួមពីមន្ត្រីជាន់ខ្ពស់ប្រមាណ២៥០នាក់ មកពីទូទាំងតំបន់ នៅតាមបណ្តាស្ថាប័ននានា ដូចជា រដ្ឋាភិបាល ពាណិជ្ជកម្ម ការអភិវឌ្ឍន៍ បណ្ឌិត្យសភា និងសង្គមស៊ីវិល។ វេទិកាដែលធ្វើឡើងរាល់ឆ្នាំនេះ ផ្តល់ជាវេទិកាសំខាន់សម្រាប់កិច្ចសន្ទនាក្នុងតំបន់អំពីបញ្ហាប្រឈមរួមនៃការអភិវឌ្ឍន៍។

ការពិភាក្សាក្នុងឆ្នាំនេះ ផ្តោតលើការជម្រុញសេដ្ឋកិច្ចជីវចក្រា ជម្រុញការច្នៃប្រឌិតផ្នែកសុខាភិបាល និងបង្ហាញពីសក្តានុពលរបស់ឧស្សាហកម្មច្នៃប្រឌិត ដែលសុទ្ធតែជាវិស័យដែលមានសារៈសំខាន់ចំពោះកំណើនប្រកបដោយចីរភាព និងបរិយាបន្ន។

តាមរយៈកម្មវិធីភាពជាដៃគូមេគង្គអូស្ត្រាលី ប្រទេសអូស្ត្រាលីកំពុងពង្រឹងកិច្ចសហប្រតិបត្តិការជាមួយបណ្តាប្រទេសតំបន់មេគង្គ ដើម្បីគាំទ្រតំបន់ដែលមានសន្តិភាព ស្ថិរភាព និងវិបុលភាព នាពេលនេះ និងទៅអនាគត។